Jehovha a yeyedza gu khuye Nungungulu nya lisine

Mufumoni wa Israyeli nya 10 mahundzu gu fumide dzipfhumu nyo vivbe. Ganiolu, Akabi a diri mweyo nya dzipfhumu nyo vivbe ngudzu. A di dzegana ni nyamayi nyo vivbe a nga ba a khozeya Bhahali. Lina laye gu diri Jezabheli. Vathu nya vangi va Israyeli va di gu khozeya Bhahali khu kotani ya Akabi ni Jezabheli. Akabi ni Jezabheli va di bwe va songeteya vaprofeti va Jehovha. Ginani a giridego Jehovha? A di ruma muprofeti Eliya a hongola ga Akabi a ya mu embeya mahungu nyo khaguri.

Eliya a di embeya Pfhumu Akabi khuye omu Israyeli kha yi na ngawa ndzadzi khu kotani nya wuvivbi waye. Litigo li di khala myaga miraru ni gu vbindra na li si bugi gilo. Vathu va di tshaniseka khu ndzala. Jehovha a di rumeya Eliya gambe a hongola ga Akabi. Pfhumu Akabi a di embeya Eliya khuye: ‘Khuwe u hi vangeyago sigaradzo! Satshavbo sesi nandru wago.’ Eliya a di mu hlamula khuye: ‘Khandreni nyi nga segeya ndzadzi. Khuwe u nga yi segeya khu gu khozeya Bhahali. Hi na gira silo nyo khaguri gasi hiti gu khethu khu mani Nungungulu nya lisine. Tshanganisa vathu ni vaprofeti va Bhahali Gigomoni gya Karmeli.’

Vatshavbo va di ya tshangana gigomoni. Eliya khuye: ‘Dundrugeyani gwadi khesi mu vbwetago gu gira. Abari gu Jehovha khuye Nungungulu nya lisine, mu landreyeni. Abari gu khu Bhahali, mu landreyeni. Hi na gira kharati: Vaprofeti va Bhahali nya 450 avo va na dongiseye ningelo gasi va ninga nungungulu wawe, va vbedza va mu rana. Aneni nyi na dongiseya Nungungulu wangu Jehovha nyi mu rana. Oyu a na hlamulago khu gu rumeya nilo, khuye Nungungulu nya lisine.’ Vathu va di dzumeya gu gira isoso.

Vaprofeti va Bhahali va di dongiseya ningelo wawe. Va di rana nungungulu wawe gukhugeya ni dzimindru kala ni siyambo, khavo: ‘O Bhahali, hi hlamule!’ Olu Bhahali a nga ba a si hlamuli, Eliya a di va hega, khuye: ‘Kwangulugani ngudzu sa. Adzina a di lala, o vbweta gu wuswa!’ Li di pfola lidambo vaprofeti va Bhahali na va ngo rana. Ganiolu, a di si va hlamuli.

Eliya a di dzega ningelo waye a wu vega vbatshani nya altari, a wu thedzeya mati. Khavbovbo, a gombeya khuye: ‘O Jehovha, nyi ngu gu lomba. Yeyedza vathu vava gu khuwe uwe khuwe Nungungulu nya lisine.’ Nya mba hweya, Jehovha a di rumeya nilo khu ndzadzini wuta vbisa ningelo watshavbo. Vathu va kwanguluga khavo: ‘Jehovha khuye Nungungulu nya lisine!’ Eliya khuye: ‘Songani vaprofeti vatshavbo va Bhahali. Mu nga va digi va tutuma!’ Khu litshigu lolo, gu songidwe 450 vaprofeti va Bhahali.

Tepo gu nga wonega lipfhiyana nya lidugwana linene, Eliya a di embeya Akabi khuye: ‘Gu nguta gingulu nya gikhongolo. Dzega kareta yago, u hongola gaya.’ Ndzadzini gu di pheya gu sivbala khu mapfhi, gu veta phuvbo, yi pheya guwa ndzadzi. Akabi a di tutumisa kareta yaye edzi a nga dzi kodza khidzo. Khu gu phaswa khu Jehovha, Eliya a di tutuma ngudzu a tshiya ni kareta! Si di gu thula gu khiso sigaradzo satshavbo sa Eliya si di vbede? Hongoleni hi si wonani.