Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano
4-10 NYA FEVEREIRO
DZITHOMBA NYA LITO LA NUNGUNGULU | VAROMA 1-3
“Simama gu hevbudza livhalo lago”
(Varoma 2:14, 15) Avo va si gu Vajudha, va si wutigo Nayo, va gu landrisa esi si rumwago khu nayo nya tumbunugo nya mavbanyelo yawe, va ngu dzi gira nayo avo vamune. 15 Va gu yeyedza khu mavbanyelo yawe gukhavo esi wu rumago nayo si lovidwe myonyoni gwawe. Mavhalo yawe ma ngu va hevbudza ugo gu vbwetegago gu gira, ma gu va thuledza mwendro gu va emela mithumoni gwawe.
lvs paj. 18, ndri. 6
Livhalo nya ladi ni Nungungulu
6 Ambari vathu vale va gu mba muti Jehovha, khu tumbunugo va ngu dziti gu khavo somo silo nya sadi ni silo nyo vivbe. Bhibhiliya yari khiyo: “Mavhalo yawe . . . ma gu va thuledza mwendro gu va emela mithumoni gwawe.” (Varoma 2:14, 15) Khu giyeyedzo, vathu nya vangi va ngu dziti gu khavo si vivbide gu songa mwendro guba. Ambari olu va si dzitigo, avo va gu engisa livhalo lawe, a gu makodzelo aya Jehovha a hi nigidego nya gu hambanise esi nya sadi ni esi nyo vivbe. Avo gambe va gu landrisa matshina nya milayo ya Nungungulu, mwendro lisine nya litshina eli Jehovha a hi ningidego gasi gu hi phasa gu hatha silo nya sadi womini.
(Varoma 2:15) Va gu yeyedza khu mavbanyelo yawe gukhavo esi wu rumago nayo si lovidwe myonyoni gwawe. Mavhalo yawe ma ngu va hevbudza ugo gu vbwetegago gu gira, ma gu va thuledza mwendro gu va emela mithumoni gwawe.
lvs dzipaji. 19-20, dzindri. 8-9
Livhalo nya ladi ni Nungungulu
8 Vambe vathu va gu pimisa gu khavo gu engisa livhalo lavo so thula gu gira silo khu guya khedzi va dzipwago khidzo. Avo va gu pimisa gu khavo va tshulegide gu gira ni gevbini gi va tsakisago. Ganiolu mapimo yathu kha ma vbeleya, nigu ayo ma nga si kodza gu hi bedza khabini. Mapimo yathu ma na ni tshivba nya gu ghohe livhalo lathu. Bhibhiliya ya ri khiyo: “Gimwalo gi kanganyisago guvbindra monyo, madwali yaye kha ma thumwi. A na tidwa khu mani?” (Jeremiya 17:9) Khu kharato hi nga tshuka hi pimisa gu khethu gilo nyo khaguri khyadi, ambari na siri gyadi. Khu giyeyedzo, Pawulo na si khali muKristo, a di gu wugeya vathu va Nungungulu nigu a di gu khodwa gu khuye esi a nga ba a gira si diri sadi. Khu mawonelo yaye a diri ni livhalo nya ladi. Ganiolu khu gu gimbiya nya tepo a di khuye: “Pfhumu khuye a nyi lamulago.” (1 Vakorinto 4:4; Mithumo 23:1; 2 Thimoti 1:3) Tepo Pawulo a ngati edzi Jehovha a nga ba a dzipwa khidzo khu esi a nga ba a gira, wonide gu khuye yede gu vbindrugedza silo nyo khaguri. Khu kharato, anethu na hi nga si giri gilogyo, hi yede gu dzi wudzisa gu khethu: ‘Ginani egi Jehovha a vbwetago gu khuye nyi gira?’
