GIHEVBULO 55
Phasedzeya libandla lago
Mafuni gwatshavbo, dzimiliyoni nya vathu va ngu khozeya Jehovha omu nya mazanazana mabandla. Vathu vovo va ngu tsaka khu sihevbudzo va si manago nigu va ngu gola gu phasedzeya libandla. Ina u ngu dzipwa kharato khu libandla lago?
1. U nga thumisa kharini tepo ni tshivba yago gasi gu phasedzeya libandla lago?
Hatshavbo hi nga phasedzeya libandlani. Khu giyeyedzo, adzina libandlani gwago gu na ni vandriyathu va gumbidego mwendro vambe vandriyathu va vbwetago giphaso. Ina u nga va phasa gu hongola mitshanganoni? Mwendro u nga va phasa khu yimbe mithumo, nya nga gu rengarenga silo mwendro gu agisa ndrangani? (Leri Jakobe 1:27.) Hi nga dzi ningedzeya gambe gu phasedzeya gu agisa ni gu lungisalungisa Salawu nya Mufumo. Mwalo a gurumedzwago gu gira isoso. Gu haladza Jehovha ni vandriyathu khiso si hi kutsago gu ‘dzi ningeya.’ — Ndzimo 110:3.
Dzifakazi dza Jehovha dzi bhabhatisidwego dzi nga phasedzeya libandla khu dzimbe dzindziya gambe. Khu giyeyedzo, vandriyathu nya vama va nga dzi garadzeya gu thuma kha nga vaphasedzeyi nya libandla mwendro madhota. Vandriyathu nya vama ni ava nya vanyamayi va nga seketeya thumo nyo tshumayele khu gu thuma kha nga vapiyonero. Dzimbe Dzifakazi dza Jehovha dzi ngu phasedzeya guvbahwa nya malanga nyo khozeye umo Jehovha. Dzimbe dzi ngu rura dzi hongola omu nya mabandla ma vbwetago giphaso.
2. Hi nga phasedzeya kharini libandla khu dzithomba dzathu?
Hi nga ‘rungudza Jehovha khu silo hi gu naso.’ (Mavingu 3:9) Gwathu lithomo nya likhongolo gu gira miningelo gasi gu phasedzeya libandla ni thumo nyo tshumayele wa mafuni gwatshavbo. (Leri 2 Vakorinto 9:7.) Miningelo yathu yi ngu phasedzeya gambe ava dugeledwego khu dzimhango. Nyavangi va ngu hunga gu “vega khu phuvbo” sitsapawana nyo khaguri semana ni semana mwendro ngima ni ngima gasi gu gira miningelo. (Leri 1 Vakorinto 16:2.) Hi nga gira miningelo yoyo omu nya dzikaxa nya miningelo Salawuni nya Mufumo mwendro omu nya saite donate.jw.org. Ndziya hi thumisago khiyo dzithomba dzathu, yi na yeyedza Jehovha gu khiyo hi ngu mu haladza.
GIRA WUGEVISISI NYO ETE
Wona dzindziya nyo khaguri u nga phasedzeyago khidzo libandla.
3. Phasedzeya libandla khu miningelo yago
Jehovha ni Jesu va ngu tsaka khoyu a ningeyago khu monyo watshavbo. Khu giyeyedzo, Jesu wonide nyamayi wule nya noni nya gisiwana na gira ningelo waye. Lerini Luka 21:1-4, mu vbedza mu bhula khu siwudziso sesi:
Ina gu vbwetega hi ningeya dzitsapawu nya dzingi gasi gu tsakisa Jehovha?
Jehovha ni Jesu vo dzipwa kharini tepo hi girago miningelo yi khugeyago monyoni?
Gasi guti edzi yi thumiswago khidzo miningelo, sistirini VHIDHYU. Khavbovbo, mu bhula khu giwudziso gegi.
Miningelo yo thumiswa kharini gasi gu phasedzeya mabandla mafuni gwatshavbo?
