Ha gu wuyedwa kharini khu divalelo wa Jehovha?

1. Khu ginani divalelo nya muthu wu garadzidego?

“NYI NGU GU DIVALEYA.” Idzo ma tsakisago khidzo gu mapwa malito yaya abari gu hi ngu dziti gu khethu hi di ganeya mwendro gu gira gilo gi nga gorosa mumbe! Ganiolu, malito ma gu khayo “nyi ngu gu divaleya” ma gu tshamuseya ginani gwago? Ina muthu u nga mu gorosago a gu gu embeya gu khuye mu na simama ni wupari? Mwendro saye a gu vbweta gu gu embeya gu khuye kha vbweti gu ganeya gambe khu mahungu yoyo. Khu lisine, divalelo nya muthu wu garadzide.

2. Divalelo wa Jehovha wa gu tshamusedwa kharini omu nya Milowo? (Wona tshamuselo wa vbavbatshi.)

² Ndziya eyi Jehovha a divaleyago khiyo vathu nya mba vbeleya, yi hambanide ngudzu ni ndziya hi divaleyago khiyo mumbe muthu. A mwalo muthu a nga si kodzago gu divaleya khu ndziya eyi Jehovha a divaleyago khiyo. Muembi nya dzindzimo, ganede maningano ni Jehovha gu khuye: “Avbo gwago u ngu kodza gu divalela khu lisine avo va gu ningago githawo.”a (Ndzi. 130:4, NM) Khu lisine, divalelo wa Jehovha, “divalelo nya lisine.” Uye khuye basi a hi yeyedzago esi si thulago divalelo nya lisine. Ga mavhesi nyo khaguri, omu nya milowo nya Gihebheru, valovi nya Bhibhiliya va tshamusede ndziya eyi Jehovha a divaleyago khiyo khu gu thumisa lito nya gu gima li di nga si thumiswi gasi gu tshamuseya ndziya eyi vathu va divaleyago khiyo.

3. Divalelo wa Jehovha wu hambanide ni uwo wathu khu ndziya muni? (Isaya 55:6, 7)

³ Tepo Jehovha a divaleyago muthu nyo khaguri, gighoho gya muthu yoyo a gu gi dusa khu gu vbeleya. Hi nga simama gu manega ni wupari nyo tiye ni Jehovha. Ndziya eyi Jehovha a divaleyago khiyo, yi ngu hlamadzisa nigu khyadi. — Leri Isaya 55:6, 7.

4. Jehovha a gu hi phasa kharini gu pwisisa divalelo nya lisine?

⁴ Abari gu divalelo wa Jehovha wu hambanide ni owu wathu, kha nga vathu nya mba vbeleya hi nga si kodza kharini gu pwisisa divalelo nya lisine? Jehovha a gu thumisa siyeyedzo nyo mbure gasi gu hi phasa gu pwisisa edzi a hi divaleyago khidzo. Avba nya ndrima yeyi, hi na bhula khu siyeyedzo nyo khaguri. Iso si na yeyedza edzi Jehovha a dusago khidzo sighoho sathu, khu tepo yayimweyo a wusedza wupari hi gu nawo naye. Tepo hi hevbulago khu siyeyedzo sesi, hi na engedzeya lihaladzo lathu ni gu bonga Papayi wathu nya wadi a hi divaleyago khu dzindziya nya dzingi.

JEHOVHA A NGU DUSA GIGHOHO A GI DZUDZUGA HWINDZO

5. Ginani gi giregago tepo Jehovha a divaleyago sighoho sathu?

⁵ Umo nya Bhibhiliya, sighoho sa gu fananiswa ni silo nyo lemeye. Pfhumu Dhavhidhe a di tshamuseya sighoho saye khu ndziya yeyi: “Kholu mithumo yangu nya guvivbe yi tade, yi langaladza hungo wangu; yi ngu nyi gikha kha nga rwalo nya gulemele.” (Ndzi. 38:4) Ganiolu, Jehovha a ngu divaleya sighohi si dzi layidego. (Ndzi. 25:18; 32:5) Lito nya Gihebheru li nga vbindrugedzedwa gu pwani “gu divaleya” omu nya mavhesi yaya, la gu thula “gu khuga” mwendro “gu rwala.” Khu kharato, tepo Jehovha a divaleyago sighoho sathu, sa gu fana ni gu ba a hi rula silo nyo lemeye magatani gwathu a bwe a si dzega.

