Phasika nyo hegise ya Jesu

Mwaga ni mwaga, Vajudha va di gu hodza Phasika khu litshigu nya wu 14 nya Nisani. Phasika yi di gu va dundrugisa edzi Jehovha a nga va tshudzisa khidzo wugumbini wa Egipto a va yisa Tigoni nya Gitumbiso. Khu mwaga nya wu 33 Matshigoni Yathu, Jesu ni vapostoli vaye va di hodza Phasika omu nya sala nya nyumba nyo khaguri ya vbatshani Jerusalema. Hwane nyo ba va vbedzide gu hodza, Jesu a di va embeya khuye: ‘Moyo wanu avba a na nyi ningeya nyi songwa.’ Vapostoli va di garadzega ngudzu, va wudzisa Jesu khavo: ‘Khu mani wakone?’ Jesu khuye: ‘Khoyu nyi mu ningago pawu yeyi.’ Khavbovbo, a di dzega gipandre nya pawu a ninga Judha Sikariyoti. Judha a di dzegeya gu khuga a hongola.

Khavbovbo, Jesu a di gombeya, a pileleya pawu a ninga vapostoli va nga ba va tshade, khuye: ‘Hodzani pawu yeyi. Yo emeya givili gyangu, egi nyi na gi ningeyago khu kotani yanu.’ A di gombeleya vhinyu, a ninga vapostoli vaye, khuye: ‘Seyani vhinyu yeyi. Yo emeya novba wangu, owu nyi na wu ningeyago gasi mu divaledwa sighoho. Nyi ngu mi tumbisa kheni: Mu na ba muri ni eni ndzadzini. Mwaga ni mwaga, girani esi gasi mu nyi dundruga.’ Khu kharato, mwaga ni mwaga, valandreyi va Jesu va nga gu tshangana khu wutshigwana wowo. Tshangano wowo wo ranwa pwani Gilalelo gya Pfhumu.

Hwane nyo ba va vbedzide gu hodza, vapostoli va di dwanisana na va vbweta guti gu khavo khu mani a nga ba ari wa lisima vbakari gwawe. Ganiolu, Jesu a di va embeya khuye: ‘Oyu a gu wa lisima vbakari gwanu khoyu a dzi wonago nari dugwana; a dzi wonago nari mwalo lisima guvbindra vambe.

Enu mu dzipari dzangu. Nyo mi embeya satshavbo esi Papayi a vbwetago gu khuye mu siti. Nugunugu, nyi na hongola ga Papayi wangu ndzadzini. Enu mu na tshala. Vathu va na dziti gu khavo mu vapizane vangu mo haladzana. Gu vbwetega mu haladzana nga edzi nyi mi haladzago khidzo.’

Khu guhegisa, Jesu a di gombeya ga Jehovha, a mu lomba gu khuye a vhikeya vapizane vaye ni gu bwe va tshala va thuma gumogo khu gupwanana. A di gombeya gasi gu lina la Jehovha li agiswa. Khavbovbo, Jesu ni vapostoli vaye va di embeleya dzindzimo va dhumisa Jehovha, va vbedza va duga va hongola. Yi di gu vboha tepo nya gu Jesu a modwa.