Ndziya nya yadi nya gu emisane ni gu mba lulama

1-2. Vathu nya vangi va gu gira ginani tepo avo mwendro vambe vathu va pharwago khu ndziya nya mba yadi, nigu ginani hi na bhulago khigyo?

VATHU nya vangi muhuno va ngu pharwa khu ndziya nya mba lulama. Avo va ngu tshaniswa kholu va gu sisiwana, khu kotani nya omu vatago khumo, edzi va nga khala khidzo ni simbe silo. Vathu nya vangi va ngu tshaniseka khu kotani nya olu vathu nyo khaguri nyo ghanye mwendro vathangeyi nya mufumo va dzi garadzago basi gu mana dzitsapawu. Gu mba lulama gogo adzina kha gu hi kuhi khu gu kongoma, ganiolu gumbe gu ngu hi kuha.

² Vathu nya vangi va ngu goroga khu kotani nya olu va pharwago khu ndziya nya mba yadi mwendro khu gu wona vambe vathu na va gu tshaniswa. Vathu vatshavbo va gu vbweta gu pharwa khu ndziya nya yadi ni gu vbanya khu gurula. Vathu nyo khaguri va ngu zama gu lulamisa sigaradzo va si wonago mafuni mwendro tigoni gwawe. Avo va ngu wugeya mifumo ni milayo yawe mwendro gu hatha vathangeyi nya politika va tumbisago gu lulamisa sigaradzo sawe. Ganiolu, kha nga Makristo ho hevbudzwa gu mba gira “gipandre nya litigo” ni gu vireya Mufumo wa Nungungulu gasi gu fuvisa gu mba lulama gwatshavbo. (Joh. 17:16) Ganiolu, ethu hi ngu simama gu garadzega mwendro gu zangari tepo hi wonago vambe na va gu pharwa khu ndziya nya mba yadi. Hi nga dzi wudzisa gu khethu: ‘Ginani nyi yedego gu gira sa gu girega isoso? Ina gyomo gilo nyi nga girago olu maningano ni gu mba lulama?’ Gasi gu hlamula siwudziso sesi, hongoleni hi pheya khu gu wona edzi Jehovha ni Jesu va dzipwago khidzo khu kotani nya gu mba lulama.

JEHOVHA NI JESU VA NGU NYENYA GU MBA LULAMA

3. Khu ginani si pwisisegago gu ethu hi nyenya gu mba lulama? (Isaya 5:7)

³ Bhibhiliya yi ngu tshamuseya gu khiyo khu ginani hi gu mba tsaka khu gu pharwa khu ndziya nya mba yadi mwendro gu wona vambe na va gu pharwa khu ndziya yeyi. Iyo yo tshamuseya gu khiyo Jehovha a hi vangide khu mufananiso waye, nigu uye a ngu “gola gululama ni nayo.” (Ndzi. 33:5; Gen. 1:26) Uye gima kha giri silo si gu mba lulama nigu kha vbweti gu khuye ni wevbini muthu a gira isoso! (Dhet. 32:3, 4; Mik. 6:8; Zak. 7:9) Khu giyeyedzo, dziteponi dza muprofeti Isaya, Jehovha a pwide “dzihuwa ni miketo” ya Vaisrayeli nya vangi va nga ba va tshaniswa khu vambe Vaisrayeli. (Leri Isaya 5:7.) Jehovha a di tsayisa vale va nga ba va si engisi Nayo waye ni gu phara vambe khu ndziya nya mba lulama. — Isa. 5:5, 13.

4. Jesu a di gu dzipwa kharini tepo vambe va nga ba va pharwa khu ndziya nya mba yadi? (Wona fotu.)

⁴ Gu fana ni Jehovha, Jesu a ngu gola gululama nigu a ngu nyenya gu mba lulama. Ga litshigu limwedo, Jesu a di wona mwama moyo a nga ba a haside libogo limwedo. Jesu a di pweya wusiwana mwama wule a bwe a mu hawulugisa libogo laye, ganiolu tepo vathangeyi nya dzitshetshe va nga wona isoso va di goroga. Avo va di embeya Jesu gu khavo a di gu fanya nayo wa Sabhadho nigu va di si khathali khu mwama wule a nga ba a tshaniseka. Jesu dzipwide kharini khu isoso? Uye a di ‘goroga khu kotani nya guvivbe nya myonyo yawe.’ — Marko 3:1-6.