6. Jehovha a gu rwala sighoho sathu kala hayi?

⁶ Bhibhiliya, ya gu thumisa gimbe giyeyedzo gasi gu yeyedza edzi Jehovha a rwalago khidzo sighoho sathu. Ndzimo 103:12 ya gu hi embeya gu khiyo: “Kha nga idzo Khugadambo gu gu hwindzo ni Muhwadambo, kharato nugo a ngu ndreyisa vbakari gwathu sighoho sathu.” Avbo li dugago avbo lidambo, hwindzo ngudzu ni avbo li pfolago avbo lidambo, nigu kha si manani. Khu mambe malito, Jehovha a gu dzudzuga sighoho sathu omu hi gu mba gu dundrugeya. Isoso sa gu hi tiyisegisa gu khiso Jehovha a na hi divaleya khu gu vbeleya.

7. Bhibhiliya ya gu tshamuseya kharini esi Jehovha a girago khu sighoho sathu? (Mikeya 7:18, 19)

⁷ Ambari olu Jehovha a dzegago sighoho sathu a hongola naso hwindzo khu ndziya nyo fananise, ina sa gu thula gu khiso uye a gu simama naso? Ahihi. Pfhumu Ezekhiya a di lova maningano ni Jehovha gu khuye: “Sighoho sangu satshavbo u si dzudzugide hwane gwago.” (Isa. 38:9, 17) Giyeyedzo gegi gya gu yeyedza gu khigyo, Jehovha a gu dzega sighoho sa vale va dzi layidego a si dzudzuga hwindzo nyo bwe a si si woni gambe. Malito yaya ma nga tshamuseya gambe gu khayo: “Uwe u giride [sighoho sangu] si gira nga khatshi kha sa girega.” Bhibhiliya ya gu tshingisa silo sesi avba nya gimbe giyeyedzo gi gomogo omu ga Mikeya 7:18, 19. (Leri.) Livhesi leli la gu ganeya gu khilo Jehovha a gu dzudzuga sighoho sathu phwani. Gale yoyo, si di gu garadza gu mana gilo gi nga dzudzugwa vbakari nya yiphwa.

8. Ginani hi gi hevbulago khu siyeyedzo hi bhudego khiso?

⁸ Siyeyedzo sesi, sa gu hi hevbudza gu khiso tepo Jehovha a hi divaleyago a gu dzega sighoho sathu a si dzudzuga hwindzo gasi hi si dzipwi gambe nandru. Kha nga a ganedego Dhavhidhe, “va ngu tsaka vale mithumo yawe nya guvivbe yi divaledwego ni vale sighoho sawe si fenengedzidwego. A ngu tsaka muthu wule Jehovha a na gu mba theya kota khu sighoho saye.” (Rom. 4:7, 8) Owu khuwo a gu divalelo nya lisine!

JEHOVHA A NGU FUVISA SIGHOHO SATHU

9. Giyeyedzo muni Jehovha a gi thumisidego gasi gu yeyedza gu khuye a ngu divaleya sighoho sathu khu gu vbeleya?

⁹ Khu kotani nya dzegiso, Jehovha a ngu si kodza gu fuvisa mwendro gu handza sighoho sa vale va dzi layidego. Hongoleni hi wona edzi Bhibhiliya yi tshamuseyago esi Jehovha a girago. Omu nya Bhibhiliya, ha gu leri gu khethu Jehovha a gu handza a bwe a gama sighoho soso. Kha nga handro wakone, isoso sa gu gira gu gighohi gi wonwa na gi gu agide. (Ndzi. 51:7; Isa. 4:4; Jer. 33:8) Jehovha, a gu tshamuseya uye kamo mihandro nya magirelo yaye. Uye wari, khuye: “Ambari sighoho sanu na si sivbade kha nga wugala, nyi na si agisa kha nga hunguva; ambari sa gu fanana ni giwunguwungu, nyi na si agisa kha nga mawoya nya nvuta.” (Isa. 1:18) Si ngu garadza gu dusa dzinoda nyo fuviye avbo nya panu nyo khaguri. Ganiolu, Jehovha a gu thumisa giyeyedzo gasi gu hi tiyisegisa gu khuye sighoho sathu si nga handzwa gwadi si si wonegi gambe.

10. Khu gevbini gimbe giyeyedzo Jehovha a gi thumisago gasi gu yeyedza edzi a hi divaleyago khidzo?

¹⁰ Kha nga si khumbugidwego avbo nya ndrima yi vbindridego, sighoho si nga fananiswa ni mangava. (Mat. 18:32-35) Khu kharato, tepo yatshavbo hi ghoheyago Jehovha, sa gu gira gu khatshi ha gu engedzeya mangava yathu. Hi ngu mu dhevha ngudzu! Ganiolu, tepo Jehovha a hi divaleyago, sa gu gira gu khatshi a gu hi embeya gasi hi si livbi mangava yathu. Uye kha hi lombi gasi hi mu livba khu gu ba a hi divalede sighoho sathu. Gu fana ni muthu a tsakago khu gu ba a livbedwe mangava yaye, anethu hi ngu tsaka ngudzu khu gu ba Jehovha a hi divalede.

