Khu mani a vbahago mapimo yago?

1, 2. a) Jesu hlamude kharini tepo Pedro a nga mu kutsa gu dzi pweya abune? (Wona foto vbatshani.) b) Khu ginani Jesu a hlamudego khu ndziya yoyo?

VAPIZANE va Jesu va di gorogide! Va di gu pimisa gu khavo Jesu a di hadzi wusedza mufumo wa Israyeli, ganiolu Jesu a di va embeya gu khuye a di hadzi tshaniswa a bwe songwa. Mupostoli Pedro a di pheya khuye gu ganeya, khuye: “Isoso si nga giregi gwago, Pfhumu! Silo nya nga isoso gima kha si na gu dugelela!” Jesu a mu hlamula khuye: “Leya, Sathane! U womo kha nga mutshunganisi wangu, kholu mapimo yago kha mati khu ga Nungungulu; aholu, khu ga vathu!” — Matewu 16:21-23; Mithumo 1:6.

² Khu malito yoyo, Jesu vegide guagani gu khuye mapimiselo ya Jehovha ma hambanide ni aya nya litigo leli li fumedwago khu Sathane. (1 Johane 5:19) Pedro a di kutsa Jesu gu tsakisa gudogoreya gwaye kha nga edzi va girago khidzo vathu nya vangi va tigoni momu. Ganiolu Jesu a di gu dziti gu khuye Jehovha a gu vbweta gu khuye a dzi dongiseya gutshaniseka ni gufa gu nga ba guta. Hlamulo wa Jesu wu yeyedzide gwadi khu khuwo uye dzumede mapimiselo ya Jehovha a bwe a bomba khu guvbeleya aya nya litigo.

3. Khu ginani si garadzago gu dzumeya mapimiselo ya Jehovha ni gu bomba aya nya litigo?

³ Ahati ethu ke? Ho pimisa nga Jehovha mwendro nga vathu nya litigo? Kha nga maKristo, ho dzi garadzeya gu gira esi si tsakisago Nungungulu. Ganiolu, ahati ndziya hi pimisago khiyo ke? Ina hi ngu dzi dzigaradzeya gu pimisa nga Jehovha, si thulago gu wona silo nga edzi Jehovha a si wonago khidzo? Gasi gu gira isoso hi yede gu dzi garadza ngudzu. Ambari ulolo, si vbevbugide ngudzu gu pimisa nga vathu nya litigo. Kholu hi randredwe khu mavbanyelo nya litigo leli. (Vaefeso 2:2) Nigu, vathu nya litigo gambe va gu khathala khu silo sawe basi, khu kharato si nga gira hi lingwa gu pimisa nga avo. Khu lisine, si ngu garadza gu pimisa nga Jehovha, ganiolu si vbevbugide ngudzu gu pimisa nga vathu nya litigo.

4. a) Ginani gi na hi dugeleyago ho dzumeleya litigo li kutsedzeya mapimo yathu? b) Ginani hi na gi hevbulago omu nya ndrima yi landreyago?

⁴ Ho dzumeleya litigo li kutsedzeya mapimo yathu, hi na pheya gu dzi fuma hi bwe hi vbweta gu dzi hungeya habune esi nya sadi ni esi nyo vivbe. (Marko 7:21, 22) Khu kharato si na ni lisima gu hevbuleya gu manega ni ‘mapimo ma tago khu ga Nungungulu’ nasiri “khu ga vathu.” Ndrima yeyi yi na hi phasa gu gira isoso. Hi na wona sighelo si yeyedzago gu khiso gu wona silo khu ndziya eyi Jehovha a si wonago khiyo khandri ga gu hi himbedzeya gilo ganiolu ga gu hi vhikeya. Hi na wona gambe edzi hi nga potsago khidzo gu vbahwa mwendro gu kutsedzedwa khu mapimo nya litigo leli. Omu nya ndrima yi landreyago, hi na hevbula edzi hi nga tugulago khidzo mapimo ya Jehovha maningano ni silo nyo khaguri ni edzi hi nga pimisago khidzo nga uye.

