Hi nga yeyedza kharini gubonga khu divalelo wa Jehovha?

1-2. Giemo gyathu gya gu fana kharini ni egi gya muphya a khumbugidwego avbo nya paragrafu 1?

DUNDRUGEYA muphya nyo khaguri a gu na ni vavelegi nyo ghanye. Litshigu limwedo gya gu girega gilo nyo mba tsakisa, vavelegi vaye va gufa avbo nya mhango nyo khaguri nya movha. Mahungu yoyo ma gu mu vbedza ngudzu tshivba. Ganiolu, a nga gu viredwa khu mahungu nya mba yadi. Uye a gu tugula gu khuye vavelegi vaye va di hagana ni dzitsapawu va bwe va gira mangava nya mangi. Olu nga dundrugeya khesi, wulangani nyo tshaledwi khu thomba a gu tshaledwa khu mangava ni gu vathu va gu khaleya gu mu hengula. Uye a mwalo makodzelo nyo livbe mangava yoyo.

² Khu ndziya nyo fane, giemo gyathu gi ngu fana ni egi gya muphya yoyu. Vavelegi vathu nyo pheye, Adhamu ni Evha, va di gu vbelede nigu va di gu vbanya omu nya paradhesi nyo mbure. (Gen. 1:27; 2:7-9) Avo va diri ni lithomo nyo vbanye na va tsakide kala gupindruga. Ganiolu, satshavbo si di vbindrugedza. Avo va di luza ndranga nya yadi yi nga ba yiri Paradhesi va bwe va luza lithomo nya gu vbanye kala gupindruga. Khu yevbini thomba va nga tshiyela sanana sawe? Bhibhiliya yari khiyo: “Gighoho gi bede mafuni khu kotani nya muthu moyo, [Adhamu] nigu gighoho gi reside gufa. Khu kharato, gufa gu thaphede vathu vatshavbo mafuni kholu vatshavbo va ghohide.” (Rom. 5:12) Thomba hi nga tshiyedwa khu Adhamu, gighoho gi resago gufa. Thomba yeyi hi yi manidego, ya gu fananiswa ni mangava nya mangi, ayo nya gu mwalo ni moyo wathu a si kodzago gu ma livba. — Ndzi. 49:8.

3. Khu ginani sighoho sathu si fanago ni “mangava”?

³ Jesu a di fananisa sighoho ni “mangava.” (Mat. 6:12 NM; Luka 11:4) Tepo hi ghohago sa gu fana ni gu ba hi dhevha Jehovha. Jehovha, adzina na hi hengula tengo nyo khaguri khu kotani nya sighoho sathu. Nari khatshi Jehovha kha gira malulamiselo gasi a hi divaleya sighoho sathu, hi di hadzi gu livba sighoho sathu khu gufa, nigu hi di hadzi gu mba mana lithomo nya gu vbanye gambe. — Rom. 6:7, 23.

4. a) Nari khatshi kha ha nga phaswa, ginani gi nga hadzi gu giregeya sighohi satshavbo? (Ndzimo 49:7-9) b) Lito “gighoho” la gu thula ginani omu nya Bhibhiliya? (Wona kwadru yi gu khiyo: “Gighoho.”)

⁴ Ina si ngu kodzega gu mana satshavbo esi Adhamu ni Evha va nga si luza? Kha si kodzegi khu tshivba yathu. (Leri Ndzimo 49:7-9.) Nari khatshi kha ha nga phaswa, hi di hadzi gu mba manega ni gutumba nya gu ta wuswe hi vbanya gambe mindru wa tshigu. Hi di hadzi gu fana ni sirengo, si fago na siri mwalo gutumba nya gu wuswe si vbanya gambe. — Muh. 3:19.

5. Papayi wathu nya lihaladzo, a hi phaside kharini gasi gu livba gighoho hi tshiyedwego khu Adhamu? (Wona kapa.)

⁵ Dundrugeya khu muphya a khumbugidwego gupheyani nya ndrima yeyi, a di hadzi gu dzipwa kharini a gu dugeleya mwama nyo khaguri nya gighanyi a dzi ningedzeya gasi gu livba mangava yaye yatshavbo? Nya mba kanakana, muphya yoyu a di hadzi gu yeyedza gubonga a bwe a dzumeya giphaso gegi. Khu ndziya nyo fane, Papayi wathu nya lihaladzo, Jehovha, a hi ningide giphaso gasi gu livba gighoho hi tshiyedwego khu Adhamu. Jesu a tshamusede isoso khu ndziya yeyi: “Nungungulu haladzide ngudzu litigo gu kala a ningeya Gyanana gyaye gi velegidwego gyonga, gasi ni wevbini a khodwago gwagyo a si fuviswi, ganiolu a mana womi nya gupindruge.” (Joh. 3:16) Gu diga isoso, giphaso mwendro giningwa gegi gi ngu gira gu hi manega ni wupari nya wadi ni Jehovha.

