MAVBANYELO NYA WUKRISTO
‘Pawulo a di rungudza Nungungulu, a tiya longo’
Tepo libandla la Roma li ngapwa gu pwani Pawulo a nguta, vandruyi nyo khaguri va di mu khinga na gu nga tshade gipimo nya 64 dzikilometro. Pawulo khuhidwe kharini khu lihaladzo lawe nya lisine? ‘Na va wone, Pawulo a di rungudza Nungungulu, a tiya longo.’ (Mith 28:15) Ambari olu Pawulo a nga ba a tidwa nga mwama nyo tiyise mabandla a nga ba a ma wuseya, ga tepo yeyi, nga gibotshwa, olu khuye a nga ba a tiyiswa hwambo — 2Ko 13:10.
Muhuno, vaoneleyi nya sipandre va gu endreya libandla ni libandla gasi gu tiyisa vandruyi ni vandriye. Kha nga va gu vathu va Nungungulu navo, dzimbe dzitepo va ngu ba va garadzega, gu garala ambari gu vbeya tshivba. Tepo mu na endredwago khu muwoneleyi nya gipandre ni mwangadzi waye, ginani u na girago gasi gu va tiyisa hwambo kha nga ndziya nya gu mu ‘tiyiselana mwatshavbo’? — Ro 1:11, 12.
Seketeya tshangano nya thumo nyo tshumayele. Muwoneleyi nya gipandre a ngu tiya hwambo a gu wona vahuweleyi na va gu dzi garadza gasi gu patega avba nya thumo nyo tshumayele ndrani nya semana nyo hathege. (1Tes 1:2, 3; 2:20) Ndrani nya liendro laye, dundrugeya khu wupiyonero nya guphasedzeye. Ina u nga thuma naye mwendro mwangadzi waye thumoni nyo tshumayele mwendro gu gimbidzisa navo gimwegyo nya gihevbulo gyago nya Bhibhiliya? Avo va ngu tsaka ngudzu khu gu thuma ni vahuweleyi nyo hambanehambane, gupata ni ava nya vaphya mwendro ava va dzipwago na va si kodzi gu tshumayela gwadi.
Va hakhe gwadi. Ina u nga va ninga wulanga nyo lale mwendro guhodza? Wa gu gira isoso uye ni mwangadzi waye va na wona gu khavo u ngu va haladza. Avo kha va vireyi mafandjara. — Lu 10:38-42.
Mu engiseye u bwe u thumisa sileletelo ni wusingalagadzi waye. Muwoneleyi nya gipandre a dziemisede gu hi phasa gu wona umo hi yedego gu tshukwadzisa omu nya thumo hi gireyago Jehovha. Dzimbe dzitepo si nga gira a gu ninga wusingalagadzi nyo tiye ngudzu. (1Ko 5:1-5) A na tsaka ngudzu ha gu mu engisa ni gu bwe hi landrisa sileletelo a hi ningago. — Heb 13:17.
Yeyedza gu bonga. Embeya muwoneleyi nya gipandre ni mwangadzi waye edzi gu dzigaradza gwawe gu gu phasago khiso. Unga si kodza gu gira isoso khu gu va loveya lidangaliya mwendro gu va embeya khu likana. — Kol 3:15.