Ndziya nyo mane gutshulega nya lisine

1, 2. a) Ginani va girago vathu gasi va mana gutshulega? b) Khu yevbini mihandro yakona?

MUHUNO, malangani nya mangi mafuni gu ngu ganedwa ngudzu khu dzifanelo nyo fane ni gutshulega. Vambe vo vbweta gu tshulega ga dzitshanisa, gihatheya, ni wusiwana. Vambe vo vbweta gu tshulega gu ganeya esi va si vbwetago, gu hatha esi va si vbwetago, ni gu vbanya khedzi va dzinago khidzo. Malangani yatshavbo vathu vo vbweta gutshulega.

² Gasi va mana gutshulega, vathu va ngu gira sitereka ni gu wugeya mufumo. Ganiolu ina va ngu si mana esi va si vbwetago? Ahihi. Gu tala nya dzitepo, mihandro yakona gutshaniseka ni gufa. Malito ya Pfhumu Solomoni ma gomogo omu ga Muhevbudzi 8:9 ma ngu pwala: “Muthu . . . a gu fumela mumbe muthu gasi gu mu tshanisa.”

3. Ginani hi yedego gu gira gasi gu hi tsaka ni gu tangala khu lisine?

³ Bhibhiliya yi ngu hi embeya esi hi yedego gu gira gasi gu hi tsaka ni gu tangala khu lisine. Mupizane Jakobe a di khuye: “Muthu a khedzisago gwadi nayo nya gululame wu hi ningago gutshulega a tiya ga uwo . . . a na kategiswa mithumoni yaye yatshavbo.” (Jakobe 1:25) Jehovha khuye mune nya milayo nyo vbeleye, nigu uye a ngu siti gwadi esi si vbwetegago gwathu gasi gu hi tsaka khu guvbeleya. Jehovha ningide Adhamu ni Evha gutshulega nya lisine ni satshavbo va nga ba va si vbweta gasi gu va tsaka khu lisine.

TEPO VATHU VA NGA BA VA TSHULEGIDE KHU LISINE

4. Gutshulega nyo khale kharini a nga ba ari nago Adhamu ni Evha? (Wona foto gupheyani nya ndrima.)

⁴ Tepo hi lerigo Genesi gipimo 1 ni 2, ha gupwa gu pwani Adhamu ni Evha va diri ni gutshulega ogu vathu muhuno va gu wonago khu vhidhiyu basi. Avo va diri ni satshavbo va nga ba va si vbweta, va di si thavi gilo, nigu mwalo a nga ba a va gireya guvivba. Kha va nga ba va garadzega khu guhodza, thumo, madwali ni gufa. (Genesi 1:27-29; 2:8, 9, 15) Ganiolu, ina gutshulega gwawe gu diri mwalo mivbingano? Hongoleni hi si wona.

5. Ambari olu vathu va pimisago silo nya singi, ginani egi gi vbwetegago ga vathu gasi va mana gutshulega?

⁵ Vathu nya vangi vo pimisa gu khavo gu manega ni gutshulega nya lisine so thula gu khiso va tshulegide gu gira ni gevbini va gi vbwetago nya mba garadzega khu mihandro yakona. Enciclopédia Delta Universal yari khiyo gutshulega “makodzelo nyo dzi hatheye esi hi si vbwetago hi bwe hi si gira.” Ambari ulolo, yi ngu bwe khiyo vathu va tshulegide a bari gu mufumo kha wu va vegeyi mivbingano nya mba lulama, nya mba vbwetega mwendro nyo vbindre pimo. Isoso so yeyedza gu khiso yi ngu vbwetega mivbingano nyo khaguri gasi gu vatshavbo va manega ni gutshulega. Ganiolu khu mani a ninganedwago khu gu hunga gu khuye mivbingano nyo khaguri yi lulamide, yi ngu vbwetega nigu kha yi vbindri pimo?

6. a) Khu ginani Jehovha a gu uye enga a gu na ni gutshulega nyo vbeleye? b) Gutshulega muni ogu vathu va nga manegago nago, nigu khu ginani?

