Tepo hi emisanago ni mhango nya tumbunugo

“Hatshavbo hi di khedza eno ni eno, hi hamuga ni gilo nyo gire. Satshavbo hi nga ba hiri naso si di tshungunudwe hiso bhi, si fenengedzedwa khu mati ni maraga.” — Andrew wa Serra Leoa.

“Hwane nya gingulu, hi di bweleya gaya gwathu. Ganiolu, gimwalo gi nga ba gi tshade. Hi di hamuga ni lito. Nyamahegyana wangu a di khidzima, a pheya gu liya.” — David wa Ilhas Virgens.

ABARI gu u di nga tshuka u thegedwa khu mhango nya tumbunugo, adzina u nga pwisisa esi si pwidwego khava va thegedwego khiyo: Gu gu thuruga, gu mba wona silo khu ndziya nya yadi, gu dzuwega hungo, gu garadzega, ni gu loralora silo nyo thise. Nya vangi va thegedwago khu gigaradzo gegi, kha va ngo dzina gambe gu vbanya.

Abari gu u di nga tshuka u thegedwa khu mhango nya tumbunugo, anuwe adzina u nga dzipwa nuri mwalo gambe tshivba nyo simame gu timiseya. Adzina u nga pheya gu pimisa gu khuwe khu giti negi u gi vbanyeyago. Ambari ulolo, Bhibhiliya yi ngu tshamuseya sighelo nya gu u simama gu vbanya, yi bwe yi gu tumbisa silo nya sadi si tago.

LISINE NYA BHIBHILIYA LI NGU HI NINGA GUTUMBA

Muhevbudzi 7:8 wari khuye: “Mahegiso nya gilo i tshukwana guvbindra maphelelo yaye.” Tepo u ngo pheyago gu thungedzeya hwane nyo thegedwe khu mhango, silo si nga garadza. Ganiolu tepo u dzi hitago vbadugwanavbadugwana, silo si nga tshukwata.

Bhibhiliya yi profetide khiyo yi na vboha tepo nya gu “kha gu na pwala gambe . . . lito nya gililo, ambari gudilela.” (Isaya 65:19) Isoso si na girega tepo Mufumo wa Nungungulu wu na vbindrugedzago mafu ma khala paradhesi. (Ndzimo 37:11, 29) Dzimhango nya tumbunugo hi naya khu gu dzi divala. Sinyangaviya ni sitshetsheya satshavbo si na fuviswa khu guvbeleya, kholu Nungungulu tumbiside gu khuye: “Silo sa gale [kha hi na nga si dundruga], ambari gu si alakanyela gambe.” — Isaya 65:17.

Nga dundrugeya khesi: Muvangi wathu a gu gu ‘ninga gitumbo ga matshigu ma nga gutago’ — womi nya gurule vbavbatshi nya Mufumo nya guvbeleye wa Nungungulu. (Jeremiya 29:11) Olu u tigo lisine leli, ina u ngu si wona sighelo nya gu u simama gu vbanya? Sally, a khumbugidwego gupheyani nya ndrima, wari khuye: “Gu dundrugeya khu silo nya sadi hi na giredwago khu Mufumo wa Nungungulu tepo wu na fumeyago mafu, si nga gu phasa gu divala sigaradzo u tshanganidego naso u bwe u timiseya esi u tshangano naso olu.”

U ngu dzina guti simbe silo esi Mufumo wa Nungungulu wu na gireyago vathu nugunugu? Wa gu gira isoso, tiyisega gu khuwe ambari olu u thegedwego khu mhango, si ngu kodzega gu gupwa gutshamba gu vbanya muhuno na u ngo vireya gufuviswa nya dzimhango. Ganiolu, muhuno Bhibhiliya yi ngu ninga dzindziya nya dzadi dzi kodzago gu hi phasa gu timiseya sigaradzo hi resedwego khu dzimhango nya tumbunugo. Wona siyeyedzo nyo khaguri.

Mavhesi nya Bhibhiliya ma nga phasago

Lala tepo nyo eneye.

“Gyandza gimwegyo basi nya muthu nya gurule, guvbindra mandza mavili nya muthu nya wughimaghima khu gu dzi garadza ngudzu; ugogo nugo gututuma hwane nya phuvbo yi vbindrago.” — Muhevbudzi 4:6.

Vagevisisi vari khavo hwane nyo ba u emisanide ni gilo nyo thise, “gu mba lala tepo nyo eneye, si nga engedzeya gu garadzega gwago u bwe u si manegi ni mawonelo nya yadi khu silo.” Khu kharato, gwadi gu lala tepo nyo eneye.

Bhuleya vambe khedzi u dzipwago khidzo.

“Uye a vbisegago a ngu vbela tshivba, aholu magana nya yadi ma gu mu tiyisedza.” — Mavingu 12:25.

Phofula ga muthu wa ndrangani mwendro pari u yi tumbago ngudzu. Vbavbandze nya gu gu engiseye basi, vandrangani gwago mwendro dzipari dzago va nga gu tiyisa va bwe va gu ninga giphaso u gi vbwetago.a

Dundrugeya khu silo nya sadi si tago.

“Khu kotani nya gitumbiso gya Nungungulu, ethu hi ngu lindrela ndzadzi yiphya ni mafu maphya, umo gu guromo gululama.” — 2 Pedro 3:13.

a Go vbindra tepo nya gulaphe muthu na gu garadzega ngudzu, gu vbwetega a lomba giphaso ga vadhogodheya.