6. Hi na bhula khu ginani avba nya ndrima yeyi, nigu khu ginani?

⁶ Hi nga wuyedwa kharini khu giningwa gegi nyo hlamadzise hi bwe hi divaledwa sighoho sathu mwendro “mangava”? Gasi gu mana hlamulo nya giwudziso gegi hi na bhula khu malito nyo khaguri ma khumbugwago omu nya Bhibhiliya hi bwe hi wona mitshamuselo yakone. Tepo hi dundrugeyago khu tshamuselo nya malito yaya, hi na engedzeya gu yeyedza gubonga gwathu khu divalelo wa Jehovha.

MAKUNGO: GU WUSEDZA WUPARI

7. a) Ginani gambe egi Adhamu ni Evha va gi luzidego? b) Kha nga situgulwana sa Adhamu ni Evha ginani hi yedego gu gira? (Varoma 5:10, 11)

⁷ Tepo Adhamu ni Evha va nga ghoha, avo kha va luza basi womi nyo pindruge, ganiolu avo va di khala valala va Papayi wawe, Jehovha. Na va nga si ghohi, Adhamu ni Evha va di gu gira gipandre nya ndranga ya Nungungulu. (Luka 3:38) Ganiolu, tepo va nga ghoha, Jehovha kha va dzumeleya gu gira gipandre nya ndranga yaye, isoso si giregide na va nga si velegi sanana. (Gen. 3:23, 24; 4:1) Kha nga situgulwana sa Adhamu ni Evha, hi yede gu wusedza wupari ni Jehovha. (Leri Varoma 5:10, 11.) Khu mambe maganelelo, hi yede gu haguleya wupari nya wadi naye. Guya khu referensiya nyo khaguri, lito li thumisidwego avba khu Gigreki li gu khilo “gu wusedza wupari” li nga thula “gu gira wupari ni nala wago.” Esi si hlamadzisago, khu gu Jehovha khuye a nga vbwetedzeya ndziya nya gu isoso si kodzega. Khu ndziya muni?

MALULAMISELO: PHASO NYA GU DIVALEDWE SIGHOHO

8. Ginani phaso nya gu divaledwe sighoho?

⁸ Phaso nya gu divaledwe sighoho, malulamiselo aya Jehovha a ma giridego gasi gu vathu va gu sighohi va si kodza gu gira wupari nya wadi naye. Isoso sa gu pata gu vbindrugedza gilo nyo khaguri khu gimbe gi gu na ni tengo nyo fane. Khu giyeyedzo, wa gu tshuka u dzimedza gilo nyo khaguri mwendro gi ghoheka, u nga gi tshikedza khu gimbe gilo nyo fane. Milowo nya Gigreki ya gu tshamuseya ndziya eyi Jehovha a giridego gu si kodzega gu muthu ni muthu a manega ni wupari naye. — Rom. 3:25.

9. Malulamiselo muni Jehovha a giridego gasi gu divaleya sighoho sa Vaisrayeli?

⁹ Jehovha giride malulamiselo gasi gu divaleya sighoho sa Vaisrayeli ni gu manega ni wupari nya wadi naye. Vaisrayeli, va di gu gira buzo wu nga ba wu ranwa pwani litshigu nya gu divaledwe sighoho, gumogo khu mwaga. Litshigu lolo, muprista nya khongolo a di gu ningeya sirengo kha nga miphaso khu lina nya vathu va Israyeli. Khu lisine, miphaso nya sirengo kha yi si kodzi gu handza sighoho nya vathu khu gu vbeleya kholu sirengo si mwalo lisima guvbindra vathu. Ganiolu, tepo khiyo Vaisrayeli va dzi layidego va nga ba va ningeya miphaso yi nga ba yi lombwa khu Jehovha, uye a di gu dzi emisede gu divaleya sighoho sawe. (Hebh. 10:1-4) Miphaso eyi Vaisrayeli va nga ba va gira ga litshigu nya gu divaledwe sighoho ni dzimbe dzitepo, yi di gu va phasa gu wona gu khavo avo sighohi nigu va di gu vbweta gilo nya gikhongolo gasi gu handza sighoho sawe.