⁶ Si na ni lisima gu dundruga gu khethu khu Jehovha Nungungulu enga a gu na ni gutshulega nyo vbeleye, gu gu mwalo mivbingano. Khu ginani? Kholu vangide silo satshavbo nigu khuye Mufumeli nya tshivba yatshavbo mafuni ni ndzadzini. (1 Thimoti 1:17; Gutuledwa 4:11) Pfhumu Dhavhidhe thumiside malito nyo mbure gasi gu tshamuseya gikhalo gya Jehovha. (Leri 1 Dzikoronika 29:11, 12.) Gu hambana naye, gutshulega nya sivangwa satshavbo sa ndzadzini ni mafuni gu na ni mivbingano. Gu gu gutshulega gu hegedwago. Jehovha Nungungulu o vbweta gu khuye hi pwisisa gu khethu khuye basi a ninganedwago khu gu hunga gu khuye khu yevbi mivbingano yi lulamidego, yi vbwetegago, ni eyi yi gu mba vbindra pimo. Gukhugeya gupheyani, Jehovha a ngu vegeya mivbingano sivangwa saye.

7. Silo muni hi girago si hi girago hi tsaka?

⁷ Ambari olu Adhamu ni Evha va nga ba va tshulegide ga silo nya singi, gutshulega gwawe gu diri ni mivbingano. Mivbingano nyo khaguri yi di gu wonega na yiri ya tumbunugo gwawe. Khu giyeyedzo, gasi gu va simama gu vbanya gu di gu vbwetega gu va hefemula, va hodza, ni gu lala. Ina isoso si di gu thula gu khiso kha va nga ba va tshulegide? Ahihi. Khu lisine, Jehovha a di gu dziti gu khuye vo gira silo soso va na tsaka. (Ndzimo 104:14, 15; Muhevbudzi 3:12, 13) Hatshavbo hi ngu gola gu hefumula liphuvbo nya ladi, gu hodza guhodza hi gu golago ngudzu, ni gu hefemula gwadi wutshigu. Kha hi dzipwi na hi gu himbedzedwa gu gira silo soso. Kha si kanakanisi gu khiso Adhamu ni Evha navo va dzi pwide kharato.

8. Nayo muni nyo kongome owu Nungungulu a ningidego Adhamu ni Evha, nigu khu ginani?

⁸ Jehovha ningide Adhamu ni Evha nayo nyo kongome. A di va embeya gu khuye va velega sanana, va tadza mafu, ni gu ma sayisa. (Genesi 1:28) Ina nayo wowo wu di gu va duseya gutshulega gwawe? Ahihi! Wu di gu va ninga lithomo nyo vbindrugedze mafu yatshavbo ma khala paradhesi, va ma gira ndranga va nga hadzi vbanya umo kala gupindruga ni sanana sawe nyo vbeleye. Ayoyo khayo ma nga ba mari makungo ya Nungungulu. (Isaya 45:18) Muhuno, vathu kha va ghohi vo hatha gu mba tshadha mwendro gu mba velega sanana. Ganiolu, vathu va ngu tshadha ni gu velega sanana ambari olu isoso si resago sigaradzo nyo khaguri. (1 Vakorinto 7:36-38, NM) Khu ginani? Kholu avo vo vireya gu mana gutsaka. (Ndzimo 127:3) Nari khatshi Adhamu ni Evha va di engiside Jehovha, na va tsakide khu lipango ni ndranga yawe kala gupindruga.

GU DZIMEDE KHARINI GUTSHULEGA NYA LISINE?

9. Khu ginani nayo wa Nungungulu wu gomogo omu ga Genesi 2:17 wu lulamidego, ni gu vbwetega, ni gu mba lemeya?

⁹ Jehovha a di ninga Adhamu ni Evha wumbe nayo a bwe a va embeya esi si nga hadzi dugeleya vo mba wu engisa. A di khuye: “Handro nya simbo nya guti gu hambanisa silo nya sadi niso nyamba sadi, u nga wu hodzi. Kholu litshigu u na gu wu hodzago u nafa.” (Genesi 2:17) Ina nayo wowo wu di vivbide, ni gu mba vbwetega, mwendro gu lemeya? Ina wu di gu dusa gutshulega ga Adhamu ni Evha? Ne, vbadugwana. Khu lisine, vatshamuseyi nya vangi nya mahungu nya Bhibhiliya vo pimisa gu khavo nayo wa Nungungulu wu diri nayo nya wadi ngudzu nigu wu di gu pwisisega. Moyo nya avo wari khuye, wo hi hevbudza gu khuwo “khu Nungungulu basi a tigo esi si gu sadi . . . ga vathu nigu khu Nungungulu basi a tigo esi si sirigo sadi . . . gwawe. Gasi gu vathu va dzi buza khesi ‘nya sadi,’ va yede gu tumba Nungungulu ni gu mu engisa. Vo mba mu engisa, va na digwa va dzi hatheya vabune esi si gu sadi . . . ni esi si sirigo sadi.” Si gu silo nyo garadze ngudzu ga vathu.

