NDRIMA NYA GIHEVBULO 42
NDZIMO 44 Nombelo nya muthu a rerekidego
Edzi hi nga tshukwadzisago khidzo milombelo yathu
“ Nyi ngu gu rana khu monyo wangu watshavbo; nyi engise [Jehovha.]” — NDZI. 119:145.
MAKUNGO NYA GIHEVBULO GEGI
Hi na wona edzi milombelo yi khumbugwago omu nya Bhibhiliya yi nga hi phasago khidzo gu tshukwadzisa milombelo yathu.
1-2. a) Ginani gi nga hi himbedzeyago gu embeya Jehovha edzi hi dzipwago khidzo? b) Ho dziti kharini gu khethu Jehovha a ngu engiseya gwadi milombelo yathu?
INA dzimbe dzitepo u ngu dzipwa na wu phindra-phindra malito yamamowo omu nya milombelo yago nigu kha wu mu embeye Jehovha edzi u dzipwago khidzo khu lisine? Abari gu i ina, kha si pheyi khuwe. Khu kotani nya olu hatshavbo hi khalago na hi pharegide, dzimbe dzitepo hi nga gira milombelo nyo role hi divaledwa gu gira eyi nyo laphe. Mwendro adzina si ngu hi garadzeya gu embeya Jehovha edzi hi dzipwago khidzo kholu hi pimisago gu khethu kha hi dinganedwi gu ganeya naye.
2 Bhibhiliya yo yeyedza gu khiyo ga Jehovha esi si gu na ni lisima milombelo yi khugeyago monyoni nasiri malito nyo mbure hi ma thumisago. Uye a ngu “engisa nombelo nya gisiwana.” (Ndzi. 10:17) Uye a ngu engiseya gwadi malito yathu yatshavbo kholu a ngu khathala khethu. — Ndzi. 139:1-3.
3. Siwudziso muni hi na bhulago khiso ga ndrima yeyi?
3 Hi nga dzi wudzisa gu khethu: Khu ginani hi nga gombeyago ga Jehovha na hi tshulegide? Hi nga gombeya kharini ga Jehovha gasi hi engedzeya gu hidzimeya gwaye? Gu hevbula khu milombelo nya sithumi sa Jehovha si khumbugwago omu nya Bhibhiliya si nga hi phasa kharini gu tshukwadzisa milombelo yathu? Ginani hi nga girago sa gu hi garadzeya gu tshamuseya edzi hi dzipwago khidzo khu malito? Hongoleni hi wona mihlamulo nya siwudziso sesi.
GIMA U NGA THAVI GU GOMBEYA GA JEHOVHA
4. Ginani gi nga hi phasago gu pheledza gu gombeya ga Jehovha na hi tshulegide? (Ndzimo 119:145)
4 Tepo hi pwisisago gu khethu Jehovha pari nyo tumbege yi vbwetago gu khiyo hi dugeleya, hi na dzipwa na hi tshulegide gu gombeya gwaye hi mu embeya esi hi si pimisago ni edzi hi dzipwago khidzo. Mulovi nya Ndzimo 119, zamide gu wona Jehovha khu ndziya yeyi tepo a nga gombeya gwaye. Uye a di gu emisana ni sigaradzo womini gwaye. Vathu nyo khaguri va ganede malipha nya makhongolo khuye. (Ndzi. 119:23, 69, 78) Uye gambe a di yede gu emisana ni gu mba vbeleya gwaye. (Ndzi. 119:5) Ambari ulolo, uye kha nga ba a thava gu tuleya monyo waye Jehovha. — Leri Ndzimo 119:145.