MAPIMO YA JEHOVHA MA NGU PHASA

5. Khu ginani vambe vathu va gu mba dzina gu kutsedzedwa khu muthu?

⁵ Vathu nyo khaguri kha va dzini gu khavo ndziya va pimisago khiyo yi kutsedzedwa khu muthu. Avo vari khavo: “Womi khwangu.” Adzina na va vbweta gu khavo va gu dzi hungeya vabune esi va si vbwetago nigu mwalo a yedego gu va himbedzeya. Avo kha va vbweti gu thangedwa khu muthu mwendro gu gurumedzwa gu gira silo nga edzi vambe va girago khidzo.a (Wona tshamuselo wa vbavbatshi.)

6. a) Gutshulega muni a hi ningago Jehovha? b) Ina gutshulega gogo gu na ni mivbingano?

⁶ Si ngu tsakisa guti gu khethu ha gu dzumeya mapimo ya Jehovha, hi na simama gu thumisa mawonelo yathu nethu. Vakorinto nya wuvili 3:17 wari khuye: “Avbo li guromo Liphuvbo la Pfhumu, gomo gutshulega.” Jehovha a ngu hi ninga gutshulega nyo dzi hatheye gu khala muthu hi mu vbwetago. Hi ngu kodza gu dzi hatheya silo si hi tsakisago. Jehovha hi giride khu ndziya yoyo. Ganiolu isoso kha si thuli gu khiso gutshulega gwathu gu mwalo mivbingano. (Leri Vagalatiya 5:13.) Jehovha o vbweta gu khuye hi thumisa Lito laye ho ba hi vbweta guti esi nya sadi ni esi nyo vivbe. Ina a gu hi himbedzeya gu gira esi hi si vbwetago, mwendro a gu hi phasa?

7, 8. Gu wona silo khu mawonelo ya Jehovha so thula gu khiso a gu hi himbedzeya gu manega ni mawonelo yathu? Ninga giyeyedzo.

⁷ Hongoleni hi si fananisa ni vavelegi va hevbudzago sanana sawe mavbanyelo nya yadi. Adzina va nga si hevbudza gu khala vathu nyo tumbege, gu thuma khu sighingi, ni gu khathala khu vambe. Isoso khandri gu si himbedzeya gu gira esi si si vbwetago. Vbavbandze nya isoso, vavelegi vo dongiseya sanana sawe gya mindru wa tshigu. Tepo sanana si dandrago si manega ni dzindranga dzaso, si na ba si tshulegide gu dzi hatheya esi si si vbwetago. So hatha gu vbanya khu guya khesi si hevbudzidwego khu vavelegi vaso, si na dzi gireya makungo nya yadi si bwe si potsa sigaradzo nya singi, ni gugaradzega mwendro gu gira silo, si dandza na si vbide.

⁸ Kha nga muvelegi nya wadi, Jehovha o vbweta gu khuye sanana saye si manega ni womi nyo tsakise ngudzu khavba si kodzegago khavbo. (Isaya 48:17, 18) Khu kharato a gu hi hevbudza matshina nya milayo maningano ni mavbanyelo ni edzi hi yedego gu phara khidzo vambe. A gu hi kutsa gu hevbula gu wona silo khu ndziya a si wonago khiyo hi bwe hi vbanya khu guya khu milayo yaye. Isoso kha si thuli gu khiso a gu hi himbedzeya gu manega ni mawonelo yathu. Wulangani nya isoso, so hi ninga guti si bwe si hi phasa gu hunga silo khu wugengeyi. (Ndzimo 92:5; Mavingu 2:1-5; Isaya 55:9) Hi na simama gu manega ni mawonelo yathu ganiolu hi na dzi hatheya silo, si na hi reseyago gutsaka. (Ndzimo 1:2, 3) Hi na phasega khu dzindziya nya dzingi ha gu pimisa nga Jehovha!

MAPIMO YA JEHOVHA MA KHUGEGIDE

9, 10. Ginani gi yeyedzago gu khigyo mapimo ya Jehovha ma khugegide ngudzu guvbindra aya nya litigo?

