Phasa vambe gasi va timiseya tepo va tshanganago ni sigaradzo

1. Jehovha dzitepo nya dzingi a gu hlamula kharini milombelo ya sithumi saye?

INA U ngu dziti gu khuwe u nga thumiswa khu Jehovha gasi gu hlamula nombelo wa muthu nyo khaguri? Abari gu u lidhota, u muphasedzeyi nya libandla, piyoneru mwendro u muhuweleyi libandlani u nga phasa vambe vandriyathu. Nigu abari gu u muphya, u dandride khu tanga mwendro u ndriyathu nya nyamayi mwendro nya mwama anuwe u nga phasedzeya. Tepo muthu nyo khaguri a haladzago Jehovha a mu lombago giphaso, Nungungulu wathu dzitepo dzatshavbo a gu thumisa madhota ni simbe sithumi nyo tumbege gasi gu “phasedzela ngudzu” muthu yoyo. (Kol. 4:11) Ethu hi ngu tsaka ngudzu khu gu thumeya Jehovha ni vandriyathu khu ndziya yeyi. Ethu hi ngu si kodza gu phasedzeya ni gu thaveleya vandriyathu tepo va tshanganago ni tungu, mhango nya tumbunugko mwendro gu wugedwa.

PHASA VAMBE NDRANI NYA TUNGU

2. Khu ginani si nga garadzago gu phasa vambe ndrani nya tungu?

² Tungu wu nga hi gira si hi garadzeya gu phasa muthu nyo khaguri. Khu giyeyedzo, ethu adzina hi nga vbweta gu wuseya dzipari dzathu, ganiolu si si kodzegi gu gira isoso. Ethu adzina hi nga vbweta gu rana vale va tshanganago ni gigaradzo nya gu hamuge dzitsapawu gasi va ta hodza ni ethu, ganiolu si si kodzegi gu gira isoso. Ethu hi nga vbweta gu phasa vambe, ganiolu isoso si garadza khu kotani nya olu sivbango nya ndranga yathu si vbwetago niso giphaso. Ambari ulolo, ethu ha gu vbweta gu phasa vandriyathu, nigu Jehovha a ngu tsaka tepo hi girago satshavbo hi si kodzago gasi gu va phasa. (Mav. 3:27; 19:17) Ginani hi nga girago?

3. Ginani hi gi hevbulago khu giyeyedzo nya madhota ya libandlani la Desi? (Jeremiya 23:4)

³ Esi madhota ma nga girago. Abari gu u lidhota, dzi garadzeye guti gwadi tshambi. (Leri Jeremiya 23:4.) Desi, ndriyathu a khumbugidwego avba nya ndrima yi vbindridego uye wari khuye: “Madhota tepo yatshavbo ma di gu thuma ni eni ni vambe thumoni nyo tshumayele, nigu hi di gu vbedza tepo nyo khaguri hatshavbo.”b Gu dzigaradza ga vahavisi vava gu va giride si va vbevbugeya gu phasa Desi hwane nya gu ba wu phede tungu nya COVID-19 ni hwane nya gu ba sivbango nya ndraga yaye si songidwe khu tungu wowu.

4. Khu ginani madhota ma nga si kodza gu phasa Desi, nigu ginani madhota ma gi hevbulago?

⁴ Desi a gu tshamuseya gu khuye: “Khu kotani nya olu nyi nga ba nyi wona madhota kha nga dzipari dzangu, si nyi vbevbugede gu va embeya edzi nyi nga ba nyi dzipwa khidzo ni esi si nga ba si nyi garadza.” Ginani egi madhota ma gi hevbulago? Havisa vale u va khathaleyago na gi si manegi gigaradzo nyo khaguri. Khala pari yawe. Abari gu khu kotani nya tungu kha si kodzegi gu wuseya vandriyago ma dzi gaya gwawe, vbwetedzeya dzimbi ndzidziya gasi gu gira isoso. Desi wari khuye: “Dzimbe dzitepo madhota nyo hambane-hambane ma di gu nyi ligareya mwendro gu nyi rumeleya dzimesaji ga litshigu la limwedo. Nigu milowo va nga ba va nyi yeyedza yi di gu nyi kuha ambari olu nyi nga ba nyi yiti gwadi.”

