Jesu a gimbiya vbatshani nya mati

Tshivba ya Jesu kha ya nga ba yi hegeya gu vbanyisa vadwali ni gu wusa ava va fudego basi, ganiolu a diri ni tshivba nya gu woneleye phuvbo ni ndzadzi. Hwane nya gu ba a vbedzide gu gombeya gigomoni, Jesu a di khedza Yiphwani ya Galileya a wona phuvbo nya yikhongolo. Vapostoli vaye va diri ngalavani na va zama gu dwana ni phuvbo gasi ngalava yi si ndrindrwi. Jesu a di releya a pheya gu gimbiya khu vbatshani nya mati a hongola avba yi nga ba yi romo ngalava. Tepo vapostoli vaye va nga wona muthu na gimbiya khu vbatshani nya mati, va di pheya gu thava. Ganiolu, Jesu a di va embeya khuye: ‘Kheni. Mu nga thavi.’

Pedro a di khuye: ‘Pfhumu, wo ba uri uwe, nyi embeya nyita iyoyo u gomogo.’ Jesu a di embeya Pedro khuye: ‘Delu.’ Tepo phuvbo yi nga ba yi veta ngudzu, Pedro a di duga khomu nya ngalava a gimbiya khu vbatshani nya mati a hongola ga Jesu. Ganiolu, nari vbafuvbi ni gu vboha ga Jesu, Pedro a di khedza phuvbo a pheya gu thava. A di pheya gu dzi wona na dzama. Pedro a di garadzega, khuye: ‘Pfhumu, nyi vbulugise!’ Jesu a di mu mola khu libogo, khuye: ‘Khu ginani u nga pheya gu kanakana? Gomo hayi gukhodwa gwago?’

Jesu ni Pedro va di beya ngalavani, phuvbo yi dzegeya gu ema. Nga dundrugeya edzi vapostoli va dzi pwidego khidzo! Va di ganeya khavo: ‘Bayi kamo u Gyanana gya Nungungulu!’

Eyi khandri tepo nyo hegise eyi Jesu a nga emisa phuvbo. Ga yimbe tepo, na gu tshatuga yiphwa ni vapostoli vaye, Jesu a di lala ndrani nya ngalava. Gu di veta phuvbo nya yikhongolo ngudzu na lade. Mati ma di khusega ngudzu ma veta ngalava ma bwe ma beya ma tala. Vapostoli va di wusa Jesu, khavo: ‘Pfhumu, hi phase!’ Jesu a di wuga, a kawuka yiphwa khuye: ‘Degula!’ Khavbovbo, phuvbo ni yiphwa si dzegeya gu degula. Jesu a di wudzisa vapostoli vaye, khuye: ‘Gomo hayi gukhodwa gwanu?’ Va di embedzeyana khavo: ‘Ambari phuvbo ni yiphwa si ngu mu engisa.’ Vapostoli va di hevbula gu khavo vo ba va tumba Jesu khu monyo watshavbo, kha va yeli gu thava gilo.