9 Wa gu ba u haladza muthu nyo khaguri gima khu na nga vbweta gu mu gandra ginyalana. Kha nga olu hi haladzago Jehovha, kha hi vbweti gu gira silo si na mu gorosago. Gasi gu mba gorosa Jehovha hi yede gutiya. Hi ngu kodza gu wona isoso avba nya giyeyedzo gya Nehemiya. Uye bombide gu thumisa giemo gyaye kha nga pfhumu gasi gu feya gu ghanya. Khu ginani? Uye wari khuye: “Kholu nyi gu ni githawo ni Nungungulu.” (Nehemiya 5:15) Nehemiya kha nga ba a vbweta gu gira gilo gi nga hadzi gorosa Jehovha. Kha nga Nehemiya, anethu hi na yeyedza gu khethu hi ngu thava gu gorosa Jehovha khu gu hi gira silo nya sadi. Hi nga kodza guti esi si tsakisago Jehovha khu gu hi leri Bhibhiliya. — Wona tshamuselo wa vbavbatshi 6.
Kemba dzithomba nya liphuvbo
(Varoma 3:4) Khandridzo. Kholu Nungungulu tumbegide gikhati gyatshavbo ambari ulo vathu va si tumbegigo. Kha nga yi ganelago Milowo, khiyo: “Gasi u manwa nu lulamide muguregerani gwago, ufela gu dugelela litshigu nya gulamudwe gwago.”
w08 15/6 paj. 30, ndri. 5
Dzithomba dza omu nya lidangaliya la Varoma
3:4.Tepo malito nya muthu ma gu mba pwana ni esi Jehovha a ganeyago avba nya lito laye, ethu ha gu si vega guagani gu khethu “Nungungulu tumbegide” khu gu khodwa mahungu ma gomogo omu nya Bhibhiliya ni gu bwe hi gira silo si gimbileyanago ni gu gola ga Nungungulu. Khu gu vbisegeya gu tshumayela maningano ni Mufumo ni gu gira vapizane, hi na phasa vambe guti gu khavo khu lisine Nungungulu womo.
(Varoma 3:24, 25) Gambe, va sayedwe gululama khu wuhigo wa Nungungulu, khu gu ningwa khu Jesu Kristo, a va tshudego wugumbini nya gighoho. 25 Nungungulu giride gu khuye khu gufa gwa Kristo, vathu vatshavbo va khodwago gwaye va mane gu tsetseledwa sighoho sawe. A gu yeyedza kharati wuwadi waye, kha nga matshigu ya gale a nga hunisela, a si tsayisi vathu khu kotani nya sighoho sawe.
w08 15/6 paj. 29, ndri. 6
Dzithomba dza omu nya lidangaliya la Varoma
3:24, 25 — Gudzegiswa gu livbidwego khu Jesu Kristo’ gu di hadzi fenengedza kharini “sighoho” si giridwego gale yoyo? Giprofeto nyo pheye gya Mesiya, gi lovidwego omu ga Genesi 3:15, gi tadzisegide khu 33 E.C. tepo Jesu a ngafa avba nya simbo nya tshanisa. (Gal. 3:13, 16) Tepo Jehovha a nga ganeya khu giprofeto gegi, gudzegiswa gu di livbidwe khu guya khu mawonelo yaye, kholu gimwalo gi kodzago gu tandregisa Nungungulu gu tadzisa makungo yaye. Khu kotani nya gudzegiswa nya litshina ga Jesu Kristo, Jehovha a di hadzi divala sighoho nya situgulwana sa Adhamu esi si nga hadzi khodwa avba nya gitumbiso gegi. Gudzegiswa gu ningide lithomo maKristo nyo pheye nya guwuswe ma vbanya gambe. — Mithumo 24:15.
11-17 NYA FEVEREIRO
DZITHOMBA NYA LITO LA NUNGUNGULU | VAROMA 4-6
“Nungungulu a hi yeyedzide gueta nya lihaladzo laye”
(Varoma 5:8) Aholu, Nungungulu a hi yeyedzide gueta nya lihaladzo laye ga ethu, khu gu Kristo a hi fela ethu na hiri sighohi.