5. Ginani madhota ma nga gi hevbulago khesi vandriyathu va si vbwetago ni edzi va nga va phasago khidzo?

⁵ Mweyo nya ndziya nya gu siti esi vandriyathu va si vbwetago, khu gu va gira siwudziso nya mba va theya dzitshoni. (Mav. 20:5) Ina avo va na ni guhodza ni mirendre? Ina si ngu kodzega avo na va luzide thumo mwendro na va mwalo dzitsapawu gasi gu renga wulanga nyo khale? Ina avo va nga vbweta gu khavo hi va lombeya giphaso ga mufumo? Desi a phasidwe khu vandriyathu khu nyamani. Ganiolu, giphaso a ningidwego khu madhota khu nyamani ni liphuvboni gi mu phaside gu timiseya sigaradzo saye. Uye wari khuye: “Madhota ma gombede ni eni. Ambari olu nyi gu mba si kodza gu dundruga gwadi esi avo va ganedego, eni nyi ngu dundruga edzi nyi dzipwidego khidzo. Isoso si di gu fana ni gu ba Jehovha a nyi embeya gu khuye: ‘Eni nyi nago.’” — Isa. 41:10, 13.

6. Ginani egi nya vangi libandlani va nga girago gasi gu phasa vambe? (Wona fotu.)

⁶ Esi vambe va nga girago. Ethu ha gu vireya gu khethu madhota ma khathaleya vandriyathu libandlani. Ganiolu, Jehovha a ngu hi lomba gasi hi tiyisa ni gu phasa vandriyathu. (Gal. 6:10) Ambari nari gilo nya gidugwana hi gi girago gasi gu phasa oyu a dwalago, ethu hi nga mu tiyisa ngudzu. Gyanana gi nga rumeya lidangaliya mwendro dhezenyu gasi gu tiyisa ndriyathu nya mwama. Vaphya adzina va nga hongola vaya rengarenga silo gasi guta ninga ndriyathu nyo khaguri nya nyamayi. Vambe libandlani adzina va nga phula guhodza va bwe va vbegedzeya ndriyathu a dwalago. Khu lisine, abari gu madwali ma gu kuha vatshavbo, vatshavbo libandlani va na vbweta gu tiyiswa. Adzina si na lomba gu hi khala tepo nya yi dugwana hwane nya mitshangano gasi gu bhula ni vandriyathu khovbe ni khovbe mwendro khu videoconferência. Ambari madhota nayo ma nga vbweta gu tiyiswa. Dzifakazi nyo khaguri, dzi ngu rumeleya malangaliya nya gu bonge madhota, aya ma khalago na ma pharegide ngudzu ndrani nya tungu. Si ngu tsakisa ngudzu tepo hi girago gipandrei gyathu khu gu engisa wusingalagadzi wu gu khuwo: “Tangadzisanani, phasanani moyo ni moyo.” — 1 Tes. 5:11.

PHASA VAMBE VA TSHANGANAGO NI MHANGO NYA TUMBUNUGO

7. Sigaradzo muni mhango nya tumbunugo yi nga vangago?

⁷ Mhango nya tumbunugo yi nga vbindrugedza womi wathu, nigu yi nga vboha nya mba yi vireya. Vathu nyo khaguri va ngu luza dzithomba dzawe, dzindranga dzawe, ambari vathu va va haladzago. Silo sesi nyo vivbe si ngu giregeya vandriyathu. Ganiolu, ginani hi nga girago gasi gu va phasa?