10. Ginani egi Jehovha a giridego gasi hi divaledwa sighoho sathu khu gu vbeleya?

¹⁰ Ginani egi Jehovha a giridego gasi hi divaledwa sighoho sathu khu gu vbeleya? Uye a giride malulamiselo gasi gu Gyanana gyaye gi ningedwa “gumogo gasi a handza sighoho nya vathu.” (Hebh. 9:28) Jesu ‘a ningede womi waye gasi gu dzegisa nya vangi.’ (Mat. 20:28) Ginani dzegiso?

TENGO: DZEGISO

11. a) Guya khu Bhibhiliya, ginani dzegiso? b) Ginani gi nga ba gi vbwetega gasi gu livba dzegiso?

¹¹ Guya khu Bhibhiliya, dzegiso i tengo wu livbidwego gasi hi si kodza gu khala dzipari dza Jehovha.a Guya khu mawonelo ya Jehovha, dzegiso wa gu wusedza esi hi nga si luza. Khu ndziya muni? Dundruga gu khuwe Adhamu ni Evha va luzide womi nyo vbeleye ni lithomo nyo vbanye kala gupindruga. Khu kharato, dzegiso wu di yede gu enedza tengo nya esi hi nga si luza. (1 Thim. 2:6) Uwo, wu di gu yede gu livbwa basi khu mwama nya khongolo, 1) a vbeledego, 2) a gu na ni makodzelo nyo vbanye kala gupindruga mafuni ni 3) a dzi emisedego gu diga satshavbo a ningeya womi waye kha nga dzegiso. Khu kharato, womi nya muthu yoyo wu di hadzi gu livba esi hi nga si luza.

12. Khu ginani Jesu a ga ba a dingana gasi gu livba tengo watshavbo wu nga ba wu vbwetega nya dzegiso?

¹² Wona sighelo siraru si nga gira gu Jesu a ninganedwa khu gu livba tengo nya dzegiso. 1) Uye a di gu vbelede — “uye kha ghoha.” (1 Ped. 2:22) 2) Kholu uye a diri ni makodzelo nyo vbanye kala gupindruga mafuni. 3) Uye a di gu dzi emisede gufa gasi gu hi dzegisa. (Hebh. 10:9, 10) Kha nga muthu nyo vbeleye, Jesu a di gu fana ni mwama nyo pheye Adhamu na nga si ghohi. (1 Kor. 15:45) Khu gu ba Jesu a hi fede, a di gu dingana gasi gu wusedza satshavbo esi Adhamu a nga si luza. (Rom. 5:19) Jesu a di khala “Adhamu nyo hegise.” Khu kharato, kha hi nga gu vbweta gambe mumbe muthu nyo vbeleye gasi gu ta livba esi si nga luzwa khu Adhamu. Jesu a hi fede “gumogo si vbeleya.” — Hebh. 7:27; 10:12.

13. Khu gwevbini gu hambana gu gomogo avbo nya phaso nya gu divaledwe sighoho ni dzegiso?

¹³ Ganiolu, khu gwevbini gu hambana nya phaso nya gu divaledwe sighoho ni dzegiso? Phaso nya gu divaledwe sighoho ndziya eyi Nungungulu a yi thumisidego gasi gu wusedza wupari nya wadi a gu nawo ni vathu. Dzegiso i tengo wu livbidwego gasi vathu va si kodza gu manega ni wupari ni Jehovha. Tengo wowo wa gu emedwa khu novba nya lisima wa Jesu wu vbaladzidwego khu kotani yathu. — Efes. 1:7; Hebh. 9:14.

MIHANDRO: GUTSHULEGA NI GU WONWA NGA VATHU NYO LULAME

14. Ginani hi na bhulago khigyo olu nigu khu ginani?

¹⁴ Hi nga wuyedwa kharini khesi Jehovha a hi giredego? Gasi gu mana hlamulo nya giwudziso gegi, hi na bhula khu malito mavili ma gomogo omu nya Bhibhiliya ma na hi phasago gu pwisisa edzi hi nga wuyedwago khidzo khu divalelo wa Jehovha.

15-16. a) Ginani gi kodzegidego khu kotani nya dzegiso wu livbidwego? b) Isoso sa gu hi kuha kharini?

¹⁵ Bhibhiliya yari khiyo, khu kotani nya olu dzegiso wu nga livbwa, ethu hi tshulegide. Mupostoli Pedro a tshamusede gu khuye: “Mu ngu dziti gu khenu kha sa thumiswa silo si fuvago nya nga prata mwendro oru gasi mu tshudwa avba nya womi wanu nya mba phasa gilo owu mu hakhidego ga vakokwe vanu, ganiolu mu tshudwe khu novba wu gu na ni lisima ngudzu, nya nga novba nya ginvutana gi gu mwalo gihoso, gi agidego; a gu novba wa Kristo.” — 1 Ped. 1:18, 19.

