Tiyisega gu khuwe Jehovha a gu divalede

1-2. Tepo hi tugulago gu khethu Jehovha a hi divalede sighoho sathu, ha gu dzipwa kharini? (Wona kapa.)

PFHUMU Dhavhidhe a di gu dziti gu khuye so thula ginani gu dzipwa nandru khu kotani nya sighoho a giridego gale. (Ndzi. 40:12; 51:3; Tradução do Novo mundo; Cabeçalho) Uye giride sighoho nya sikhongolo womini waye. Ganiolu, Dhavhidhe a dzi layide khu lisine, nigu Jehovha a mu divalede. (2 Sam. 12:13) Uye a tsakide ngudzu tepo a nga tugula gu khuye Jehovha a mu divalede. — Ndzi. 32:1.

² Gu fana ni Dhavhidhe, hi nga tsaka nethu tepo hi tugulago gu khethu Jehovha a gu hi yeyedza wuhindzi ni gu hi divaleya khu sighoho sathu. Si ngu thaveleya gu dziti gu khethu Jehovha a dzi emisede gu divaleya sighoho sathu ambari nari sikhongolo, ganiolu ha gu dzi laya khu lisine, hi dawuleya sighoho sathu ni gu gira satshavbo hi si kodzago gasi hi si giri sihoso sasimweso! (Mav. 28:13; Mith. 26:20; 1 Joh. 1:9) Nigu hi ngu tsaka, kholu tepo Jehovha a divaleyago sighoho sathu uye gima kha na nga hi ninga nandru mwendro gu hi tsayisa khu kotani nya isoso. — Ezek. 33:16.

3-4. Ndriyathu nya nyamayi a dzipwide kharini hwane nya gu ba a bhabhatisidwe, nigu hi na bhula khu ginani avba nya ndrima yeyi?

³ Ganiolu, dzimbe dzitepo si nga garadza gukhodwa gu khethu Jehovha a hi divalede kamo khu lisine. Wona esi si nga giregeya ndriyathu Jennifer, a nga dandriswa lisineni. Tepo a nga ba ari muphya, uye a di gira silo nyo vivbe a bwe a siheya vavelegi vaye. Hwane nya myaga nyo khaguri, uye a di vbindrugedza mavbanyelo yaye a dzi hendzeledza ga Jehovha a bwe a bhabhatiswa. Uye wari khuye: “Gale, dzitepo nya dzingi nyi di gu gira wubhayi, gu seya ngudzu, gu manega ni gi zangazangani ni gu wona dzitsapawu nga gilo nya lisima gwangu. Nyi di gu dziti gu kheni Bhibhiliya yari khiyo khu kotani nya muphaso wa Kristo, Jehovha a nga divaleya sighoho sathu. Ganiolu, ambari olu nyi nga dzi laya nyi bwe nyi lomba Jehovha gasi a nyi divaleya, kha nya nga ba nyi khodwa gu kheni a nyi divalede khu lisine.”

⁴ Dzimbe dzitepo, adzina u nga dzipwa nga khatshi Jehovha a ngo simama na gu zangarede khu kotani nya sihoso u giridego gale. Jehovha a gu vbweta gu khuye hi tiyisega khu wuhindzi waye nga Dhavhidhe. Avba nya ndrima yeyi, hi na bhula gu khethu khu ginani si gu na ni lisima gu khodwa gu khethu Jehovha a ngu hi divaleya khu lisine ni esi si nga hi phasago gu gira isoso.

KHU GINANI SI GU NA NI LISIMA GU KHODWA GU KHETHU JEHOVHA A HI DIVALEDE KHU LISINE?

