Tiyisanani khu gyanu, “ngudzungudzu olu”

1. Khu ginani mupostoli Pawulo a nga embeya maKristo nya vaHebheru gu khuye tiyisanani khu gyanu “ngudzungudzu olu”?

GA LIZANA myaga nya gupheye, mupostoli Pawulo ningide wusingalagadzi wowu ga maKristo nya vaHebheru: “Hongoleni hi tiyiselane khu gyathu, hi phasana gu gira mithumo nya wuhindzi ni mithumo yatshavbo nya yadi. Hi nga digi, kha nga edzi va nga girago vambe, giolovedzo nya gubele mitshanganoni nya Libandla lathu. Aholu, hongoleni hi tiyiselane khu gyathu, ngudzungudzu olu enu mu wonago gukhenu Litshigu la Pfhumu li ngu vboha.” (Vahebheru 10:24, 25) Si nga gira vandriyathu na va dzi wudziside gu khavo khu ginani Pawulo a nga va embeya khuye va di yede gu engedzeya gu tiyisana. Na gu si gu vbindri livbandre myaga, gighelo gyakona gi di wonega. Khu tepo yoyo, va wonide gu khavo litshigu la Jehovha nyo lamule Jerusalema li di romo vbafuvbi. Va wonide gu khavo va di yede gu tutuma dhoropani mule kha nga olu Jesu a nga ba a va embede. (Luka 21:20-22; Mithumo 2:19, 20) Litshigu lolo la Jehovha li vbohide khu mwaga nya 70, tepo vaRoma va nga tshungunula Jerusalema.

2. Khu ginani hi yedego gu dundrugeya ngudzu khu gutiyisana khu gyathu muhuno?

² Anethu hi womo ga giemo nya gufane muhuno. Litshigu la Jehovha nya “likhongolo ni gu thisa ngudzu” lomo vbafuvbi. (Joyele 2:11) Malito ya muprofeti Sofoniya nayo ma ngu thuma dziteponi dzathu: “Li ngu vboha litshigu nya likhongolo la PFHUMU Nungungulu, lomo vbafuvbi li nata khu guvbiredza.” (Sofoniya 1:14) Khu gighelo gyogyo, gu vbwetega gu hi “tiyiselane khu gyathu, mwendro gu khathaleyana, hi phasana gu gira mithumo nya wuhindzi ni mithumo yatshavbo nya yadi.” (Vahebheru 10:24) Gu vbwetega gu hi khathala ngudzu khu vandriyathu, gasi gu hi kodza gu va tiyisa sa gu vbwetega.

KHU MANI A VBWETAGO GU TIYISWA?

3. Ginani egi mupostoli Pawulo a ganedego maningano ni gu tiyiswa? (Wona foto gupheyani nya ndrima.)

³ “Uye a vbisegago a ngu vbela tshivba, aholu magana nya yadi ma gu mu tiyisedza.” (Mavingu 12:25) Hatshavbo hi ngu tshuka hi vbweta gu tiyiswa. Pawulo si vegide guagani gu khuye ambari vale va gu na ni thumo nya gu tiyise vambe, anavo va ngu vbweta gu tiyiswa. Uye lovede vandriyaye va Roma khuye: “Khu lisine, nyi ngu gola ngudzu gu ta mi wona, gasi nyi ta mi tshatshedza giningwa nya liphuvbo gi dzi kodzago gu mi tiyisela. Nya gu gola gu kheni hita tiyiselana hatshavbo: eni nyi tiyisedwa khu gukhodwa gwanu, ni enu mu tiyisedwani khu gwangu.” (Varoma 1:11, 12) Khu kharato ambari mupostoli Pawulo a di gu vbweta gu tiyiswa dzimbe dzitepo. — Leri Varoma 15:30-32.

4, 5. Khu vamani hi nga va tiyisago muhuno, nigu khu ginani?

⁴ Muhuno, hi nga tiyisa ava va thumeyago Jehovha thumoni nya tepo yatshavbo, nya nga vapiyonero nyo tumbege. Gutala nya avo va ngu dzi hiya silo nya singi va si golago gasi gu thuma wupiyonero. Khidzo saye gambe ni vamisiyonariyo, ava va thumago Bheteli, vawoneleyi nya gipandre ni vagadzi vawe, ni ava va thumago omu nya dzindranga nya wuvbindrugedzeyi. Vatshavbo vovo va ngu dzi hiya silo nyo khaguri gasi gu va engedzeya thumo wawe ga Jehovha. Khu kharato hi yede gu va tiyisa. Gu na ni vathu nya vangi ava va dogoreyago gu simama thumoni nya tepo yatshavbo ganiolu si si kodzegi khu sighelo nyo khaguri. Anavo va ngu tsaka ngudzu va gu tiyiswa.

