Thumisa dzivhidhiyu gasi gu hevbudza sihevbuli sago nya Bhibhiliya

Dzivhidhiyu ni dzifoto si ngu ndrindra gupima ga wule a si wonago nigu si ngu mu phasa gu pwisisa ni gu dundruga esi a si hevbudego. Muhevbudzi wathu nya khongolo Jehovha thumiside sivangwa gasi gu hevbudza silo nya lisima. (Ge 15:5; Jer 18:1-6) Muhevbudzi nya Khongolo Jesu, thumiside nuye sipimaniso. (Mt 18:2-6; 22:19-21) Myagana yeyi, gu ngu thumiswa ngudzu dzivhidhiyu gasi gu hevbudza khidzo silo nya lisima. Ina u ngu thumisa dzivhidhiyu gasi gu hevbudza sihevbuli sago nya Bhibhiliya?

Gu dongisedwe 10 dzivhidhiyu gasi gu hi phasa gu hevbudza khidzo sihevbulo sa omu nya bruxura Mahungu nya yadi ya Nungungulu! Avba nya vhidhiyu ni vhidhiyu, gu di thumiswa gimwegyo nya siwudziso sa avba nya bruxura, si lovidwego khu tita nyo sivbale ngudzu kha nga hungo nya mahungu nya vhidhiyu yoyo. Wa gu tula bruxura khomu nya sayiti jw.org gu na ni dzilink dzi na hi dundrugisago gu yeyedza dzivhidhiyu nyo khaguri. Dziti gambe gu khuwe, dzimbe divhidhiyu dzi ngu tshingisa mahungu nyo khaguri ma gomogo omu nya mabhuku ma wumbago Dziferameta hi hevbudzago khidzo.

Mwa gu bhula khu mahungu nyo khaguri nya Bhibhiliya ni gihevbuli gyago gi gu mba ma pwisisa gwadi? Mwendro gihevbuli gyago gya gu emisana ni silingo nyo khaguri? Vbwetedzeya dzivhidhiyu omu nya jw.org® ni omo nya JW Broadcasting® kala u mana eyi yi na phasago gihevbuli gyago. Adzina tshukwana uwe gumogo ni gihevbulo gyago mu wona mwatshavbo mweyo nya dzivhidhiyu mu bwe mu bhula khiyo.

Ngima ni ngima gu ngu duswa dzivhidhiyu nya dziphya. Tepo u wonago dzivhidhiyu dzodzo, dundrugeya khedzi u nga phasago khidzo vambe khu gu thumisa dzivhidhiyu dzodzo.