Thumeya Jehovha, Nungungulu nya gutshulega

1, 2. a) Khu ginani gu nga ba gu ganedwa ngudzu khu wugumbi ni gutshulega matshiguni ya mupostoli Pawulo? b) Guya khesi a ganedego Pawulo, khu mani gifefe nya gutshulega?

MAKRISTO nya lizana myaga nya gupheye ma di gu vbanya Mufumoni wa Roma, omu vathu va nga ba va dzi khusedza khu milayo yawe, malamulelo, ni gutshulega va nga ba vari nago. Ambari ulolo, mufumo wowo nya tshivba wu di gu tumba dzigumbi gasi gu va gireya mithumo nyo lemeye ngudzu. Khu tepo nyo khaguri, gipimo nya 30 dzipursentu nya vathu va nga ba va vbanya Mufumoni wa Roma va diri dzigumbi. Khu kharato, wugumbi ni gutshulega li diri ilo libhulo lakona ga vathu nya vangi, gupata ni maKristo.

² Mupostoli Pawulo a di gu oloveya gu lova mahungu ma ganeyago khu gutshulega. Ganiolu kha nga ba a zama gu lulamisa sigaradzo nya litigo leli, a gu iso vathu nya vangi va teponi yoyo va nga ba va vbweta gu gira. Wulangani nya isoso, Pawulo ni maKristo makwawe va di gu dzi garadzeya gu hevbudza vathu mahungu nya yadi nya Mufumo wa Nungungulu ni gu va phasa gu pwisisa lisima nya muphaso nya gudzegiswe wa Jesu. Pawulo embede maKristo makwawe omu va nga gi manago umo Gifefe nya gutshulega. Lovide esi: “[‘Jehovha,’ NM] Liphuvbo, avbo li gu romo Liphuvbo la [‘Jehovha,’ NM], gomo gutshulega.”— 2 Vakorinto 3:17.

3, 4. a) Ginani gi nga gira Pawulo a lova malito ma gomogo omu ga 2 Vakorinto 3:17? b) Ginani hi yedego gu gira gasi gu mana gutshulega gu tago khiyo ga Jehovha?

³ Avba nya lidangaliya laye nya wuvili a nga loveya vaKorinto, Pawulo ganede khesi si dugeledego Mosi tepo a nga wuya khu gigomoni gya Sinayi hwane nyo ba a wonanide ni ngilozi ya Jehovha. Khovbe yaye yi di gu ngangameya! Tepo vaIsrayeli va nga wona Mosi, va di thava, khu kharato uye a di fenengedza khovbe yaye khu mwendra. (Ekisodha 34:29, 30, 33; 2 Vakorinto 3:7, 13) Pawulo tshamusede gu khuye: “Va gu vbindrugedza va khodwa ga Pfhumu, khavbo tshalu yi na gu funungudwago.” (2 Vakorinto 3:16) A di gu vbweta gu khuye ginani Pawulo?

⁴ Avba nya ndrima yi vbindridego hi hevbude gu khethu Jehovha, Muvangi nya silo satshavbo, khuye enga a gu na ni gutshulega nyo vbeleye, gu gu mba hegedwa. Khu kharato si ngu pwala gu pwani avbo a gu romo Jehovha ni “avbo li gu romo Liphuvbo la [‘Jehovha,’ NM]” gu na ni gutshulega. Ganiolu Pawulo a di khuye ho ba hi vbweta gu manega ni gutshulega gogo, gu vbwetega gu hi vbindrugedza hi khodwa ga Jehovha. Isoso so thula gu khiso gu vbwetega gu hi manega ni wupari nya wukhongolo naye. Tepo vaIsrayeli va nga ba va romo giwulani va di gu wona silo khu mawonelo nya vathu, nasiri khu mawonelo ya Jehovha. Si di gu fana ni gu ba va fenengedzidwe mwendra mapimoni ni myonyoni yawe. Avo va di gu vbweta gu thumisa gutshulega gwawe gasi gu dzi tsakisa. — Vahebheru 3:8-10.