5. Khu ginani hi ngu mba yela gu dzumeya gu dzipwa nya mba gwadi gu hi himbedzeya gu gombeya ga Jehovha? Tshamuseya.
5 Jehovha a ngu kovhidhari ambari kamo vale va giridego sighoho nya sikhongolo gasi va gombeya gwaye. (Isa. 55:6, 7) Khu kharato, kha hi yeli gu dzumeleya gudzipwa nya mba gwadi gu hi himbedzeya gu gombeya. Gasi gu fananisa, mugimbidzisi nya avhiyawu a ngu dziti gu khuye a nga ganeya ni vawoneleyi nya dziavhiyawu dzi vbuvbago a gu vbweta giphaso. Ina uye a di hadzi gu gira mihuni gu va lomba giphaso khu kotani nya dzitshoni mwendro khu gu ba a giride gihoso? Khu lisine ahihi! Khu ndziya nyo fane, ambari dzimbe dzitepo ha gu dzipwa na hi si giti gilo nyo gire mwendro na hi giride gighoho, hi nga gombeya ga Jehovha na hi tshulegide. — Ndzi. 119:25, 176.
EDZI U NGA TSHUKWADZISAGO KHIDZO MILOMBELO YAGO
6-7. Gu dundrugeya khu makhalelo ya Jehovha si nga hi phasa kharini gu tshukwadzisa milombelo yathu? Ninga giyeyedzo. (Wona tshamuselo wa vbavbatshi.)
6 Tepo hi gombeyago ga Jehovha hi mu embeya edzi hi dzipwago khidzo ni esi hi si pimisago khu lisine, hi ngu engedzeya gu hidzimeya gwaye. Ina ka, ginani hi nga girago gasi hi tshukwadzisa milombelo yathu?
7 Dundrugeya khu makhalelo ya Jehovha.a Tepo hi dundrugeyago khu makhalelo ya Jehovha, si na hi vbevbugeya gu ganeya edzi hi dzipwago khidzo na hi tshulegide. (Ndzi. 145:8, 9, 18) Wona giyeyedzo gya ndriyathu nya nyamayi nyo pwani khu Kristine, a nga ba ari ni papayi a gu na ni maghilivindra. O tshamuseya gu khuye: “Khu kotani nya esi nyi nga emisana naso, si di gu nyi garadzeya gu khodwa gu kheni Jehovha Papayi nya lihaladzo nyi nga ganeyago naye na nyi tshulegide. Nigu nyi di gu pimisa gu kheni gu mba vbeleya gwangu gu di hadzi gu gira Jehovha a nyi diga.” Makhalelo muni ya Jehovha ma nga mu phasa? A di khuye: “Lihaladzo nyo tumbege la Jehovha li nyi giride nyi dzipwa na nyi vhikelegide. Nyi ngu dziti gu kheni uye gima kha na nga diga libogo langu. Ambari nya gu gira sihoso nyo khaguri, uye a na simama gu nyi haladza ni gu nyi phasa. Tepo nyi dundrugeyago khu lihaladzo la Jehovha, si ngu nyi vbevbugeya ngudzu gu bhula naye khu silo si nyi tsakisago ni esi si nyi garadzago.”
8-9. Wuyelo muni u nga wu manago khu gu pimisa khesi u vbwetago gu ganeya na wu si gombeye? Tshamuseya.
8 Pimisa esi u vbwetago gu ganeya. U nga dzi gira siwudziso nya singi na wu si pheye gu gombeya. Khu giyeyedzo: ‘Sigaradzo muni nyo kongome nyi emisanago naso? Ina womo nyi yedego gu mu divaleya? Gyomo gilo gi nga vbindrugedza matshigwanaya womini gwangu nyi vbwetago giphaso gya Jehovha gasi nyi dzi pwananisa nagyo?’ (2 Dzipf. 19:15-19) Dundrugeya gambe khedzi Jesu a nga hi hevbudza khidzo gu gombeya u bwe u dundrugeya khesi u nga ganeyago omu nya milombelo yago maningano khu Lina Laye, Mufumo Waye ni gugola Gwaye. — Mat. 6:9, 10.
