‘Rana madhota’

1. Jehovha yeyedzide kharini gu khuye dzinvuta dzaye dzi na ni lisima gwaye?

DZINVUTA dza Jehovha dzi na ni lisima gwaye. Uye a dzi rengide khu novba wa Gyanana gyaye nyo hathege ngudzu ni gu hathide madhota gasi ma dzi khathaleya. (Mith. 20:28) Nungungulu o vbweta gu khuye madhota ma khathaleya gwadi dzinvuta dzaye. Na ma gu landra sileletelo sa Jesu, madhota ma gu phasa dzinvuta gu simama ni wupari nyo tiye ni Jehovha. — Isa. 32:1, 2.

2. Khu va mani ngudzu-ngudzu ava Jehovha a nga dzi emiseya gu va phasa? (Ezekiyeli 34:15, 16)

² Jehovha a ngu khathaleya dzinvuta dzaye dzatshavbo, ganiolu uye a dzi emisede gu phasa ngudzu-ngudzu dzile dzi tshanisekago. Khu gu thumisa madhota, uye a ngu phasa dzile dzi tshanisekago khu liphuvboni. (Leri Ezekiyeli 34:15, 16.) Ganiolu, Jehovha o vbweta gu khuye hi lomba giphaso ha gu gi vbweta. Uye kha vbweti basi gu khuye hi gombeya gwaye hi lomba giphaso, ganiolu o vbweta gambe gu khuye hi lomba giphaso hi gi vbwetago ga “vahavisi ni vahevbudzi.” — Efes. 4:11, 12.

3. Khu ginani hatshavbo hi nga wuyedwago khu gu ninga lisima thumo oyu madhota ma wu girago?

³ Ga ndrima yeyi, hi na wona edzi Jehovha a thumisago khidzo madhota gasi gu phasa vale wupari wawe naye wu nga vbola. Hi na gira isoso khu gu hlamula siwudziso sesi: Lini hi yedego gu lomba giphaso madhota? Khu ginani hi yedego gu gira isoso? Nigu ayo ma nga hi phasa kharini? Ambari ha gu ba hi si tshangani ni sigaradzo, mihlamulo nya siwudziso sesi yi na engedzeya gubonga gwathu avba nya malulamiselo ya Jehovha nya gu hi divaleye ni gu vbulugisa womi wathu.

LINI HI YEDEGO GU ‘RANA MADHOTA’?

4. Ha gu dziti kharini gu khethu Jakobe 5:14-16, 19, 20 a gu ganeya khu madwali ya liphuvboni? (Wona dzifotu.)

⁴ Mupizane Jakobe a di tshamuseya edzi Jehovha a thumisago khidzo madhota gasi gu hi phasa. Jakobe a di lova gu khuye: “Ina womo a dwalago vbakari gwanu? A na rane madhota nya libandla.” (Leri Jakobe 5:14-16, 19, 20.) Jakobe a gu ganeya khu muthu a yedego gu tshukwadzisa wupari waye ni Jehovha. Jakobe a gu embeya mudwali gasi gu rana madhota ya libandlani gasi gu mu phasa nasiri dhogodheya. Gu diga isoso, Jakobe a gu tshamuseya gu khuye muthu a dwalago khu liphuvboni a gu hawuluga tepo sighoho saye si divaledwago. Ga silo nyo khaguri, esi muthu a yedego gu gira gasi gu thuma madwali a gu nawo khu liphuvboni si ngu fana ni esi a yedego gu gira a gu ba a dwala khu nyamani. Ha gu ba hi dwala khu nyamani, hi ngu hongola hiya manana ni dhogodheya, hi mu embeya esi hi sipwago hi bwe hi landra sileletelo saye. Khu ndziya nyo fane, ha gu ba hi dwala khu liphuvboni, ha gu vbweta lidhota, hi li embeya edzi hi dzipwago khidzo hi bwe hi thumisa wusingalagadzi nya Bhibhiliya li hi ningago.

