Ina u ngu pimisa nga edzi Jehovha a pimisago khidzo?

1, 2. Ginani hi gi hevbulago, tepo hi yago hi dandra khu liphuvboni? Ninga giyeyedzo.

NGA dundrugeya khu muthu a ningago giningwa gyanana nya gidugwana. Vavelegi vagyo va gi embeya khavo, “indra khuwe nyi bongide.” Igyo gi gira isoso kholu va gi rumidego. Ganiolu tepo gi yago gi dandra, gi pheya gu pwisisa gighelo gi girago vavelegi vagyo va wona gu bonga na guri ga lisima tepo vambe va girago silo nya sadi. Khavbovbo, gi kutsega nigyo gu bonga vathu nya mba rumwa kholu gi hevbude gu bonga.

² Isoso si hi giregede nethu. Tepo hi nga pheya gu hevbula lisine, hi hevbude gu khethu si na ni lisima gu engisa milayo nya litshina ya Jehovha. Ganiolu tepo hi yago hi simama gu dandra khu liphuvboni, ha gu hevbula nya singi maningano ni mapimo yaye, a gu esi a si golago, esi a si nyenyago, ni mawonelo yaye nya silo. Tepo hi dzumeyago gu gimbidziswa khu mapimo ya Jehovha omu nya esi hi si hathago ha gu pimisa nga Jehovha.

3. Khu ginani si tshukago si garadza gu pimisa nga Jehovha?

³ Ambari olu hi golago gu hevbula gu pimisa nga Jehovha, dzimbe dzitepo si ngu garadza gu pimisa nga uye kholu kha ha vbeleya. Khu giyeyedzo, hi ngu dziti edzi Jehovha a gu wonago khidzo gu mba handzega, gu landriseya dzithomba, gu tshumayela, mathumiselo nyo vivbe nya novba, ni simbe silo. Ganiolu si nga tshuka si hi garadzeya gu pwisisa gu khethu khu ginani a si wonago khu ndziya yoyo. Khu kharato hi nga hevbula kharini gu engedzeya gu pimisa nga Jehovha? Nigu isoso si na hi phasa kharini gu gira silo nya sadi olu ni mindru wa tshigu?

HI NGA PIMISA NGA JEHOVHA KHU NDZIYA MUNI?

4. So thula ginani gu vbindrugedza mapimo yathu?

⁴ Leri Varoma 12:2. Omu nya livhesi leli, mupostoli Pawulo tshamusede esi hi yedego gu gira gasi gu hevbula gu pimisa nga Jehovha. Uye a di khuye gu vbwetega gu hi si “landriselini mikhuwo nya mavbanyelo nya litigo leli.” Kha nga hi hevbudego omu nya dzindrima dzi vbindridego, isoso so thula gu khiso hi yede gu bomba mawonelo ni mavbanyelo nya litigo. Ganiolu Pawulo ganede gambe gu khuye gu vbwetega gu hi vbindrugedza mapimo yathu. Isoso so thula gu khiso hi yede gu hevbula lito la Nungungulu, hi pwisisa mapimo yaye, hi dundrugeya khayo, hi bwe hi dzi garadzeya gu manega ni mapimo ya Nungungulu.

5. Tshamueya guhambana gu gomogo avba nya gu leri ni gu hevbula.

⁵ Gu hevbula khandri gu vbindrisa maho basi mwendro gu lova kwenga khu vbavbatshi nya hlamulo nya giwudziso nya gihevbulo. Tepo hi hevbulago, ha gu dundrugeya khesi mahungu yoyo ma hi hevbudzago maningano ni gu khayo khu mani Jehovha, ginani a girago, ni edzi a pimisago khidzo. Ha gu zama gu pwisisa gu khethu khu ginani Jehovha a hi lombago gu gira silo nyo khaguri simbe a hi himbedzeya. Hi ngu dundrugeya gambe khesi hi yedego gu si vbindrugedza guvbanyani gwathu ni mapimoni gwathu. Lisine gu, kha si na nga kodzega gu dundrugeya khu satshavbo sesi tepo ni tepo hi hevbulago. Ganiolu gwadi gu vbedza adzina metadu nya tepo hi yi vbedzago na hi gu hevbula gasi gu dundrugeya khesi hi si leridego. — Ndzimo 119:97; 1 Thimoti 4:15.