5. Ginani hi yedego gu gi dundruga maningano khu gu goroga khu tepo nyo laphe?

⁵ Kha nga olu Jehovha ni Jesu va gorogago tepo va wonago vathu na va gu pharwa khu ndziya nya mba yadi, kha sa vivba gu anethu hi dzipwa kharato. (Efes. 4:26) Ganiolu, hi yede gu woneleya giviti gyathu ni gu hi dundruga gu khethu ethu hi mwalo makodzelo nya gu vbedze gu mba lulama. Ha gu simama gu zangari khu tepo nyo laphe hi nga dwala mwendro gu garadzega ngudzu. (Ndzi. 37:1, 8; Jak. 1:20) Ganiolu, ginani hi yedego gu gira gasi hi emisana ni gu mba lulama? Hi nga gira isoso khu gu hevbula khu giyeyedzo gya Jesu.

JESU A EMISANIDE KHARINI NI GU MBA LULAMA?

6. Vathu nyo khaguri va di gu pharwa kharini tepo khiyo Jesu a nga ba a romo mafuni? (Wona fotu.)

⁶ Jesu a wonide vathu nya vangi na va gu pharwa khu ndziya nya mba yadi. Uye a wonide edzi vathu va nga ba va tshaniswa khidzo khu vathangeyi nya dzitshetshe. (Mat. 23:2-4) Uye a di gu dziti gambe edzi vafumeli nya Varoma va nga ba va tshanisa khidzo vathu. Vathu nya vangi va di gu vbweta gu tshulega mandzani ga Varoma. Vambe va di gu dzi emisede gu dwana ni Varoma. Ganiolu, Jesu kha gira gipandre nya tsawa wu nga ba wu dwana gasi gu vbindrugedza silo ndrani nya mufumo wowo. Tepo a nga tugula gu khuye vathu va di gu vbweta gu mu gira pfhumu, Jesu a di dzi hambanisa navo. — Joh. 6:15.

7-8. Khu ginani Jesu a nga mba zama gu fuvisa gu mba lulama tepo khiyo a nga ba a romo mafuni? (Johane 18:36)

⁷ Tepo khiyo a nga ba a romo mafuni, Jesu kha zama gu thuma ni vathangeyi nya politika gasi gu fuvisa gu mba lulama. Khu ginani Jesu a nga mba gira isoso? Kholu a di gu dziti gu khuye a mwalo muthu mwendro pfhumu nya vathu yi gu na ni makodzelo nya gu gire isoso. (Ndzi. 146:3; Jer. 10:23) Nigu vathu va mwalo makodzelo nya gu duse egi gi vangago gu tshaniseka gwatshavbo hi gu nago. Sathane Dhiyabhulosi khuye a fumago mafu yaya. Uye a vivbedwe ngudzu khu monyo nigu vathu nya vangi mafuni momu va ngu mu pimedzeya. (Joh. 8:44; Efes. 2:2) Ambari vathu nya vadi kha va si kodzi gu lulamisa sigaradzo nya litigo leli kholu anavo dzimbe dzitepo kha va gire esi si lulamidego.

⁸ Jesu a di gu dziti gu khuye Mufumo wa Nungungulu basi wu na fuvisago sigaradzo satshavbo khu gu vbeleya. Khiso si nga mu gira a thuma khu sighingi gasi gu “tshumayela ni gu huweleya mahungu nya yadi nya Mufumo wa Nungungulu.” (Luka 8:1) Uye a di tiyisegisa “ava va gu na ni ndzala ni lidora nya silo nyo lulame” gu khuye mahegiso nya wuvivbi ni gu mba lulama ma na vboha. (Mat. 5:6; Luka 18:7, 8) Wu mwalo mufumo nya vathu wu na si kodzago gu gira guvbindrugedza gogo. Mufumo wa Nungungulu khuwo basi wu na girago isoso, nigu Mufumo wa Nungungulu kha wu giri “gipandre nya litigo leli.” — Leri Johane 18:36.

