Khu ginani u yedego guthava Jehovha?

1-2. Guya khu Ndzimo 25:14 ginani hi yedego gu gira abari gu ha gu vbweta gu manega ni wupari nyo tiye ni Jehovha?

MAKHALELO muni ma vbwetegago abari wo vbweta gu manega ni wupari nyo tiye ni muthu nyo khaguri? Adzina u nga hlamula gu khuwe dzipari nya dzadi dzi yede gu yeyedzana lihaladzo ni gu seketeyana khu gyawe. Uwe adzina kha wu na nga pimisa gu khuwe guthava likhalelo nya lisima li vbwetegago gasi gu manega ni wupari nya wadi. Ambari ulolo kha nga wu ganeyago lowo wu seketeyago ndrima yeyi, vale va vbwetago gu manega ni wupari nyo tiye ni Jehovha va yede gu mu “thava.”— Leri Ndzimo 25:14.

² Gani ho thumeya Jehovha khu tepo nyo laphe mwendro ne hatshavbo hi yede gu simama gu mu yeyedza githawo. Ganiolu, so thula ginani gu thava Nungungulu? Hi nga hevbuleya kharini gu thava Jehovha? Ni gu ginani hi nga hevbulago khu giyeyedzo gya Obhadhiya, Muphasi nya Khongolo nya Mhamba Joyadha, ni Pfhumu Jowasi maningano khu gu thava Nungungulu?

SO THULA GINANI GU THAVA NUNGUNGULU?

3. Tshamuseya edzi hwanga wu hi vhikeyago khidzo.

³ Ethu adzina hi nga thava ha gu dziti gu khethu hi na tshangana ni mhango nyo khaguri. Guthava nya nga ogu, gu nga hi phasa gu hunga makungu nya yadi. Hwanga nyo thege wu nga hi phasa gu mba gimbileya vbafuvbi ni liphala nyo khaguri. Guthava nyo dzi bayise, gu na hi gira hi gimbileya hwindzo ni dzimhango. Hwanga nyo vege mhangoni wupari wathu ni muthu nyo khaguri wu na hi phasa gu mba ganeya mwendro gu gira gilo gi na mu khunguvanyisago.

4. Sathane o vbweta gu khuye vathu va manega ni hwanga muni?

⁴ Sathane o vbweta gu khuye vathu va manega ni hwanga nyo vbindre pimo khu Jehovha. A gu vbweta gu khuye hi khodwa gu khethu Jehovha tepo yatshavbo a zangaride, o vbweta gu hi tsayisa ni gu gima kha hi na nga si kodza gu mu tsakisa. (Joba 4:18, 19) Nigu o vbweta gu khuye hi thava ngudzu Jehovha nyo bwe hi ema gu mu thumeya. Ganiolu, ethu kha hi yeli gu thava Jehovha, wulangani nya isoso ethu hi yede gu hevbuleya gu mu ninga githawo hi bwe hi thava gu mu gorosa.

5. So thula ginani gu thava Nungungulu?

⁵ Muthu a ningago githawo Nungungulu a ngu mu haladza ni gu kha na nga vbweta gu gira gilo gi vegago mhangoni wupari waye naye. Jesu yeyedzide gu khuye a di gu “thava Nungungulu.” (Hebh. 5:7) Ganiolu, kha nga ba a thava Jehovha guvbindra pimo. (Isa. 11:2, 3) Wulangani nya isoso uye a di gu mu haladza ngudzu ni gu vbweta gu mu engisa. (Joh. 14:21, 31) Gufana ni Jesu ethu ha gu yeyedza githawo Jehovha kholu uye lihaladzo, a na ni guti, lulamide ni gu a na ni tshivba. Hi ngu dziti gambe gu khethu Jehovha a ngu hi haladza ngudzu ni gu a ngu kuhwa khedzi hi hakhago khidzo sileletelo saye. Ha gu mba engisa Jehovha hi na mu khunguvanyisa, ganiolu ha gu mu engisa a na tsaka khethu. — Ndzi. 78:41; Mav. 27:11.