5. Sathane a gu vbweta gu khuye hi khodwa ginani? Ninga giyeyedzo.

⁵ Tepo hi khodwago gu khethu Jehovha a ngu hi haladza nigu a hi divalede, kha hi na nga khodwa malipha ya Sathane. Dundruga gu khuwe Sathane a na gira ni gevbini gilo gasi gu hi gira hi ema gu thumeya Jehovha. Gasi gu vboheya makungo yaye, Sathane a nga zama gu hi gira hi khodwa gu khethu Jehovha gima kha na nga hi divaleya. Wona giyeyedzo gya mwama nyo khaguri wa Korinto a nga duswa libandlani kholu a nga gira wubhayi. (1 Kor. 5:1, 5, 13) Khu gu landreya, uye a dzi layide, ganiolu Sathane a di gu vbweta gu khuye vathu libandlani va bomba gu mu divaleya ni gu mba mu dzumeleya a wuya libandlani. Ganiolu, libandla la gu mba mu divaleya, uye a di hadzi gu pimisa gu khuye Jehovha gima kha na nga mu divaleya. Uye a di hadzi gu vbeya tshivba nyo bwe a ema gu thumeya Jehovha. Sathane kha vbindrugedza makungo yaye mwendro milaphwi yaye. Ganiolu, ethu “kha hi hangwi khu mano yaye.” — 2 Kor. 2:5-11.

6. Ginani gi na hi phasago ha gu dzipwa gu khatshi Jehovha kha hi divaleya khu sihoso hi giridego gale?

⁶ Ha gu khodwa gu khethu Jehovha a hi divalede, hi nga ema gu dzipwa nandru. Hi ngu dzipwa nandru tepo hi girago gighoho. (Ndzi. 51:17) Nigu gwadi gu dzipwa kharato. Kholu ha gu dzipwa gu khethu hi giride gilo nya mba gyadi hi nga vbindrugedza hi bwe hi gira esi nya sadi. (2 Kor. 7:10, 11) Ganiolu, ha gu simama gu dzipwa nandru, hi nga vbeya tshivba nyo bwe hi ema gu thumeya Jehovha. Wulangani nya isoso, ha gu khodwa gu khethu Jehovha a hi divalede khu lisine, hi nga ema gu dzipwa nandru. Nigu hi nga simama gu thumeya Jehovha khu ndziya a yi vbwetago, na hiri ni livhalo li agidego nigu na hi tsakide. (Kol. 1:10, 11; 2 Thim. 1:3) Ganiolu, hi nga vbindrugedza kharini gudzipwa gwathu ni gu khodwa gu khethu Jehovha a hi divalede?

GINANI GI NA HI PHASAGO GU KHODWA GU KHETHU JEHOVHA A HI DIVALEDE KHU LISINE?

7-8. Ginani egi Jehovha a hi embedego maningano khuye, nigu hi nga tiyisega khu ginani? (Ekisodha 34:6, 7)

⁷ Dundrugeya esi Jehovha a ganedego maningano khuye. Khu giyeyedzo, dundruga esi Jehovha a embedego Mosi Gigomoni gya Sinayi.a (Leri Ekisodha 34:6, 7.) Ambari olu Jehovha a gu na ni makhalelo nya mangi nyo mbure, uye a di hatha gu embeya Mosi gu khuye, uye “Nungungulu nya wuhindzi ni pwela wusiwana.” Ina Nungungulu a di hadzi gu mba divaleya githumi gi dzi layidego khu lisine ga gighoho gi giridego? Khu lisine ne! Jehovha a gu mba divaleya muthu yoyo, uye a di hadzi gu yeyedza gu khuye khandri muthu nya wadi nigu a mwalo wuhindzi. Ganiolu, Jehovha gima kha na nga gira isoso.

⁸ Ethu hi nga tiyisega gu khethu tepo Jehovha a hi embeyago gu khuye a na ni wuhindzi, uye a gu ganeya lisine, uye gima kha liphi. (Ndzi. 31:5) Khu kharato, ethu hi nga tumba esi a ganeyago. Sa gu ba si gu garadzeya gu khodwa gu khuwe Jehovha a gu divalede khu lisine, dzi wudzise gu khuwe: ‘Ina nyi ngu khodwa gu kheni Jehovha khu lisine a na ni wuhindzi ni pweya-wusiwana nigu a di hadzi gu divaleya ni wevbini a dzi layidego khu lisine ga gighoho a giridego?’ Wa gu ba u khodwa isoso, u nga tiyisega gu khuwe a gu divalede nuwe.