PIMEDZEYA JESU TEPO U EMISANAGO NI GU MBA LULAMA

9. Ginani gi gu tiyisegisago gu khuwe Mufumo wa Nungungulu khuwo basi wu na fuvisago gu mba lulama gwatshavbo?

⁹ Kha nga olu hi vbanyago matshigoni nya gu hegise mafuni momu, hi ngu wona gu mba lulama nya gungi guvbindra ogu Jesu a nga gu wona tepo a nga ba a romo mafuni. Ganiolu kha nga dziteponi dza Jesu, ava va vangago gutshaniseka khavo va mowo, khu Sathane ni vathu va mu pimedzeyago. (2 Thim. 3:1-5, 13; Gutu. 12:12) Gu fana ni Jesu hi ngu dziti gu khethu Mufumo wa Nungungulu khuwo basi wu na fuvisago wuvivbi watshavbo. Ethu ha gu tshumayela maningano ni Mufumo wa Nungungulu, nigu kha hi giri sitereka mwendro gu tumba mifumo gasi gu vbedza gu mba lulama. Wona giyeyedzo gya ndriyathu nya nyamayi nyo pwani khu Stacy.a Na si hevbuli lisine, Stacy a pategide avba nya sitereka nya singi gasi gu vbedza gu mba lulama. Ganiolu, hwane nya tepo nyo khaguri a di pheya gu kanakana gu khuye esi a girago si di hadzi gu phasa vathu nigu si di hadzi gu lulamisa sigaradzo. Uye wari khuye: “Tepo khiyo nyi nga ba nyi gira sitereka, nyi di gu dzi wudzisa gu kheni nyi di gu gira esi nya sadi gani. Ganiolu, olu nyi ngu tiyisega gu kheni Mufumo wa Nungungulu wu na lulamisa sigaradzo satshavbo khu gu vbeleya. Nyi ngu dziti gu kheni Jehovha a na vbedza gwatshavbo gutshaniseka, a gu gilo nyi gu mba gi kodza gu gira.” — Ndzi. 72:1, 4.

10. Guya khu Matewu 5:43-48, khu ginani hi gu mba zama gu vbindrugedza milayo ni mifumo? (Wona fotu.)

¹⁰ Vathu nya vangi muhuno va gu beya omu nya mitsawa yi zamago gu vbindrugedza mifumo. Ganiolu, nya vangi vakone va ngu goroga ngudzu nyo bwe va ndraga milayo va bwe va gireya silo nyo vivbe vambe. (Efes. 4:31) Ndriyathu nya mwama nyo pwani khu Jeffrey wari khuye: “Eni nyi ngu dziti gu kheni tepo vathu va girago sitereka, avo va nga vbiredzeya gu goroga khavbovbo va pheya gu tshungunuleya silo, vaba ni gu bayisa vambe vathu.” Ganiolu, Jesu a gu hi hevbudza gu haladza vathu vatshavbo, ambari na va si pwanani ni ethu mwendro gu hi wugeya. (Leri Matewu 5:43-48.) Nigu kha nga Makristo hi ngu gira satshavbo gasi gu mu pimedzeya.

11. Khu ginani dzimbe dzitepo si garadzago gu pimedzeya Jesu?

¹¹ Ambari olu hi dzitigo gu khethu Mufumo wa Nungungulu wu na fuvisa gu mba lulama, si nga hi garadzeya gu pimedzeya Jesu tepo hi pharwago khu ndziya nya mba yadi. Wona esi si dugeledego Janiya a nga pharwa khu ndziya nya mba yadi khu kotani nya lifumbo laye. Uye wari khuye: “Nyi di goroga ngudzu. Isoso si di nyi vbisa ngudzu monyo nigu nyi di gu vbweta gu kheni vathu vale va tsayiswa. Khavbovbo, nyi di pimisa gu gira gipandre nya tsawa wu nga ba wu wugeya isoso. Nyi di gu pimisa gu kheni gu gira isoso si di hadzi gu nyi phasa gu dzipwa gwadi.” Khu gu gimbiya nya tepo, Janiya a di wona gu khuye a di yede gu vbindrugedza mapimiselo yaye. Uye a gu engedza gu khuye: “Nyi di tugula gu kheni, wulangani nya gu tumbi Jehovha, nyi di pheya gu tumba esi vathu va nga ba va ganeya nyi bwe nyi va tumba. Khu kharato, nyi di hunga gu duga khumo nya tsawa wowo nyi bwe nyi si pategi gambe avba nya silo soso.” Ambari ha gupwa wuvi tepo hi pharwago khu ndziya nya mba yadi mwendro gu wona vambe na va gu pharwa khu ndziya yayimweyo, hi yede gu dzi woneya gasi gu woneleya zanga yathu hi bwe hi si giri gipandre nya litigo leli. — Joh. 15:19.