HI NGA HEVBULEYA GU THAVA NUNGUNGULU

6. Khu yevbini mweyo nya dzindziya hi nga yi thumisago gasi gu hevbuleya gu thava Nungungulu? (Ndzi. 34:11)

⁶ Ethu kha ha velegwa na hi gu thava Jehovha, khu kharato hi yede gu haguleya guthava gogo. (Leri Ndzimo 34:11.) Mweyo nya dzindziya hi nga girago khidzo isoso khu gu hevbula khu sivangwa saye. Tepo hi tugulago gu khethu sivangwa sa Jehovha so yeyedza guti gwaye, tshivba ni lihaladzo a gu nalo khethu isoso so hi gira hi engedzeya gu mu ninga githawo ni gu mu haladza. (Rom. 1:20) Ndriyathu moyo nya nyamayi nyo pwani khu Adrienne wari khuye: “Guti ga Jehovha nyi gu wonago avbo nya sivangwa saye gu ngu nyi hlamadzisa nigu, gu ngu nyi phasa gu tugula gu kheni uye a ngu siti esi si gu sadi gwangu. Khu kotani nya olu uye a dundrugeyago khu silo sesi tepo yatshavbo uye wari khuye: “Eni kha nyi vbweti gu gira ni gevbini gilo gi na vegago mhangoni wupari wangu ni Jehovha oyu a nyi ningidego womi.” Dzi vegeye tepo semana yeyi gasi gu dundrugeya khu gilo nyo khaguri egi Jehovha a gi vangidego. Wa gu gira isoso u na engedzeya githawo ni lihaladzo u gu nalo khu Jehovha.— Ndzi. 111:2, 3.

7. Gu gombeya gu nga hi phasa kharini gu haguleya gu thava nya gwadi khu Jehovha?

⁷ Yimbe ndziya hi nga yi thumisago gasi gu engedzeya guthava gwathu khu Nungungulu, khu gu gombeya tepo yatshavbo. Hi na muti gwadi Jehovha ha gu gombeya gwaye tepo yatshavbo. Tepo yatshavbo hi lombago Jehovha gasi a hi ninga tshivba nya gutimiseye ethu ha gu dundrugeya khu tshivba a gu nayo. Tepo hi bongago Jehovha khu gu bani a hi ningide gyanana gyaye, ethu ha gu dundrugeya khu lihaladzo nya likhongolo a gu nalo khethu. Ni gu tepo hi lombago Jehovha gasi a hi phasa ha gu emisana ni sigaradzo nyo khaguri isoso so hi dundrugisa gu khiso uye a na ni guti nya gungi. Gu gombeya khu monyo wathu si na hi phasa gu engedzeya gu ninga githawo Jehovha. Ni gu gu na hi phasa gu potsa ni gevbini gilo gi na vegago mhangoni wupari wathu naye.

8. Ginani hi yedego gu gira gasi hi simama gu thava Nungungulu?

⁸ Ethu hi nga simama gu thava Nungungulu khu gu hi manega ni misuwo nya gu hevbule Bhibhiliya, hi hevbula khu siyeyedzo nya sadi ni esi nya mba sadi si gomogo omu nya Bhibhiliya. Hongoleni hi bhula khu sithumi sivili nyo tumbege sa Jehovha, a gu Obhadhiya ni Muphasi nya khongolo nya mhamba Joyadha. Khu gu landreya hi bhula khesi hi nga si hevbulago khu Jowasi pfhumu ya Judha, oyu a phedego khu gu gira silo nya sadi khu gu hegisa a ema gu thumeya Jehovha.