6. Ginani gi giregago ha gu dundrugeya khu Lito la Nungungulu?

⁶ Gyomo gilo nyo samadzise gi giregago ha gu dundrugeya khu Lito la Nungungulu tepo yatshavbo. Ha gu dzi tiyisegisa habune mwendro gu dzi gira hi khodwa gu khethu, mapimo ya Jehovha ma vbelede. Hi pheya gu pwisisa edzi Jehovha a si wonago khidzo silo, hi bwe hi hegisa khu gu dzi pwananisa ni mapimiselo yaye. Hi vbindrugedza mapimo yathu hi pheya gu pimisa khu yimbe ndziya. Vbadugwana vbadugwana hi pheya gu pimisa nga Jehovha.

ESI HI SI PIMISAGO SI NGU KHUHA MAVBANYELO YATHU

7, 8. a) Jehovha a gu dzi wona kharini dzithomba? (Wona dzifoto gupheyani nya ndrima.) b) Ha gu ba hi wona dzithomba khu mawonelo ya Jehovha, ginani hi na gi thangisago ga satshavbo?

⁷ Mapimo yathu ma ngu khuha esi hi girago. (Marko 7:21-23; Jakobe 2:17) Hongoleni hi wone siyeyedzo singaniyana nya isoso. Gimwegyo gyakona khegi gi manegago omu nya matimo nya guvelegwe ga Jesu, ma yeyedzago gwadi mapimo ya Jehovha khu dzithomba. Khu Nungungulu abune a hathidego Josefe ni Mariya gasi gu dandrisa Gyanana gyaye ambari olu va nga ba vari sisiwana. (Levhi 12:8; Luka 2:24) Tepo Jesu a nga velegwa, Mariya a di mu “ladzisa mugighowoloni, kholu kha va nga mana wulanga nyumbani nya vaendri.” (Luka 2:7) Nari khatshi Jehovha a di dzinide, na giride gu Jesu a velegedwa wulangani nyo khadzisege. Ganiolu a di gu vbweta gu khuye Jesu a dandriswa ndrangani yi thangisago wukhozeyi wa Nungungulu. Isoso khiso si nga ba siri sa lisima ngudzu ga Jehovha.

⁸ Matimo yaya nya guvelegwa ga Jesu ma gu hi hevbudza edzi Jehovha a dzi wonago khidzo dzithomba. Vambe vavelegi vo vbweta gu khavo sanana sawe si mana dzithomba nya dzingi, ambari isoso sa gu songa wupari waso ni Jehovha. Ganiolu, Jehovha a gu wona wupari wathu naye na wuri wa lisima guvbindra satshavbo. Ina u ngu dzumeya mawonelo ya Jehovha ga silo sesi? Sigiro sago so yeyedza ginani? — Leri Vahebheru 13:5.

9, 10. Hi nga yeyedza kharini gu khethu hi ngu wona gu tshunganisa vambe nga edzi Jehovha a gu wonago khidzo?

⁹ Gimbe giyeyedzo khegi gi ganeyago khedzi Jehovha a mu wonago khidzo muthu a tshunganisago vambe, si thulago gu gira vambe va ghoha mwendro va diga gu thumeya Jehovha. Jesu a di khuye: “Gani khu mani a khunguvanyisago moyo nya sanana si khodwago nya nga esi, a diri tshukwana gu hungeledwa thamoni gwaye giwindri nya gikhongolo nya libwe, a rinywa nondrwani.” (Marko 9:42) Ayoyo malito nya tshivba ngudzu! Nigu hi ngu dziti gu khethu Jesu a ngu fana ni Babe waye. Khu kharato kha si kanakanisi gu khiso Jehovha nuye kha tsakiswi a gu tshuka muthoyo a tshunganisa moyo nya valandreyi va Jesu. — Johane 14:9.