¹⁶ Khu kotani nya muphaso nya dzegiso, hi tshulegide ga gighoho ni gufa. (Rom. 5:21) Hi ngu bonga ngudzu Jehovha ni Jesu khu gu ba va hi tshudziside khu novba nya lisima wa Jesu. — 1 Kor. 15:22.

17-18. a) So thula ginani gu khala muthu nyo lulame? b) Ha gu wuyedwa kharini khu gu ba Jehovha a hi wona nga vathu nyo lulame?

¹⁷ Bhibhiliya yari khiyo, Jehovha a gu wona sithumi saye na si lulamide. Khu kotani nya isoso, uye kha lombi gu khuye hi livba khu sighoho hi giridego. Khu gu ba a gira isoso, Jehovha kha ndragi milayo yaye yi ganeyago khu gululama. Uye kha hi woni na hi lulamide khu gu ba hi yedwa khu gululama, nigu Jehovha khandri khatshi a gu dzumeleyana ni sighoho hi girago. Ganiolu, Jehovha a dzi emisede gu hi divaleya kholu hi yeyedzago gukhodwa ga esi Uye ni Jesu va giridego gasi gu hi dzegisa. — Rom. 3:24; Gal. 2:16.

¹⁸ Ha gu wuyedwa khu ginani tepo Jehovha a hi wonago nga vathu nyo lulame? Vambe va wonwago nga vathu nyo lulame, va hathidwe gasi gu ya fuma ni Jesu ndzadzini ni gu va khade sanana sa Nungungulu. (Tit. 3:7; 1 Joh. 3:1) Nungungulu a divalede sighoho sawe, si gira gu khatshi avo gima kha va ghoha va bwe va ninganedwa khu gu beya Mufumoni waye. (Rom. 8:1, 2, 30) Vale va gu na ni gutumba nyo vbanye mafuni, va wonidwe na va lulamide nga dzipari dza Nungungulu va bwe va divaledwa sighoho sawe. (Jak. 2:21-23) Vathu nya vangi va na vbulugago avba nya Arimagedhoni, kha va na ngafa gambe. (Joh. 11:26) “Va nya gululama” ni “ava nya mba lulama” va fudego, va na wuswa va vbanya gambe. (Mith. 24:15; Joh. 5:28, 29) Khu lisine, satshavbo sithumi nyo engise sa Jehovha sa omu mafuni si na “hengeya wudhumoni nya gutshulege nya sanana sa Nungungulu.” (Rom. 8:21) Hi ngu vireya khu maho nyo fuviye tepo khiyo hi na khalago sanana nyo vbeleye sa Papayi wathu Jehovha!

19. Giemo gyathu gi vbindrugedzide kharini khu kotani nya esi Jehovha ni Jesu va hi giredego? (Wona kwadru yi gu khiyo: “Ha gu wuyedwa kharini khesi Jehovha a hi giredego?”)

¹⁹ Khu lisine, giemo gyathu gi ngu fana ni egi gya muphya a khumbugidwego gupheyani nya ndrima yeyi, a luzidego satshavbo a bwe a tshiyedwa mangava nya mangi nya gu kha nga ba a si kodza gu ma livba. Ganiolu, hi ngu mu bonga ngudzu Jehovha khu gu ba a hi phaside. Giemo gyathu gi vbindrugedzide kholu Jehovha a giridego malulamiselo gasi gu divaleya sighoho sathu, nigu Jesu a livbide tengo nya wukhongolo, a gu dzegiso. Gukhodwa gwathu ga Jesu, gu ngu hi dzumeleya gu hi tshulega avbo nya gighoho ni gufa. Tepo Jehovha a divaleyago sighoho sathu, sa gu gira gu khatshi gima kha ha ghoha. Egi gi gu na ni lisima gu vbindra satshavbo, khu gu olu hi nga si kodza gu manega ni wupari nya wadi ni Papayi wathu nya lihaladzo, Jehovha.

20. Ginani hi na bhulago khigyo ga ndrima yi landreyago?

²⁰ Tepo hi dundrugeyago khesi Jehovha ni Jesu va hi giredego, ha gu engedzeya gu va bonga. (2 Kor. 5:15) Nya mba na giphaso gyawe hi di hadzi gu mba manega ni gutumba. Ganiolu, divalelo wa Jehovha wa gu thula ginani avbo gwathu? Hi na bhula khiso ga ndrima yi landreyago.