U nga mana gurula ambari wa gu tshangana ni sigaradzo

1. Ginani “gurula ga Nungungulu” nigu ha gu wuyedwa kharini khu gu manega nago? (Vafilipi 4:6, 7)

GOMO gurula nyo khaguri ugo vathu nya litigo leli va gu mba guti a gu “gurula ga Nungungulu,” hi gu manago khu gu ba hiri ni wupari wa vbafuvbi ngudzu ni Papayi wathu wa ndzadzini. Tepo hi manegago ni gurula ga Nungungulu ha gu dzipwa na hi tiyide. (Leri Vafilipi 4:6, 7.) Ethu hi na ni wupari ni vathu va mu haladzago. Nigu hi ngu tsaka khu gu hi manega ni wupari wa vbafuvbi ni “Nungungulu nya gurule.” (1 Tes. 5:23) Tepo hi tigo, hi tumba ni gu engisa Papayi wathu, gurula ga Nungungulu gu na rudzisa monyo wathu tepo hi tshanganago ni gigaradzo nyo khaguri.

2. Khu ginani hi nga tiyisegago gu khethu si ngu kodzega gu mana gurula ga Nungungulu?

² Ina si ngu kodzega gu mana gurula ga Nungungulu tepo hi tshanganago ni sigaradzo, nya nga madwali nya makhongolo, dzimhango nya tumbunugo, sitereka mwendro gu wugedwa? Ni gevbini gigaradzo gi nga hi gira hi manega ni hwanga. Ambari ulolo, Jesu ningide wusingalagadzi valandreyi vaye wu gu khuwo: “Mu nga garadzegini myonyo yanu, gambe mu nga thavi gilo.” (Joh. 14:27) Egi tsakisago khu gu, vandriyathu va ngu landrisa wusingalagadzi wa Jesu. Khu gu phaswa khu Jehovha avo va ngu si kodza gu mana gurula tepo va tshanganago ni sigaradzo nya sikhongolo.

MANA GURULA NDRANI NYA TUNGU

3. Tungu wu nga dusa kharini gurula gwathu?

³ Tungu, wu nga vbindrugedza silo nya singi womini gwathu. Wona edzi tungu nya COVID-19 wu kuhidego khidzo vathu nya vangi. Mahungu nyo khaguri ma tshamusede khayo vathu nyo khaguri si ngu va garadzeya gu mana ligovbe ndrani nya tungu. Ndrani nya tungu gugaradzega, gu vbeledwa khu litsako, gu seya ngudzu wadwa, gu daha, wughevenga ni gu zama gu dzisonga, silo sesi si di engedzeya ngudzu. Abari gu umo u vbanyago umo womo tungu, ginani u nga girago gasi gu woneleya gu garadzega gwago u bwe u tsaka khu gurula ga Nungungulu?

4. Khu ginani guti giprofeto gya Jesu maningano ni matshigu nya gu hegise gi hi ningago gurula?

⁴ Jesu ganede gu khuye ga matshigu nya gu hegise gu na manega mitungu ga “malanga nya mangi.” (Luka 21:11) Guti isoso sa gu hi ninga kharini gurula? Ethu kha hi samadziswe khu mitungu yoyo. Kholu esi si giregago sa gu yeyedza esi Jesu a nga ganeya khuye si na girega. Ethu hi na ni gighelo nya gyadi nya gu engise wusingalagadzi uwo Jesu a ningidego ava va vbanyago ga tepo yeyi nya mahegiso wu gu khuwo: “Mu nga thurugi.” — Mat. 24:6.

5. a) Malito ma gomogo umo ga Vafilipi 4:8, 9, ma gu hi phasa kharini guti esi hi nga gombeyago khiso tepo hi tshanganago ni tungu nyo khaguri? b) Gu engiseya awudhiyu nya gulerwi nya Bhibhiliya, si nga gu phasa kharini?