⁵ Khu vamani vambe va vbwetago gu tiyiswa? Hi nga tiyisa vandriyathu nya vangi va hathago gu simama gu khala nya mba tshadha khu gu vbweta gu engisa nayo wa Jehovha nyo dzegwe mwendro gu dzega “nayoni wa Pfhumu.” (1 Vakorinto 7:39) Vagadzi va ngu tiyiswa tepo vama vawe va va embeyago gu khavo va ngu va haladza ni gu bonga khu satshavbo va girago. (Mavingu 31:28, 31) Makristo ma wugedwago mwendro ma emisanago ni madwali, anayo ma ngu vbweta gu tiyiswa. (2 Vatesalonika 1:3-5) Jehovha ni Jesu va ngu thaveleya vatshavbo vathu vovo nyo tumbege. — Leri 2 Vatesalonika 2:16, 17.

MADHOTA MA NGA HI TIYISA

6. Ginani hi gi hevbulago khu thumo wu girwago khu madhota omu ga Isaya 32:1, 2?

⁶ Leri Isaya 32:1, 2. Ha gu vbanya dziteponi nyo garadze si vbevbugago ngudzu gu khunguvanyega mwendro gu vbeya tshivba. Jesu a gu thumisa vandriyaye va todzidwego ni “dzindruna” nyo tumbege nya dzimbe dzinvuta gasi gu hi tiyisa. Madhota yoyo nya libandla khandri ‘vafumeli’ nya gukhodwa gwathu ganiolu ‘vaphasedzeyi’ nya gutsaka gwathu. Avo vo vbweta gu hi phasa gu mana gutsaka ni gu simama gutumbega. — 2 Vakorinto 1:24.

7, 8. Madhota ma nga tiyisa kharini vambe khesi ma si ganeyago ni esi ma si girago?

⁷ Madhota ma nga pimedzeya mupostoli Pawulo, oyu a nga ba a zama gu tiyisa vandriyaye tepo yatshavbo. Lovede maKristo ya Tesalonika ma nga ba ma tshaniswa khuye: “Khu gu mi haladzani ngudzu, hi di dzi emisede gu mba mi ningani mahungu nya Yadi basi, aholu, ni gu ningela gambe guvbanya gwathu khu enu, kholu enu mu khade nga sanana sathu nya sigodwa.” — 1 Vatesalonika 2:8.

⁸ Madhota ma nga tiyisa ngudzu khu malito yawo. Ganiolu ina isoso si ngu eneya tepo yatshavbo? Pawulo embede madhota ya Efeso khuye: “Mu . . . phasedzela vale va keneledwago. Dundrugani magana ya Pfhumu Jesu a gukhuye: ‘Kategide ngudzu oyu a ningago guvbindra oyu a hakhago.’” (Mithumo 20:35) Pawulo a di dzi emisede gu ‘ningela satshavbo a nga ba ari naso, ambari wurumba waye khu kota nya’ vandriyaye. Yeyedzide khu sigiro saye gu khuye a di dzi emisede gu gira satshavbo a nga ba a si kodza khavo. (2 Vakorinto 12:15) Khu ndziya yamweyo, madhota ma yede gu tiyisa ni gu thaveleya vambe nasiri basi khesi ma si ganeyago ganiolu khesi ma si girago gambe. Isoso so yeyedza gu khiso ayo ma ngu khathala khethu kamo. — 1 Vakorinto 14:3.

9. Madhota ma nga ninga kharini wusingalagadzi khu ndziya yi tiyisago?

⁹ Gasi gu tiyisa vandriyathu, gu vbwetega gu yimbe tepo madhota ma ninga wusingalagadzi. Madhota ma nga hevbula omu nya Bhibhiliya edzi ma nga girago khidzo isoso khu ndziya yi tiyisago. Jesu vegide giyeyedzo nya gyadi nyo ninge wusingalagadzi tepo a nga rumeya mahungu ga mabandla ya Aziya Menor hwane nyo ba a fude a bwe a wuga. Uye gambe ningede wusingalagadzi nya lisima ngudzu ga mabandla ya Efeso, Pergamo ni Tiyatira. Ganiolu na si gu va ningi wusingalagadzi, a di va zundza khu satshavbo silo nya sadi va nga ba va gira. (Gutuledwa 2:1-5, 12, 13, 18, 19) Jesu embede libandla la Lawodhikeya khuye: “Eni, nya gu kawuka ni gu laya avo nyi va golago. Khu kharato, dzi garadze, u vbindrugedza mavbanyelo.” (Gutuledwa 3:19) Madhota yathu nayo ma gu zama gu pimedzeya Kristo khu ndziya ma ningago khiyo wusingalagadzi.