9 Tepo ndriyathu nya nyamayi nyo pwani khu Aliska a nga tugula gu khuye mwama waye a diri ni câncer terminal omu nya wongo waye, si mu garadzede gu gombeya. Uye a di khuye: “Nyi di gu garadzega ngudzu avbo nya gu si nyi garadzeya gu pimisa gwadi esi nyi nga gombeyago khiso.” Ginani gi nga mu phasa? O tshamuseya gu khuye: “Nyi ngu dzi ninga tepo na nyi si gombeyi gasi nyi pimisa vbadugwana khesi nyi vbwetago gu ganeya, isoso si ngu nyi phasa gu tiyisega gu kheni avba nya milombelo yangu kha nyi vege gupima avbo gwangu basi. Tepo nyi girago isoso, nyi gu si kodza gu rula nyi bwe nyi si kodza gu embeya Jehovha khu nombelo sigaradzo nyi emisanago naso.”
10. Khu ginani hi yedego gu zama gu gombeya khu tepo nyo laphe? (Wona dzifotu.)
10 Dzi ninge tepo nya yadi nyo gombeye. Lisine gu milombelo nyo role yi nga hi phasa gu hidzimeya ga Jehovha, ganiolu tepo hi dzi ningago tepo nyo gire milombelo nyo laphe hi nga si kodza gu embeya Jehovha satshavbo hi sipwago.b Mwama wa ndriyathu Aliska a gu ndriyathu Elijah, o tshamuseya gu khuye: “Nyi ngu zama gu gombeya dzitepo nya dzingi khu litshigu, nigu nyi ngu dzipwa vbafuvbi ga Jehovha tepo nyi dzi ningago tepo nya yadi nyo gombeye. Jehovha a ngu nyi engiseya khu gu laphisa monyo tepo nyi gombeyago.” Zama esi: Vbweta tepo ni wulanga si nga gu vbevbugeyago gu gombeya, adzina u nga gombeya khu lito nyo khugege nya mba tsolopetedwa khu gilo, nigu manega ni giolovedzo nyo gombeye khu tepo nyo laphe.
Vbweta wulanga ni tepo nya yadi nyo gombeye khiyo (Wona paragrafu 10)
DUNDRUGEYA KHU MILOMBELO YI KHUMBUGWAGO OMU NYA BHIBHILIYA
11. Hi nga phasega kharini khu gu dundrugeya gwadi khu milombelo yi gu romo omu nya Bhibhiliya? (Wona kwadru yi gu khiyo: “Ina u ngu kuhwa khu siemo sawe?”)
11 Gu dundrugeya khesi sithumi sa Jehovha sa dziteponi nya Bhibhiliya si nga ba si ganeya omu nya milombelo yaso ni dzindzimo nya gu dhumise Jehovha, adzina si nga gu phasa ngudzu. Gu dundrugeya gwadi khesi va nga ba va si pimisa ni edzi va nga ba va dzipwa khidzo, si nga gu kutsa nuwe gu gombeya khu ndziya nyo fane. Milombelo yaso, yi nga gu phasa gu mana malito u nga ma thumisago omu nya milombelo yago. Nigu adzina u nga mana milombelo nyo khaguri nya sithumi sa Jehovha yi ganeyago khedzi u dzipwago khidzo mwendro silo nyo fani u vbwetago gu gombeya khiso.
12. Siwudziso muni u nga dzi girago tepo u dundrugeyago khu milombelo yi gomogo omu nya Bhibhiliya?
12 Tepo u lerigo nombelo nyo khaguri omu nya Bhibhiliya, dzi wudzise gu khuwe: Khu mani a giridego nombelo wowu, womi waye wu di khade kharini nigu khu ginani a nga gombeya khu ndziya yeyi? Ina nombelo wowu wu ngu nyi kuha? Ginani nyi gi hevbulago ga nombelo wowu? Adzina u nga gira dzipeskiza gasi u mana mihlamulo nya siwudziso sesi, ganiolu dziti gu khuwe gudzigaradza u na gu girago khandri wa mahala. Hongoleni hi wona 4 siyeyedzo nya milombelo yi gomogo omu nya Bhibhiliya.