⁵ Tungu, wu nga hi gira hi garadzega mwendro gu thava. Esi khiso si giregedego ndriyathu moyo nya nyamayi nyo pwani khu Desi.b Hwane nyo ba tiyu waye, primu ni dhogodheya va fude khu kotani nya COVID-19, uye a di gu thava gu thapedzisa mamayi waye a nga ba a dandride khu tanga. Ganiolu, khu kotani nya tungu uye a di gu garadzega khu gu khuye a di hadzi luza thumo waye, khu kharato a garadzega khedzi a nga hadzi livba khidzo ndranga ni gu renga gilo nyo hodze. Uye a di gu garadzega khesi nyo bwe a hamuga ni ligovbe. Ganiolu, Desi a si kodzide gu mana gurula. Khu ndziya muni? Uye a di gombeya ga Jehovha gasi a mu phasa gu manega ni gurula ni gu dundrugeya khu silo nya sadi. (Leri Vafilipi 4:8, 9.) Uye engisede Jehovha na gu “ganeya” naye tepo a nga ba a engiseya awudhiyu nya gulerwi nya Bhibhiliya. Uye wari khuye: “Esi nyi nga ba nyi sipwa si nyi phaside gu mana gurula, nyi si garadzegi nyi bwe nyi dundruga kheni Jehovha a ngu nyi khathaleya.” — Ndzi. 94:19.

6. Gu gira gihevbulo nya muthu enga ni gu manega mitshanganoni nya libandla si na gu phasa kharini?

⁶ Ndrani nya tungu khandri tepo yatshavbo hi si kodzago gu gira esi hi nga ba hi vbweta gu gira, ganiolu hi nga digi gu gira gihevbulo nya muthu enga ni gu hongola mitshanganoni. Matshango hi ma manago umo nya mabhuku yathu ni dzivhidhiyu ma gu hi dundrugisa gu khayo vandriyathu va ngu simama gu thumeya Jehovha khu gutumbega ambari na va gu emisana ni sigaradzo nya singi. (1 Ped. 5:9) Mitshangano yi na hi phasa gu dundrugeya khu silo si hi tiyisago si gomogo umo nya Bhibhiliya. Mitshangano gambe yi na hi ninga mathomo nya gu tiyise vambe ni gu tiyiswa. (Rom. 1:11, 12) Tepo hi dundrugeyago khedzi Jehovha a phasidego sithumi saye tepo si nga ba sipwa hwanga mwendro gu dzipwa songa, gukhodwa gwago gu na tiya ni gu u na tiyisega gu khuwe uye a na gu phasa nuwe.

7. Ginani hi gi hevbulago khu giyeyedzo gya mupostoli Johane?

⁷ Dzi garadzeye gu simama gu bhula ni vandriyago. Khu kotani nya tungu, adzina si na lombega gu hi gira distanciamento físico ni vandriyathu. Ga giemo nya nga egi, adzina u nga dzipwa nga edzi mupostoli Johane a dzipwidego khidzo. Uye a di vbweta gu wona pari yaye Gayo khovbe ni khovbe. (3 Joh. 13, 14) Ambari ulolo, Johane a tugude gu khuye kha nga ba a yede gu mu wona khu tepo nyo khaguri. Khu kharato, Johane a di gira esi a nga si kodza, khu gu mu rumeleya lidangaliya. Khandri tepo yatshavbo si na kodzegago gu hi wonana ni vandriyathu, khu kharato hi nga bhula navo khu gu thumisa telefoni, vhidhiyu xamadha mwendro gu va loveya mesaji. Tepo u simamago gu bhula ni vandriyathu uwe kha wu na nga dzipwa wenga nigu u na dzipwa nu rude. Vbweta madhota tepo u dzipwago nu vbede tshivba nigu dzumeya gu tiyiswa khayo. — Isa. 32:1, 2.

VBWETEDZEYA GURULA TEPO U TSHANGANAGO NI MHANGO

8. Mhango yi nga dusa kharini gurula gwago?

⁸ Abari gu u di nga tshangana ni ndrambi, gireva-reva mwendro gu vbedwa khu ndranga, adzina u garadzegide khu tepo nyo laphe tepo si nga girega isoso. Abari gu u fedwe khu muthu nyo khaguri u mu haladzago adzina u pwide gu vbisa nya gu khongolo mwendro gu mbati gilo nyo gire. Isoso kha si thuli khiso u mwalo gukhodwa. Uwe u di tshangana ni sigaradzo ni gu vathu nyo khaguri va nga vireya gu u gira silo khu ndziya yoyo. (Joba 1:11) Ambari ulolo u nga simama gu mana gurula. Khu ndziya muni?