⁹ Gimbe gighelo gi hi girago hi vbweta gu khethu mapimo yathu ma fana ni aya Jehovha khu gu mapimo yaye ma khugegide ngudzu guvbindra aya nya litigo. Litigo li ngu ninga wusingalagadzi maningano ni mavbanyelo ma gu yadi, mamanelo nya litsako ndrangani, edzi hi nga dugeleyago khidzo thumoni wathu nyo dzi vbanyise, ni simbe silo guvbanyani gwathu. Ganiolu gutala nya wusingalagadzi wowo kha wu pwanani ni mapimo ya Jehovha. Khu giyeyedzo, gutala nya dzitepo litigo la gu kutsa vathu gu khathala khu silo sawe basi ni gu wona wubhayi nga gilo nyo olovelege. Nigu dzimbe dzitepo li ngu kutsedzeya gu khilo mwama ni ngadzi va na mana gutsaka va gu hambana mwendro gu tshula wugadzi ambari nya mba na sighelo nyo pwale. Wusingalagadzi wowo wu ngu dwanisana ni esi Bhibhiliya yi si hevbudzago. Ganiolu wusingalagadzi nya litigo ni owu wa Jehovha khu wevbini wu gu wadi ngudzu muhuno?

¹⁰ Jesu a di khuye: “Guti gwa gu dzi yeyedza khu mithumo yaye.” (Matewu 11:19) Ambari olu litigo li yago li andra khu tecnologia, kha li si kodzi gu lulamisa sigaradzo nya singi si hi tandregisago gu tsaka, nya nga dzinyimbi, gihatheya nya mafumbo ni wughevenga. Nigu litigo gambe la gu wona wubhayi nari gilo nyo olovelege. Ganiolu vathu nya vangi va ngu dzumeya gu khavo wubhayi wu ngu tshungunula dzindranga, wu vanga madwali, ni simbe sigaradzo. Ahati Jehovha ke, a gu si wona kharini? Makristo ma dzumeyago mawonelo ya Jehovha ma ngu tsaka dzindrangani gwawo, ma na ni womi nya wadi, nigu ma ngu pwanana ni vandriyawe mafuni gwatshavbo. (Isaya 2:4; Mithumo 10:34, 35; 1 Vakorinto 6:9-11) Isoso so yeyedza gwadi gu khiso mapimo ya Jehovha ma khugegide ngudzu guvbindra aya nya litigo.

11. Khu mani a vbahidego mapimo ya Mosi, nigu khu yevbini mihandro yakone?

¹¹ Sithumi nyo tumbege sa Jehovha sa teponi yi vbindridego si di gu dziti gu khiso mapimo ya Jehovha ma khugegide ngudzu. Khu giyeyedzo, ambari olu Mosi a hevbudzidwego ‘guti gwatshavbo gwa vaGipiti,’ a di gu dziti gu khuye guti nya lisine khogu gu tago khiyo ga Jehovha. (Mithumo 7:22; Ndzimo 90:12) Khu kharato, uye a di lomba Jehovha khuye: ‘Nyi embeye gikungo gyago.’ (Ekisodha 33:13) Khu kotani nya olu Mosi a digidego Jehovha a vbaha mapimo yaye, Jehovha mu thumiside khu ndziya nyo samadzise ngudzu gasi gu tadzisa makungo Yaye a bwe a mu zundza khu gu mu rana khuye mwama nya gukhodwa nya gukhongolo. — Vahebheru 11:24-27.

12. Pawulo dzi seketede hayini tepo a nga hunga makungo yaye?

¹² Mupostoli Pawulo a di guti ngudzu, a di hevbude omu nya dzixikola nya dzadi, nigu a di gu ganeya malimi mavili khu wudugwana wakona. (Mithumo 5:34; 21:37, 39; 22:2, 3) Ganiolu, a di bomba guti nya litigo a hunga gu gira silo khu guya khu Lito la Nungungulu. (Leri Mithumo 17:2; 1 Vakorinto 2:6, 7, 13.) Kha nga handro wakone, a di dugeleya ngudzu thumoni waye nyo tshumayele a bwe a vireya khu maho nyo fuviye tshatshazelo nya gupindruge. — 2 Thimoti 4:8.

