Ndziya nya gu pale sigaradzo

Gikhati u pheyago gu vbanya noyu u dzeganego naye, si na manega sigaradzo nya guhambane-hambane. Si nga manega khu kotani nya guhambane gwanu nya mapimiselo, gudzipwa, nedzi mu si wonago khidzo silo nya guvbanye. Gudzina saye sigaradzo soso si ngata khu vbavbandze mwendro gu reswa khu sigiro sa sa viredwago.

Vathu va ngu tshuka va wegeleya gu mba khathaleya sigaradzo, ganiolu Bhibliya yi ngu hi kutsa gu bhudzisana khu sigaradzo sathu. (Matewu 5:23, 24) Khu gu thumisa matshina nya milayo nya Bhibliya, mu na mana lipindru nya ladi nya sigaradzo sanu.

1 BHUDZISANANI KHU SIGARADZO

NGA WONA ESI BHIBLIYA YI SI GANEYAGO: Gu “na ni . . . gikhati nya gu ganeye.” (Mutshumayeli 3:1, 7) Dzi ningeni gikhati nya gu eneye nya gu khale mu bhula khu gigaradzo mu gu nagyo. Tula monyo wago u bhuleya oyu u dzeganego naye khedzi u dzipwago khidzo ni esi u si pimisago khigyo. Tepo yatshavbo ‘ganeya lisine’ ni oyu u dzeganego naye. (Vaefeso 4:25) Ambari monyo wago wa gu ba na wu vbisa ngudzu, dzi phare gasi gu u si dwanisi. Gu hlamula khu ndziya nya gurule gu na phasa gu mabhulo nya madugwana ma si dandri ma khala litunga.​—Mavingo 15:4; 26:20.

Ambari wa gu ba na u ri ni mawonelo nya guhambane, yeyedza gurula, u dundruga gu yeyedza lihaladzo ni githawo ga oyu u dzeganego naye. (Vakolosi 4:6) Zamani gu bhudzisana khu gigaradzo mu gu nagyo khu guvbiredza; gima mu nga deguleyani.​—Vaefeso 4:26.

GIRA KHARATI:

• Vegani gikhati gi fanedego gasi gu mu bhudzisana khu gigaradzo mu gu nagyo

• Gya gu ba na giri gikhati gyago nya gu engiseye, dzi phare gasi u si piyi oyu a ganeyago. Gi na vboha gikhati gyago nya gu ganeye

2 ENGISEYA UBWE U PWISISA

NGA WONA ESI BHIBLIYA YI SI GANEYAGO: “Golanani khu lihaladzo nya wundruye, mu palisana khu gu ningana githawo.” (Varoma 12:10) Ndziya u engiseyago khiyo gilo nya lisima ngudzu. Zama gu pwisisa mawonelo ya oyu u dzeganego naye khu gu ‘hengeya monyo moyo [“gudzipwa,” NM], ni gu dzi sodzisa.’ (1 Pedro 3:8; Jakobe 1:19) U nga pfhadzi nga khatshi wa gu engiseya. Sa gu kodzega, diga esi u thumago u vega gupima gwago gwatshavbo ga oyu u dzeganego naye. Mwendro saye u nga lomba gu mu bhudzisana khu gigaradzo gyogyo khu gimbe gikhati. Wa gu wona oyu u dzeganego naye kha nga muphasedzeyi wago, na siri muganedzi, khu ‘na nga vbiredzeya gu zangari.’​—Mutshumayeli 7:9.

GIRA KHARATI:

• Engiseya nu tude mapimo, ambari na u si tsakiswi khesi u si pwago

• Zama gu pwisisa mahungu ma ganedwago. Khedza gambe esi khovbe yaye yi gu embeyago ni edzi lito laye li pwalago khidzo

3 KHEDZANI GU KHENU MU NGU GIRA KAMWE ESI MU SI HUNGIDEGO

NGA WONA ESI BHIBLIYA YI SI GANEYAGO: “Thumo watshavbo wu na ni bhindzu, ganiolu gu ganeya basi gu ngu resa wusiwana.” (Mavingo 14:23) Gu dzumeya lipindru nya ladi basi kha gu eneyi. Mu fanede gu khedza gu khenu mu ngu gira esi mu si hungidego khu wuvili wanu. Isoso si nga lomba gudzigaradza, ganiolu si na resa bhindzu. (Mavingo 10:4) Mwa gu thumisana khu gupwanana, mu na mana “tshatshazelo nya wadi” khu kotani nya gudzigaradze gwanu.​—Mutshumayeli 4:9.

GIRA KHARATI:

• Wona gu khuwe silo muni si phasago u na girago gasi gu pala gigaradzo mu gu nagyo

• Dzi ninge gikhati nya gu muta na mu gu khedza gu khenu silo si ngu gira tshukwana gani