13. Gihevbudzo muni hi gi manago ga Ana maningano ni milombelo? (1 Samuweli 1:10, 11) (Wona nya kapa.)
13 Leri 1 Samuweli 1:10, 11. Tepo Ana a nga gira nombelo wowu, a di gu emisana ni sigaradzo sivili nya sikhongolo ngudzu. Uye a diri mwalo gyanana nigu mumbe mwangadzi wa mwama waye a di gu mu tshanisa. (1 Sam. 1:4-7) Abari gu u na ni gigaradzo gi wonegago gu khatsi kha gi vbindri, ginani u nga gi hevbulago khu nombelo wa Ana? Ana embede Jehovha edzi a nga ba a dzipwa khidzo nigu hwane nya isoso a manide gurula ga mapimoni. (1 Sam. 1:12, 18) Anethu hi nga mana gurula gogu tepo hi ‘vegago gu garadzega gwathu mandzani ga Jehovha’ khu gu mu embeya edzi hi dzipwago khidzo ni sigaradzo hi tshanganago naso. — Ndzi. 55:22.
Khu kotani nya siemo a nga emisana naso ni gu wonedwa vbavbatshi khu mumbe mwangadzi wa mwama waye, Ana a di tuleya monyo waye Jehovha (Wona paragrafu 13)
14. a) Ginani gambe hi nga gi hevbulago ga giyeyedzo gya Ana? b) Gu dundrugeya khu Milowo si nga hi phasa kharini gu tshukwadzisa milombelo yathu? (Wona tshamuselo wa vbavbatshi.)
14 Hwane nya myaga nyo khaguri gyanana gyaye Samuweli na gi gu velegidwe, Ana a di gi ningeya ga Muprista nya Khongolo Eli. (1 Sam. 1:24-28) Ga nombelo a nga gira uye a di embeya Jehovha gu khuye a di gu mu bonga kholu wonide gu khuye uye a ngu khathaleya sithumi saye nyo tumbege.c (1 Sam. 2:1, 8, 9) Adzina saye sigaradzo saye ndrangani kha sa vbindra, ganiolu Ana a di vega gupima ga edzi Jehovha a nga mu kategisa khidzo. Ginani hi gi hevbulago? Hi nga si kodza gu emisana gwadi ni sigaradzo sathu ha gu simama gu vega gupima ga dzindziya edzi Jehovha a nga hi phasa khidzo kala olu.
15. Tepo hi emisanago ni gu mba lulama, ginani hi nga gi hevbulago ga nombelo wa Jeremiya? (Jeremiya 12:1)
15 Leri Jeremiya 12:1. Ga gipandre nyo khaguri nya womi waye, muprofeti Jeremiya garadzegide khu gu wona va nya guvivbedwa khu monyo na va gu dugeleya. Uye gambe garadzegide khu gu wona edzi Vaisrayeli va nga ba va pharwa khidzo. (Jer. 20:7, 8) Hi ngu mu pwisisa gwadi edzi a nga ba a dzipwa khidzo kholu anethu hi ngu pharwa khu ndziya nya mba yadi, nigu hi ngu wona vathu va girago silo nyo vivbe na va gu dugeleya. Ambari olu Jeremiya a nga embeya Jehovha gu khuye a di gu goroga khu gu wona silo sile, uye gima kha ninga nandru Jehovha khu kotani nya gu mba lulama a nga ba a gu wona. Tepo a nga wona Jehovha na kawuka vathu vaye nya mba engisa, adzina saye uye engedzede gu tumba gululama ga Nungungulu. (Jer. 32:19) Anethu hi nga embeya Jehovha na hi tshulegide edzi si hi vbisago khidzo tepo hi wonago gu mba tumbega ga vathu. Ganiolu, hi yeyedza gambe gu khethu hi ngu tumba gu khethu Jehovha a na gira gilogyo nya mba hweya khu gu mba lulama gogu hi gu wonago.
16. Tepo hi dzipwago na hi si si kodzi gu gira nya singi, ginani hi nga gi hevbulago ga nombelo wa Mulevhi nyo khaguri? (Ndzimo 42:1-4) (Wona dzifotu.)