5. a) Gutshulega muni hi ningwago khu liphuvbo la Jehovha? b) Ho dziti kharini gu khethu muthu a gu gumbi mwendro a khotedwego pasoni a nga simama gu manega ni gutshulega hi ningwago khu Jehovha? c) Siwudziso muni hi yedego gu si hlamula?

⁵ Gutshulega hi ningwago khu liphuvbo la Jehovha gu ngu vbindra gutshulega khu wugumbini. Liphuvbo lolo li ngu ninga gutshulega nya gukhongolo ngudzu guvbindra ogu nyo ningwe khu vathu. Ilo li nga hi tshula wugumbini nya gighoho ni gufa ni wugumbini nya wukhozeyi nya malipha ni sihena sawo. (Varoma 6:23; 8:2) Ina kha gu samadzise gutshulega gogo? Ambari oyu a gu gumbi mwendro a gomogo pasoni a nga manega ni gutshulega gogo. (Genesi 39:20-23) Vandriyathu Nancy Yuen ni  Harold King va di khotedwe pasoni khu myaga nya yingi khu kotani nya gukhodwa gwawe, ambari ulolo avo va diri nago gutshulega gogu. U nga wona matshango yawe omu nya JW Library. (Beya omu nya ENTREVISTAS E EXPERIÊNCIAS > ENFRENTAR DIFICULDADES.) Olu hongoleni hi hlamula siwudziso sivili. Hi nga yeyedza kharini gu khethu gutshulega gwathu gu na ni lisima gwathu? Nigu hi nga thumisa kharini gutshulega gwathu khu wugengeyi?

GUTSHULEGA HI NINGWAGO KHU NUNGUNGULU GU NA NI LISIMA NGUDZU

6. Vaisrayeli va yeyedzide kharini gu mba bonga gutshulega va nga ba va ningidwe khu Jehovha?

⁶ Tepo hi hakhago giningwa nyo hathege, hi ngu mu bonga oyu a hi ningidego. Ambari ulolo, vaIsrayeli kha va yeyedza gubonga gutshulega va nga ba va ningidwe khu Jehovha. Migimana hwane nyo ba Jehovha a va duside khu Egipito, va di pheya gu dileya guhodza ni wadwa va nga ba va wu mana Egipito. Va di pheya gu galala manaha, gu gu guhodza va nga ba va ningwa khu Jehovha. Va bwe va vbweta ni gu bweleya Egipito! Gwawe, ‘dzindzandzi, marigiri, madzwani, dzisobola ni ayo’ si diri ni lisima ngudzu guvbindra gutshulega va nga ba va ningidwe khu Jehovha gasi gu mu khozeya. Kha si samadzise gu ba Jehovha a gorogide ngudzu khavo. (Mitengo 11:5, 6, 10; 14:3, 4) Esi si ngu hi hevbudza gilo nya lisima ngudzu.

7. Pawulo wu thumiside kharini wusingalagadzi waye wu gomogo omu ga 2 Vakorinto 6:1, nigu ethu hi nga gira sasimweso khu ndziya muni?

⁷ Pawulo gengedzide maKristo yatshavbo gu ma si yeyedzi gu mba bonga gutshulega ogu Jehovha a hi ningidego khu guthumisa Gyanana gyaye, Jesu Kristo. (Leri 2 Vakorinto 6:1.) Pawulo kha nga ba a vbelede, a diri gumbi nya gighoho ni gufa, nigu isoso si di gu mu gira a si dzipwi gwadi. Ambari ulolo, ganede khuye: “A na rungudzwe Nungungulu a nyi vbulugisago khu Jesu Kristo, Pfhumu yathu!” Khu ginani a nga ganeya isoso? Pawulo tshamusede maKristo makwawe gu khuye: “Kholu nayo nya liphuvbo nya guvbanye li ningago guvbanya khu gu hi tshanganisa ni Jesu Kristo wu nyi tshude ga nayo nya gighoho ni ga tshivba nya gufe.” (Varoma 7:24, 25; 8:2) Kha nga Pawulo, gima hi nga divali gu khethu Jehovha a hi tshude wugumbini nya gighoho ni gufa. Gudzegiswa gu hi tulede ndziya nyo thumeye Nungungulu na hiri ni livhalo li agidego, nigu isoso si ngu hi ninga gutsaka nya lisine. — Ndzimo 40:8.