(Varoma 5:12) Gighoho gi bede mafuni khu muthu moyo basi, gambe gighoho gi yade gufa. Khidzo kharato gufa gu enedzidego vathu vatshavbo kholu vatshavbo va ghohide.
w11 15/6 paj. 12, ndri. 5
Nungungulu a hi yeyedzide gueta nya lihaladzo laye
5 Avba nya sasamedzo a wu giridego Pawulo, phede khu gu ganeya gu khuye: “Gighoho gi bede mafuni khu muthu moyo basi, gambe gighoho gi yade gufa. Khidzo kharato gufa gu enedzidego vathu vatshavbo kholu vatshavbo va ghohide.” (Rom. 5:12) Ethu ha gu si pwisisa esi kholu Jehovha a giridego malulamiselo nya gu gu lowa edzi womi nya vathu wu phedego khidzo. Jehovha wumbide vathu vavili, agu Adhamu ni Evha. Avo va di vbelede gu fana ni Muvangi a nga vbeleya. Nungungulu va ningide nayo nyo khaguri a bwe a va embeya gu khuye va gu mba engisa nayo wowo va nafa. (Gen. 2:17) Avo va di hatha gu fanya nayo va ningidwego khu Nungungulu, va bomba kharato Nungungulu kha nga muningi nya milayo ni wufumu waye. — Dhet. 32:4, 5.
(Varoma 5:13, 14) Gighoho gi diromo khu gale mafuni na wu si gu vegwi Nayo. Aholu, Nungungulu a di si theli kota khigyo, kholu a di si gu vegi Nayo. 14 Gu mwalo gukanakana vbamahungutunu nya gukhethu gukhugela matshiguni ya Adhamu kala matshiguni ya Mosi, gufa gu fumide vbatshani nya vathu vatshavbo ni ga vale va ngamba ghoha nga Adhamu a nga yeyisago NungunguIu. Adhamu a diri giyeyedzo gya wule a nga bani a gu hadzi guta.
w11 15/6 paj. 12, ndri. 6
Nungungulu a hi yeyedzide gueta nya lihaladzo laye
6 Adhamu velegide sanana hwane nya gu ba a gohide, khu kharato thapedziside gighoho ga sanana saye satshavbo. Khu lisine iso kha sa fanya nayo wa Nungungulu nga Adhamu a fanyidego, khu kharato iso kha si singedzwi gighoho nyo fane; ni gu gambe gu di nga si manegi milayo. (Gen. 2:17) Ambari ulolo situgulwana sa Adhamu si thapedwe khu gighoho. Khu kharato gighoho ni gufa si phede gu fuma tepo Nungungulu a nga ningago milayo vaIsrayeli, eyi yi nga yeyedza guagani gu khiyo avo sighohi. (Leri Varoma 5:13, 14.) Gighoho gi nga fananiswa ni madwali nyo thapedzisane, nya ga anemia mediterrânea mwendro hemofilia. Adzina u di nga tshuka u leri avba va nga pwani Alexis gyanana gya Czar Nicholas II wa Rusiya ni Alexandra, gi thapedwe khu madwali nya gu pwani hemofilia. Si ngu kodzega gu vavelegi va manega ni madwali yaya ganiolu simbe sanana sawe si si manegi nawo, ambari ulolo iso si thapedzisa vambe vathu. Ganiolu gighoho kha gi thumi kharato. Phandza nya gighoho gya Adhamu mwalo a yi tutumago. Hatshavbo hi yi mane. Iyo yi ngu songa. Nigu sanana satshavbo si yi manide. Ina gighodho gegi nya gikhongolo gi na leyiswa?
(Varoma 5:18) Kha nga olu, gighoho gya muthu moyo basi gi residego gukonega ga vathu vatshavbo, kharati gambe, thumo nya guvbanyise wa muthu moyo basi, wu tshanganiside vathu vatshavbo ni Nungungulu, va gu vbanya naye khu gurula.
(Varoma 5:21) Kha nga olu gighoho gi yeyedzidego tshivba yaye khu gu resa gufa, kharati nuwo wuhigo wa Nungungulu wu ngu yeyedza tshivba yaye khu gu hi ninga gululama gu hi yisago guvbanyani nya gupindruge, khu Pfhumu yathu Jesu Kristo.
w11 15/6 paj. 13, dzindri. 9-10
Nungungulu a hi yeyedzide gueta nya lihaladzo laye
9 Khu wevbi tshamuselo nya malito nya giGreki ma gu khayo “hi giride vathu nya gululame” ni ayo ma gu khayo “va gu vbanya naye khu gurula”? Muvbindrugedzeyi nyo khaguri nya Bhibhiliya a di tshamuseya gu khuye: “[Malito yaya] ma gu fananisa wulamuli. Ma gu ganeya khu guvbindrugedza nyo khaguri nya muthu mahoni ga Nungungulu, ganiolu kha ndri guvbindrugedza nya muthu wakone khu wugulu . . . Ayo ma gu tshamuseya Nungungulu nga mulamuli a nga lamula oyu a ghohidego, oyu khu mambe maganelelo a yisidwego nyumbani nya wulamuli ya Nungungulu, gasi a ya wonwa nga mune nandru. Ganiolu Nungungulu tshude gighohi gyogyo.”