9. Ndzimo 32:5 a gu hi hevbudza ginani maningano khedzi Jehovha a divaleyago khidzo sighoho sathu?

⁹ Dundrugeya esi Jehovha a hi hevbudzago omu nya Bhibhiliya maningano ni edzi a hi divaleyago khidzo. Khu giyeyedzo, wona edzi mulovi Dhavhidhe a tshamusedego khidzo divalelo wa Jehovha. (Leri Ndzimo 32:5.) Dhavhidhe a di khuye: ‘U nyi divalede guvivba nya gighoho gyangu.’ Lito nya Gihebheru li nga vbindrugedzedwa gu pwani “gu divaleya” avba nya mavhesi yaya, ma gu thula gambe gu “dusa” mwendro “gu rwala.” Khu kharato, tepo Jehovha a nga divaleya Dhavhidhe, uye dzipwide nga khatshi Jehovha a di mu rula gighodho nya gikhongolo gi nga ba gi mu lemeya. Dhavhidhe a tsakide khu gu dziti gu khuye Jehovha a mu divalede khu gu vbeleya. (Ndzi. 32:2-4) Anethu hi ngapwa litsako la limwedo. Tepo hi dzi layago khu lisine ga sighoho hi giridego, kha hi yeli gu simama gu dzipwa nandru khu sighoho soso kholu Jehovha a hi divalede khu gu vbeleya.

10-11. Malito ma gu khayo ‘a dongide gu hi divaleya’ mo vbweta gu hi embeya ginani khu Jehovha? (Ndzimo 86:5)

¹⁰ Leri Ndzimo 86:5. Dhavhidhe a di khuye Jehovha ‘a dongide gu hi divaleya.’ Isoso so thula gu khiso Jehovha kha hi tsukuli tepo hi girago gihoso, ganiolu uye a dzi emisede gu hi divaleya ha gu dzi laya khu lisine. Khu ginani a girago isoso? Kholu uye a “tade khu wuhindzi ni gutsetselela.” Kha nga hi nga si wona ga ndrima yi vbindridego, Jehovha a gu yeyedza lihaladzo nyo tumbege vale va mu haladzago ni gu mba mu diga. Nigu khu gu kutswa khu lihaladzo laye nyo tumbege, uye a ngu ‘divaleya khu monyo watshavbo’ sighohi satshavbo si dzi layago. (Isa. 55:7) Sa gu ba si gu garadzeya gu khodwa gu khuwe Jehovha a gu divalede, dundrugeya esi: ‘Wa gu ba u khodwa gu khuwe Nungungulu a dzi emisede gu divaleya vatshavbo va dzi layago khu lisine ni gu gombeya gwaye va lomba divalelo, tiyisega gu khuwe a gu divalede nuwe tepo u nga gombeya gwaye u lomba divalelo.’

¹¹ Si ngu hi thaveleya gu dziti gu khethu Jehovha a ngu dziti gu khuye hi vathu nya mba vbeleya. (Ndzi. 139:1, 2) Hongoleni hi wona esi Dhavhidhe a nga lova ga yimbe ndzimo ni edzi isoso si nga hi phasago khidzo gu khodwa gu khethu Jehovha a ngu dzina gu hi divaleya.

ESI JEHOVHA A SI DUNDRUGAGO MANINGANO KHETHU

12-13. Guya khu Ndzimo 103:14, ginani Jehovha a gi dundrugago maningano khethu, nigu isoso so mu kutsa gu rini?

¹² Leri Ndzimo 103:14. Dhavhidhe a di khuye Jehovha a ngu ‘dundruga gu khuye ethu hi libumba.’ Khu malito yaya, Dhavhidhe o tshamuseya gimwegyo nya sighelo si girago Jehovha a dzi emiseya gu divaleya sithumi saye si dzi layago: Uye a ngu dziti gu khuye kha ha vbeleya. Gasi hi pwisisa gwadi isoso, hongoleni hi zama gu pwisisa gwadi malito ya Dhavhidhe.