11. Bhibhiliya ya gu vbweta gu khiyo ginani tepo yi ganeyago gu khiyo sighoho sathu si ngu ‘futwa khu gu vbeleya?’ (Mithumo 3:19)

¹¹ Jehovha kha hi embeyi basi gasi hi si livbi mangava yathu mwendro sighoho; Uye a gu si futa. (Leri Mithumo 3:19.) Khu giyeyedzo, dundrugeya muthu nyo khaguri na gu theya X vbatshani nya tengo nya dzitsapawu u mu dhevhago. Ganiolu, ambari olu a nga theya X vbatshani nya tengo nya dzitsapawu, si thulago gu khiso kha wu na nga livba gambe, tengo nya dzitsapawu u nga hadzi gu livba wu nga gu simama gu wonega. Ganiolu, gu theya X si hambanide ni gu futa. Gasi gu pwisisa tshamuselo nya malito yaya, hi yede gu dundruga gu khethu gale yoyo gu di gu thumiswa tinta yi nga ba yi girwa khu karbhonu, ghoma ni mati. Muthu nyo khaguri si di gu kodzega gu a phara exponja nyo nagane a futa esi si nga lowa. Khu kharato, ma gu futwa mangava, kha ma nga ba ma wonega gambe. Vathu kha va nga ba va si kodza gu wona esi si nga ba si lovidwe. Si di gu gira gu khatshi mangava yoyo gima kha ma manega. Si ngu tsakisa guti gu khethu Jehovha khandri a gu theya X avbo nya sighoho sathu, ganiolu a gu si futa khu gu vbeleya. — Ndzi. 51:9.

12. Ginani hi gi hevbulago khu giyeyedzo nya lipfhi?

¹² Jehovha, a gu thumisa gimbe giyeyedzo gasi gu yeyedza edzi a divaleyago khidzo sighoho sathu khu gu vbeleya. Uye wari, khuye: “Nyi fuviside guvivba gwago, gu fanana ni hunguva, ni sighoho sago nyi si mwalalegiside kha nga lipfhi.” (Isa. 44:22) Tepo Jehovha a hi divaleyago, sa gu fana ni gu ba a siha sighoho sathu omu nya lipfhi, gasi uye gumogo ni ethu hi si si kodzi gu si wona.

13. Tepo Jehovha a divaleyago sighoho sathu, ha gu dzipwa kharini?

¹³ Siyeyedzo sesi sa gu hi hevbudza ginani? Tepo Jehovha a divaleyago sighoho sathu, ethu kha hi yeli gu dzipwa nandru khu sighoho hi giridego womini wathu watshavbo. Dzegiso wa Jesu wu livbide sighoho sathu khu gu vbeleya. Tepo Jehovha a divaleyago sighoho sathu, sa gu gira gu khatshi gima kha ha ghoha. Owu khuwo divalelo nya lisine wu tago khiyo ga Jehovha, hi wu manago tepo hi dzi layago khu sighoho hi giridego.

JEHOVHA A GU HI DZUMELEYA GASI HI KHALA GAMBE DZIPARI DZAYE

14. Khu ginani hi nga tumbago divalelo wa Jehovha? (Wona dzifotu.)

¹⁴ Divalelo nya lisine wu tago khiyo ga Jehovha, wu ngu hi dzumeleya gu hi manega ni wupari nya wadi naye. Uwo wu ngu hi phasa gu potsa gu khaleya gu dzipwa nandru. Kha hi yeli gu thava gu khethu Jehovha a gu vega likhulo ni gu a gu vbwetedzeya ndziya gasi gu hi tsayisa. Isoso gima kha si na nga girega. Khu ginani hi nga tumbago Jehovha tepo a hi embeyago gu khuye a ngu hi divaleya? Jehovha a di embeya muprofeti Jeremiya gu khuye: “Nyi tsetselede guvivba ni sighoho sawe, gima kha nyi na nga si alakanya gambe.” (Jer. 31:34) Na gu ganeya khu malito yaya, mupostoli Pawulo a di ganeya malito nyo fane tepo a nga ganeya gu khuye: “Kha nyi na nga dundruga gambe sighoho sawe.” (Hebh. 8:12) Ganiolu, isoso sa gu tshamuseya ginani?