8, 9. a) Gigengedzo muni egi Pedro a hi ningidego maningano ni mathumiselo nya gutshulega gwathu? b) Muthu a nga thumisa kharini gutshulega gwaye khu ndziya nyo vivbe?

⁸ Kha hi yeli gu ganeya basi gu khethu hi ngu mu bonga Jehovha, ganiolu hi yede gu dzi woneya gambe gasi gu hi si thumisi gutshulega gwathu khu ndziya nyo vivbe. Khu giyeyedzo, Mupostoli Pedro a hi gengedzide gu khuye kha hi yeli gu thumisa gutshulega gwathu kha nga gighelo nyo dzi emeleye khigyo gasi gu gira silo nyo vivbe. (1 Pedro 2:16, NM) Gigengedzo gyogyo gyo hi dundrugisa esi si dugeledego vaIsrayeli giwulani. Muhuno, anethu hi ngu gi vbweta gigengedzo gyogyo, adzina ngudzu guvbindra gale. Sathane ni litigo laye va ngu hi ninga silo nya singi si ndrindrago gupima, nya nga sombo nyo ambale, guhodza, silo nyo seye niso nyo dzi hungate khiso. Varengisi nyo gengeye vo thumisa vathu nyo mbure gasi gu va hi gira hi renga silo esi khu lisine hi gu mba si vbweta. Si nga vbevbuga ngudzu gu pengiswa khu litigo hi thumisa gutshulega gwathu khu ndziya nyo vivbe.

⁹ Wusingalagadzi wa Pedro wu nga thuma gambe omu nya sipandre nya singi nya lisima ngudzu guvbanyani, nya nga sihevbulo, ni thumo hi wu hathago. Khu giyeyedzo, vaphya muhuno vo dzipwa na va gurumedzega gu thuma khu sighingi gasi gu va dzumeledwa gu hevbula omu nya dziunivhersidhadhi nya dzadi ngudzu. Vathu nya vangi vo va embeya gu khavo vo mana sihevbulo nyo khugege, va na mana mithumo nya yadi, va hakha dzitsapawu nya dzingi, va bwe va ningwa githavo. Vathu vovo va nga va yeyedza mahungu ma gu khatshi mo seketeya khu khayo ava va hevbulago univhersidhadhi va na hakha dzitsapawu nya dzingi ngudzu guvbindra ava va hevbulago xikola sekundariya basi. Sihevbulo nyo khugege si nga wonega nari gilo nya gyadi ga vaphya tepo si lombago gu va hunga makungo ma na khuhago womi wawe watshavbo. Ganiolu ginani egi avo ni vavelegi vawe va yedego gu gi dundruga?

10. Ginani hi yedego gu gi dundruga tepo hi dzi hatheyago silo sathu habune?

¹⁰ Vambe va nga pimisa gu khavo kha nga olu silo sesi si gu sa mawonelo nya muthu ni muthu, avo va tshulegide gu hatha ni gevbini va gi vbwetago gyo nga nga ne dwanisana ni livhalo lawe. Va nga dundrugeya khu malito ya Pawulo ma gu khayo: “Khu ginani gutshulega gwangu gu lamudwa khu mahingigedzo ya mumbe muthu, na?” (1 Vakorinto 10:29) Ambari olu hi tshulegidego gu dzi hatheya esi hi si vbwetago maningano ni sihevbulo ni thumo wathu, gu vbwetega gu hi dundruga gu khethu gutshulega gwathu gu na ni mivbingano nigu ni gyatshavbo hi gi hathago gi na ni mihandro yagyo. Kigyo gi giridego Pawulo khuye: “Silo satshavbo si ngu dzumedziswa, aholu khandri satshavbo si vbahago muthu; silo satshavbo si ngu dzumedziswa, aholu khandri satshavbo si phasago gukhodwa.” (1 Vakorinto 10:23) Khu kharato ambari olu hi tshulegidego gu dzi hatheya silo sathu habune, esi hi si vbwetago khandriso si gu na ni lisima ngudzu.