10 Khu kotani nya ginani “Mulamuli nya litigo latshavbo” a nga hadzi tshula gighohi? (Gen. 18:25) Gisekelo Nungungulu a gi emisidego khu ndziya nya lihaladzo, gu rumeya Mwanaye wa moyo omu mafuni. Jesu giride guhaladza ga Babe waye khu gu vbeleya, ambari olu a nga ba a emisana ni sigaradzo nya nga guwugedwa, gu vadwa, gu hegwa ni dzimbe dzitshanisa. Uye sayiside gutumbega gwaye kala gufani. (Hebh. 2:10) Khu gu ba a ningede womi waye nyo vbeleye, Jesu tshudziside mwendo gu dzegisa situgulwana sa Adhamu avba nya gighoho ni gufa. — Mat. 20:28; Rom. 5:6-8.
Kemba dzithomba nya liphuvbo
(Varoma 6:3-5) Ina kha mu dzitini nya gukhenu ethu hatshavbo hi bhapatisidwego ga Jesu Kristo, hi bhapatisidwe gambe naye gufani gwaye, gani? 4 Khu gu bhapatiswa hi dzingidwe gumogo ni Kristo, hi gu hengela naye gufani gwaye. Gasi hi dzi kodza nethu gu vbanya khu mavbanyelo nya maphya nya nga ya Kristo a wugidego khu ga vafudego khu tshivba ya Nungungulu Babe. Kholu, nya nga olu hi tshanganisidwego ni Kristo khu gufa nya nga ogu gwaye, kharati gambe hi na hengela naye guwuga khu ga vafudego.
w08 15/6 paj. 29, ndri. 7
Dzithomba dza omu nya lidangaliya la Varoma
6:3-5 — Sa gu thula ginani gu bhapatiswa khu ga Jesu kristo ni gu bhapatiswa gufani gwaye? Jehovha a gu todza maKristo khu liphuvbo nya guage, va gu patana ni Jesu va bwe va wumba gipandre nya libandla a gu givili gya Kristo, uye Kristo nari Hungo. (1 Kor. 12:12, 13, 27; Kol. 1:18) Ogu gu bhabhapatiswa gwawe khu ga Jesu Kristo. Makristo matodzidwego ayo gambe ma gu ‘bhapatiswa gufani gwaye [Kristo]’ khu gu ma vbanya womi nya gudziningeye ni gu bwe ma si manegi ni mapimo nyo khavo va na ni gutumba nyo vbanye kala gupindruga omu mafuni. Gufa gwawe, gufana nogu ga Jesu i mhamba, ambari gu si thumigo nga gudzegiswa. Gubhapatiswa gwawe gufani ga Kristo ga gu tadzisega tepo vafago va bwe va wuswa gasi gu ya vbanya ndzadzini.
(Varoma 6:7) Kholu muthu a fudego tshulegide wugumbini nya gighoho.
w14 1/6 paj. 11, ndri. 1
Guvireya muni hi gu nago khu va vhovho vathu?
Tepo sighohi si na wuswago, ina si na wuswa si lamudwa guya khesi va giridego na va nga si gufi? Ahihi. Varoma 6:7 wari khuye: “Kholu muthu a fudego tshulegide wugumbini nya gighoho.” Muthu yoyo a na ba a livbide sighoho saye gufani gwaye. Khu kharato, va na lamudwa guya khesi va na girago hwane nya gu ba va wusidwe, na siri esi va ghohidego na va nga si gufi. Esi si na hi phasa kharini?
18-24 NYA FEVEREIRO
DZITHOMBA NYA LITO LA NUNGUNGULU | VAROMA 7-8
“Ina u ngu ‘khedziseya wutsigu ni mihani’?”
