GIPANDRE NYA WU 2

Tumbega ga oyu u dzeganego naye

“Esi Nungungulu a si patidego avba nya kanga moyo, si nga hambaniswi khu muthu.”—Marku 10:9,NM.

Jehovha o vbweta gu khuye hi “gola gutumbega.” (Mikeya 6:8, NM) Isoso khya lisima ngudzu ngudzungudzu wugadzini, kholu kha si kodzegi gu tumba muthu wule a si yeyedzigo gutumbega. Gu tumbana gilo nya lisima ngudzu gasi lihaladzo li kodza gu dandra.

Muhuno, Sathane ni vaphasedzeyi vaye va ngu dhumeya gutumbega wugadzini. Gasi gu vhikeya wugadzi wago, u fanede gu dzi emiseya gu gira silo sivili.

1 VEGA WUGADZI WAGO WULANGANI NYA GUPHEYE

NGA WONA ESI BHIBLIYA YI SI GANEYAGO: “Mu nga vbanyi kha nga sipumbu, aholu kha nga vathu nya guti.” (Vaefeso 5:15, 16) Gu wona wugadzi wago kha nga gilo nya lisima womini gwago ga gu yeyedza guti. Khu kharato, uwo wo vbweta gu ningwa wulanga nya gupheye.

Jehovha o vbweta gu khuye u vega gupima gwago ga oyu u dzeganego naye, u ‘vbanya naye khu gutsaka.’ (Mutshumayeli [Mutshawuteli] 9:9) Uye a gu leleteya gu khuye gima u nga hunisi gu khathaleya oyu u dzeganego naye, ganiolu, enu mwa vavili mu fanede gu vbweta dzindziya nya gu mu tsakisana. (1 Vakorinto 10:24) Gira oyu u dzeganego naye a dzipwa na gu khathaledwa ni gu ningwa lisima.

Mwama a ningago tsaya mwangadzi waye; mwama a wuyago a ta mana mwangadzi waye na gu phula

GIRA KHARATI:

Tiyisega gu khuwe mu ngu tala gu khala mwatshavbo, u vega gupima gwago gwatshavbo ga oyu u dzeganego naye
Gupimisani gwago indra khuwe “ethu” na siri “eni”

Mwama ni ngadzi va gu vbedza tepo vatshavbo na va romo haganoni

2 SAYISA MONYO WAGO

NGA WONA ESI BHIBLIYA YI SI GANEYAGO: ‘Watshavbo oyu a khedzago nyamayi, khu gu mu dogoreya, bhayide naye monyoni gwaye.’ (Matewu 5:28) Muthu a khalago khu gu pimisa guhengeya malawu khu ndziya nya guvivbe, khu ndziya nya gu kari, kha yeyedzi gutumbega ga oyu a dzeganego naye.

Jehovha wari khuye u fanede gu “sayisa monyo wago.” (Mavingo 4:23; Jeremiya 17:9) Gasi gu kodza gu gira isoso, u fanede gu sayisa maho yago. (Matewu 5:29, 30) Landra giyeyedzo gya hungo nya ndranga Joba, a nga gira gidzumeledzwano ni maho yaye gasi a si khedzi mumbe nyamayi khu gu mu dogoreya. (Joba 31:1) Dzi emiseye gu mba tshuka u wona sifananiso nya vathu nya mba ambala gilo. Gambe dzi emiseye gu mba dogoreyana ni muthu a si rigo oyu u dzeganego naye.

Mwama a vegide foto ya mwangadzi waye avba nya meza nya thumo

GIRA KHARATI:

Gira vambe vathu va wona gu khavbo u tumbegide khu guvbeleya ga wule u dzeganego naye
Theya kota khu gu dzipwa ga oyu u dzeganego naye, u dzegeya gu piya wupari watshavbo wu na mu vbisisago monyo