8. Ginani egi madhota ni mihungu nya dzindranga va nga girago na yi si dugeleye mhango nyo khaguri?

⁸ Esi madhota ma nga girago. Madhota ma nga phasa vandriyawe gu dzi dongiseya na gu si gu dugeleyi mhango nya tumbunugo. Ayo ma yede gu tiyisega gu khayo vatshavbo libandlani va ngu siti esi va yedego gu gira gasi gu simama na va vikhelegide ni gu manega ni dzinumeru nya madhota. Margaret a khumbugidwego avba nya ndrima yi vbindridego wari khuye: “Madhota ya libandlani gwangu ma hi gengedzide avbo nya gipandre esi si yedego gu khathaledwa libandlani, khu gu hi embeya gu khayo nango nya guvbi nya makhabi yi si vbeyi. Ayo ma di hi embeya gu khayo ya gu tshuka mifumo yi hi embeya gasi gu duga khu mu dzi ndrangani gwathu mwendro gya gu tshuka giemo gi thisa, ethu hi yede gu duga khu gu vbiredza.” Vandriyathu va di hi ninga mahungu yaya khu tepo nya yadi kholu hwane nya 5 dzisemana, gipandreni gwathu gu di thapedwa khu nilo. Mihungu nya dzindranga, tepo yi girago wukhozeyi nya ndranga, yi nga wusedza esi givbango gimwegyo ni gimwegyo gi yedego gu gira. Abari gu uwe ni sanana sago mu dongide, mu na si kodza gu simama na mu rude ya gu dugeleya mhango nya tumbunugo.

9. Ginani egi madhota ma nga girago na yi si dugeleye mhango ni hwane nya gu ba yi dugelede?

⁹ Abari gu u mu woneleyi nya tsawa nya thumo nyo tshumayele, tiyisega gu khuwe u na ni dzinumeru dzawe, nigu u ngu guti avbo va khalago vatshavbo va girago gipandre nya tsawa wago. Nigu tiyisega khu isoso na yi si dugeleyi mhango. Lova avba nya lidangaliya dzinumeru dzawe. Khavbovbo u na si kodza gu ligareya muhuweleyi ni muhuweleyi gasi gu wona esi va si vbwetago ya gu tshuka yi dugeleya mhango. Dzegeya gu ligareya mutshanganisi nya madhota oyu a na ligareyago nuye muwoneleyi nya gipandre. Tepo vandriyathu va thumago vatshavbo avo va nga si kodza gu gira satshavbo va si kodzago gasi gu phasedzeya. Hwane nya gu ba gipandreni gyaye gu phede guvbya, muwoneleyi nya gipandre wa Margaret kha nga lala. Uye a di khala 36 dziora na gu bhula ni madhota gasi gu va phasa gu khathaleya 450 vandriyathu va nga ba va mwalo wulanga nyo khale. (2 Kor. 11:27) Khu dziya yeyi, avo va si kodzide gu phasedzeya. Khu kharato, vatshavbo va nga ba va vbweta wulanga nyo khale va khathaledwe.

10. Khu ginani madhota ma wonago gu havisa dzinvuta nga gilo nya lisima? (Johane 21:15)

¹⁰ Madhota ma na ni thumo nya gu tiyise vandriyathu khu gu thumisa Bhibhiliya ni gu phasa ava va garadzegago. (1 Ped. 5:2) Tepo yi dugeleyago mhango, madhota ma yede gu pheya khu gu tiyisega gu khavo vandriyathu va vikhelegide nigu va na ni gu hodza, sombo nyo ambale ni wulanga nyo khale. Ganiolu, hwane nya migima nyo khaguri, ava va vbulugidego va na vbweta gu tiyiswa khu ma liphuvboni. (Leri Johane 21:15.) Harold oyu a thumago ni Kometi ya Betheli a bhudego ni vandriyathu nya vangi va dugeledwego khu dzimhango wari khuye: “Si ngu dzega tepo gasi gu dzipwa gambe gwadi.” Avo va nga pheya gambe gu dzipwa gwadi, ganiolu khu kotani nya olu va nga fedwa khu sighodwa sawe, va luza dzithomba va nga khaleya gupimisa khiso. Gu dundrugeya khu silo sesi si nga va gira va garadzega gambe. Isoso kha si tuli gu khiso avo va mwalo gukhodwa, ganiolu kha sa vivba gu dzipwa khu ndziya yeyi.

11. Ginani egi dzindranga dzi yedego gu gira?

¹¹ Madhota ma ngu dzina gu thumisa wusingalagadzi wu gu khuwo “lila ni vale va lilago.” (Rom. 12:15) Madhota ma yede gu tiyisa vandriyathu va vbulugidego gu khavo Jehovha ni vandriyathu va ngu va haladza ngudzu. Madhota ma yede gu phasa dzindraga gasi gu dzi simama gu gira silo sa maliphuvboni, gu gombeya, gu hevbula, gu manega mitshanganoni ni gu patega thumoni nyo tshumayele. Madhota gambe ma nga kutsa vavelegi gasi gu va phasa sanana sawe gu vega gupima avbo nya silo si nga mba tshungunudwa khu dzimhango nya tumbunugo. Vavelegi, dundrugisani sanana sanu gu khenu Jehovha tepo yatshavbo a nga khala pari yaso, nigu tepo yatshavbo uye a na si phasa. Nigu si tiyisegise gu khuwe iso si nga simama gu gira gipandre nya ndranga ya mafuni gwatshavbo nya vandriyathu ava va dzi emisedego gu si phasa.— 1 Ped. 2:17.