13. Khu mani a yedego gu vbindrugedza mapimiselo yathu gasi gu hi wona silo khu mawonelo ya Jehovha?

¹³ Khu lisine, mapimo ya Nungungulu ma khugegide ngudzu guvbindra aya nya litigo. Ho landreya milayo ya Nungungulu, hi na tsaka khu lisine hi bwe hi dugeleya. Ganiolu Jehovha kha na nga hi gurumedza gu pimisa nga uye. ‘Githumi nya gutumbege, ni nya gugengeye’ kha gi woneleyi mapimo yathu, ambari madhota nayo. (Matewu 24:45; 2 Vakorinto 1:24) Moyo ni moyo wathu gu vbwetega gu a vbindrugedza mapimiselo yaye gasi gu hi wona silo khu mawonelo ya Jehovha. Hi nga si gira kharini isoso?

U NGA DZUMEYI GU VBAHWA KHU LITIGO LELI

14, 15. a) Ginani hi yedego gu dundrugeya khigyo gasi gu hi pimimsa nga Jehovha? b) Khu ginani hi si yeligo gu dzumeleya mawonelo nya litigo ma beya mapimoni gwathu? Ninga giyeyedzo.

¹⁴ Varoma 12:2 wari khuye: “Mu nga landriselini mikhuwo nya mavbanyelo nya litigo leli, aholu vbindrugedzani mapimo yanu ni mavbanyelo yanu yatshavbo, gasi mu kodze gupima gugola gwa Nungungulu; ni gu pima esi nya sadi, nya gutsakise, si vbeledego mahoni gwa Nungungulu.” Lowo wowu wo hi yeyedza gu khuwo ambari ho ba hi vbahidwe mapimo yathu khu simbe silo na hi si gu hevbuli lisine, hi ngu kodza gu vbindrugedza mapimo yathu ma fana ni aya ya Nungungulu. Ambari olu makhalelo ya vavelegi vathu ni esi hi si hevbudego guvbanyani si khuhago mapimiselo yathu, mapimo yathu ma nga vbindrugedza khu lisine. Nigu ma na vbindrugedza khu guya khesi hi hathago gu dundrugeya khiso. Ha gu dundrugeya khu mapimo ya Jehovha, hi na si wona habune gu khethu mawonelo yaye khyadi tepo yatshavbo. Khavbovbo, hi na dogoreya gu wona silo khu ndziya a si wonago khiyo.

¹⁵ Ganiolu gasi gu hi vbindrugedza mapimo yathu hi pimisa nga Jehovha, gu vbwetega gu hi si ‘landriseli mikhuwo nya mavbanyelo nya litigo leli.’ Isoso so thula gu khiso gu vbwetega gu hi diga gu sixitiri, gu leri, nigu engiseya ni gevbini gi dwanisanago ni mapimo ya Nungungulu. Gasi gu hi phasa gu pwisisa lisima nyo gire isoso, hi na ninga giyeyedzo khu guhodza. Muthu a gu vbweta gu manega ni womi nya wadi, adzina a nga hunga gu hodza guhodza nya gwadi. Ganiolu a na ba a thumede giburwana a gu patedzeya ni guhodza nyo hine! Khu ndziya nyo fane, ho dzumeleya mapimo nya litigo, gudzigaradza gwatshavbo hi gu girago gasi gu hevbula khu mapimo ya Jehovha gu na ba gu luzide.

16. Ginani egi hi yedego gu dzi vhikeya gwagyo?

¹⁶ Ina si nga kodzega gu potsa mawonelo nya litigo khu guvbeleya? Ahihi, hi na tshuka hi khuhwa khu mawonelo nyo khaguri nya litigo, kholu hi mwalo ndziya nya gu dzi hamanise khu guvbeleya ni litigo. (1 Vakorinto 5:9, 10) Ambari tepo hi tshumayelago, hi ngupwa vathu na va gu ganeya silo nyo vivbe ni malipha khu Nungungulu. Ganiolu kha nga olu hi si kodzigo gu potsa mawonelo nyo vivbe khu guvbeleya, kha hi yeli gu ma dundrugeya mwendro gu ma dzumeya. Gu fana ni Jesu, gu vbwetega gu hi dzegeya gu bomba mapimo ya Sathane. Nigu hi nga dzi vhikeya khu gu potsa gu dzi rengisa mapimoni nya litigo. — Leri Mavingu 4:23.