10. Khu ginani gutshulega gu dzi hatheya esi hi si vbwetago si gu mba fana ni gu ninganedwa khu gu hunga esi si gu sadi ni esi nyo vivbe?

¹⁰ Vathu nyo khaguri va nga pimisa gu khavo Jehovha kha ninga Adhamu gutshulega nyo gire esi a nga ba a si vbweta. Ambari ulolo, kha va si woni gu khavo gutshulega gu dzi hatheya, mwendro gu hatha esi hi si vbwetago gu gira, khandridzo saye ni gu ninganedwa khu gu hunga esi nya sadi ni esi nyo vivbe. Adhamu ni Evha va di tshulegide gu hatha gu khavo va na engisa Nungungulu mwendro ne. Ganiolu khu Jehovha enga a ninganedwago khu gu hunga esi nya sadi ni esi nyo vivbe. “Simbo nya guti gu hambanisa iso nya sadi niso nyamba sadi” wu diri giyeyedzo ga Adhamu ni Evha maningano ni isoso. (Genesi 2:9) Khandri tepo yatshavbo hi yi tigo mihandro nya esi hi si hathago, nigu hi mwalo gu vbudza gu khethu mihandro yakona yi na ba yiri yadi tepo yatshavbo. Khigyo gi girago gu dzitepo nya dzingi hi wona vathu na va gu hatha mwendro gu hunga silo na vari ni makungo nya yadi, ganiolu mihandro yakona gutshaniseka, ni dzimhango. (Mavingu 14:12) Khu lisine, vathu va ngu hegedwa avba nya esi va nga si girago. Khu gu va ninga nayo nya gu mba hodza simbo wule, Jehovha a di gu va hevbudza gu khuye va di yede gu mu engisa gasi gu va mana gutshulega nya lisine. Ginani egi Adhamu ni Evha va hungidego gu gira?

11, 12. Khu ginani esi si hathidwego khu Adhamu ni Evha si va bedzidego mhangoni? Ninga giyeyedzo.

¹¹ Egi gi si tsakisigo, khu gu Adhamu ni Evha va di hatha gu mba engisa Jehovha. Evha a di hatha gu engisa Sathane tepo a nga tumbisa gu khuye: “Mu na tulega maho, mu khala kha nga Nungungulu; muti esi nya sadi ni esi nya guvivbe.” (Genesi 3:5) Ina esi Adhamu ni Evha va si hathidego si engedzede gutshulega gwawe, kha nga edzi Sathane a ganedego khidzo? Ahihi. Khu lisine, va si wone gu khavo gu bomba wuthangeli wa Jehovha so yisa mhangoni. (Genesi 3:16-19) Khu ginani? Kholu Jehovha kha ninga vathu gutshulega nyo dzi hungeye esi si gu sadi ni esi nyo vivbe. — Leri Mavingu 20:24; Jeremiya 10:23.

¹² Khidzo saye ni mugumbidzisi nya avhiyawu. Gasi gu a vboha gwadi omu a hongolago, o oloveya gu gimbiya khomu gu dzumeledwego gu gimbiya khumo, a thumisa mitshini yi gomogo omu nya avhiyawu gasi gu mu yeyedzeya ndziya. A bwe a thumisana ni ava va emisedwego gu mu ninga sileletelo maningano ni omu a yedego gu gimbiya khumo ni tepo a yedego gu tshiga khiyo ni wulanga wakone gasi gu a si ghumani ni dzimbe dziavhiyawu. Ganiolu mugimbidzisi nya avhiyawu o mba landreya sileletelo soso a bwe a gimbiya nya mu gimbiye, a na tshuka a gira mhango. Kha nga mugimbidzisi yoyo nya avhiyawu, Adhamu ni Evha va di vbweta gu gira silo khu magirelo yawe. Va bomba gu thangedwa khu Nungungulu. Khu wevbini handro wakona? Mhango! Esi va si hungidego si reside gighoho ni gufa gwawe ni sanana sawe satshavbo. (Varoma 5:12) Adhamu ni Evha kha va mana gutshulega nya gukhongolo khu gu zama gu dzi hungeya vabune esi si gu sadi ni esi nyo vivbe. Wulangani nya isoso, va di luza gutshulega nya lisine ogu Jehovha a nga ba a va ningide.

NDZIYA NYO MANE GUTSHULEGANYA LISINE

13, 14. Hi nga gu mana kharini gutshulega nya lisine?