KHANDRI MADHOTA WONGA MA YEDEGO GU TIYISA VAMBE

10. Hatshavbo hi nga tiyisana khu gyathu khu ndziya muni?

¹⁰ Madhota khandrayo wonga ma yedego gu tiyisa vambe. Pawulo kutside maKristo yatshavbo gu ganeya “magana nya yadi, nya gu phasedzele” vambe. (Vaefeso 4:29) Moyo ni moyo wathu yede gu dundrugeya khesi si vbwetegago ga vambe gasi gu hi va phasa. Pawulo lovede maKristo nya vaHebheru khuye: “Khusedzani mandza ma garadego, mu gu tiyisa dzikhungumudzi dzi vbedego tshivba. Tulani dzindzila nya gululame, gasi a si khuyugi oyu a hasidego, aholu, a hawuluga.” (Vahebheru 12:12, 13) Hatshavbo hi nga tiyisana ni gu thaveleyana khu gyathu khesi hi si ganeyago ambari ho ba hi ngari vaphya ngudzu.

11. Ginani gi phasidego Marthe tepo a nga ba a rerekide?

¹¹ Ndriyathu nyo khaguri nya pwani khu Marthea a di rerekide khu tepo nyo khaguri. (Wona tshamuselo wa vbavbatshi.) Lovide khuye: “Litshigu limwedo, nyi di gombeya nyi lomba gu tiyiswa, gitepwana hwane nya isoso nyi di manana ni ndriyathu nya nyamayi a dandridego khu tanga oyu a nga nyi yeyedza wuwadi ni gu nyi khathaleya, a gu iso nyi nga ba nyi si vbweta myaga hwane. Uye a di nyi tshamuseya esi a giridego tepo a nga a emisana ni gigaradzo nya nga gyangu, isoso si vbungude gugaradzega gwangu.” Ndriyathu wule adzina ne kha pimisi khedzi malito yaye ma phasidego khidzo Marthe!

12, 13. Hi nga wu thumisa kharini wusingalagadzi wu gomogo omu ga Vafilipi 2:1-4?

¹² Pawulo lovede maKristo ya Filipi khuye: “Khavbo avbo, mwa gu bani mu mane gutiya khu ga Kristo, ni gutangadziswa khu lihaladzo laye, ni gutshanganiswa khu Liphuvbo laye, mwa gu bani mu li pima lihaladzo li guromo vbakari gwanu, nyi ngu mi lomba gukheni mu tadzise gutsaka gwangu khu gukheni, mwatshavbo mu hengele mapimo mamowo, lihaladzo limwedo, hefemulo moyo ni gudogorela gumogo basi. Mu nga girini gilo khu monyo nya gudwanele gu dzi khusedza mwendro khu matshandza nya mahala, aholu, girani khu gu dzi sodzisa, mu dzi gira va nyalidede ga vathu vatshavbo. Muthu ni muthu a nga dwaneli basi gu sayisa esi si gu saye, aholu, a na dzi garadze gambe khu sile si gu sa vangana.” — Vafilipi 2:1-4.

¹³ Hatshavbo hi yede gu sota dzindziya nyo phasane khu gyathu. Gasi gu tiyisa vandriyathu, hi nga va thaveleya khu ndziya nya lihaladzo; hi yeyedza gukhathala khavo, ni lihaladzo ni gupweya-wusiwana.

DZINDZIYA NYO TIYISE KHIDZO VAMBE

14. Khu yevbini mweyo nya dzindziya hi nga tiyisago khiyo vambe?

¹⁴ Si ngu hi tsakisa gupwa gupwani ava hi va phasidego dziteponi dzi vbindridego va ngo simama gutumbega. Mupostoli Johane lovide khuye: “Gi mwalo gi nyi tsakisago guvbindra gupwa gupwani sanana sangu si ngu vbanya khu gu landra lisine.” (3 Johane 4) Vapiyonero nya vangi va ngu tsaka tepo va wonago gu khavo vathu nyo khaguri va va phasidego gu hevbula lisine myaga hwane va ngo simama gu thumeya Jehovha khu gutumbega, adzina yimbe tepo kha nga vapiyonero. Khu kharato, vapiyonero vo vbeya tshivba, hi nga va dundrugisa satshavbo silo nya sadi va giridego gasi gu phasa vambe.