12. Khu ginani hi yedego gu dzi woneya ni esi hi lerigo, gu sixitiri ni gu sipwa?

¹² Ginani gi na hi phasago gu simama gu rula tepo hi pharwago khu ndziya nya mba yadi? Gimwegyo nya gilo hi nga girago khu gu dzi woneya ni esi hi lerigo, hi sixitirigo ni gu sipwa. Silo nyo khaguri hi sipwago omu nya dziredhi-sociais sa gu ganedwa basi gasi gu hi hlamala khiso ni gu ngurangureya mufumo. Dzitepo nya dzingi, vajornalista va gu ganeya mawonelo yawe nasiri esi kamo si nga girega. Ambari mahungu nyo khaguri nari lisine, kha hi yeli gu zama gu lulamisa gigaradzo gyogyo khu gu simama gu leri khu mahungu yoyo. Khu lisine, ha gu vbedza tepo nyo laphe na hi gu leri mahungu nya nga aya hi nga engedzeya gu garadzega, hi vbisega mwendro gu goroga. (Mav. 24:10) Gu diga isoso, hi nga diga gu thangisa Mufumo wa Nungungulu womini gwathu hi bwe hi divala gu khethu khuwo basi wu na fuvisago gutshaniseka gwatshavbo.

13. Gu leri Bhibhiliya tshigu ni tshigu, si na hi phasa kharini tepo hi wonago vathu na va gu pharwa khu ndziya nya mba yadi?

¹³ Ha gu leri Bhibhiliya tshigu ni tshigu hi bwe hi dundrugeya khesi hi lerigo, isoso si na hi phasa guti esi hi nga girago ha gu pharwa khu ndziya nya mba yadi mwendro ha gu wona vambe na va gu pharwa khu ndziya nyo fane. Ndriyathu nya nyamayi nyo pwani khu Alia a di vbisega ngudzu khu gu wona vathu nyo khaguri na va gu tshanisa vambe. Uye a di gu wona gu khatsi vale va girago silo nyo vivbe kha va tsayiswe khu mithumo yawe. Uye wari khuye: “Nyi di wona gu kheni abari gu nyi ngu tumba gu kheni Jehovha a na lulamisa sigaradzo sesi, eni nyi di yede gu vbindrugedza mapimiselo yangu. Tepo yeyi, nyi di hevbula libhuku la Joba 34:22-29. Mavhesi yaya ma nyi phaside gu wona gu kheni Jehovha a ngu wona satshavbo. Uye khuye basi a kodzago gu lamula vathu, nigu khuye basi a na lulamisago satshavbo sigaradzo sathu.” Ganiolu, na hi gu vireya gu khethu Mufumo wa Nungungulu wu resa gululama, hi yede gu emisana ni gu mba lulama olu. Khu ndziya muni?

SILO NYA SADI HI NGA GIRAGO OLU

14. Gilo muni hi nga girago olu? (Vakolosi 3:10, 11)

¹⁴ Kha si kodzegi gu hi vbindrugedza edzi vathu va pharago khidzo vambe, ganiolu hi nga woneleya sigiro sathu. Kha nga hi bhudego khiso gupheyani, ha gu pimedzeya Jesu khu gu yeyedza lihaladzo. Khu kharato, ha gu zama gu phara gwadi vatshavbo ambari vale va hi wugeyago. (Mat. 7:12; Rom. 12:17) Jehovha a ngu tsaka ngudzu tepo hi pharago vatshavbo khu wuwadi ni gu lulama. — Leri Vakolosi 3:10, 11.