¹³ Dhavhidhe a di khuye Jehovha “a ngu dziti edzi hi wumbidwego khidzo.” Jehovha a di wumba Adhamu khu “kudzudzwane,” khu ndziya yoyo uye a ngu dziti edzi vathu va nga wumbwa khidzo ni esi va si vbwetago. Khu giyeyedzo, avo va yede guhodza, gu lala, gu hefemula, nigu ambari vathu nyo vbeleye va yede gu manega ni silo sesi. (Gen. 2:7) Ganiolu, kha nga olu Adhamu ni Evha va nga ghoha, gu wumbwa khu kudzudzwane gu di manega gambe ni wumbe tshamuselo. Kha nga olu hi gu situgulwana sawe, ethu hi thapedwe khu gighoho nigu khu kotani nya isoso si ngu hi vbevbugeya gu gira sighoho. Ganiolu, Jehovha kha dziti basi gu khuye hi sighohi, ganiolu uye a ngu ‘dundruga’ isoso. Lito nya Gihebheru li nga thumiswa avba, li nga thula gu gira gilogyo. Hi nga piya tshamuselo nya malito ya Dhavhidhe khu gu ganeya gu khethu: Jehovha a ngu dziti gu khuye dzimbe dzitepo hi ngu phazama, nigu tepo hi girago isoso uye a ngu kutsega gu hi divaleya ha gu dzi laya khu lisine. — Ndzi. 78:38, 39.

14. a) Ginani gambe Dhavhidhe a ganedego maningano khedzi Jehovha a hi divaleyago khidzo? (Ndzimo 103:12) b) Ginani hi nga gi hevbulago khu ndziya eyi Jehovha a divaledego khidzo Dhavhidhe? (Wona kwadru “Edzi Jehovha a divaleyago khidzo ni gu divala.”)

¹⁴ Ginani gambe gi nga hi phasago gu tiyisega gu khethu Jehovha a hi divalede? (Leri Ndzimo 103:12.) Dhavhidhe wari khuye tepo Jehovha a divaleyago, Uye a gu vega sighoho sathu “hwindzo ni Muhwadambo.” Avba li dugago avbo lidambo ni avba li sihalago avbo, hwindzo ngudzu nigu iso kha si manani. Isoso sa gu hi embeya ginani maningano khu sighoho esi Jehovha a divaleyago? Referensiya nyo khaguri ya gu tshamuseya esi maningano ni livhesi leli gu khiyo, “Nungungulu a gu dzega gighoho gyathu a gi vega hwindzo gwathu, gu fana ni gu nungeya nya gilo gu mwalalegago khu gu vbeleya. Khu kharato, hi nga tiyisega gu khethu uye kha na nga pimisa gambe mwendro gu dundruga gambe gighoho hi giridego.” Dzimbe dzitepo, gu nungeya nya guhodza mwendro nya simbe silo si nga hi gira hi dundruga gilo nyo khaguri gi nga girega gale. Ganiolu, hwane nya gu ba Jehovha a divalede gighoho nyo khaguri, gimwalo gi mu girago a dundruga isoso ni gu mu gira a hunga gu hi ninga nandru mwendro gu hi tsayisa. — Ezek. 18:21, 22; Mith. 3:19.

15. Ginani hi nga girago ha gu ba hi simama gu dzipwa nandru khu sighoho hi giridego gale?

¹⁵ Malito ya Dhavhidhe ma gu romo omu nga Ndzimo 103 ma nga hi phasa kharini gu khodwa gu khethu Jehovha a hi divalede? Dundrugeya edzi Jehovha a dzipwago khidzo. Uye a ngu dundruga gu khuye uwe kha wa vbeleya. Nigu Jehovha a ngu divaleya vatshavbo vale va dzi layidego khu lisine va bwe va gira guvbindrugedza. Isoso khiso u giridego. Dundruga gambe gu khuwe Jehovha a hungide gu mba pimisa mwendro gu dundruga sighoho sago, kholu a gu divalede. Khu kharato, gima kha na nga gu ninga nandru mwendro gu gu tsayisa khesi u giridego. Jehovha kha vegi gupima ga sighoho hi giridego gale. Anuwe kha wu yeli gu si vegeya gupima. (Ndzi. 130:3) Ha gu khodwa gu khethu Jehovha a hi divalede khu lisine, hi nga ema gu dzipwa nandru hi bwe hi simama gu thumeya Jehovha na hi tsakide.