9. Ginani egi Jesu a ganedego gasi gu hi gengedza khu dzimhango?

⁹ Dundruga esi Jesu a profetidego. Vathu nyo khaguri muhuno vo pimisa gu khavo gima kha va na nga tshangana ni dzimhango, ganiolu ethu hi ngu dziti gu khethu dzimhango dzodzo dzi na dugeleya matshigoni yathu, nigu ethu hi ngu tshangana ni dzimhango dzodzo. Jesu embede valandreyi vaye gu khuye si na manega “sirevareva nya sikhongolo” nigu dzimbe dzimhango dzi di hadzi manega na gu si vbohi mahegiso (Luka 21:11) Uye gambe profetide gu khuye gu di hadzi manega “gu engedzeya nya gu vivbe” nigu isoso khiso si giregago muhuno. Khu giyeyedzo, muhuno hi ngu wona wughevenga ni dzinyimbi. (Mat. 24:12) Jesu gima kha ganeya gu khuye dzimhango dzedzi dzi di hadzi dugeleya basi vale va digidwego khu Jehovha. Khu lisine, sithumi nya singi nyo tumbege sa Jehovha muhuno aniso si ngu tshangana ni dzimhango dzodzo. (Isa. 57:1; 2 Kor. 11:25) Jehovha kha hi vhikeyi ga dzimhango dzodzo khu gu gira silewugiso, ganiolu uye a ngu hi ninga ni gevbini hi gi vbwetago gasi hi simama na hi rude.

10. Khu ginani gu dzi dongiseya olu gasi gu emisana ni mhango si gu giyeyedzo nya gu khethu hi na ni gukhodwa?

¹⁰ Si nga vbevbuga gu simama na hi rude ya gu dugeleya mhango khu gu dzi dongiseya na yi nga gu romo tepo. Ganiolu, ina gu dzi dongiseya sa gu yeyedza gu khiso ethu hi mwalo gu khodwa ga Jehovha? Ahihi. Khu kharato, gu dzi dongiseya na yi nga si dugeleyi mhango so yeyedza gu khiso ethu hi na ni gukhodwa nyo khethu uye a ngu kodza gu hi khathaleya. Khu ndziya muni? Lito la Nungungulu la gu hi gengedza gu dzi dongiseya ga dzimango. (Leri Mavingu 22:3.) Nigu dzindrima nya mukhedziseyi, mitshangano nya libandla ni sitiviso hi ningwago khu hengeledzano ya Nungungulu tepo yatshavbo sa gu hi kutsa gu dzi dongiseya ga dzimhango.c Ina hi ngu tumba Jehovha? Abari gu ina, ethu hi na si kodza gu engisa wusingalagadzi waye olu na yi nga si giregi mhango.

11. Ginani u gi hevbulago khu giyeyedzo gya Margaret?

¹¹ Wona giyeyedzo gya ndriyathu moyo nya nyamayi nyo pwani khu Margaret. Mifumo yi di mu embeya gu khiyo a di yede gu diga ndraga yaye kholu gipandreni gwaye gu di thapedwe khu nilo. Khu kotani nya olu vathu nya vangi va nga ba va zama gu thava khu gipandreni mule, ruwani gu di tade khu dzimovha nya dzingi, khu kharato si garadza gu duga khu gipandreni mule. Gu di gu tade khu wutshi nya wungi nyo sivbale nigu Margaret kha nga ba a si kodza gu duga khu movhani gwaye. Ambari ulolo, uye vbulugide kholu a di gu dongide. Umo nya rava waye a di gu thede mapa ma nga ba ma yeyedza yimbe ruwa a nga hadzi gu beya khiyo ya gu tshuka yi dugeleya mhango. Uye a di gu gimbide umo nya ruwa yoyo na yi si gu giregi mhango yeyi, gasi a yi thumisa ya gu tsuka yi manega mhango. Margaret a vbulugide kholu a di gu dongide.