17. Hi nga potsa kharini gu dzi rengisa mapimoni nya litigo?

¹⁷ Khu giyeyedzo, hi yede gu hatha gwadi dzipari dzathu. Bhibhiliya yi ngu hi gengedza gu khiyo ha gu gira wupari ni vathu va si khozeyigo Jehovha, hi na pheya gu pimisa khu ndziya va pimisago khiyo. (Mavingu 13:20; 1 Vakorinto 15:12, 32, 33) Hi yede gambe gu hatha gwadi sivbungadzo sathu. Tepo hi potsago sivbungadzo si kutsedzeyago sihevbudzo nya evholusawu, wughevenga, gu mba fa nya hefemulo, hi ngu potsa gu nyenyezisa mapimo yathu khu mawonelo ma “wugelago guti gwa Nungungulu.” — 2 Vakorinto 10:5.

18, 19. a) Khu ginani hi yedego gu dzi woneya ga mawonelo nya litigo ma kutsedzedwago khu dzindziya dzi sihadego? b) Siwudziso muni hi yedego gu dzi gira nigu khu ginani?

¹⁸ Hi yede gu tugula hi bwe hi potsa mawonelo nya litigo ma kutsedzedwago khu dzindziya nya mba wonega gwadi. Khu giyeyedzo, mambe mahungu ma ganedwago omu dziradhiyu ni dzitelevhizawu ma gu ema ni mawonelo nyo khaguri nya politika. Nigu mambe matimo nya maphya nya vathu ma gu kutsedzeya misuwo ni sigiro si samadwago khu litigo. Dzimbe dzifilmu ni mabhuku ma gu kutsedzeya vathu gu yeyedza liphuvbo nya gu thangise gugola gwawe basi, khu ndziya nya gu li wonega na liri liphuvbo nya ladi ni gu tsakisa. Ambari ulolo, mawonelo yoyo kha ma pwanani ni Bhibhiliya. Kholu iyo yari khiyo ethu ni dzindranga dzathu hi na tsaka khu lisine ho haladza Jehovha guvbindra satshavbo. (Matewu 22:36-39) Nigu, simbe sivbungadzo nya sanana, ambari olu si dzumeledwago khu vathu nya vangi, si nga gira gu sanana si beleya mavbanyelo nyo vivbe.

¹⁹ Isoso kha si thuli gu khiso si vivbide gu vbungadza. Ganiolu hi yede gu dzi wudzisa esi: ‘Ina nyi ngu si kodza gu tugula mawonelo nya litigo ambari mo ba ma sihade? Ina nyi ngu dzi vhikeya gumogo ni sanana sangu ga milongoloko nyo khaguri nya Televhizawu mwendro ga mabhuku nyo khaguri nyo vivbe? Ina nyi ngu phasa sanana sangu gu wona silo khu mawonelo ya Jehovha gasi gu si si kutsedzedwi khu mawonelo nya litigo si ma pwago ni gu ma wona?’ Ha gu si kodza gu wona guhambana gu gomogo avba nya mapimo ya Nungungulu ni aya nya litigo, hi na potsa gu ‘landrisela mikhuwo nya mavbanyelo nya litigo leli.’

KHU MANI A GU VBAHAGO OLU?

20. Ginani gi na yeyedzago oyu a hi vbahago?

²⁰ Gu vbwetega gu hi dundruga gu khethu sifefe sivili basi nya mahungu si gomogo. A gu Jehovha ni Sathane gumogo ni litigo laye. Khu mani a gu vbahago? Hlamulo wakone khowu: Khegi gi gu ningago mahungu. Ho dzumeya mawonelo nya litigo, litigo li na vbaha mapimiselo yathu nigu hi na pimisa ni gu gira silo gasi gu dzi tsakisa habune basi. Khu kharato, si na ni lisima ngudzu gu hatha gwadi esi hi si sistirigo, hi lerigo, hi engiseyago ni esi hi si pimisago.

21. Ginani hi na ganeyago khigyo avba nya ndrima yi landreyago?

²¹ Avba nya ndrima yeyi hi hevbude gu khethu gasi gu manega ni mapimo ya Jehovha, hi yede gu potsa mawonelo nya litigo. Hi yede gambe gu dundrugeya khu mapimo ya Nungungulu gasi gu anethu hi pimisa nga uye. Omu nya ndrima yi landreyago, hi na hevbula edzi hi nga girago khidzo isoso.