15. Gu bhuleya vathu esi Bhibhiliya yi ganeyago si nga va phasa kharini?

¹⁵ Ndziya nya yadi nya gu phase vathu, khu gu va hevbudza khu Jehovha. Khu ginani hi ganeyago isoso? Kholu tepo vathu va hevbulago khu Jehovha ni gu vbweta gu mu tsakisa, avo va gu gira guvbindrugedza va bwe va hevbuleya gu yeyedza wuwadi ni lihaladzo. (Isa. 11:6, 7, 9) Na si hevbuli lisine, mwama moyo nyo pwani khu Jemal a di dzi pata omu nya tsawa nya vawugeyi wu nga ba wu dwana gasi gu vbindrugedza mufumo tigoni gwawe kholu wu nga ba wu si fume gwadi. Uye wari khuye: “Kha hi yeli gu gurumedza vathu gu vbindrugedza. Eni kha nya gurumedzwa gu vbindrugedza, ganiolu nyi di vbindrugedzwa khu lisine nya Bhibhiliya nyi nga ba nyi hevbula.” Esi Jemal a hevbudego, si mu phaside gu ema gu dwana. Khu kharato, tepo hi hevbudzago vambe lisine nya Bhibhiliya, hi nga va phasa gu ema gu gira silo si khunguvanyisago vambe.

16. Khu ginani u kutsegago gu bhuleya vambe khu gutumba nya Mufumo?

¹⁶ Gu fana ni Jesu, ha gu vbweta khu monyo wathu watshavbo gu bhuleya vambe gu khethu Mufumo wa Nungungulu khuwo wu na lulamisago satshavbo sigaradzo khu gu vbeleya. Gutumba gogu gu nga tiyisa vale va nga pharwa khu ndziya nya mba yadi. (Jer. 29:11) Stacy, a khumbugidwego gupheyani a gu tshamuseya gu khuye: “Gu hevbula lisine si nyi phaside gu emisana ni gu mba lulama nyi nga gu vbanya ni ogu nyi gu wonago muhuno. Jehovha a gu thumisa Bhibhiliya gasi gu hi thaveleya. Hi yede gu dzi emiseya gu thaveleya vambe khu situmbiso si gomogo omu nya Bhibhiliya.” Wa guti gwadi esi Bhibhiliya yi ganeyago khu sigaradzo, uwe u na tiyisega gwadi khu sihevbudzo soso. Khu ndziya yoyo, u na si kodza gu hevbudza vambe gani xikwatuno mwendro thumotuno gu khuwe, khu ginani hi tshanisekago nigu ginani Jehovha a na girago gasi gu vbedza gu tshaniseka.b

17. Jehovha a gu hi phasa kharini gu emisana ni gu mba lulama muhuno?

¹⁷ Nya mba tsakisa khu gu, kha nga olu Sathane a gu mufumeli nya mafu yaya, hi na simama gu tshaniseka. Ganiolu, hi nga vireya dzitepo nya dzadi, kholu Jehovha a hi tumbiside gu hi phasa olu ni gu fuvisa Sathane ni wuvivbi watshavbo. (Joh. 12:31) Khu giyeyedzo, uye a gu hi embeya omu nya Bhibhiliya gu khuye khu ginani hi tshanisekago ngudzu ni gu khuye a ngu khathala khu vale va tshaniswago. (Ndzi. 34:17-19) Giyeyedzo gya Jesu gi hi hevbudzide esi hi nga girago ha gu pharwa khu ndziya nya mba yadi. Nigu nya mba hweya, Mufumo wa Nungungulu wu na fuvisa gutshaniseka gwatshavbo nigu vathu kha va na nga tshaniseka gambe. (2 Ped. 3:13) Hongoleni hi simama gu tshumayela mahungu nya yadi khu sighingi, na hi gu vireya khu maho nyo fuviye tepo mafu ma na talago khu “nongameto ni gululama.” — Isa. 9:7.