12. Khu ginani hi yedego gu landrisa sileletelo si ganeyago khu gu dzi vhikeya?

¹² Gasi gu hi vhikeya, ava va thangeyago adzina va nga hi lomba gasi gu engisa tepo va vegago ora hi yedego gu manega madzigaya gwathu, tepo va hi embeyago gasi gu duga khu gipandreni nyo khaguri mwendro gu landrisa simbe sileletelo. Vathu nyo khaguri kha va engise sileletelo sesi kholu avo va gu vbweta gu gira esi va si vbwetago. Ginani egi Makristo ma yedego gu gira? Bhibhiliya yari khiyo: “Khu kotani ya Pfhumu yingelani milayo yatshavbo nya litigo; ni mufumeli kholu khuye a gu khongolo, hi dzindruna dzaye.” (1 Ped. 2:13, 14) Hengeledzano ya Nungungulu yi ngu hi ninga sileletelo si vbulugisago womi wathu. Ethu tepo yatshavbo hi ngu dundrugiswa gu ninga dzinumeru dzathu madhota gasi ma hi vbwetedzeya tepo gu dugeleyago mhango nyo khaguri. Ina u giride isoso? Ethu adzina hi nga hakha gileletelo gi ganeyago khu wulanga hi yedego gu hongola, ndziya hi na beyago khiyo mwendro wulanga hi nga manago mirendre ni edzi hi nga phasago khidzo vambe, ha gu mba engisa hi nga vega womi wathu mhangoni ni owu wa madhota. Dundruga gu khuwe vama vava nyo tumbege, khavo va hi woneleyago tepo yatshavbo. (Hebh. 13:17) Margaret o ganeya khuye: “Eni nyi ngu khodwa gu kheni khu gu ba nyi landriside sileletelo nya madhota ni hengeledzano yaye khiso si vbulugisidego womi wangu.”

13. Ambari olu Makristo ma nga ba ma hambanisidwe, ginani gi va ningidego gu tsaka ni gurula?

¹³ Vandriyathu nya vangi va ngu diga dzidranga dzawe khu kotani nya dzimhango nya tumbunugo, dzinyimbi ni sitereka. Ganiolu, va giride satshavbo va nga si kodza gasi gu dzi pwananisa ni giemo nya giphya ni gu simama gu gira nya singi thumoni wa Jehovha. Gu fana ni Makristo nyo pheye ma nga hambaniswa khu kotani nya gu wugedwe, avo va simamide gu “hevbudza mahungu nya yadi.” (Mith. 8:4) Gutshumayela gu va phaside gu vega gupima avba nya Mufumo vbavbandze nya gu vege gupima avbo nya sigaradzo sawe. Kha nga handro wakone, avo va simamide ni gu tsaka gwawe ni gurula.

VBWETEDZEYA GURULA TEPO U WUGEDWAGO

14. Gu wugedwa gu nga dusa kharini gurula gwathu?

¹⁴ Tepo hi wugedwago hi nga luza silo nya singi si hi phasago gu simama na hi rude. Ethu hi ngu tsaka tepo hi tshanganago gumogo khu gu tshulega hi tshumayela guagani, hi bwe hi gira silo hi girago tshigu ni tshigu nya mba thava gu modwa. Abari gu kha si kodzegi gu gira silo sesi, ethu adzina hi nga garadzega hi thava khu gu dundrugeya esi si na giregago khu gu landreya. Gu dzipwa khu ndziya yeyi kha sa vivba, ganiolu ethu gi yede gu dzi woneya. Jesu ganede gu khuye gu wugedwa gu nga gira valandreyi vaye va thega. (Joh. 16:1, 2) Hi nga simama kharini ni gurula gwathu tepo hi wugedwago?