TIYA HWAMBO GUFANA NI OBHADHIYA

9. Guthava ogu Obhadhiya a nga ba ari nago khu Jehovha gu mu phaside kharini? (1 Dzipfhumu 18:3, 12)

⁹ Bhibhiliya ya gu khumbuga Obhadhiyab khu tepo nyo pheye gu khiyo uye a di gu “ninga githawo pfhumu Nungungulu.” (Leri 1 Dzipfhumu 18:3, 12.) Guthava nya gwadi a nga ba ari nago Obhadhiya gu mu phaside kharini? Gu mu phaside kholu a khade muthu nyo tumbege nigu khu kotani nya isoso pfhumu yi mu ningide thumo nya gu thangeye ndranga yaye. (Nehemiya 7:2) Guthava ogu Obhadhiya a nga ba ari nago khu Nungungulu gu mu phaside gambe gu tiya hwambo a gu likhalelo a nga ba a li vbweta ngudzu. Uye a vbanyide ndrani nya mufumu wa pfhumu Akabhi a nga ba a vivbedwe khu monyo, oyu a giridego ugo gu “vivbidego mbeli ga pfhumu Nungungulu gu vbindra dzipfhumu dzi phedego khidzo gu fuma.” (1 Dzipf. 16:30) Ni gu gambe Jezebheli mwangadzi wa Akabhi oyu a nga ba a khozeya Bhahali, a di gu nyenya ngudzu Jehovha nyo bwe a zama gu fuvisa wukhozeyi nya lisine Israyeli. Uye gambe songide vaprofeti nya vangi va Nungungulu. (1 Dzipf. 18:4) Khu lisine Obhadhiya a di gu khozeya Jehovha ga tepo nyo garadze ngudzu.

10. Obhadhiya yeyedzide kharini gu tiya hwambo?

¹⁰ Obhadhiya yeyedzide kharini gu tiya hwambo tepo Jezebheli a nga ba a vbwetedzeya vaprofeti va Nungungulu gasi gu va songa? Obhadhiya a di dzega 100 nya avo a va siha “khu mitsawa nya livbandre magumi a va siha mavbalani a va vbanyisa khu pawu ni mati nyo seye.” (1 Dzipf. 18:13, 14) Nari khatsi Jezebheli a di tugude esi Obhadhiya a giridego na mu songide. Khu lisine Obhadhiya a di gu thava ni gu kha nga ba a vbweta gufa. Ganiolu, Obhadhiya a di gu haladza ngudzu Jehovha ni vale va nga ba va Mu thumeya, guvbindra womi waye.

11. Sithumi sa Jehovha muhuno sa gu pimedzeya kharini Obhadhiya? (Wona fotu.)

¹¹ Muhuno sithumi nya singi sa Jehovha so vbanya ga mayigo thumo wathu wu himbedzedwago. Gufana ni Obhadhiya, vandriyathu vovo kha va dzumeyi gu ema gu khozeya Jehovha, ganiolu avo va ngu simama gu ninga githawo wufumu. (Mat. 22:21) Avo vo yeyedza githawo Nungungulu khu gu mu engisa wulangani nyo engise vathu. (Mith. 5:29) Avo vo gira isoso khu gu simama gu tshumayela mahungu nya yadi ni gu beya mitshangano khu gisihaledza. (Mat. 10:16, 28) Avo vo zama gu wona gu khavo vandriyawe va nani guhodza ga liphuvboni gasi va si kodza gu manega ni wupari nyo tiye ni Jehovha. Wona giyeyedzo gya Henri oyu a vbanyago ga litigo nyo khaguri Afrika umo thumo wathu wu nga himbedzedwa khu tepo nyo khaguri. Tepo thumo wathu wu nga himbedzedwa Henri a di dzi ningedza gasi gu ningeya guhodza ga liphuvboni vandriyaye. Uye lovide gu khuye: “Eni nyi nani dzitshoni, khu kharato eni nyi ngu tiyisega gu kheni gu tiya hwambo nyi gu manidego kholu nyi nga ba nyi ninga githawo Jehovha.” Ina u nga manega ni gutiya hwambo nga Henri? U nga manega nago wa gu yeyedza githawo khu Nungungulu.

TUMBEGA GUFANA NI MUPHASI NYA KHONGOLO NYA MHAMBA JOYADHA

12. Muphasi nya khongolo nya mhamba Joyadha ni mwangadzi waye va yeyedzide kharini gu khavo va di gu tumbegide ga Jehovha?