5. Hi nga dziti kharini gu khethu wupari wathu ni Jehovha wa gu pheya gu vbola?

⁵ Libhuku la Jakobe gipimo 5, la gu hi kutsa gu bhula ni madhota ha gu wona gu khethu hi ngu vbweta giphaso gasi gu tiyisa wupari wathu ni Jehovha. Ganiolu, si na ni lisima ngudzu gu lomba giphaso gyawe na hi si luzi wupari wathu ni Jehovha. Kha hi yeli gu dzi senga. Bhibhiliya ya gu hi gengedza gu khiyo hi yede gu dzi woneya gasi hi si pimisi gu khethu hi ngu tsakedwa khu Jehovha narigu ha gu dzi senga. (Jak. 1:22) Khiso si nga giregeya Makristo nyo khaguri ya Sardhesi, ganiolu Jesu a ma embede gu khuye kha ma nga ba ma tsakisa gambe Jehovha. (Gutu. 3:1, 2) Hi nga dziti kharini gu khethu hi na ni wupari nya wadi ni Jehovha? Mweyo nya ndziya khu gu tiyisega gu khethu hi ngu wona Jehovha khu ndziya yayimweyo hi nga ba hi mu wona khiyo tepo hi nga bhabhatiswa. (Gutu. 2:4, 5) Hi nga dzi wudzisa gu khethu: ‘Ina nyi nga gu gola gu leri Bhibhiliya ni gu dundrugeya khiyo nga gale? Ina kha nyi ningeyi mihlamulo mitshanganoni yatshavbo? Ina nyi mwalo gambe sighingi thumoni nyo tshumayele? Ina nyi ngu khaleya gu pimisa ngudzu khu dzitsapawu guvbindra gale?’ Abari gu u di hlamula gu khuwe ina ga gimwegyo nya siwudziso sesi, so thula gu khiso wupari wago ni Jehovha wu vbode. Nigu adzina saye gigaradzo gyogyo gi na engedzeya wa gu mba gira gilogyo. Ha gu mba si kodza gu tiyisa wupari wathu ni Jehovha mwendro ha gu ba hi giride gilo nyo khaguri hi dzitigo gu khethu kha gi tsakise Jehovha, hi yede gu lomba giphaso madhota.

6. Ginani va yedego gu gira vale va giridego gighoho nya gikhongolo?

⁶ Sighoho nyo khaguri sikhongolo ngudzu nigu si nga gira muthu a duswa libandlani a gu mba dzi laya. Ha gu ba hi giride gighoho nyo khaguri, hi yede gu bhula ni limwedo nya madhota. (1 Kor. 5:11-13) Ni wevbini muthu a giridego gighoho nya gikhongolo a yede gu vbweta giphaso gasi gu wusedza wupari waye ni Jehovha. Jehovha a na divaleya sighoho sathu basi ha gu yeyedza gu khethu hi dzi layide khu lisine. (Mith. 26:20) Nigu mweyo nya dzindziya hi nga girago isoso, khu gu bhula ni lidhota ha gu ba hi giride gighoho nya gikhongolo.

7. Khu mani gambe a yedego gu lomba giphaso madhota?

⁷ Madhota kha ma phasi basi ava va nga gira gighoho nya gikhongolo, ganiolu ma ngu phasa gambe vale va nga vbola khu liphuvboni. (Mith. 20:35) Khu giyeyedzo, u nga thava gu padwa khu gudogoreya nya mba gwadi. Si nga gu garadzeya gu dwana ni gudogoreya nya mba gwadi abari gu na wu si khali Mukristo wu di gu thumisa sidahadaha, gu wona ponografiya mwendro u diri ni mavbanyelo nya mba handzega. U nga thavi gu lomba giphaso. U nga hatha gu bhula ni lidhota limwedo li na gu engiseyago gwadi, li gu ninga wusingalagadzi ni gu gu tiyisegisa gu khilo u nga simama gu tsakisa Jehovha wa gu potsa gu vbanya khu gudogoreya gwago nya mba gwadi. (Muh. 4:12) Adzina saye u vbede tshivba khu kotani nya gu dwani ni gudogoreya nya mba gwadi, ganiolu madhota ma nga gu dundrugisa gu khayo isoso so yeyedza gu khiso u ngu ninga lisima wupari wago ni Jehovha nigu u ngu potsa gu dzi tumba ngudzu. — 1 Kor. 10:12.