16 Leri Ndzimo 42:1-4. Ndzimo yeyi yi di lowa khu Mulevhi a nga ba a romo wugumbini a nga ba a si si kodzi gu gira wukhozeyi tempeleni ni vambe Vaisrayeli. Ndzimo yaye yi ngu yeyedza edzi a nga ba a dzipwa khidzo. Adzina hi nga dzipwa nga uye ha gu mba si kodza gu duga khu gaya gwathu, adzina saye khu kotani nya madwali mwendro khu gu ba hi khotedwe khu kotani nya gukhodwa gwathu. Dzimbe dzitepo, hi nga dzipwa gwadi ganiolu dzimbe hi garadzega. Ganiolu, ambari ha gu dzipwa kharini, gwadi gu gombeya ga Jehovha hi mu embeya edzi hi dzipwago khidzo. Isoso si nga hi phasa gu pwisisa gwadi gudzipwa gwathu ni gu dundruga esi si gu na ni lisima ngudzu. Khu giyeyedzo, Mulevhi tugude gu khuye a na manega ni mambe mathomo nyo khozeyi Jehovha. (Ndzi. 42:5) Uye gambe dundrugede edzi Jehovha a nga ba mu khathaleya khidzo. (Ndzi. 42:8) Gu gombeya ga Jehovha khu monyo wathu watshavbo, si nga hi phasa gu pwisisa gudzipwa gwathu, gu mana gurula ni tshivba nya gu timiseye.
Mulevhi a nga lova Ndzimo 42 a di tuleya monyo waye Nungungulu. Tepo hi embeyago Jehovha edzi hi dzipwago khidzo khu nombelo, si nga hi phasa gu wona giemo gyathu khu yimbe ndziya (Wona paragrafu 16)
17. a) Ginani hi gi hevbulago khu nombelo wa muprofeti Jona? (Jona 2:1, 2) b) Malito nyo khaguri ma gomogo omu nya Dzindzimo ma nga hi phasa kharini tepo hi emisanago ni sigaradzo? (Wona tshamuselo wa vbavbatshi.)
17 Leri Jona 2:1, 2. Muprofeti Jona giride nombelo wowu nari ndrani nya ndzandzi nya yikhongolo. Ambari olu a nga ne engisa Jehovha, Jona a di gu tiyisega gu khuye Nungungulu a napwa nombelo waye. Ga nombelo waye, Jona thumiside malito nya mangi hi ma manago omu ga Dzindzimo.d Adzina saye uye a di gu dziti gwadi Dzindzimo dzedzi. Khu gu dundrugeya khidzo, uye a tiyisegide gu khuye Jehovha a di hadzi gu mu phasa. Khu ndziya nyo fane, ha gu zama gu vega hungoni mavhesi nyo khaguri nya Bhibhiliya, ayo ma nga wuya mapimoni gwathu ma bwe ma hi thaveleya tepo hi gombeyago ga Jehovha ndrani nya siemo nyo garadze.
SIMAMA GU HIDZIMEYA GA JEHOVHA KHU NOMBELO
18-19. Sa gu tshuka si hi garadzeya gu ganeya edzi hi dzipwago khidzo khu nombelo, gitiyisegiso muni hi gi manago omu ga Varoma 8:26, 27? Ninga giyeyedzo.
18 Leri Varoma 8:26, 27. Dzimbe dzitepo hi ngu garadzega ngudzu avbo nya gu hi si si kodzi gu tshamuseya Jehovha edzi hi dzipwago khidzo. Ganiolu hi na ni muphasedzeyi. Ga siemo nya nga esi, liphuvbo nya guage la Nungungulu li ngu hi “ganeleya.” Khu ndziya muni? Khu gu thumisa liphuvbo laye, Jehovha giride gu milombelo nya yingi yi vegedzwa omu nya Lito laye. Ha gu mba si kodza gu tshamuseya gwadi edzi hi dzipwago khidzo mwendro esi hi si pimisago, Jehovha a nga thumisa milombelo yeyi yi gomogo omu nya Lito laye gasi a tugula esi hi si vbwetago a bwe a hi phasa.
