Tepo hi fedwago khu muthu hi mu golago
WA Gu ba u fedwe khu muthu u mu gulago, adzina anuwe u pwide silo nyo hambanehambane, guvbeledwa khu gutsaka, gu dzipwa wenga, ni gu dzipwa nu si phasi gilo. Adzina u ngu ba u goroga, gu dzi rwega nandru, ni gu thava gambe. Adzina u dzi wudzisa gu khuwe gasi nyi ngo vbanyeya ginani gambe.
Tiyisega gu khuwe kha wu ghohi wa gu vbisega, ambari wa gu vbisega khu tepo laphe. Isoso so yeyedza edzi u nga ba u mu gola khidzo oyu a fudego. Ambari ulolo, ina gyomo gilo gi nga gu phasago gu vbungula guvbisa u gu pwago?
ESI SI PHASIDEGO VAMBE
Tepo si wonegago nga khatshi wuvi u wu pwago kha wu vbeyi, adzina u nga thaveledwa khu mawonelo yaya ma landreyago:
SO LOMBEGA, U NGA DIGI GU LIYA
Khandri vatshavbo vathu va vbisegago khu ndziya nyo fane mwendro khu tepo nyo fane. Ambari ulolo, gu liya gu nga vbungula wuvi u wu pwago. Vanessa, a khumbugidwego gupheyani, wari khuye: “Nyi di liya gu liya; nyi di gu vbweta vbungula wuvi nyi nga ba nyi wupwa.” Sofía, oyu a fedwego khu ndriyaye khavba ni avba, wari khuye: “Si ngu vbisa ngudzu gu dundrugeya khesi si giregidego, sa gu fana ni gu namuleya ni gu handza gilondra gi gu na ni ndzilo. Khandri guvbisa gwagyo, ganiolu si ngu vbodzisa gilondra.”
BHULEYA VAMBE EDZI U DZI PWAGO KHIDZO
Si ngu pwisisega gu dzimbe dzitepo u na vbweta gu khala wenga. Ganiolu gu tshaniseka wenga khu wuvi, sa gu fana ni gu zama gu rwala gighodho nyo lemeye wabune. Jared a gu na ni 17 myaga, oyu a fedwego khu Papayi waye, wari khuye: “Nyi di gu bhuleya vambe edzi nyi nga ba nyi dzipwa khidzo ambari olu nyi nga ba nyi si dzi phofuli gwadi, ganiolu nyi di gu tsaka khu gu ba nyi si ganede basi.” Janice, hi ganedego khuye gupheyani, a gu engedzeya gu khuye: “Gu bhula ni vambe si di gu phasa ngudzu. Va di gu nyi pwisisa, nigu nyi di si dzipwi nyenga.”
DZUMEYA GU PHASWA
Dhogodheya moyo wari khuye: “Ava va fedwego, va gu dzumeya gu phaswa khu dzipari ni valongo ndrani nya matshigu nyo pheye va dugedwego khu sigaradzo, si nga va nga vbevbugeya gu timiseya guvbisa va gu pwago va bwe va gu pala.” Va embeye esi u vbwetago gu phaswa; yimbe tepo gu dzina va ngu dzina gu gu phasa, ganiolu kha va dziti gu khavo va na pheya khu hayi. — Mavingu 17:17.
TIYISA WUPARI WAGO NI NUNGUNGULU
Tina wari khuye: “Tepo mwama wangu a ngafa khu githugedza khu kotani nya kankru, a diri mwalo gambe vbafuvbi gasi nyi mu tshuleya khana yangu, khu kharato nyi di embeya Nungungulu satshavbo! Tshigu ni tshigu, nyi di gu pheya khu gu gombeya nyi mu lomba gasi a nyi phasa gu pfodzisa gwadi lidambo. Nungungulu nyi phaside khu dzindziya nya dzingi nyagu kha nyi dzi kodzi ni gu dzi ganeya.” Tarsha, a nga ba ari ni 22 myaga tepo mamayi waye a ngafa, wari khuye: “Guleri gwangu nya Bhibhiliya ga tshigu ni tshigu, gu nyi tiyiside ngudzu. Gu di gu nyi ninga gilo nyo dundrugeye khigyo gi na nyi tiyisago.”
DUNDRUGEYA KHU GU WUGA GA AVA VA FUDEGO
Tina o bwe khuye: “Gupheyani, gutumba nya guwuga ga ava va fudego gu di si nyi thaveleyi kholu nyi di gu mu vbweta ngudzu mwamwa wangu, nigu sanana sangu niso si di gu vbweta papayi waso. Ambari ulolo, olu, hwane nya 4 myaga, nyi ngu tiyiswa khu gutumba gogu. Khugo gu nyi vbanyisago. Nya gu dzi dundrugeya na nyi mu wona gambe, nigu isoso si ngu nyi ninga gurula ni gutsaka!”
Lisine gu adzina guvbisa u gu pwago kha gu na nga dzegeya gu vbindra. Ganiolu, esi si dugeledego Vanessa si nga gu tiyisa. Wari khuye, “Adzina u nga pimisa gu khuwe wuvi wago gima kha wu na nga vbindra, ganiolu vbadugwanavbadugwana u na wona gu khuwe silo si ngu tshukwata.”
Dundruga gu khuwe ambari wa gu ba u khaleya gu dileya pari mwendro nongo wago a fudego, u ngari ni sighelo nya singi nyo simame gu vbanya. Khu gu phaswa khu Nungungulu nya lihaladzo, u nga simama gu tsaka khu gu vbungadza ni dzipari nya dzadi u bwe u vbanyeya gilo nyo giti. Nigu nugunugu Nungungulu a na wusa ava va fudego. A gu vbweta gu khuye u ta wugareya gambe pari mwendro nongo wago a fudego. Khavbovbo guvbisa u gu pwago monyoni, gu na vbodziswa kala gupindruga!