¹⁰ Ina hi ngu wona gu tshunganisa vambe nga edzi Jehovha ni Jesu va gu wonago khidzo? Mavbanyelo yathu mo yeyedza ginani? Khu giyeyedzo, si nga gira na hi gola maambalelo nyo khaguri ni gu dzi mburiseya khu ndziya nyo khaguri. Ganiolu ginani hi na girago so tshuka esi hi si hathago adzina si si tsakisi vambe libandlani mwendro gu va gira va dundrugeya silo nyo vivbe? Ina lihaladzo lathu khu vandriyathu li na hi kutsa gu diga esi hi si golago? — 1 Thimoti 2:9, 10.

11, 12. Ha gu hevbuleya gu venga esi Jehovha a si vengago hi bwe hi haguleya gudziphara, hi na ba hi dzi vhikeya khu ndziya muni?

¹¹ Egi nya wuraru khegi: Jehovha a ngu venga gumbalulama. (Isaya 61:8) Khu lisine, uye a ngu dziti gu khuye dzimbe dzitepo si ngu hi garadzeya gu gira silo nya sadi kholu hi nga mba vbeleya. Ambari ulolo, o vbweta gu khuye hi venga silo nyo vivbe, nga uye. (Leri Ndzimo 97:10.) Ha gu dundrugeya khedzi Jehovha a si vengago khidzo silo nyo vivbe, si na hi phasa gu manega ni mawonelo nya nga yaye si bwe si hi ninga tshivba nyo potse gu gira silo nyo vivbe.

¹² Ha gu hevbula gu venga silo nyo vivbe, si na hi phasa gambe gu tugula silo nyo khaguri si vivbidego ambari Bhibhiliya ya gu ba yi si dzegeyi gu si vega guagani. Khu giyeyedzo, momo mahanelo nyo vivbe nyo pwani i dança do colo ma olovelegago ngudzu matshigwanaya. Vambe vathu vo pimisa gu khavo isoso khandri gu hengeya malawu, khu kharato vo si wona na sa sa vivba.a (Wona tshamuselo wa vbavbatshi.) Ganiolu, Jehovha o si wona kharini? Dundruga gu khuwe Jehovha a ngu venga gwatshavbo guvivba. Khu kharato hongoleni hi gimbileya hwindzo ngudzu ni gevbini gi vivbidego khu gu hevbuleya gudziphara ni gu venga esi Jehovha a si vengago. — Varoma 12:9.

PIMISA OLU KHESI U NA GIRAGO MINDRU WA TSHIGU

13. Khu ginani hi yedego guti edzi Jehovha a si wonago khidzo silo nyo khaguri olu gasi gu hi hunga silo khu wugengeyi mindru watshigu?

¹³ Tepo hi hevbulago, gu vbwetega gu hi dundrugeya khedzi Jehovha si wonago khidzo silo kholu isoso si na hi phasa gu hunga silo khu wugengeyi. Khavbovbo, ha gu tshangana ni gigaradzo nyo khaguri gu na vbwetegago gu hunga gu khethu hi na rini khu gitepwana gyogyo, kha si na nga hi thurugisa ngudzu. (Mavingu 22:3) Hongoleni hi wone siyeyedzo nyo khaguri sa omu nya Bhibhiliya.