15. Ginani hi nga girago gasi gu tiyisa vale va thumeyago Jehovha khu gutumbega?

¹⁵ Gutala nya vawoneleyi nya gipandre vari khavo avo ni vagadzi vawe va ngu tiyiswa tepo va hakhago gidangaliyana nyo bonge thumo wawe hwane nyo ba va endrede libandla nyo khaguri. Isoso si ngu girega gambe ga madhota, vamisiyonariyo, vapiyonero, ava va thumeyago Bheteli, ni vatshavbo va thumeyago Jehovha khu gutumbega. Khu gu va bonga, si nga gira hi va tiyisa khu ndziya hi gu mba yi pimisa.

EDZI HI NGA TIYISANAGO KHIDZO

16. Khu sevbini silo nyo vbevbuge hi nga si girago gasi gu tiyisa muthu nyo khaguri?

¹⁶ Ahati so ba si gu garadzeya gu embeya vambe idzo u dzipwago khidzo khavo? Khu lisine, kha si garadzi ngudzu gu tiyisa vambe. Zama gu hegeya muthu nyo khaguri. O mba gu hegeya nuye, si nga gira nari o emisana ni gigaradzo nyo khaguri, na gu vbweta muthu gasi gu mu bhuleya. U nga mu thaveleya khu gu mu engiseya basi. — Jakobe 1:19.

17. Ginani gi tiyisidego muphya moyo nya ndriyathu?

¹⁷ Muphya moyo nya ndriyathu nyo pwani khu Henri, a di vbeledwa khu gutsaka tepo valongo vaye nyo khaguri va digidego gu thumeya Jehovha. Moyo nya avo a di ri papayi waye, a nga ba a thuma kha nga lidhota. Muwoneleyi nyo khaguri nya gipandre wonide gu khuye Henri a di gu vbeya tshivba, khu kharato a di mu rana gasi gu ya seya naye kafe. Uye a di engiseya gwadi tepo Henri a nga ba a tshamuseya edzi a nga ba a dzipwa khidzo. Hwane nyo ba va bhude, Henri a di tugula gu khuye ndziya yamweyo nyo phase va ndrangani gwaye gu wuya lisineni, khu gu uye a simama na tumbegide. Uye thaveledwe gambe khu gu leri Ndzimo 46, Sofoniya 3:17, ni Marko 10:29, 30.

18. a) Ginani a lovidego Pfhumu Solomoni maningano ni gu tiyisa hwambo? b) Mawonelo muni ma ningidwego khu mupostoli Pawulo?

¹⁸ Ginani hi nga gi hevbulago avba nya matshango ya Marthe ni Henri? Hatshavbo hi nga thaveleya ni gu tiyisa vandriyathu. Pfhumu Solomoni lovide gu khuye: “Mahungu ma gu ganedwa khidzo gu vbwetegago khidzo, ma gu tshamba ngudzu. Iso si tsakedwago khu maho, sa gu tsakisa monyo, ni mahungu nya yadi, ma gu tiyisa marambo.” (Mavingu 15:23, 30) Womo u mu dundrugago a vbedego tshivba? Khu ginani u si mu gireyigo gilogyo nya nga gu mu lereya ndrima nyo khaguri omu nya Mukhedziseyi mwendro omu nya sayiti yathu? Pawulo gambe hevbudzide gu khuye gu embeleya dzindzimo nya Mufumo hatshavbo si nga hi tsakisa. A di lova khuye: “Hevbudzanani, mu ningana wusingalagadzi mwendro mu tiyisana khu gyanu. Embelelani dzindzimo ni sizimba na mu gu bonga Nungungulu khu monyo wanu watshavbo.” — Vakolosi 3:16; Mithumo 16:25.

19. Khu ginani nugunugu gu na vbwetegago ngudzu gu hi tiyisana khu gyathu, nigu ginani hi yedego gu gira?

¹⁹ Kha nga olu litshigu la Jehovha li hidzimeyago, gu na vbwetega ngudzu gu hi tiyisana khu gyathu. (Vahebheru 10:25) Hi na tsaka ha gu gira esi Pawulo a hi gengedzidego: “Tangadzisanani, mwendro tiyisanani, phasanani moyo ni moyo nga edzi mutago na mu gu gira kala olu.” — 1 Vatesalonika 5:11.