12. Vambe va nga gira ginani gasi gu phasedzeya vale va thegedwego khu dzimhango? (Wona fotu.)

¹² Esi vambe va nga girago. Ya gu dugeleya mhango vbafuvbi ni avbo u khalago, u nga wudzisa madhota esi u nga girago gasi gu phasedzeya. Adzina u nga phasa vale va digidego dzindranga dzawe mwendro vale va phasedzeyago vandriyathu va thegedwego khu dzimhango khu gu va rana gasi guta khala navo gaya gwago. Uwe adzina u nga ninga guhodza mwendro simbe silo vahuweleyi va si vbwetago. Ya gu dugeleya mhango hwindzo ni avbo u khalago uwe gambe u nga phasedzeya. Khu ndziya muni? Khu gu u gombeleya vale va thegedwego khu dzimhango. (2 Kor. 1:8-11) Uwe u nga phasedzeya khu gu gira miningelo nya gu dzini yi seketeyago thumo nya mafu yatshavbo. (2 Kor. 8:2-5) Wa gu si kodza gu endra u hongola avbo gu dungeledego mhango nyo khaguri, u nga wudzisa madhota esi u nga girago gasi gu ya phasedzeya. Wa gu ranwa gasi guya phasedzeya u na hakha trenamentu u na yi thumisago ya gu tshuka yi dugeleya mhango.

PHASA VANDRIYATHU VA TIMISEYAGO GU WUGEDWA

13. Sigaradzo muni vandriyathu va tshanganago naso ga mayigo thumo wathu wu himbedzedwago?

¹³ Ga malanga thumo wathu wu himbedzedwago mwendro gu wugedwa isoso si ngu lemedzisa womi wa vandriyathu. Vandriyathu va vbanyago malangani momo va ngu tshangana ni sigaradzo nya nga gu hamuga dzitsapawu, madwali ni gu fedwa khu sigodwa sawe. Ganiolu, khu kotani nya gu wugedwa, madhota kha ma si kodzi guya wuseya ava va vbwetago gu tiyiswa. Khiso si giregidego ni Andrei hi bhudego khuye ga ndrima yi vbindridego. Ndriyathu moyo a girago gipandre nya tsawa waye nya thumo nyo tshumayele a di gu tshangana ni gigaradzo nyo hamuge dzitsapawu. Uye a di gira asidhenti khu movha. Uye a di yede gu gira dzioperasawu nya dzingi, nigu kha nga ba a yede gu thuma. Ambari olu thumo wathu wu nga ba wu himbedzedwa gupata ni tungu, vandriyathu va giride satshavbo va nga si kodza gasi gu mu phasa, nigu Jehovha a di gu si wona esi va nga ba va gira.

14. Giyeyedzo muni nya gu tumbe Jehovha hi vegedwego khu madhota?

¹⁴ Esi madhota ma nga girago. Andrei a di gombeya a bwe a gira esi a nga si kodza. Jehovha a hlamude kharini? Uye a kutside vandriyathu nya vangi libandlani gasi gu phasa khesi va nga si kodza. Vambe va ningide bholeya ndriyathu gasi gu a hongola ospitali. Vambe va ningide dzitsapawu gasi gu mu phasa. Jehovha a va kutside gasi gu mu phasa khesi va nga ba va si kodza, nigu uye a kategiside gudzigaradza gwawe nya gu mu phase. (Hebh. 13:16) Madhota, tepo thumo wathu wu himbedzedwago lombani giphaso ga vambe. (Jer. 36:5, 6) Guvbindra satshavbo tumbani Jehovha. Uye a nga mi phasa gu khathaleya vandriyathu.

