Jehovha a tiyisa Eliya

Tepo Jezabheli a ngapwa esi va nga girwa vaprofeti va Bhahali, a di goroga ngudzu. A di rumeya mahungu ma hongola ga Eliya, khuye: ‘Mindru, anuwe u nafa kha nga vaprofeti va Bhahali.’ Eliya a di thava ngudzu a tutuma a hongola giwulani. A di gombeya, khuye: ‘Jehovha, nyi garade. Kha nyi ngo vbweta gilo. Tshukwana nyifa basi.’ Eliya a di vbedza a lala vbavbatshi nya simbo, khu gu garala.

Gu dita ngilozi yi ta mu wusa, khiyo: ‘Wuga, u hodza.’ Tepo a nga wuga, a di wona pawu vbatshani nya siwindri nyo vbise ni jaru nya mati. A di hodza, a seya a bwe a lala gambe. Ngilozi yi dita mu wusa gambe, khiyo: ‘Hodza, u kodza gu mana tshivba nya gu gimbiye.’ Khavbovbo, Eliya a di wuga a hodza gambe, a vbedza a gimbiya 40 matshigu, wutshigu ni mihani, kala a vboha Gigomoni gya Horebhi. Tepo a nga vboha, a di beya omu nya phago nya giwidri nya gikhongolo gasi a lala. Ganiolu, Jehovha a di mu wudzisa, khuye: ‘Eliya, ginani u thumago avba?’ Eliya a di khuye: ‘Vaisrayeli va digide gu gira esi va nga tumbisa. Va khungumude dzialtari dzago va bwe va songeteya vaprofeti vago. Olu vo vbweta gu nyi songa neni.’

Jehovha a di mu embeya khuye: ‘Gimbiya u ya ema gigomoni.’ Gupheya, gu di veta phuvbo nya yikhongolo yi vbindra khavba a nga ba a emide avbo. Khu gulandreya, mafu ma di hana-hana, gu khondra nilo. Khu guhegisa, Eliya a dipwa lito na li pwaleya vbavbatshi. Eliya a di sega dzindzeve khu libhadzi a ema vbavbandze nya phago. Jehovha a di mu wudzisa khuye, khu ginani u nga khuga u tutuma? Eliya a di khuye: ‘Nyi di tshala nyonga.’ Ganiolu, Jehovha a di mu embeya gu khuye: ‘Khandruwe wenga. Gu na ni 7000 nya Vaisrayeli va ngo nyi khozeyago. Gimbiya u ya emisa Elizewu kha nga muprofeti gasi a gu tshikedza.’ Eliya a di dzegeya gu hongola a ya gira esi a nga embedwa khu Jehovha. Wo si wona kharini, ina Jehovha kha na nga gu phasa wo gira esi a si vbwetago gu khuye u gira? Ina, a na gu phasa. Hongoleni hi wonani silo nyo khaguri si nga girega tepo yi nga ba yi siwi ndzadzi.