(Varoma 8:19) Sivangwa satshavbo somo si khedziseya, wutshigu ni mihani, na si gu lindrela gu wona litshigu Nungungulu a na gu dzi wonegisago ga sanana saye.
w12 15/7 paj. 11, ndri. 17
Dzumeleya gu khuwe Jehovha a gu yisa omu nya gutshulega nya lisine
17 Na gu ganeya khu gutshulega ogu Jehovha a vegedego sithumi saye sa mafuni, Pawulo a di khuye: “Sivangwa satshavbo somo si khevisela, wutshigu ni mihani, na si gu lindrela gu wona litshigu Nungungulu a na gu dzi wonegisago ga sanana saye.” A di bwe khuye: ‘Sivangwa si na lindrela gu khiso mwendro si na tshudwa wugumbini, ni gumbembani, gasi si guta hengela wudhumoni nya gutshulege nya sanana sa Nungungulu.’ (Rom. 8:19-21) “Sivangwa” ga gu thudwa ava va gu ni guvireya nyo vbanye mafuni va vireyago ‘gudziwonegisa’ nya Sanana si todzidwego sa Nungungulu. Gudziwonegisa gogo gu na pheya tepo “sanana” si na wuswago gasi gu ya vbanya ndzadzini, si na patanago ni Kristo avba nya gu tshudzise mafu yaya avba nya sigaradzo ni gu bwe si sayisa “mwandra nya wungi ngudzu nya vathu” gasi wu beya omu nya mafu nya maphya. — Gutu. 7:9, 14.
(Varoma 8:20) Kholu sivangwa si fumedwe khu tshivba ya wule a si yisago gumbembani, nasiri khu gudzina gwa iso, aholu khu gugola gwa wule a nga si vanga
w12 15/3 paj. 23, ndri. 11
Hongoleni hi nengelani khu gutumba hi gu nago
11 “Gutumba, NM” gu ningidwe vathu tepo Jehovha a nga tumbisa gu tshipisa “mwamilambo nya khongolo,” agu Sathane Dhiyabhulosi, khu gu thumisa “gitugulwana” a tumbisidego. (Gutu. 12:9; Gen. 3:15) “Gitugulwana” gegi, gu pheya go thudwa Jesu Kristo. (Gal. 3:16) Khu kotani nya gufe ni guwuswa gwaye, Jesu ningede gitumbiso nyo tiye nyo khuye vathu va na tshudwa avba nya wugumbi nya gighoho ni gufa. Gutadzisega nya githumbiso gegi go pwananiswa ni ‘gudziwonegisa nya sanana sa Nungungulu.’ Ava va todzidwego vo wumba gipandre nya wuvili nya “gitugulwana.” Makristo yaya ma na ‘wonegiswa’ tepo ma na patanago ni Kristo gutshungunulani nya litigo la Sathane. (Gutu. 2:26, 27) Isoso gu na ba guri guvbulugiswa nya dzimbe dzinvuta dzi na vbindrago omu nya dzitshanisa nya dzikhongolo. — Gutu. 7:9, 10, 14.
(Varoma 8:21) Na si gu lindrela gu khiso mwendro si na tshudwa wugumbini, ni gumbembani, gasi si guta hengela wudhumoni nya gutshulege nya sanana sa Nungungulu.
w12 15/3 paj. 23, ndri. 12
Hongoleni hi nengelani khu gutumba hi gu nago
12 Ndrani nya Wufumu wa Kristo nya likhumi mazana myaga, “Sivangwa” si na seya mati khu khokho! Khu ga tepo yoyo, “sanana sa Nungungulu” si na ‘wonegiswa’ ngudzungudzu olu si na thumago nga vaphasi nya mhamba gumogo ni Kristo, va thumisana ni makategwa ma resedwego vathu khu kotani nya ningelo nya gudzegiswa wa Jesu. Kha nga olu “sivangwa” si na fumedwago khu Mufumo wa Nungungulu, si na pepa avba nya lipfule li vangwago khu gighoho ni gufa. Vbadugwana-vbadugwana vathu va na “tshudwa wugumbini, ni gumbembani.” Va gu simama na va tumbegide ga Jehovha ndrani nya Likhumi mazana myaga ni omu nya gulingwa nyo hegise gu na tago khu mahegiso, malina yawe ma na lowa omu nya “libhuku nya womi” ma si futwi gambe. Va na vboheya “wudhumoni nya gutshulege nya sanana sa Nungungulu.” (Gutu. 20:7, 8, 11, 12) Vbavbadze nyo kanakane, ugogo gutumba nya wudhumu kamo!
