Muphya a vbwetedzeyago giyeyedzo nya yadi nyo gi pimedzeye

SIWUDZISO SI GIRWAGO KHU VAPHYA

U nga hatha kharini muthu nya wadi u na mu pimedzeyago?

“Tepo nyi nga ba nyi emisana ni sigaradzo xikwatuno, egi gi nga ba gi nyi phasa gu dundrugeya khu muthu nyo khaguri nyi mu ningago lisima a nga tshangana ni sigaradzo sasimweso. Khavbovbo, nyi di gu zama gu pimedzeya giyeyedzo gya muthu yoyo. Si di gu nyi vbevbugeya gu emisana ni sigaradzo kholu nyi diri ni giyeyedzo nya gyadi nya gu gi pimedzeye.” — Haley.

Gu manega ni giyeyedzo nya gyadi nya gu pimedzeye, si nga gu phasa gu potsa sigaradzo ni gu tadzisa misuwo yago. Sihalo khu gu hatha giyeyedzo nya gyadi nya gu gi pimedzeyi.

Khu ginani u yedego gu hatha gwadi?

Vathu u va hathago gasi va khala giyeyedzo gwago va na kutsedzeya sigiro sago.

Bhibhiliya ya gu embeya Makristo gasi gu pimedzeya ava va gu siyeyedzo nya sadi. Iyo yari khiyo: “Khedzani handro nya mavbanyelo yawe, mu pimedzeya gukhodwa gwawe.” — Vahebheru 13:7.

Mawonelo: Vathu u na va hathago va nga gu kutsa gu gira nya sadi mwendro nya mba sadi. Khu kharato, hatha vathu khu gu khedza makhalelo yawe nasiri kholu va tidwago ngudzu mwendro olu va gu na ni tanga yayimweyo nago.

“Nyi hevbude nya singi ni ndriyathu Adam maningano khedzi a pimisago khidzo ni edzi a girago khidzo silo. Nyi ngu hlamadziswa ngudzu kholu nyi nga gu dundruga silo nyo khaguri a ganedego ni gu gira. Nyi ngu tumba gu kheni uye kha dziti edzi a nga kuha khidzo womi wangu.” — Colin.
Vathu u va hathago gasi va khala giyeyedzo avbo gwago va nga kuha edzi u pimisago khidzo ni edzi u dzipwago khidzo.

Bhibhiliya yari khiyo: “Mu nga dzi sengi. Dzipari nyo vivbe dzi ngu vivbisa mavbanyelo nya yadi.” — 1 Vakorinto 15:33.

Mawonelo: Hatha muthu khu gu khedza makhalelo yaye nya yadi nasiri khedzi a khadego khidzo. Dundruga gu khuwe wa gu hatha muthu guya khedzi a khadego khidzo, si nga gu gira u hegisa khu gu dzi laya.

“Wa gu khaleya gu dzi fananisa ni vathu va tidwago ngudzu isoso si na gu gira u dzipwa na wuri mwalo lisima. Isoso si na gu gira u garadzega khedzi u gu idzo.” — Tamara.

Dzi wudzise gu khuwe: Khu yevbini mhango yi gomogo avba nya gu hathe vathu va gu na ni ndruma gasi va khala giyeyedzo avbo gwago?
Vathu u va hathago gasi gu va khala giyeyedzo avbo gwago, si nga gira gu si gu vbevbugeya mwendro gu gu garadzeya gu vboheya misuwo yago.

Bhibhiliya yari khiyo: “Wule a gimbilago ni va nya mapimo, a na mana mapimo.” — Mavingu 13:20.

Mawonelo: Hatha vathu va gu na ni makhalelo u vbwetago gu ma pimedzeya. Khu kharato, wa gu va khedziseya gwadi u na wona esi u nga girago gasi gu vboheya misuwo yago.

“Wulangani nya gu ganeye basi gu khuwe, ‘Nya gu vbweta gu gira silo khu ndziya nya yadi,’ u nga ganeya gu khuwe, ‘Eni nya gu vbweta gu gira silo khu ndziya nya yadi nga Jane. Uye gima kha gedwi nigu a ngu gira mithumo yaye khu ndziya nya yadi.’” — Miriam.

Malito nyo hegise: Tepo u hathago muthu gasi gu khala giyeyedzo nya gyadi avbo gwago, u na si kodza gu woneleya gwadi misuwo u vbwetago gu yi vboheya.

U na hatha mani?

U nga gira isoso khu gu thumisa dzindziya dzimbili.

U nga hatha likhalelo u vbwetago gu li haguleya, khavbovbo u vbwetedzeya muthu u mu ningago lisima a gu na ni likhalelo lolo.
U nga hatha muthu u mu ningago lisima, khavbovbo u hatha likhalelo a gu nalo u vbwetago gu li haguleya.

Silo nyo khaguri si khumbugidwego avba nya ndrima yeyi si na gu phasa gu gira isoso.

U nga pimedzeya giyeyedzo gya:

Vaphya. “Nyi di gu dzina gu fana ni pari yangu. Uye tepo yatshavbo a dzi emisede gu phasa vambe. Eni nyi khongolo guvbindra uye, ganiolu nyi ngu si kodza gu wona makhalelo nyo mbure a gu nawo, nigu si ngu nyi kutsa gu vbweta gu pimedzeya giyeyedzo gyaye.” — Miriam.
Vathu nya vakhongolo. Adzina vavelegi vago mwendro muthu nyo khaguri libandlani. “Vavelegi vangu giyeyedzo nya gyadi gwangu. Avo va na ni makhalelo nya yadi. Avo va ngu hosisa, ganiolu nyi ngu wona gu kheni avo va tumbegide. Nyo vireya gu kheni va nyi wona khu ndziya yayimweyo nya gu manega ni tanga yawe.” — Annette.
Vathu va khumbugwago omu nya Bhibhiliya. “Nyi hathide siyeyedzo nya singi nya Bhibhiliya nyi nga si pimedzeyago: Thimoti, Ruti, Joba ni gyagadzyana nya Muisrayeli, vatshavbo siyeyedzo nya sadi. Tepo nyi engedzeyago gu hevbula nya singi khavo, nyi ngu engedzeya gu vati gwadi. Nyi ngu gola ngudzu gu leri matimo nya libhuku Imite a sua fé ni gipandre ‘Exemplo a Seguir’ omu nya libhuku Siwudziso si girwago khu vaphya.” — Melinda.

Mawonelo: U nga hegeyi basi avbo nya gu vbwetedzeye giyeyedzo nyo gi pimedzeyi. Mupostoli Pawulo a di embeya Makristo gu khuye: “Simamani gu khedziseya vale va landreyago giyeyedzo hi mi ningidego.” — Vafilipi 3:17.

U di gu dziti? U nga khala giyeyedzo nya gyadi ga vambe. Bhibhiliya yari khiyo: “Khala giyeyedzo ga va nya gu tumbege, guganeyani, mavbanyeloni, lihaladzoni, gukhodwani ni guagani.” — 1 Thimoti 4:12.

“Ambari na wu dzi garadzeya gasi u tshukwadzisa makhalelo nyo khaguri u nga phasa vambe gu gira sasimweso. Kha wu dziti gu khuwe khu mani a gu khedziseyago nigu kha wu dziti edzi esi u ganeyago si nga tshukwadzisago khidzo womi nya muthu nyo khaguri.” — Kiana.