Jesu a hodzisa vathu nya vangi

Na gu tshade matshigu nya madugwana gasi va hodza Phasika nya mwaga nya wu 32 Matshiguni Yathu, vapostoli va di wuya khu gutshumayelani. Va di garade ngudzu. Khu kharato, Jesu a di hongola navo khu ngalava Bhetisayidha gasi va ya hefemula. Ganiolu, tepo ngalava yi nga ba yiri vbafuvbi ni gu vboha funguni, Jesu a di wona vathu nya vangi va nga ba va mu landride. Ambari olu Jesu a nga ba a vbweta gu khala ni vapizane vaye basi, a di va hakha gwadi vathu vovo. A di hawulugisa vadwali va nga ba va romo a bwe a pheya gu va hevbudza. A di vbedza litshigu latshavbo na gu hevbudza khu Mufumo wa Nungungulu. Tepo gu nga pheya gu phuma, vapizane vaye va dita khavo: ‘Vathu va ngupwa ndzala. Va dige va hongola gasi va ya dzi vbweteya guhodza.’

Jesu a di khuye: ‘Mu nga va digi va hongola. Va ningeni guhodza.’ Vapostoli va di mu wudzisa, khavo: ‘Wo vbweta gu khuwe hi ya va rengeya dzipawu?’ Filipi, moyo nya vapostoli, khuye: ‘Ambari na hiri ni dzipawu nya 200 dzidhenariyo, na dzi si eneyi gu hodzisa vathu vava va khura.’

Jesu a di va wudzisa khuye: ‘Guhodza nyo vbohe hayi mu gu nago?’ Andreya a di khuye: ‘Ho wa ni 5 dzipawu ni sindzadziyana sivili basi. Hi na enedza mani khiso isoso!’ Jesu khuye: ‘Nyi ningeni dzipawu ni dzindzandzi dzodzo.’ A di ruma vathu gu khuye va khala khu mitsawa nya 50 ni 100 nya avo. Jesu a di dzega dzipawu ni dzindzandzi, a khedza ndzadzini a gombeya. Gu di hodza 5000 vama, vanyamayi ni sanana kala va khura. Khavbovbo, va di pata esi nga ba si tshade gasi gu si luziswi gilo. Esi si nga ba si tshade si di tadza 12 mirava! Igyogyo gilewugiso nya gikhongolo, khandridzo?

Vathu va di tsaka ngudzu nyo bwe va vbweta gu khavo Jesu a khala pfhumu yawe. Ganiolu, Jesu a di gu dziti gu khuye yi di si vbohi tepo nya gu Jehovha a vbweta gu khuye a khala pfhumu. Khu kharato, a di embeya vathu gu khuye va hongola, a bwe a embeya vapostoli vaye gu khuye va tshatuga Yiphwa ya Galileya. Vapostoli va di beya omu nya ngalava, khavbovbo Jesu a hongola gigomoni enga. Khu ginani? A di gu vbweta tepo nyo bhule ni Papayi waye khu nombelo. Ambari a gu ba ari ni thumo nya wungi kharini, Jesu a di gu dzi ninga tepo nya gu gombeye.