GIHEVBULO 14
Hi nga khozeya kharini Nungungulu khu ndziya yi mu tsakisago?
Kha nga hi si wonidego avba nya gihevbulo gi vbindridego, Nungungulu kha tsakiswi khu dzitshetshe dzatshavbo dzedzi hi dzi wonago. Ganiolu, hi nga khozeya Muvangi wathu khu ndziya yi mu tsakisago. Ina ka, khu wevbini “wukhodwa [mwendro wukhongeyi]” wu mu tsakisago? (Jakobe 1:27) Hongole hi wona esi Bhibhiliya yi si hevbudzago.
1. Wukhozeyi wathu gu vbwetega wu dzi seketeya omu nya ginani?
Wukhozeyi wathu gu vbwetega wu dzi seketeya omu nya Bhibhiliya. Jesu embede Nungungulu khuye: “Magana yago khayo ma gu lisine.” (Johane 17:17) Dzitshetshe nyo khaguri kha dzi hevbudzi esi si gomogo omu nya Lito la Nungungulu, a gu Bhibhiliya. Dzo hevbudza sihevbudzo nya vathu ni sihenahena sawe. Ganiolu, Jehovha kha tsaki khu vathu vovo va ‘tshipisago milayo’ yaye. (Leri Marko 7:9.) Khu mambe maganelelo, Jehovha a ngu tsaka tepo hi engisago esi Bhibhiliya yi si hevbudzago.
2. Hi yede gu mu khozeya kharini Jehovha?
Gu vbwetega hi khozeya Jehovha enga kholu khuye Muvangi wathu. (Gutuledwa 4:11) Isoso so thula gu khiso gu vbwetega hi mu haladza ni gu khozeya uye enga, hi si khozeyi sifananiso mwendro gimbe gilo gi khozedwago. — Leri Isaya 42:8.
Gu vbwetega hi khozeya Jehovha khu ndziya “nya [guage], nya gunengedzise” mahoni gwaye. (Varoma 12:1) Esi so thula gu khiso gu vbwetega hi engisa milayo yaye. Khu giyeyedzo, ava va haladzago Jehovha va ngu gola va bwe va engisa milayo yaye yi yelanago ni wugadzi. Va ngu gimbileya hwindzo gambe ni silo si vangago dzimhango nya dzikhongolo, nya nga gu daha, gu thumisa dzidroga mwendro gu leva.a
3. Khu ginani hi yedego gu khozeya Jehovha ni Makristo makwawe?
Mitshangano yathu nya semana ni semana yi ngu hi tuleya dzindziya nya dzingi nyo dhumise Jehovha vbakari nya libandla. (Ndzimo 111:1, 2) Mweyo nya dzindziya hi mu dhumisago khiyo gu embeleya dzindzimo. (Leri Ndzimo 104:33.) Jehovha o vbweta gu khuye hi hongola mitshanganoni kholu a ngu hi haladza nigu a ngu dziti gu khuye yi na hi phasa gu tsaka kala gupindruga. Gu diga isoso, tepo hi hongolago mitshanganoni hi ngu ya tiyisa vambe, anethu hi tiyiswa.
GIRA WUGEVISISI NYO ETE
Wona sighelo si girago Jehovha a si dzumeyi gu khuye hi thumisa sifananiso omu nya wukhozeyi wathu. Hevbula dzindziya nyo dhumise khidzo Nungungulu.
4. Kha hi yeli gu thumisa sifananiso omu nya wukhozeyi wathu
Ho dziti kharini gu khethu Nungungulu kha tsaki khu gu hi thumisa sifananiso? Sistirini VHIDHYU, mu bwe mu bhula khu giwudziso gi landreyago.
Ginani gi giregidego tepo vathu nyo khaguri va Nungungulu va dziteponi nya gulowe nya Bhibhiliya va nga zama gu mu khozeya khu gu thumisa gifananiso?
Vathu nyo khaguri vo dzipwa vbafuvbi ni Nungungulu vo mu khozeya khu gu thumisa sifananiso. Ganiolu, ina kamo khiyo ndziya nya yadi nya gu mu khozeya khiyo? Lerini Ekisodha 20:4-6 ni Ndzimo 106:35, 36, mu vbedza mu bhula khu siwudziso sesi:
Silo muni mwendro sifananiso muni u si wonago na si thumiswa khu vathu gasi gu khozeya Nungungulu?
Jehovha o dzipwa kharini khu gu wona vathu na va thumisa sifananiso?
Uwe ke, wo dzipwa kharini khu gu wona vathu na va thumisa sifananiso?
5. Gu khozeya Jehovha enga si nga hi tshudzisa ga sihevbudzo nya malipha
Wona edzi gu khozeya Jehovha khu ndziya yi mu tsakisago si hi tshudzisago khidzo ga sihevbudzo nya malipha. Sistirini VHIDHYU.
Lerini Ndzimo 91:14, mu bwe mu bhula khu giwudziso gegi:
Ginani egi Jehovha a tumbisago gu hi gireya ho yeyedza gu khethu hi ngu mu haladza khu gu khozeya uye enga?
6. Ho khozeya Nungungulu mitshanganoni nya libandla
Ho dhumisa Jehovha hi bwe hi tiyisa gukhodwa ga moyo ni moyo wathu khu gu embeleya dzindzimo ni gu hlamula mitshanganoni nya libandla. Lerini Ndzimo 22:22, mu bwe mu bhula khu siwudziso sesi:
U ngu si gola gupwa vambe na va hlamula mitshanganoni?
U ngu dzina gu dongiseya hlamulo wago?
7. Jehovha a ngu tsaka tepo hi bhuleyago vambe esi hi si hevbulago
Gu na ni dzindziya nya dzingi nyo bhuleye khidzo vathu esi hi si hevbulago omu nya Bhibhiliya. Lerini Ndzimo 9:1 ni 34:1, mu bwe mu bhula khu giwudziso gegi:
Ginani u gi hevbudego omu nya Bhibhiliya u tsakeyago gu bhuleya muthu?
VAMBE VARI KHAVO: “Nungungulu kha khedzi edzi u mu khozeyago khidzo, wo nga nga khodwa gwaye basi.”
Uwe ke, wo si wona kharini?
REZUMO
Ho tsakisa Muvangi wathu tepo hi khozeyago uye enga, hi mu dhumisa mitshanganoni nya libandla, ni gu bwe hi bhuleya vambe esi hi si hevbulago.
Siwudziso nyo wusedze
Hi nga gira kharini gasi hiti ndziya nyo khozeye yi mu tsakisago Nungungulu?
Khu ginani hi yedego gu khozeya Jehovha enga?
Khu ginani hi yedego gu khozeya Nungungulu gumogo ni vathu va vbwetago gu mu tsakisa?
HEVBULA SIMBE
Omu nya matimu “Kha nyi ngu thumeya gambe sifananiso,” wona edzi nyamayi nyo khaguri a digidego khidzo gu khozeya sifananiso.
Wona esi u yedego gu gira gasi u kodza gu hlamula mitshanganoni nya libandla.
“Dhumisa Jehovha libandlani” (Mukhedziseyi nya Janeiro nya 2019)
Wona edzi lidzaha nyo khaguri li phasegidego khidzo khu mitshangano nya libandla, ambari olu si nga ba si mu garadzeya.
Vathu nya vangi vo khodwa gu khavo Makristo gu vbwetega ma thumisa gihambano. Ganiolu, ina kamo si ngu yela gu thumisa gihambano gukhozeyani?
a Esi hi na hevbula khiso ga sihevbulo si ngu gu tago.