8. Ina hi yede gu ganeya ni madhota tepo hi girago ni gevbini gihoso? Tshamuseya.

⁸ Kha hi yeli gu bhula ni madhota khu satshavbo sihoso hi girago. Khu giyeyedzo, u nga ganeya gilo gi nga khunguvanyisago ndriyathu mwendro gu mba laphisa-monyo. Sa gu girega isoso, wulangani nya gu bhule ni lidhota, thumisa wusingalagadzi wa Jesu u bwe uya ganeya ni ndriyathu yoyo u mu lomba divalelo. (Mat. 5:23, 24) U nga gevesisa mahungu ma ganeyago khu gurula, gulaphisa-monyo ni gu dzi phara, gasi u kodza gu yeyedza makhalelo yaya nya yadi khu gu vbeleya mindru wa tshigu. Lisine gu wa gu wona gu khuwe kha wu si kodzi gu lulamisa gigaradzo gyago, u nga lomba giphaso lidhota nyo khaguri. Tepo Evhodhiya ni Sintiki va nga ba va si si kodzi gu lulamisa gigaradzo gyawe, Pawulo a di lomba ndriyathu nya mwama libandlani gasi gu va phasa. Nigu lidhota nyo khaguri libandlani gwago li nga gu phasa nilo. — Filp. 4:2, 3.

KHU GINANI HI YEDEGO GU LOMBA GIPHASO MADHOTA?

9. Khu ginani hi yedego gu mba dzumeleya dzitshoni dzi hi himbedzeya gu bhula ni madhota? (Mavingu 28:13)

⁹ Hi yede gu manega ni gukhodwa ni gu tiya-hwambo gasi gu lomba giphaso ha gu ba hi giride gighoho nya gikhongolo mwendro tepo hi wonago gu khethu kha hi si kodzi gu pala gudogoreya gwathu nya mba gwadi. Kha hi yeli gu dzumeleya dzitshoni dzi hi himbedzeya gu lomba giphaso madhota. Khu ginani hi ganeyago isoso? Kholu khu gu thumisa malulamiselo ya Jehovha, ethu ha gu yeyedza gu khethu hi ngu mu tumba nigu hi ngu tumba sileletelo saye si hi phasago gu simama ni gukhodwa nya gu tiye. Ethu hi ngu yeyedza gambe gu khethu hi ngu gi vbweta giphaso gyaye gasi gu simama gu gira esi nya sadi. (Ndzi. 94:18) Nigu ha gu ba hi giride gighoho, hi nga tiyisega gu khethu Jehovha a na hi divaleya ha gu bhuleya madhota esi hi nga gira ni gu ema gu gira esi nyo vivbe. — Leri Mavingu 28:13.

10. Ginani gi nga giregago ha gu zama gu siha sighoho sathu?

¹⁰ Tepo hi bhuleyago madhota gighoho hi giridego, Jehovha a gu hi divaleya nigu hi nga tiyisega gu khethu hi na wusedza wupari wathu naye. Ganiolu, ha gu mba ganeya ni madhota hi na dzi engedzeya sigaradzo. Tepo Pfhumu Dhavhidhe a nga zama gu siha sighoho saye, uye a di tshaniseka ngudzu khu liphuvboni ni nyamani. (Ndzi. 32:3-5) Gufana ni madwali nyo khaguri, gigaradzo gya liphuvboni gu tala nya dzitepo gyo engedzeya gya gu mba khathaledwa gwadi. Jehovha a ngu siti isoso, khu kharato uye a ngu hi kovhidhari gasi hi ‘lulamisa sigaradzo’ naye khu gu thumisa malulamiselo a nga ma gira. — Isa. 1:5, 6, 18.

11. Ha gu siha sighoho sathu nya sikhongolo, isoso si nga kuha kharini vambe?

¹¹ Ha gu zama gu siha sighoho sathu nya sikhongolo, isoso si nga kuha vambe. Hi nga gira gu li si manegi liphuvbo la Jehovha libandlani ni gu mba manega gurula vbakari ga vandriyathu. (Efes. 4:30) Khu kharato, ha gu tugula gu khethu ndriyathu nyo khaguri libandlani giride gighoho nya gikhongolo, hi yede gu mu kutsa gu ganeya ni madhota khu isoso.a Gu siha gighoho gya mumbe muthu isoso si nga hi gira hi manega ni nandru. (Levhi 5:1) Lihaladzo hi gu nalo khu Jehovha li yede gu hi kutsa gu vbwetedzeya madhota gasi gu ganeya lisine. Tepo hi girago isoso, hi na vhikeya vandriyathu libandlani ni gu phasa oyu a giridego gighoho gu manega gambe ni wupari nya wadi ni Jehovha.