TEPO HI THUMEYAGO JEHOVHA HO THUMISA GUTSHULEGA GWATHU KHU WUGENGEYI

11. Khu gevbi gighelo gi giridego gu Jehovha a hi tshudzisa?

¹¹ Tepo Pedro a nga hi gengedza gu mba thumisa gutshulega gwathu khu ndziya nyo vivbe, a di khuye ndziya nya yadi nyo gu thumise gwadi khu gu hi vbanya nga “sithumi sa Nungungulu.” Khu kharato Jehovha thumiside Jesu gasi gu hi tshula khu wugumbini nya gighoho ni gufa gasi hi kodza gu thumeya Uye womini wathu watshavbo.

12. Giyeyedzo muni egi Nowa ni ndranga yaye va hi ningidego?

¹² Ndziya nya yadi nyo thumise gutshulega gwathu khu gu thumisa tepo ni tshivba yathu gasi gu thumeya Jehovha khu guvbeleya. Isoso si na hi vhikeya gu dzumeleya misuwo nya litigo ni gudogoreya gwathu si khala iso nya lisima ngudzu womini wathu. (Vagalatiya 5:16) Nga dundrugeya khesi Nowa ni ndranga yaye va giridego. Avo va di gu vbanya tigoni nyo vivbe gu nga ba gu tade khu wughevenga. Ganiolu avo kha va dzi bedzedzeya omu nya misuwo ni mithumo nya vathu va nga ba va va randrede. Va di hatha gu khala na va pharegide thumoni va nga ba va ningidwe khu Jehovha. Va di vbaha litaro, va hengeledzeya guhodza gwawe ni ogu nya sirengo, va bwe va gengedza vambe maningano ni ndrambi. “Nowa a di gira satshavbo kha nga idzo a nga rumwago khidzo khu Nungungulu.” (Genesi 6:22) Kha nga handro wakona, Nowa ni ndranga yaye va vbulugide guhegisa nya litigo lile. — Vahebheru 11:7.

13. Ginani egi Jehovha a hi rumidego gu gira?

¹³ Ginani egi Jehovha a hi rumidego gu gira muhuno? Kha nga vapizane va Jesu, hi ngu dziti gu khethu Nungungulu hi rumide gu tshumayela. (Leri Luka 4:18, 19.) Muhuno, Sathane segide maho nya vathu nya vangi nigu avo kha va tuguli gu khavo dzigumbi nya wukhongeli nya malipha, dzithomba, ni silo nya politika. (2 Vakorinto 4:4) Kha nga Jesu, ethu hi na ni lithomo nyo phase vambe vathu guti ni gukhozeya Jehovha, Nungungulu nya gutshulega. (Matewu 28:19, 20) Gu tshumayela vambe kha si vbevbugi. Mambe malanga, vathu va mwalo tepo ni guti Nungungulu, nigu vambe va ngu goroga tepo hi va tshumayelago. Ganiolu kha nga olu Jehovha a hi rumidego gu tshumayela, gu vbwetega gu hi dzi wudzisa esi: ‘Ina nyi ngu thumisa gutshulega gwangu gasi gu engedzeya thumo wangu ga Jehovha?’

14, 15. Ginani egi vathu nya vangi va Jehovha va hungago gu gira? (Wona foto gupheyani nya ndrima.)

¹⁴ Si ngu tiyisa hwambo guti gu khethu vathu nya vangi va Jehovha va ngu si wona gu khavo mahegiso momo vbafuvbi ngudzu va bwe va vbevbugisa womi va khala vapiyonero. (1 Vakorinto 9:19, 23) Vambe va gu thuma kha nga vapiyonero omu va vbanyago umo, vambe va gu ya thumeya omu nya mabandla ma vbwetago guphasedzedwa. Ndrani nya livbandre myaga yi vbindridego 250 000 nya vathu ni gu vbindra va belede thumo nya wupiyonero, nigu olu gu na ni vapiyonero nya tepo yatshavbo va vbindrago 1 100 000. Si ngu tsakisa ngudzu gu wona vathu nya vangi na va gu thumisa gutshulega gwawe gasi gu thumeya Jehovha khu ndziya yoyo!— Ndzimo 110:3.