¹² Muphasi nya khongolo nya mhamba Joyadha a di gu thava Jehovha ni gu isoso si mu kutside gu tumbega ni gu andrisa wukhozeyi nya lisine. Isoso si wonegide tepo gyanana gya Jezebheli nyo pwani khu Ataliya gi nga wandra wufumu Judha. Vathu va diri ni gighelo nya gyadi nyo thave Ataliya uye a diri muthu nya mba wadi ni gu gasi gu khala pfhumugadzi uye a di zama gu songa satshavbo situgulwana saye gasi a si kodza gu fuma. (2 Dzik. 22:10, 11) Gimwego nya situgulwana soso khu Jowasi, gi vbulugide khulu mwangadzi wa Joyadha nyo pwani khu Jeyosabhati a nga gi vbulugisa. Uye ni mwama waye va sihide Jowasi va bwe va mu khathaleya. Khu ndziya yeyi Joyadha ni Joyosabhati va giride satshavbo va nga si kodza gasi gu vbulugisa muthu moyo wa ndrangani ga Dhavhidhe gasi gu khala pfhumu. Joyadha a di gu tumbegide ga Jehovha ni gu kha dzumeleya gu khuye hwanga a nga ba ari nawo khu Ataliya wu mu himbedzeya gu gira esi nya sadi. — Mav. 29:25.

13. Tepo Jowasi a nga gira 7 myaga, Joyadha yeyedzide kharini gu khuye a di gu tumbegide?

¹³ Tepo Jowasi a nga ba ari ni 7 myaga Joyadha yeyedzide gambe gu khuye a di gu tumbegide ga Jehovha. Uye a di luga mano, ayo ma gu dugeleya Jowasi a di hadzi gu khala pfhumu yi dugeyago khu ndrangani ga Dhavhidhe. Ganiolu, ma gu mba dugeleya Joyadha khu lisine a di hadzi gu songwa. Mano a ma lugidego ma dugelede khu gu phaswa khu Jehovha. Joyadha khu gu phaswa khu dzindruna ni Valevhi va si kodzide gu gira Jowasi a khala pfhumu ni gu ruma gu khavo Ataliya a songwa. (2 Dzik. 23:1-5, 11, 12, 15; 24:1) Khavbovbo, “Joyadha a di gira gidzumeledzwano ni pfhumu Nungungulu, mufumeli gumogo ni vathu, gasi va khala vathu va pfhumu Nungungulu.” (2 Dzipf. 11:17) Uye gambe a di “emisa vawoneleyi nya dzinyangwa nya nyumba ya pfhumu Nungungulu gasi gu si beli ni wevbini muthu a dzi nyenyezisidego.”— 2 Dzik. 23:19.

14. Jehovha tshatshazede Joyadha khu dzindziya muni?

¹⁴ Jehovha a ganede gu khuye: “Avo va nyi zundzago nyi na va zundza neni.” Khu lisine uye tshatshazede Joyadha. (1 Sam. 2:30) Khu giyeyedzo, uye dzumelede gu khuye matimu ma ganeyago khu Joyadha ma manega omu nya Bhibhiliya gasi ma khala gihevbudzo gwathu. (Rom. 15:4) Ni gu tepo a ngafa uye manegide ni lithomo nya likhongolo nya gu dzingwe “dhoropani ga Dhavhidhe gumogo ni vafumeli, kholu giride wuwadi ga Israyeli, ga Nungungulu gumogo ni nyumba yaye.” — 2 Dzik. 24:15, 16.

15. Hi nga hevbula ginani khu matimu ma ganeyago khu Joyadha? (Wona fotu.)

¹⁵ Matimo yaya ma ganeyago khu Joyadha ma nga hi phasa gu haguleya guthava nya gwadi khu Nungungulu. Madhota ma nga pimedzeya Joyadha khu gu tepo yatshavbo ma vbwetedzeya dzindziya nya gu vhikeye libandla. (Mith. 20:28) Vandriyathu va dandridego khu tanga va nga hevbula khu giyeyedzo gya Joyadha khu gu tepo yatshavbo va ninga githawo Jehovha ni gu simama na va gu tumbegide, khu kharato Jehovha a na va thumisa gasi gu tadzisa makungo yaye ni gu gima kha na nga va diga. Vaphya va nga wona edzi Jehovha a pharidego khidzo Joyadha va bwe va mu pimedzeya khu gu simama gu ninga githawo vandriyathu va dandridego khu tanga ngudzu-ngudzu vale va thumedego Jehovha khu myaga nya yingi. (Mav. 16:31) Khu guhegisa hatshavbo hi nga hevbula khu giyeyedzo gya Valevhi ni vama nyo khaguri va nga seketeya Joyadha. Hongoleni hi seketeya “ava va hi thangeyago” khu gu va engisa. — Hebh. 13:17.