15. Hi nga simama kharini gupwana ni vandriyathu tepo hi wugedwago?

¹⁵ Esi vambe va nga girago. Thumo wathu wa gu himbedzedwa, ethu adzina hi nga tshangana ni vandriyathu khu mitsawa nya yidugwana. Khu kharato, igyo gi gu na ni lisima ngudzu gu manega ni gurula vbakari gwathu. Ethu ho dwana ni Sathane nasiri khu gyathu. Kha hi yeli gu vega gupima avba nya sihoso sa vandriyathu mwendro gu dzega tepo nyo laphe na hi gu zama gu lumamisa gigaradzo nyo khaguri. (Mav. 19:11; Efes. 4:26) Dzi emiseye gu phasa vambe. (Tit. 3:14) Giphaso egi vambe va ningedego ndriyathu wule nya nyamayi gi kuhide tsawa nya thumo nyo tshumayele. Avo va di khala vbafuvbi gwaye nga khatshi valongo vaye. — Ndzi. 133:1.

16. Guya khu Vakolosi 4:3, 18, hi nga phasa kharini vandriyathu va wugedwago?

¹⁶ Mazanazana nya vandriyathu va ngu thumeya Jehovha ambari olu thumo wathu wu himbedzedwago khu mifumo. Vambe vakone va khothedwe khu kotani nya gu gukhodwa gwawe. Ethu hi nga va gombeleya, hi gombeleya dzindranga dzawe hi bwe hi gombeleya vale va yeyedzago gu tiya-hwambo khu gu seketeya vandriyathu va khothedwego ambari olu va vegago gutshulega gwawe mhangoni. Avo va gu tiyisa vandriyathu vovo gasi gu simama na va tumbegide ga Jehovha, va va ninga esi va si vbwetago nigu va emeya tribhunali.c (Leri Vakolosi 4:3, 18.) Gima kha hi yeli gu divaledwa gu khethu milombelo yathu yi na phasa vatshavbo vandriyathu vovo. — 2 Tes. 3:1, 2; 1 Thim. 2:1, 2.

17. U nga dzi dongiseya kharini olu gasi gu emisana ni gu wugedwa?

¹⁷ Uwe ni ndranga yago mu nga dzi dongiseya olu gasi gu emisana ni gu wugedwa. (Mith. 14:22) U nga zami gu dundrugeya khu satshavbo silo nya gu vivbe si na dugeleyago, wulangani nya isoso tiyisa wupari wago ni Jehovha ni gu u phasa sanana sago gu gira sasimweso. Abari gu dzimbe dzitepo u ngu garadzega, gombeya ga Jehovha khu monyo wago watshavbo. (Ndzi. 62:7, 8) Kha nga ndranga, bhulani khu satshavbo sighelo nya sadi mu gu naso gasi gu tumba Jehovha.d Gu fana ni giemo nya dzimhango nya tumbunugo, gu dzi dongiseya gwago ni gu tumba Jehovha gu na phasa sanana sago gu tiya-hwambo ni gu manega ni gurula.

18. Ginani hi gi vireyago mindru watshigu?

¹⁸ Gurula ga Nungungulu gu ngu hi gira hi dzipwa na hi vikhelegide. (Filp. 4:6, 7) Isoso so thula gu khiso Jehovha a ngu rudzisa monyo wathu ambari ho tshangana ni madwali, dzimhango nya tumbunugo ni gu wugedwa, a gu iso si hi kuhago muhuno. Uye a gu thumisa madhota ma thumago khu gu dzi garadza gasi gu hi havisa. Nigu uye a ngu hi ninga lithomo nya gu phase vambe. Gurula hi gu nago olu gu na hi phasa gu emisana ni sigaradzo nya sikhongolo ambari kamo gu emisana ni “tshanisa nya yikhongolo.” (Mat. 24:21) Ga tepo yoyo, ethu hi na ba hi yede gu simama na hi rude hi bwe hi phasa vambe gu gira sasimweso. Ganiolu, hwane nya tshanisa nya yikhongolo, ethu kha hi na nga tshangana ni sigaradzo nya sikhongolo si na hi girago hi garadzega. Ethu hi na tsaka kholu khiso Jehovha tepo yatshavbo a si vbwetago gwathu, a gu gu mana gurula nya lisine kala gupindruga. — Isa. 26:3, 4.