Kemba dzithomba nya liphuvbo
(Varoma 8:6) Gu dzi garadza khu gu landra gudogolela nya tumbunugo nya wuthu, gwa gu ninga gufa. Gasi gu dzi garadza khu gu landrisa esi Liphuvbo nya Guage li rumago, gwa gu ninga guvbanya ni gurula.
w17.06 paj. 3
U ngo dundruga?
Khu gwevbi gu hambana gu gomogo avba nya gu “dzi garadza khu gu landra gudogolela nya tumbunugo nya wuthu” ni gu “dzi garadza khu gu landrisa esi Liphuvbo nya Guage li rumago”? (Rom. 8:6)
Oyu a vegago gupima avba nya gudogoreya ni gu wegeleya avba nya nyama nya mba vbeleya, tepo yatshavbo a gu pimisa khu silo nya nyama ni gu bhula khiso. Oyu a vegago gu pima avba nya silo nya liphuvbo a ngu dziti gu khuye nya lisima womini gu thumeya Nungungulu; kha nga muKristo a gu dzumeya gu gimbidziswa khu liphuvbo nya guage. Gu vega gupima avba nya silo nya nyama sa gu thula gufa ganiolu gu vega gupima avba nya silo nya liphuvbo sa gu thula womi ni gu rula. — w16.12 dzipaji. 15-17.
(Varoma 8:26, 27) Khidzo nugo kharato, Liphuvbo nya Guage li ngu hi phasedzela ethu hi gu mwalo tshivba. Khu lisine, ethu kha hi kodzi gu lombelela kha nga edzi gu vbwetegago khidzo. Aholu, ilo labune Liphuvbo nya Guage khilo li hi lombelelago ga Nungungulu khu gudilela gule nya gumba dzi kodza gu tshamusedwa khu magana. 27 Uye a wonago ndrani nya myonyo a ngu giti egi Liphuvbo li vbwetago gu lomba, kholu Liphuvbo la gu lombelela khu vale va lumbago Nungungulu, kha nga edzi Nungungulu a dzinago khidzo.
w09 11/15 paj. 7, ndri. 20
Milombelo yago ya gu yeyedza ginani khuwe?
20 Dzimbe dzitepo hi ngu tshuka hi si giti gilo nyo ganeye avba nya milombelo yathu. “ethu kha hi kodzi gu lombelela kha nga edzi gu vbwetegago khidzo”, Pawulo lovide khuye “Liphuvbo nya Guage khilo li hi lombelelago ga Nungungulu khu gudilela gule nya gumba dzi kodza gu tshamusedwa khu magana. Uye [Nungungulu] a wonago ndrani nya myonyo a ngu giti egi Liphuvbo li vbwetago gu lomba.” (Rom. 8:26, 27) Jehovha giride malulamiselo nya gu milombelo yi lowa omu nya Bhibhiliya. Uye a gu wona milombelo yoyo nga khatshi khyathu, a bwe a yi hlamula. Nungungulu a ngu hiti nigu a ngu wuti tshamuselo nya silo esi a nga gira gu liphuvbo laye li ganeya khu gu thumisa valovi nya Bhibhiliya. Jehovha a gu hlamula milombelo yathu tepo liphuvbo li hi lombelelago. Ha gu liti gwadi lito la Nungungulu, esi hi bwetago gu si lomba avba nya milombelo yathu si na wuya mapimoni.
25 NYA FEVEREIRO KALA 3 NYA MARÇO
DZITHOMBA NYA LITO LA NUNGUNGULU | VAROMA 9-11
“Gipimaniso nya ngure nya likhabi mwendro simbo nya miolivha”
(Varoma 11:16) Kholu gipandre nya guhegule nya gibaba gya bani gi phasedwe Nungungulu, gu yeyedza gupwani gibaba gyatshavbo gi agisedwe Nungungulu. Mikhamba nya simbo ya gu bani yi kategide, ni matamo yakone gambe, ma kategide!
w11 5/15 paj. 23, ndri. 13
‘Nga wona idzo wu gu idzo guti gwa Nungungulu!’