¹⁵ Ginani gi va phasidego gu thumisa gutshulega gwawe khu wugengeyi? Nga dundrugeya khu John ni Judith, va thumidego mayigoni nya mangi ndrani nya 30 myaga yi vbindridego. Vo tshamuseya gu khavo tepo yi nga pheya Xikola nya Thumo nya Wupiyonero khu 1977, sihevbuli si kutsidwe gu ya thumeya omu gu nga ba gu vbwetega ngudzu vatshumayeli. Gasi gu va kodza gu vboheya misuwo yoyo, gu di vbwetega gu John and Judith va vbevbugisa womi wawe. Khu kharato John a di gu khaleya gu vbindrugedza thumo waye. Va hegiside khu gu ya tshumayela mayigoni ya vbavbandze. Ginani gi va phasidego gu pala sigaradzo nya nga gu hevbula lidimi nya liphya, gu dzi pwananisa ni mavbanyelo nya maphya ni dzinango nya limbe litigo? Va di gombeya ga Jehovha va bwe va tumba gu phaswa khuye. Vo dzipwa kharini khu gu ba va thumede Jehovha khu ndziya yeyi myaga yatshavbo yeyi? John wari khuye: “Nyi di dzipwa na nyi belede thumo nya wadi ngudzu nya gu gima nyi di si wu mani. Jehovha a di khala nga muthu nya lisine womini gwangu, kha nga edzi a gu idzo babe nya lihaladzo. Olu nyi ngu si pwisisa gwadi esi si ganedwago khu Jakobe 4:8: ‘Hidzimelani vbafuvbi ga Nungungulu, uye nuye a na mi hidzimelela.’ Nyi di gu dziti gu kheni nyi di gi mane egi nyi nga ba nyi gi vbweta, a gu womi nyo tsakise wu gu na ni gighelo.”

16. Dzimiliyoni nya vathu va thumiside kharini gutshulega gwawe khu wugengeyi?

¹⁶ Kha nga John ni Judith, vambe navo, va nga thuma wupiyonero khu tepo nyo laphe. Khu kotani nya simbe silo, vambe va nga thuma wupiyonero khu gitepwana. Vambe gambe, va nga phasedzeya thumo nya guvbahe wu girwago mafuni gwatshavbo. Khu giyeyedzo, gipimo nya 27 000 nya vandriyathu va dzude va ta phasedzeya guvbahwa nya tsindza nya mafu yatshavbo Warwick, Novha York. Vambe va thumide khu dzisemana dzimbili, vambe khu migimana, vambe khu mwaga mwendro guvbindra. Nya vangi ga vandriyathu vovo va digide silo nya singi gasi gu ya thuma Warwick. Avo siyeyedzo nya sadi nya vathu va thumisidego gutshulega gwawe gasi gu zundza ni gu rungudza Jehovha, Nungungulu nya gutshulega!

17. Ginani hi na gi manago ho thumisa gutshulega gwathu khu wugengeyi muhuno?

¹⁷ Hi ngu bonga ngudzu kholu hi tidego Jehovha hi bwe hi manega ni gutshulega hi gu manago khu gu mu khozeya. Hongoleni hi yeyedza gu khethu hi ngu gu ninga lisima gutshulega gwathu khesi hi si hathago. Vbavbandze nyo gu thumise khu ndziya nyo vivbe, hongoleni hi gu thumisa gasi gu thumeya Jehovha khavba hi si kodzago khavbo. Khavbovbo hi na mana makategwa aya Jehovha a hi tumbisidego khu wumindru tepo gu na tadzisegago giprofeto gegi: “Sivangwa . . . si na tshudwa wugumbini, ni gumbembani, gasi guta hengela wudhumoni nya gutshulege nya sanana sa Nungungulu.” — Varoma 8:21.