15. Khu ginani hi si yeligo gu thava gu wugedwa? (Johane 15:20; 16:33)

¹⁵ Lito la Nungungulu la gu hi embeya gu khilo: “Vatshavbo vale va vbwetago gu vbanya khu gukhodwa ga Kristo Jesu va na saniswa.” (2 Tim. 3:12) Ndriyathu moyo nyo pwani khu Andrei, si mu garadzede gu dzumeya gu khuye satshavbo sithumi sa Jehovha si di hadzi gu wugedwa hwane nya gu ba wu emisidwe thumo wathu tigoni gwaye. Uye wari khuye: ‘Omu gu na ni Dzifakazi nya dzingi, Mufumo wu nga si kodza kharini gu mola dzatshavbo?’ Wulangani nya gu Andrei a simama na rude, uye a di pheya gu garadzega ngudzu. Vambe vandriyathu va di tumba Jehovha khu gu vbeleya nigu kha va pimisa gu khavo kha va na nga wugedwa, avo a di gu dziti gu khavo adzina va na modwa. Ganiolu, avo kha va garadzega ngudzu nga Andrei. Khu kharato, uye a di hunga gu vbindrugedza mawonelo yaye nigu bwe a tumba Jehovha, nya mba hweya uye a di pheya gupwa gurula nigu uye a si kodzide gu tsaka ambari olu a nga ba a emisana ni sigaradzo nya singi. Silo nya nga esi si nga hi dugeleya nethu. Jesu na gu ganeya gu khuye hi di hadzi gu wugedwa, uye a hi tiyisegiside khuye hi di hadzi si kodza gu simama na hi tumbegide. — Leri Johane 15:20; 16:33.

16. Gileletelo muni hi yedego gu gi engisa tepo hi wugedwago?

¹⁶ Tepo thumo wathu wu emiswago mwendro gu himbedzedwa, ethu hi nga hakha sileletelo sitago khu Bheteli mwendro khu ga madhota. Sileletelo soso hi ningwago, si giredwe gasi gu hi vhikeya ni gu hi tiyisegisa gu khiso hi na simama gu hakha guhodza ga maliphuvboni nigu si ngu hi phasa gu simama gu tshumayela. Sa gu kodzega, u yede gu simama gu engisa gileletelo u hakhago ambari wo mba gi pwisisa khu gu beleya. (Jak. 3:17) Ethu gima kha hi yeli gu embeya mahungu ma ganeyago khu vandriyathu mwendro mithumo nya hengeledzano ga vathu va gu mba yela gu ma hakha. — Muh. 3:7.

17. Gu fana ni vapostoli va lizana myaga nyo pheye, ginani hi yedego gu dzi emiseya gu gira?

¹⁷ Gimwegyo nya gighelo gi girago Sathane a dwana ni vathu va Nungungulu kholu avo “va landrisago Wufakazi wa Jesu kristo.” (Gutu. 12:17) U nga digi Sathane ni litigo laye va gu thurugiseya. Gu tshumayela ni gu hebudza na hi gu wugedwa si nga hi reseya gutsaka ni gurula. Ga lizana myaga nyo pheye tepo vafumeli nya Vajudha va nga ruma vapostoli gu ema gu tshumayela, vama vale nyo tumbege va di hatha gu engisa Nungungulu. Avo va di simama gutshumayela nigu thumo wowo wu va ningide gutsaka. (Mith. 5:27-29, 41, 42) Khu lisine, tepo thumo wathu wu himbedzedwago ethu hi yede gu dzi woneya tepo hi tshumayelago. (Mat. 10:16) Ganiolu, ha gu gira satshavbo hi si kodzago hi na mana gurula gutago khiyo ga Nungungulu khu gu ba hi tsakisa Jehova ni gu huweleya mahungu ma vbulugisago womi nya vathu nya vangi.

“GURULA GA NUNGUNGULU GU NA KHALA NI ENU”

18. Gurula nya lisine hi nga gu mana ga mani?

¹⁸ U nga tiyisega gu khuwe ambari wo ba u tshangana ni sigaradzo nya singi u nga mana gurula. Ga dzitepo dzodzo hi yede gu dundruga khethu gurula hi gu vbwetago gurula ga Nungungulu, nigu gurula gogo khu Jehovha basi a nga hi ningago. Tumba uye tepo u emisanago ni tungu, dzimhango mwendro gu wugedwa. Simama vbafuvbi nya hengeledzano yaye, dundrugeya khu wumindru nya wadi wu hi vireyago, wa gu gira isoso “gurula ga Nungungulu gu na khala [nago].” (Filp. 4:9) Ga ndrima yi landreyago hi na wona edzi hi nga phasago khidzo Makristo ma tshanganago ni sigaradzo gu mana gurula ga Nungungulu.