19 Gu dundrugeya khu isoso si phaside ndriyathu moyo nya nyamayi wa Rússia nyo pwani khu Yelena. Uye a di khotedwa pasoni khu gu gombeya ni gu hevbula Bhibhiliya. Ndriyathu Yelena a di gu garadzega ngudzu nyo bwe a si si kodzi gu gombeya. Uye a di khuye: “Khu gu landreya nyi di dundruga gu kheni tepo nyi garadzegago ngudzu nyo bwe nyi si giti gilo nyo gombeye khiyo, Jehovha a ngu dzumeya milombelo yi gomogo omu nya Bhibhiliya nya sithumi saye nyo tumbege sa gale . . . kha nga gilombo nyi vbwetago gu gira . . . isoso si ngu nyi tiyisa ngudzu tepo nyi emisanago ni siemo nyo garadze ngudzu.”
20. Hi nga dongiseya kharini mapimo yathu na hi si gombeyi ha gu ba hi garadzega?
20 Tepo hi garadzegago, si nga hi garadzeya gu vega gwadi gupima tepo hi gombeyago. Gasi hi si kodza gu dongiseya mapimo yathu, hi nga engiseya dziaudhyu nya libhuku la Dzindzimo. Hi nga lova gambe edzi hi dzipwago khidzo, gu fana ni esi Pfhumu Dhavhidhe a nga gira. (Ndzi. 18; 34; 142; Cabeçalho.) Ganiolu, gasi gu ganeya lisine yi mwalo milayo yi ganeyago khedzi hi yedego gu gombeya khidzo. (Ndzi. 141:2) Khu kharato, tshulega gu gira esi si thumago gwago.
21. Khu ginani hi nga gombeyago khu monyo wathu watshavbo?
21 Si ngu hi thaveleya ngudzu gu dziti gu khethu Jehovha a ngu pwisisa gudzipwa gwathu ambari na hi si mu embeye gilo nyo khaguri. (Ndzi. 139:4) Ganiolu, uye o vbweta gu khuye hi mu embeya edzi hi dzipwago khidzo ni edzi hi mu tumbago khidzo. Khu kharato, u nga giri mihuni gu gombeya ga Papayi wago wa ndzadzini. Hevbula khu milombelo hi yi manago omu nya Lito laye. Gombeya ga Jehovha khu monyo wago watshavbo. U mu embeya esi si gu tsakisago ni esi si gu garadzago. Kha nga Pari yago nya lisine, Jehovha tepo yatshavbo a na ba ari vbafuvbi gwago!
NDZIMO 45 Mipimiso nya monyo wangu
a Wona “makhalelo nyo khaguri ya Jehovha ma wonegago ngudzu” ma khumbugwago ga libhuku Milowo nya Bhibhiliya yi hi phasago gu vbanya kha nga Makristo, ga gipandre gi gu khiyo “Jehovha.”
b Milombelo yi girwago vbakari nya vathu nya vangi libandlani gu tala nya dzitepo kha yi yile gu lapha ngudzu.
c Ga milombelo yaye, Ana thumiside malito nyo fane ni aya hi ma manago ga mabhuku ma nga lowa khu Mosi. Gasi gu ganeya lisine, uye a dzi ningide tepo nya gu dundrugeye khu milowo. (Dhet. 4:35; 8:18; 32:4, 39; 1 Sam. 2:2, 6, 7) Hwane nya myaga nya yingi, Mariya, mamayi wa Jesu, thumiside malito yamamowo ma nga thumiswa khu Ana. — Luka 1:46-55.
d Khu giyeyedzo, fananisa Jona 2:3-9 ni Ndzimo 69:1; 16:10; 30:3; 142:2, 3; 143:4, 5; 18:6; ni 3:8, a gu mavhesi ma yeyedzago milombelo yi nga girwa khu Jona.