14. Ginani hi gi hevbulago avba nya hlamulo wa Josefe ga mwangadzi wa Potifari?

¹⁴ Tepo ngadza Potifari a nga zama gu kutsedzeya Josefe, a di dzegeya gu bomba. Somo guagani gu khiso Josefe a di gu dundrugeya khedzi Jehovha a wu wonago khidzo wugadzi. (Leri Genesi 39:8, 9.) Josefe a di embeya ngadza Potifari khuye: “Nyi ngu dzi kodza kharini eni gu gira gihoso nya gikhongolo nya kharato, nyi ghohela Nungungulu, na?” Isoso so yeyedza gu khiso a di gu wona silo khedzi Jehovha a nga ba a si wona khidzo. Ahati ethu ke? Ginani u na girago go tshuka githumi-khwathu gi pheya gu hagana khu gu wudzana nago? Ahati a gu tshuka muthoyo a gu rumeleya dzimesaji mwendro dzifoto dzi yeyedzago silo nya malawu omu nya telefone yago?b (Wona tshamuselo wa vbavbatshi.) Si ngu vbevbuga ngudzu gu simama gutumbega ga Jehovha ha gu ba hi hevbude mawonelo yaye ga silo nyo khaguri hi ma dzumeya hi bwe hi hunga gu khethu hi na rini.

15. Hi nga simama kharini na hi tumbegide ga Jehovha, nga vahebheru vale nya vararu?

¹⁵ Dundrugeya gambe khu giyeyedzo nya vaHebheru vale nya vararu, Sadraki, Misaki ni Abhedhi-Negho. Tepo Pfhumu Nabhukodhonosori a nga va ruma gu khozeya githombe gile nya ndralama a nga ba a giride, avo va di bomba na va tiyide. Edzi va hlamudego khidzo pfhumu so yeyedza gu khiso va di gu pimiside gale khesi si nga hadzi gu dugeleya va gu simama na va tumbegide ga Jehovha. (Ekisodha 20:4, 5; Dhaniyeli 3:4-6, 12, 16-18) Ahati muhuno ke? Ginani u na girago go tshuka muthangeyi wago thumotuno a gu lomba gu dusa dzitsapawu gasi gu seketeya buzo nyo khaguri wu gimbileyanago ni wukhongeyi nya malipha? Vbavbandze nyo vireye kala gu dugeleya silo nya nga isoso, gwadi gu dundrugeya olu khu mawonelo ya Jehovha ga silo soso. Khavbovbo, ha gu ba hi romo ga giemo nya nga igyogyo, si na hi vbevbugeya gu gira ni gu ganeya lisine, nga esi va giridego vaHebheru vale nya vararu.

16. Gu pwisisa gwadi mapimiselo ya Jehovha gu nga hi phasa kharini gu khala na hi dongide go dugeleya gilo nya khavba ni avba gi gimbidzisanago ni vadhogodheya?

¹⁶ Ha gu dundrugeya khu mapimo ya Jehovha si na hi phasa niso gu simama na hi tumbegide gwaye ha gu manega ni gigaradzo nya madwali nya khavba ni avba. Lisine gu hi dzi emisede gu bomba guthedwa novba mwendro sipandriyana sawo nya listhina. (Mithumo 15:28, 29) Ganiolu gu na ni mambe mathumiselo nya novba ma vbwetago gu muKristo ni muKristo a dzi hungeya gu khuye a na rini na gu dzi seketeya khu matshina nya milayo nya Bhibhiliya. Lini hi yedego gu hunga gu khethu hi na rini? Ina khu tepo hi gomogo xipitali, adzina na hipwa guvbisa ngudzu, na hi gu kutsedzedwa gu hunga gilo nyo gire khavba ni avba? Khu lisine ne. Olu khiyo tepo nyo gevisise yatshavbo malangaliya nya wudhogodheya ma tshamuseyago gwadi esi hi si vbwetago, hi bwe hi ganeya ni dhogodheya wathu.c (Wona tshamuselo wa vbavbatshi.)

17-19. Khu ginani si gu na ni lisima gu hevbula mawonelo ya Jehovha nya silo olu? Ninga giyeyedzo.