16. Ninga giyeyedzo nya edzi si gu mhango khidzo gu simama gu pimisa khu sighoho Jehovha a si divaledego. (Wona fotu.)

¹⁶ Wona giyeyedzo gegi. Tepo muthu nyo khaguri a gimbidzisago movha, uye a nga khedza avba nya libona nya retrovhizori gasi gu wona esi sitago khu hwane. Uye a nga gira isoso dzitepo nyo khaguri, ganiolu gu na ba guri mhango a gu simama gu khedza avba nya libona tepo yatshavbo. Gasi gu gimbidzisa khu ndziya nya yadi, uye a yede gu khedza frenti. Khu ndziya nyo fane, dzimbe dzitepo khyadi gu pimisa khu sihoso hi giridego, kholu isoso si na hi phasa gu potsa gu gira sihoso sasimweso. Ganiolu, ha gu simama gu pimisa khu gighoho Jehovha a gi divaledego, adzina hi nga vbeledwa khu litsako hi bwe hi si si kodzi gu mu thumeya khu ndziya nya yadi. Wulangani nya isoso, hongoleni hi vega gupima avba nya wumindru a hi tumbisidego, a gu tepo eyi nya gu kha hi na nga ‘gu dundruga’ silo nya mba sadi. — Isa. 65:17; Mav. 4:25.

SIMAMA GU TIYISEGA

17. Khu ginani hi yedego gu simama gu tiyisega gu khethu Jehovha a ngu hi haladza nigu a na hi divaleya?

¹⁷ Hi yede gu tiyisega gu khethu Jehovha a ngu hi haladza nigu a dzi emisede gu hi divaleya. (1 Joh. 3:19) Khu ginani? Kholu Sathane a na simama gu zama gu hi gira hi khodwa gu khethu Jehovha kha hi haladzi nigu gima kha na nga hi divaleya. Edzi dzindziya Sathane a dzi thumisago gasi gu hi gira hi ema gu thumeya Jehovha. Nigu kha nga olu hi vbanyago matshigoni nya gu hegise, uye a na gira isoso khu tshivba yaye yatshavbo kholu a ngu dziti gu khuye a tshaledwe khu tepo nya yidugwana. (Gutu. 12:12) Ganiolu, hi yede gu dwana ni Sathane hi bwe hi simama gu thumeya Jehovha khu gu tumbega.

18. U nga gira ginani gasi u simama gu tiyisega gu khuwe Jehovha a ngu gu haladza nigu a na gu divaleya?

¹⁸ Gasi gu engedzeya gu tiyisega gu khuwe Jehovha a ngu gu haladza, thumisa esi hi si hevbudego avba nya ndrima yeyi. Ndrima yeyi, yi hi hevbudzide edzi u nga tiyisegago gu khuwe Jehovha a gu divalede. Khu giyeyedzo, dundruga esi Jehovha a ganedego khuye mune. Dundrugeya esi valovi nya Bhibhiliya va ganedego maningano khu divalelo waye. U nga divali gu khuwe Jehovha a ngu dziti gu khuye kha wa vbeleya nigu a na gu yeyedza wuhindzi. Dundruga gambe gu khuwe tepo a gu divaleyago, a gu gira isoso khu gu vbeleya. Khu kharato, u na tsaka kholu u ngu tiyisega gu khuwe Jehovha a ngu gu yeyedza wuhindzi, nigu gu fana ni Dhavhidhe u nga ganeya gu khuwe: “Nyi bongide Jehovha, khu gu ‘nyi divalela guvivba nya gighoho gyangu’!” — Ndzi. 32:5.