KHA HI YELI GUFANA NI PFHUMU JOWASI

16. Ginani pfhumu Jowasi a giridego hwane nya gu ba Joyadha a fude?

¹⁶ Joyadha phaside pfhumu Jowasi gu khala muthu nya wadi. (2 Dzipf. 12:2) Kha nga handro wakone tepo Jowasi a nga ba ari muphya a di vbweta gu tsakisa Jehovha. Ganiolu, hwane nya gu ba Joyadha a fude Jowasi a di engisa wusingalagadzi nya va wugeyi. Khu wevbini handro wakone? Uye ni vathu vaye va di pheya gu “thumeya madingo nya sifananiso nya vambe vanungungulu nya malipha.” (2 Dzik. 24:4, 17, 18) Ambari olu Jehovha a nga ba a gorogide khu kotani nya isoso, uye “a di va rumeya vaprofeti gasi gu ta va wuyisa gwaye nyaluphye . . . aholu avo ka va va engisa” avo kha va engisa ambari gyanana gya Joyadha, Zakariya, oyu a nga ba a siri muprofeti basi ni muphasi nya khongolo nya mhamba wa Jehovha, ganiolu a nga ba ari primu wa Jowasi. Ni gu Jowasi a di gu vbweta gu songa Zakariya, ambari olu vavelegi va Zakariya va nga ba va vbulugiside womi waye. — 2 Dzik. 22:11; 24:19-22.

17. Ginani gi dugeledego Jowasi?

¹⁷ Khu kotani nya olu Jowasi a nga ba a si thavi Jehovha, silo kha sa mu gimbileya gwadi. Jehovha ganede gu khuye: “Avo va nyi kanganyisago va na thega dzitshoni.” (1 Sam. 2:30) Libutho nya lidugwana la Vasiriya li di pala “masotshwa nya mangi” ya Jowasi ni gu uye bayisidwe ngudzu. Hwane nya gu bani Vasiriya va bwelede, Jowasi a di songwa khu sithumi saye khu kotani nya olu a nga songa Zakariya. Kha nga olu pfhumu Jowasi a nga ba a vivbedwe khu monyo vathu “kha va mu dzinga marowoni ya vafumeli.” — 2 Dzik. 24:23-25

18. Guya khu Jeremiya 17:7, 8 u nga potsa kharini gu pimidzeya Jowasi?

¹⁸ Ginani hi nga gi hevbulago khu giyeyedzo gya Jowasi Uye a di gu fana ni simbo wu gu nani mikhamba nya mba tiya wu tiyiswago khu gilo nyo khaguri Jowasi a di pheya gu engisa vawugeyi a bwe a si tumbegi ga Jehovha tepo museketeyi waye Joyadha a ngafa Giyeyedzo gegi gya gu hi hevbudza gu khigyo kha hi yeli gu engisa Nungungulu khu kotani nya olu va ndrangani gwathu mwendro vambe libandlani va hi vegedego giyeyedzo nya esi hi yedego gu gira Gasi hi simama ni wupari nyo tiye ni Jehovha hi yede gu tiyisa lihaladzo lathu ni gu mu ninga githawo Khu gu hi simama gi gira gihevbulo nya muthu enga gu dundrugeya ni gu gombeya.— Leri Jeremiya 17:7, 8; Kol. 2:6, 7.

19. Jehovha o vbweta gu khuye hi gira ginani?

¹⁹ Jehovha kha vireyi gu khuye hi gira silo hi gu mba si kodza uye a gu vbweta gu khuye hi gira esi si lovidwego omu ga Muhevbudzi 12:13, “Thava Nungungulu u sayisa milayo yaye kholu eyi khiyo fanelo nya muthu watshavbo.” Tepo hi ningago githawo Nungungulu ethu hi na si kodza gu emisana ni sigaradzo mindru wa tshigu hi bwe hi simama na hi tiyide gu fana ni Obhadhiya ni Joyadha. Gimwalo gilo gi na ghohago wupari wathu ni Jehovha.