15. Jehovha o vbweta gu khuye ginani tepo a ganeyago gu khuye kha na nga dundruga gambe sighoho sathu?

¹⁵ Umo nya Bhibhiliya lito “gu dundruga,” khandri tepo yatshavbo li thulago muthu nyo khaguri a dundrugago gilo gyogyo mwendro gu pimisa khu gilo gyogyo. Wulangani nya isoso, la gu thula muthu nyo khaguri a girago gilo nyo khaguri. Gighohi nya gikhongolo gi nga ba gi khokhotedwe vbafuvbi ni Jesu gi di mu embeya gu khigyo: “Jesu, nyi dundruge tepo u na beyago Mufumoni gwago.” (Luka 23:42, 43) Igyo gi di gu lomba Jesu gasi a mu gireya gilogyo. Jesu a di embeya gighohi gile gu khuye a di hadzi gu gi wusa khu ga ava va fudego. Tepo Jehovha a hi embeyago gu khuye kha na nga dundruga sighoho sathu, uye a gu hi embeya gu khuye a na hi divaleya nigu kha na nga gira gilo gasi gu hi tsayisa khu sighoho sathu mindru wa tshigu.

16. Bhibhiliya ya gu hi fananisa ni ginani?

¹⁶ Bhibhiliya yi ngu thumisa gimbe giyeyedzo gasi gu hi phasa gu pwisisa gutshulega hi gu manago khu kotani nya divalelo nya lisine. Khu kotani nya gu mba vbeleya gwathu, ha gu fananiswa ni “dzigumbi nya gighoho.” Ganiolu, khu kotani nya divalelo wa Jehovha, ethu ha gu fananiswa nga dzigumbi dzi nga ‘tshudziswa avba nya sighoho.’ (Rom. 6:17, 18; Gutu. 1:5) Tepo hi dzitigo gu khethu Jehovha a hi divalede, hi nga tsaka nga dzigumbi dzi tsakago tepo dzi tshulegago.

17. Gu divaleya gwa gu resa gu hawuluga khu ndziya muni? (Isaya 53:5)

¹⁷ Leri Isaya 53:5. Giyeyedzo nyo hegise hi na bhulago khigyo, gya gu hi fananisa ni vathu va gu na ni madwali ma songago. Khu kotani nya dzegiso owu Jehovha a hi ningidego khu gu thumisa Gyanana gyaye, hi nga ganeya khu ndziya nyo fananise gu khethu Jehovha a hi hawulugiside. (1 Ped. 2:24) Tepo hi ghohago, ha gu vega wupari wathu ni Jehovha mhangoni, ganiolu khu kotani nya dzegiso, si ngu kodzega gu a hi divaleya hi bwe hi manega gambe ni wupari nyo tiye naye. Gu fana ni muthu a tsakago tepo a hawulugiswago madwali nya makhongolo, anethu hi ngu tsaka tepo wupari wathu ni Jehovha wu hawulugiswago ni gu bwe hi tsakedwa khuye.

DIVALELO WA JEHOVHA WA GU KUHA WOMI WATHU KHU NDZIYA MUNI?

18. Ginani hi gi hevbulago maningano ni siyeyedzo si ganeyago khu divalelo wa Jehovha? (Wona kwadru yi gu khiyo “Jehovha a gu hi divaleya khu ndziya muni?”)

¹⁸ Ginani hi gi hevbudego maningano ni siyeyedzo si ganeyago khu divalelo wa Jehovha? Tepo a hi divaleyago, uye a gu gira isoso khu gu vbeleya. Khu kharato, hi nga manega ni wupari nya wadi ni Papayi wathu wa ndzadzini. Hi ngu dziti gu khethu divalelo wa Jehovha giningwa a hi ningidego kholu a hi haladzago ni olu a gu na ni wuwadi nasiri kholu hi yedwago khugo. — Rom. 3:24.

19. a) Hi yede gubonga khu ginani? (Varoma 4:8) b) Hi na bhula khu ginani ga ndrima yi landreyago?

¹⁹ Leri Varoma 4:8. Hi ngu bonga ngudzu kholu Jehovha a hi divaleyago. (Ndzi. 130:4) Ganiolu, gasi gu hi divaledwa khu Jehovha, hi yede gu gira gilo nya lisima. Jesu a di tshamuseya gu khuye: “Mwa gu mba divaleya vathu sihoso sawe, Papayi wanu nuye kha na nga mi divaleya sihoso sanu.” (Mat. 6:14, 15) Khu kharato, hi yede gu pimedzeya Jehovha hi bwe hi divaleya vambe. Ganiolu, hi nga si gira kharini isoso? Ga ndrima yi landreyago, hi na wona gu khethu isoso sa gu pata gu rini.