Siwudziso si girwago khu valeri

Tepo Jesu a nga gira Gilalelo gya Pfhumu, vapizane vaye nya 70 a va rumedego gupheyani gasi gu tshumayela va di gu romo hayi? Ina va di mu tutuma?

Ethu kha hi yeli gu pimisa gu khethu, khu kotani nya olu vapizane vale nya 70 va Jesu va nga ba vari mwalo tepo a nga gira Gilalelo gya Pfhumu isoso so thula gu khiso kha va nga tsakedwa khu Jesu ambari gu pimisa gu khethu va di mu tutuma. Jesu a di gu vbweta basi gu manega ni vapizane vaye ga tepo yile.

Uye a di gu tsakede ava nya 12 ni ava nya 70. Vbakari nya vapizane vaye, Jesu gupheya a di hatha 12 vama, ava a nga va rana gu khuye vapostoli. (Luka 6:12-16) Uye a di gu romo Galileya tepo a nga “rana vapizane vaye nya 12” a bwe “a va rumeya gu gimbiya va tshumayela Mufumo wa Nungungulu ni gu hawulugisa.” (Luka 9:1-6) Khu gu landreya, eyi Judheya Jesu a “di hatha gambe 70 vathu [a] va rumeya vavili-vavili.” (Luka 9:51; 10:1) Khu kharato, Jesu a diri ni vapizane malangani nyo hambane-hambane omu gu nga ba gu tshumayedwa maningano khuye.

Vajudha va nga khala vapizane va Jesu va di gu gira Phasika mwaga ni mwaga, adzina saye ni dzindranga dzawe. (Ekiso. 12:6-11, 17-20) Na yi gu tshade tepo nya yidugwana gasi Jesu a songwa, uye ni vapizane vaye va di hongola Jerusalema. Ganiolu, uye kha rana vapizane vaye vatshavbo va Judheya, Galileya ni Pereya gasi guya hodza vatshavbo Phasika. A di va embeya, khuye: “Nyi ngu dogoreya ngudzu gu hodza Phasika yeyi nanu, na nyi nga si tshaniseki.” — Luka 22:15.

Uye a diri ni gighelo nya gyadi gasi gu gira isoso. Nya mba hweya, Jesu a di hadzi gufa kha nga “ginvutana gya Nungungulu egi gi dusago gighoho nya litigo!” (Joh. 1:29) Isoso si di hadzi gu girega Jerusalema, avbo gu nga ba gu giredwa miphaso gukhugeya gale. Givuntana gi nga thumiswa avba nya phasika, gi di gu dundrugisa Vaisrayeli gu khavo Jehovha a di gu va tshudziside Egipto. Ganiolu, dzegiso wa Jesu wu di hadzi gu gira nya singi. Uye a di hadzi gu tshudzisa vathu vatshavbo avba nya gighoho ni gufa. (1 Kor. 5:7, 8) Esi Jesu a giridego, si di hadzi gu dzumeleya 12 vapostoli gu khala sivbango nyo pheye nya libandla nya Wukristo. (Efes. 2:20-22) Esi si hlamadzisago khu gu lidhoropa nya guage la Jerusalema li diri ni “12 siwindri nya sisekelo nigu avba nya siwindri soso gu di lovidwe malina nya 12 vapostoli va Ginvutana.” (Gutu. 21:10-14) Khu kharato, vapostoli nyo tumbege va di hadzi manega ni gipandre nya lisima avba nya gu tadzisege nya makungo ya Nungungulu. Khu kotani nya isoso, hi ngu pwisisa gu khethu khu ginani Jesu a nga ba a vbweta gu manega ni vapizane vaye avba nya Phasika yaye nyo hegise ni avba nya Gilalelo gya Pfhumu.

Ava nya 70 ni vambe vapizane va diri mwalo avba nya buzo ni Jesu. Ambari ulolo, vapizane vatshavbo nyo tumbege va di hadzi gu wuyedwa khesi Jesu a giridego, a gu Gilalelo gya Pfhumu. Vatshavbo vapizane va nga hadzi gu khala Makristo matodzidwego khu gu gimbiya nya tepo, va di hadzi gu gira gidzumeledzwanu gasi gu beya Mufumoni, ogu Jesu a embedego vapostoli vaye ga wutshigu wule. — Luka 22:29, 30.