Edzi u nga phasedzeyago khidzo hwane nya gu ba yi dugelede mhango

Muhuno watshigu, dzimhango nya tumbunugo dzi ngu girega ngudzu. Tepo yi giregago mhango nyo khaguri, satshavbo si girwago gasi gu vbulugisa vathu ga mhango yoyo si yede gu sasamedzwa gwadi ni gu thangedwa khu ndziya nya yadi. Khu gighelo gyogyo, Huwo nya guthangeye yi giride malulamiselo nya gu dzatshavbo Dzibheteli dzi manega ni Dhepartamentu nyo phasedzeye vale va nga thegedwa khu dzimhango.

Tepo vandriyathu nya dhepartamentu yeyi va tugulago gu khavo yi giregide mhango nyo khaguri, avo vo dzegeya gu ligareya madhota ya gipandreni mule gasi gu mana vahuweleyi va vbwetago giphaso. Abari gu vahuweleyi va gipandreni mule, kha va si kodzi gu woneleya mhango yile khu kotani nya olu a gu yikhongolo ngudzu, Bheteli yi na emisa vandriyathu va wutigu gwadi thumo wule gasi gu thangeya. Vandriyathu vovo, adzina va nga lomba vavholuntaryu, miningelo nya gukongome mwendro avo va nga renga ni gu kabaniseya esi si vbwetegago gipandreni mule.

Silo so gimbiya gwadi so girwa khu ndziya yeyi. Ganiolu, vandriyathu vo gira silo khu gu si khugeya vabune, isoso si nga resa mayunga ni gu gaxitari dzitsapawu.

Vandriyathu va emisidwego khu Bheteli, va ngu wuti tengo nya dzitsapawu nigu va ngu dziti gu khavo vathu vangani va vbwetegago gasi gu phasedzeya. Avo gambe va nga tivisa dzipfhumu dza mule idzo dzimbe dzitepo dzi phasedzeyago gu vbiredziseya thumo. Khu kharato, vathu kha va yeli gu hengiseya dzitsapawu, va rumeleya silo ava va thegedwego khu dzimhango mwendro gu hongola ga wulanga gu nga girega mhango nya mba rumwa khu muthu.

Ambari ulolo, tepo hi thegedwago khu dzimhango hi ngu vbweta giphaso. (Heb 13:16) Ethu hi ngu haladza vandriyathu! Ginani hi nga girago? Egi hi nga girago khu gu gombeleya ava va thegedwego khu dzimhango ni vale va girago thumo nya gu vbulugise. Ethu gambe, hi nga gira miningelo avbo nya thumo wa mafuni gwatshavbo. Khu gu thangedwa khu Huwo nya guthangeye, Dzibheteli dzi ngu dziti avbo dzitsapawu dzi yedego gu thumisedwa avbo, nigu abari gu ha gu vbweta gu patega avbo nya thumo wowo, hi nga yeyedza gu khethu hi ngu dzina khu gu tadzisa petisawu nya Departamento Local de Projecto/Construção (DC-50).

YEYEDZA VHIDHYU DZINDRAMBI DZI NGA GHOHETEYA BRAZIL, KHU GU LANDREYA GIRA GIWUDZISO GEGI:

Ginani gi nga gu hlamadzisa khesi si giridwego khu Dzifakazi dza Jehovha hwane nya gu ba dzi manegide dzindrambi Brazil khu 2020?