¹⁷ Khu guhegisa, dundrugeya khedzi Jesu a nga hlamula khidzo khavba ni avba wusingaladzi nya mba wadi wa Pedro: “Isoso si nga giregi gwago, Pfhumu!” Somo guagani gu khiso Jesu a di gu dundrugede gale khesi Nungungulu a nga ba a vbweta gu khuye a gira ni siprofeto si nga ba si ganeya khu guvbanya gwaye ni gufa mafuni. Guti gogo gu mu ningide tshivba nyo simame na tumbegide ga Jehovha ni gu ningeya womi waye gasi gu dzegisa hatshavbo. — Leri Matewu 16:21-23.

¹⁸ Muhuno, Nungungulu o vbweta gu khuye hi khala dzipari dzaye hi bwe hi gira satshavbo hi si kodzago gasi gu tshumayela mahungu nya yadi. (Matewu 6:33; 28:19, 20; Jakobe 4:8) Ganiolu vambe vathu va ngu hi kutsedzeya gu diga gu gira isoso na va gu khavo va gu hi phasa, nga esi Pedro a giridego ga Jesu. Khu giyeyedzo, o tshuka muthangeyi wago thumotunu a gu engedzeya dzitsapawu ganiolu na wu dziti gu khuwe si na lomba u thuma dziora nya dzingi nyo bwe u si tshaledwi gambe khu tepo nyo hongole mitshanganoni mwendro nyo tshumayele ni libandla. Mwendro wo ba u nga gu hevbula, vahevbudzi vago va gu ninga lithomo nya gu ya hevbule hwindzo ni gaya gasi gu engedzeya sihevbulo sago. Sa gu tshuka silo soso si dugeleya, u na pheya gu vbweta gu gombeya, u gira wugevisisi nyo khaguri, u bwe u bhuleya va ndrangani gwago mwendro madhota khu tepo yoyo kamo na u si gu hungi gilo nyo gire? Khandri tshukwana gu hevbula olu khu mawonelo ya Jehovha ga silo nya nga isoso u bwe u pimisa nga uye? Khavbovbo wa gu tshuka u ningwa mathomo nya nga yoyo, khu na nga garadzega. U ngu giti gilo nyo gire kholu u na ba u hungide gu simama gu vega gupima gwago avba nyo thumeye Jehovha.

¹⁹ U nga dundrugeya gambe khu simbe siemo si na tshukago si linga gutumbega gwago ga Jehovha khavba ni avba. Lisine gu kha hi na nga kodza gu dzi dongiseya ga satshavbo silingo hi na tshanganago naso. Ganiolu ha gu dundrugeya khu mapimo ya Jehovha, tepo hi girago gihevbulo gyathu, hi na dundruga esi hi si hevbudego hi bwe hiti edzi hi nga si thumisago khidzo ga siemo satshavbo. Khu kharato tepo hi hevbulago, hongoleni hi tugula mawonelo ya Jehovha nya silo, hi pimisa nga uye, hi bwe hi dundrugeya edzi si na hi phasago khidzo gu hunga silo khu wugengeyi olu ni mindru wa tshigu.

WUMINDRU WAGO NI ESI JEHOVHA A SI PIMISAGO

20, 21. a) Khu ginani hi na manegago ni gutshulega mafuni nya maphya? b) Hi nga tsakiswa kharini khu guvbanya olu?

²⁰ Khu lisine hatshavbo hi li virede litigo nya liphya khu maho nyo fuviye. Nya vangi gwathu va gu vireya guta vbanya kala gupindruga Paradhesini mafuni. Mufumoni wa Nungungulu, hi na mana gutshulega gutshanisekani gwatshavbo ni guvbisa hi gu pwago mafuni momu. Nigu, khu lisine, hi na simama na hi tshulegide gu dzi hatheya esi hi si golago ni esi hi si vbwetago.

²¹ Ganiolu isoso kha si thuli gu khiso gutshulega gwathu kha gu na nga manega ni mivbingano. Vathu nyo rule va na simama gu hunga silo guya khu milayo nya Jehovha ni mapimo yaye. Nigu isoso si na resa gutsaka ni gurula nya gukhongolo. (Ndzimo 37:11) Kala iyoyo, hi na kodza gu manega ni gutsaka olu ha gu pimisa nga Jehovha.