Hengeledzano ni matimo / Ho dzi mana hayi dzitsapawu nyo seketeye khidzo thumo wathu?

Thumo wathu nyo tshumayele wo seketedwa khu miningelo nya gudzine yi girwago khu Dzifakazi dza Jehovha. Kha gu girwi mihengo mitshanganoni yathu, nigu mwalo a hengudwago gipandre nya wugumi. (Matewu 10:7, 8) Ganiolu omu hi gireyago umo mitshangano yathu gu na ni dzikaxa edzi ni wevbini a dzinago a girago umo ningelo waye. Kha hi embedzeyi vathu gu khethu hi giride ningelo.

Gimwegyo nya sighelo gi girago gu dzitsapawu dzathu dzi thumiswa gwadi khu gu kha hi hakhisi vathangeyi nya wukhongeyi, nigu Dzifakazi dza Jehovha kha dzi livbwi gilo gasi dzi gimbiya dzi tshumayela khu ndranga ni ndranga, nigu malanga yathu nya wukhozeyi khandri malanga nyo dhure.

Miningelo yatshavbo yi rumedwago omu nya dziBheteli dza Dzifakazi dza Jehovha yo thumisedwa gu phasedzeya ava va luzidego silo sawe khu kotani nya singulo, dzindrambi, ni sirevareva, yi ngu thumisedwa gambe gu phasedzeya vamisiyonariyo ni vawoneleyi nya sipandre, yi bwe yi thumisedwa gu phasedzeya gu vbaha malanga nya wukhozeyi, gu ghandla ni gu kabaniseya dziBhibhiliya ni mambe mabhuku ma duswago khu hengeledzano yathu.

Muthu ni muthu a gu hatha gu khuye a na gira ningelo gasi gu seketeya thumo wu girwago gipandreni gwaye mwendro wa mafuni gwatshavbo, mwendro gasi gu seketeya yatshavbo ya yivili. Libandla ni libandla li ngu gira mubiko ngima ni ngima nya dzitsapawu dzi dusidwego ni edzi dzi thumisidwego gasi gu tivisa ava va lumbago libandla lolo.