Pfhumu nyo pheye Israyeli

Jehovha a di emiside valamuli gasi gu thangeya Vaisrayeli. Ganiolu, ga tepo yile va di gu vbweta pfhumu. Va di embeya Samuweli gu khavo: ‘Mayigo yatshavbo ma ni dzipfhumu. Anethu ho vbweta pfhumu.’ Samuweli a di si wona na si vivbide. Khu kharato, a di gombeya ga Jehovha. Khavbovbo, Jehovha a mu embeya esi: ‘Vathu khandri vo bomba uwe. Vo bomba eni. Va embeye gu khuwe va na yi mana pfhumu, ganiolu yi na vbweta nya singi gwawe.’ Ambari hwane nyo ba va embedwe isoso, vathu va di khavo: ‘Khandri gilo isoso. Ethu ho vbweta pfhumu basi!’

Jehovha a di embeya Samuweli gu khuye mwama nyo pwani khu Sawule a di hadzi khala pfhumu nyo pheye ya Israyeli. Tepo Sawule a nga hongola Rama a ya wuseya Samuweli, Samuweli a di emisa Sawule kha nga pfhumu khu gu mu theya mafura hungoni gwaye.

Khu hwane nya tepo, Samuweli a di rana Vaisrayeli gasi a ya va yeyedza pfhumu yawe yi nga ba yi emisidwe. Ganiolu, Sawule kha va nga ba va mu mana. U ngu dziti gu khuwe khu ginani? A di sihade omu nya sombo. Tepo va nga mu mana, va di mu dusa vbavbandze va mu emisa vbakari nya vathu. Sawule a di laphide guvbindra vatshavbo, nigu a di mburide ngudzu. Samuweli a di khuye: ‘Oyu a hathidwego khu Jehovha kha mu mu woni oyu, mu woneni.’ Tepo vathu va nga wona pfhumu yawe, va di tsaka ngudzu.

Gupheyani, Pfhumu Sawule a di gu engisa Samuweli a bwe a engisa Jehovha. Ganiolu, a di vbindrugedza. Khu giyeyedzo, Sawule a diri mwalo fanelo nya gu ningeya miphaso. Ganiolu, litshigu limwedo Samuweli a di embeya Sawule gu khuye a mu vireya kala a vboha. Ambari ulolo, Samuweli kha vbiredza gu vboha. Khu kharato, Sawule a di tshala a ningeya muphaso. Ginani egi Samuweli a nga gira? A di embeya Sawule khuye: ‘Kha wa mu engisa Jehovha.’ Ina Sawule hevbude gilogyo khu gihoso gyaye?

Khu hwane nya tepo, Sawule a di ya dwana ni Vaamaleki. Samuweli a di mu embeya gu khuye a di yede gu songa vatshavbo a si tshiyi ni moyo. Ganiolu, Sawule a di ya tshiya Pfhumu Agagi, a si mu songi. Jehovha a di embeya Samuweli gu khuye: ‘Sawule a nyi digide, kha nyi engisi.’ Samuweli a di goroga ngudzu, a embeya Sawule khuye: ‘Khu kotani nya olu u nga mba engisa Jehovha, uye a na hatha yimbe pfhumu.’ Tepo Samuweli a nga ba a dzuwuluga gasi gu hongola, Sawule a di mola libhadzi la Samuweli li pferuga. Samuweli khuye: ‘Gu fana ni libhadzi leli li nga pferuga, Jehovha gu dzegede wufumu.’ Jehovha a di hadzi dzega wufumu wowo a wu ningeya ga mumbe muthu, oyu a nga hadzi mu haladza a bwe a mu engisa.