MADHOTA MA NGA HI PHASA KHARINI?

12. Madhota ma gu phasa kharini muthu a vbodego khu liphuvboni?

¹² Bhibhiliya ya gu embeya madhota gasi gu phasa vale va vbwetago gu wusedza wupari wawe ni Jehovha. (1 Tes. 5:14) Wa gu ba u giride gighoho, madhota ma na gu gira siwudziso gasi ma pwisisa edzi u pimisago khidzo ni edzi u dzipwago khidzo. (Mav. 20:5) Adzina kha si gu vbevbugeyi gu bhula ni madhota. U ngapwa dzitshoni gu ganeya esi si nga girega, ganiolu u nga ma phasa wa gu ma embeya gigaradzo u emisanago nagyo. U nga garadzegi khu gu khuwe u na ganeya gilo nya mba gyadi. (Joba 6:3) Madhota kha ma na nga dzegeya gu lamula esi u ganeyago, wulangani nya isoso ma na gu engiseya gwadi gasi mati satshavbo si pategago na ma si gu ningi wusingalagadzi nya Bhibhiliya. (Mav. 18:13) Madhota ma ngu dziti gu khayo si ngu dzega tepo gasi gu ninga giphaso gi vbwetegago muthu nyo khaguri. Khu kharato, ayo ma ngu dziti gu khayo muthu yoyo a na vbweta gu bhula dzitepo nya dzingi nayo gasi gu mana giphaso a gi vbwetago.

13. Madhota ma nga hi phasa kharini khu milombelo yawe ni wusingalagadzi nya Bhibhiliya? (Wona dzifotu.)

¹³ Madhota kha ma vbweti gu gu vbedza tshivba khu kotani nya esi u nga gira. Wulangani nya isoso, ayo ma na gu gombeleya. Jehovha a na engiseya milombelo yawe yi gu na ni “tshivba.” U na dzipwa na wuri ni tshivba ni gu thaveledwa khu ndziya u nga mba yi dundrugeya. Tepo muthu a lombago giphaso madhota, ayo ma na mu phasa khu gu “mu todza mafura khu lina la Jehovha.” (Jak. 5:14-16) “Mafura” yoyo ma gu thula lisine nya Lito la Nungungulu. Khu kharato, madhota ma na bhula nago khu mavhesi nyo khaguri nya Bhibhiliya ma na gu thaveleyago ni gu gu phasa gu wusedza wupari wago ni Jehovha. (Isa. 57:18) Wusingalagadzi nya Bhibhiliya wu nga gu ninga tshivba u yi vbwetago gasi gu simama gu gira esi nya sadi. Madhota ma nga gu phasa gupwa Jehovha na gu embeya gu khuye: “Eyi khiyo ndzila; gimbilani khiyo.” — Isa. 30:21.

14. Guya khu Vagalatiya 6:1, madhota ma nga phasa kharini vale va ‘ndreyago ndziyani?’ (Wona dzifotu.)

¹⁴ Leri Vagalatiya 6:1. Tepo Mukristo a ‘ndreyago ndziyani’ kha giri esi Jehovha a vbwetago gu khuye a gira. Adzina saye a hungide makungo nya mba yadi mwendro a giride gighoho nya gikhongolo. Khu kotani nya olu madhota ma haladzago vandriyawe ayo ma ngu ‘zama gu kawuka muthu yoyo khu wuwadi.’ Lito nya Gigreki li nga vbindrugedzedwa gupwani gu “kawuka” li ngu thumiswa gambe gasi tshamuseya dhogodheya a zamago gu vegedza gwadi girambo gi nga fanyega gasi gi khalega gwadi. Gu fana ni dhogodheya a girago satshavbo gasi gu vegedza girambo gi nga fanyega nya mba gira muthu yoyo apwa gu vbisa, madhota anayo ma gu hawulugisa muthu a dwalago khu liphuvboni khu ndziya nya yadi. Bhibhiliya gambe ya gu embeya madhota gasi ma ‘dzi woneya gasi ma si lingwi.’ Tepo madhota ma hi phasago gu wusedza wupari wathu ni Jehovha, ayo ma ngu dundruga gu khayo kha ma vbeleya nigu ma nga tshuka ma gira silo nya mba sadi. Khu kharato, ayo ma ngu dzi woneleya gasi ma si pimisi gu khayo ma lulamide ngudzu, vbavbandze nya isoso, ayo ma ngu dzi nogisa ni gu yeyedza gupheya-wusiwana. — 1 Ped. 3:8.