4. Hi nga dzi ningedzeya gu phasedzeya
Sithumi sa Jehovha sa gale si di gu gola ngudzu gu sayisa malanga va nga ba va khozeya umo Jehovha. Ganiolu gu di gu patega nyasingi guvbindra gu phasedzeya khu dzitsapawu basi. Lerini 2 Dzikoronika 34:9-11, mu vbedza mu bhula khu giwudziso gegi:
Vaisrayeli va di gu phasedzeya kharini gu sayisa tempele?
Gasi gu wona edzi Dzifakazi dza Jehovha dzi pimedzeyago khidzo giyeyedzo gegi gya Vaisrayeli, sistirini VHIDHYU. Khavbovbo, mu bhula khu siwudziso sesi.
Khu ginani si gu sa lisima gu Salawu nya Mufumo yi khala na yi agide ni gusayisega?
Khu dzevbini dzimbe dzindziya u nga phasedzeyago khidzo?
5. Vandriyathu nya vama va nga gira nyasingi libandlani
Bhibhiliya yo kutsa vandriyathu nya vama gu dzi garadzeya gu phasedzeya libandla. Gasi gu wona giyeyedzo nyo khaguri, sistirini VHIDHYU. Khavbovbo, mu hlamula siwudziso sesi.
Kha nga hi si wonidego omu nya vhidhyu, ginani a giridego Ryan gasi a engedzeya gu phasedzeya libandla?
Bhibhiliya yi ngu yeyedza makhalelo aya vandriyathu nya vama va yedego gu manega nawo gasi va thuma kha nga vaphasedzeyi nya libandla mwendro madhota. Lerini 1 Thimoti 3:1-13, mu vbedza mu bhula khu siwudziso sesi:
Makhalelo muni va yedego gu manega nawo vandriyathu nya vama va vbwetago gu thuma kha nga vaphasedzeyi nya libandla mwendro madhota?
Makhalelo muni aya dzindranga dzawe dzi yedego gu manega nawo? — Wona mavhesi 4 ni 11.
Libandla lo phasega kharini tepo vandriyathu nya vama va dzi garadzeyago gu manega ni makhalelo yaya?
VAMBE VA NGA WUDZISA KHAVO: “Dzifakazi dza Jehovha dzo dzi mana hayi dzitsapawu nyo seketeye khidzo thumo wadzo?”
U di hadzi hlamula kharini?
REZUMO
Jehovha a ngu bonga ngudzu kholu hi dzi garadzeyago gu phasedzeya libandla khu tepo, tshivba ni dzithomba dzathu.
Siwudziso nyo wusedze
Hi nga thumisa kharini tepo ni tshivba yathu gasi gu phasedzeya libandla?
Hi nga thumisa kharini dzithomba dzathu gasi gu phasedzeya libandla?
U di gu tsakeya gu phasedzeya kharini libandla?
HEVBULA SIMBE
Wona gu khuwe khu ginani Nungungulu a gu mba vbweta gambe gipandre nya likhumi.
“Ginani egi Bhibhiliya yi ganeyago khu gipandre nya likhumi?” (Ndrima nya jw.org, khu Giputukezi)
Wona gu khuwe so thula ginani gu dzi garadzeya gu mana malungelo libandlani.
“U ngu dzi garadzeya gu mana malungelo?” (Mukhedziseyi nya 15 nya Setembro nya 2014, khu Giputukezi)
Guti Dzifakazi dza Jehovha nyo khaguri nyo tiye hwambo dzi dzi garadzago gasi gu vbohiseya mabhuku vandriyadzo.
Guphakedwa nya mabhuku nya Bhibhiliya tigoni ga Congo (4:25)
Guhambana ni dzimbe dzitshetshe, ethu ho seketeya kharini thumo wathu?
“Ho dzi mana hayi dzitsapawu nyo seketeye thumo wathu?” (Ndrima nya jw.org)