Joyadha yeyedzide gutiya-hwambo

Jezabheli a diri ni gyanana nyo pwani khu Ataliya, oyu nuye a nga ba ari ni mavbanyelo nyo vivbe nga mamayi waye. Ataliya a diri ngadza pfhumu ya Judha. Tepo mwama waye a ngafa, gyanana gyaye gi pheya gu fuma. Ganiolu, tepo gyanana gyaye gi ngafa, Ataliya a di dzi gira pfhumu a pheya gu fumeya litigo la Judha. A di zama gu songa vatshavbo va nga ba va dugeya ga lihundzu nya wufumu, khu gu songa vatshavbo va nga hadzi tshuka va mu dzegeya wufumu, gupata ni vatugulu vaye. Vatshavbo va di gu mu thava.

Mupristi nya Khongolo Joyadha ni mwangadzi waye Jeyosabhati, va di gu dziti gu khavo esi a nga ba a giredzeya Ataliya si di vivbide ngudzu. Va di vega womi wawe mhangoni, va siha Jowasi — moyo nya vatugulu va Ataliya. Va di ya mu dandriseya tempeleni.

Tepo Jowasi a nga ba ari ni 7 myaga, Joyadha a di tshanganisa vathangeyi vatshavbo ni valevhi a va embeya khuye: ‘Emani vbamyanyatunu nya tempele, mu nga mu digi a beya.’ Joyadha a di emisa Jowasi kha nga pfhumu a bwe a mu ambagisa gihugu nya wufumu. Vathu va Judha va di huweleya khavo: ‘Pfhumu yi na vbanye khu matshigu nya mangi!’

Pfhumugadzi Ataliya, a dipwa ligwaha nya vathu a dzegeya gu hongola tempeleni khu gu tutuma. Tepo a nga wona gu khuye yi emisidwe pfhumu nya yiphya, a di pheya gu ganeya khu lito nyo khugege, khuye: ‘Mo nyi wugeya! Mo nyi wugeya!’ Vathangeyi va di mola Ataliya, va mu dusa vbavbandze va ya mu songa. Ganiolu, ahati kutsedzelo nyo vivbe a nga ba a wu yade tigoni?

Joyadha a di phasa vathu gu khuye va gira pwanano ni Jehovha, va mu tumbisa gu khavo va na khozeya uye enga. Joyadha a di embeya vathu gu khuye va khungumula tempele ya Bhahali va bwe va tshungunuleya sifananiso hiso bhi. A di emisa vapristi ni Valevhi gu thuma tempeleni gasi gu vathu va kodza gu khozeya umo. A di hatha vathu nyo khaguri gasi va woneleya myanya nya tempele gasi gu si beyi vathu nya mba handzega. Khu gulandreya, Joyadha ni vathangeyi va di dzega Jowasi va hongola naye nyumbani nya wufumu va ya mu khadzisa avbo nya kadera nya wufumu. Vathu va Judha va di tsaka ngudzu. Kholu va di tshulegide gu khozeya Jehovha, na va si kutsedzedwi khu pfhumugadzi Ataliya gu khozeya Bhahali. U wonide edzi vathu va phasegidego khidzo kholu Joyadha a yeyedzidego gutiya-hwambo?