15. Ginani hi yedego gu gira ha gu emisana ni gigaradzo?

¹⁵ Hi nga tumba madhota ya libandlani gwathu. Jehovha a ma hevbudzide gu vegedza misihalo ya vambe. Vbavbandze nya isoso, ma hevbude gambe gu ninga wusingalagadzi nya Bhibhiliya na siri gu ganeya mawonelo yawe, nigu ma hevbude gambe gu khayo ma yede gu simama gu hi phasa gu emisana ni sigaradzo sathu. (Mav. 11:13; Gal. 6:2) Madhota ma mwalo makhalelo nyo fane, nigu mambe ma ngu gira thumo wowo khu myaga nya yingi, ganiolu ethu hi nga bhula ni levbini lidhota ha gu ba hi emisana ni gigaradzo nyo khaguri. Si na ni lisima gu hi si zame gu lomba wusingalagadzi ga madhota nyo hambane-hambane kala limwedo nya ayo li hi embeya esi hi si vbwetago gu sipwa. Ha gu gira isoso, hi na fana ni vale va vbwetago gu ‘nyagaledzedwa dzindzeve’ na siri gupwa “sihevbudzo nya sadi” nya Lito la Nungungulu. (2 Thim. 4:3) Tepo hi ganeyago ni lidhota nyo khaguri khu gigaradzo hi emisanago nagyo, ilo li nga li wudzisa gu khilo hi dinga ganeya ni mambe madhota khu mahungu yaya nigu wusingalagadzi muni ma nga hi ninga. Nigu khu kotani nya olu li gu na ni wugengeyi, ilo li nga pheya khu gu lomba wusingalagadzi mambe madhota. — Mav. 13:10.

ESI MOYO NI MOYO WATHU A YEDEGO GU GIRA

16. I thumo muni moyo ni moyo wathu a gu nawo?

¹⁶ Ambari olu madhota ma hi ningago wusingalagadzi nigu ma hi phasago ha gu emisana ni sigaradzo, ayo kha ma hi hungeyi makungo. Moyo ni moyo wathu, a yede gu yeyedza Jehovha khu maganelelo ni mithumo yaye nya litshigu ni litshigu gu khuye a ngu mu haladza ni gu vbweta gu mu tsakisa. Khu gu phaswa khuye, hi nga si kodza gu emisana ni sigaradzo ni gu simama na hi tumbegide. (Rom. 14:12) Khiso si girago madhota ma si hi hungeyi makungo, vbavbandze nya isoso, ayo ma ngu thumisa Bhibhiliya gasi gu hi phasa gu pwisisa edzi Jehovha a ma wonago khidzo mahungu nyo khaguri, khavbovbo ma hi diga hi dzi hungeya makungo. Nigu tepo hi thumisago wusingalagadzi wawe wu seketedwago khu Bhibhiliya, hi nga si kodza gu trenari ‘makodzelo yathu nyo pimise’ gasi hi si kodza gu hunga makungo nya yadi. — Hebh. 5:14.

17. Ginani hi yedego gu dzi emiseya gu gira?

¹⁷ Lithomo nya likhongolo gu khala dzinvuta dza Jehovha! Uye a hi rumede “muhavisi nya wadi”, Jesu, gasi a ta livba dzegiso wu girago si kodzega gu hi manega ni lithomo nya vbanye kala gupindruga. (Joh. 10:11) Nigu khu kotani nya madhota nya libandla nya Wukristo, Jehovha tadziside gitumbiso gegi: “Nyi na mi ningani vathangeli nyi pwanago navo, avo va na mi thangela khu guti ni wugengeli.” (Jer. 3:15) Khu kharato, tepo hi wonago gu khethu hi na ni gigaradzo nyo khaguri khu liphuvboni, kha yeli gu gira mihuni gu lomba giphaso madhota. Hongoleni hi dzi emiseya gu londrowa gwadi malulamiselo aya Jehovha a nga ma gira nya gu hi ninge madhota ya libandlani.