¹³ Vathu nyo khaguri vo pimisa gu khavo gu manega ni gutshulega nya mba na mivbingano si di hadzi tsakisa. Ganiolu si di hadzi tsakisa kamo? Ambari olu gu manega ni gutshulega si gu na ni mihandro nya yingi nya yadi, nga dundrugeya khedzi li nga hadzi khala khidzo litigo leli nari khatshi gu diri mwalo mivbingano! Enciclopédia Delta Universal yari khiyo milayo nya dzi hengeledzano dzatshavbo nya vathu yi ngu garadza kholu yi yede gu vhikeya yi bwe yi vega mivbingano avba nya gutshulega nya vathu. Isoso kha si vbevbugi tepo yatshavbo. Khu gighelo gyogyo, gu na ni milayo nya yingi ngudzu ni vaadhivhogadhu ni valamuli nya vangi va zamago gu yi tshamuseya ni gu yi thumisa.

¹⁴ Jesu tshamusede edzi hi nga gu manago khidzo gutshulega nya lisine. A di khuye: “Mwa gu simama gu vegedza magana yangu, mu na khala vapizane vangu khu lisine, mu natini lisine, gambe ilo lisine li na mi gira vathu nya gutshulege.” (Johane 8:31, 32) Khu kharato gasi gu hi mana gutshulega nya lisine, gu vbwetega gu hi gira silo sivili. Nyo pheye, gu vbwetega hi dzumeya lisine li hevbudzidwego khu Jesu. Nya wuvili, gu vbwetega gu hi khala vapizane vaye. Ho gira isoso si na hi ninga gutshulega nya lisine. Ganiolu gutshulega avba nya ginani? Jesu a di khuye: “Muthu watshavbo a ghohago, khumbi nya gighoho.” A engedza khuye: “Mwa gu tshudwa khu gyanana, mu na bani mu tshulegide khu lisine.” — Johane 8:34, 36.

15. Khu ginani gutshulega gu tumbisidwego khu Jesu gu nga hi girago hi ‘tshulega khu lisine’?

¹⁵ Gutshulega ogu Jesu a tumbisidego vapizane vaye khugo nya gwadi ngudzu guvbindra ogu gu diledwago ngudzu khu vathu muhuno. Tepo Jesu a nga khuye: “Mwa gu tshudwa khu gyanana, mu na bani mu tshulegide khu lisine,” a di gu thula gutshulega wugumbini nya gighoho, wu gu wugumbi nyo vivbe ngudzu guvbindra watshavbo. Hi dzi gumbi nya gighoho khu ndziya muni? Gighoho gyo hi gira hi gira silo nyo vivbe. Gi nga hi tandregisa gambe gu gira esi hi si tigo na si lulamide mwendro gu hi tandregisa gu gira satshavbo si gomogo dzitshivbani dzathu. Mihandro yakona gugaradzega, wuvi, gutshaniseka, ni gufa. (Varoma 6:23) Mupostoli Pawulo wu pwide wuvi nyo khale gumbi nya gighoho. (Leri Varoma 7:21-25.) Tepo gighoho gi na duswago khu guvbeleya khavbo hi na manegago ni gutshulega ogu Adhamu ni Evha va nga ba vari nago.

16. Hi nga tshulega khu lisine khu ndziya muni?

¹⁶ Malito ya Jesu nya gu khayo “mwa gu simama gu vegedza magana yangu” mo yeyedza gu khayo ho ba hi vbweta gu khethu Jesu a hi tshula, gu vbwetega gu hi gira silo nyo khaguri. Silo muni? Kha nga maKristo ma dzi hendzeledzidego, gu vbwetega gu hi dzi nyenya wurumba wathu hi bwe hi hatha gu dzumeya mivbingano eyi Jesu a vegedego vapizane vaye. (Matewu 16:24) Kha nga edzi Jesu a tumbisidego khidzo, hi na tshulega khu lisine mindru wa tshigu, tepo hi na hakhago makategwa nya muphaso nya gudzegiswe.

17. a) Ginani gi nga hi girago hi tsaka khu lisine? b) Ginani hi na gi hevbulago avba nya ndrima yi landreyago?

¹⁷ Gasi gu hi tsaka khu lisine, gu vbwetega gu hi engisa sihevbudzo sa Jesu, kha nga vapizane vaye. Ho gira isoso, hi nga tshulega khu lisine wugumbini nya gighoho ni gufa. (Leri Varoma 8:1, 2, 20, 21.) Avba nya ndrima yi landreyago, hi na hevbula edzi hi nga thumisago khidzo gutshulega hi gu nago khu wugengeyi. Khavbovbo hi na kodza gu zundza Jehovha, Nungungulu nya gutshulega nya lisine kala gupindruga.