13 Mupostoli Pawulo fananiside ava va girago gipandre nya gitugulwana gya Abrahama ni simbo nya miolivha nya gu fananise. (Rom. 11:21) Simbo nya miolivha wu haguledwego wa gu emeya gu tadzisega nya makungo ya Nungungulu maningano ni pwanano a wu giridego ni Abrahama. Khamba nya simbo wu agide nigu wa gu emeya Jehovha nga oyu a ningago womi Israyeli wa liphuvboni. (Isa. 10:20; Rom. 11:16) Litshina la guemeya Jesu nga gipandre nyo pheye nya gitugulwana gya Abrahama. Khu wumowo matamo mo emeya “mayigo yatshavbo” nya ava va wumbago gipandre nya wuvili nya gitugulwana gya Abrahama.
(Varoma 11:17) Mambe matamo makokeledwe. Aholu, uwe u na bani uri kha nga ngure nya likhabi, u tshomegidwe matamoni momo, u tshanganiswa kharato ni mikhamba, gasi u lisedzedwa mahwe nya ngure nya mbewu nya yadi.
(Varoma 11:20, 21) Lisine ilolo. Avo va kokidwe khu kotani nya gumba khodwa, gasi uwe olu u vegidwe wulangani wowo khu kotani u khodwago. Ambari ulo, u nga dzi giri matshandza khu kotani nya isoso. Aholu gu vbwetega gu dzi wonela. 21 Olu, Nungungulu a ngamba tsetsa Vajudha va gu matamo nya mavelego, ina wa gu alakanya gukhuwe a na gu tsetsa uwe, gani?
w11 15/5 paj. 24, ndri. 15
‘Nga wona idzo wu gu idzo guti gwa Nungungulu!’
15 Ginani Jehovha a giridego gasi gu tadzisa makungo yaye? Pawulo tshamusede gu khuye, gasi gu tshikedza matamo ma kokidwego avba nya simbo nya miolivha wu haguledwego, gu di tshomegedwa mambe matamo nya miolivha nya likhabi. (Leri Varoma 11:17, 18.) Khu kharato, maKristo ma todzidwego ya mayigoni, mambe ya libandla la Roma, khu ndziya nyo fananise ma di tshomegwa avba nya simbo nya miolivba nyo fananise. Khu ndziya yoyo ayo ma di khala gitugulwana gya Abrahama. Gupheyani, va diri mwalo lithomo nyo wumbe gipandre nya pwanano wowu nyo hathage, va di gu fana ni matamo nya simbo nya miolivha nya likhabi. Ganiolu Jehovha a di ma tuleya ndziya nyo khale vaJudha nya liphuvbo. — Rom. 2:28, 29.
(Varoma 11:25, 26) Vandruye, kha nyi vbweti gukheni mu hangwe khu sihalo yoyu, gasi mu si dzi randri va nya guti. Guganedza ga vathu va na Israyeli kha gu na pindruga gikhati nya gulaphe, aholu gu na simama kala mayigo yatshavbo ma vbindrugedza ma khodwa ga Nungungulu. 26 Gikhati gyogyo, ngamo yatshavbo ya na Israyeli yi na vbanyiswa kha nga yi ganelago Milowo nya Guage, khiyo: “Khu Siyoni a nata muvbanyisi, a nata handzago guvivba ga sanana sa na Israyeli.
w11 15/5 paj. 25, ndri. 19
‘Nga wona idzo wu gu idzo guti gwa Nungungulu!’
19 Vbavbandze nyo kanakane, makungo ya Jehovha maningano ni “libandla latshavbo la Nungungulu” ma ngu tadzisega khu ndziya nyo samadzise. (Gal. 6:16) Pawulo a di khuye: “Ngamo yatshavbo ya na Israyeli yi na vbanyiswa.” (Rom. 11:26) Khu tepo yakone “ngamo yatshavbo ya na Israyeli” — a gu tengo watshavbo nya ava va wumbago Israyeli wa liphuvboni — va na ba vari dzipfhumu ni vaphasi nya mhamba ndzadzini. Gimwalo gi tandregisago makungo ya Nungungulu!
Kemba dzithomba nya liphuvbo
(Varoma 9:21-23) Ina muwumbi mwalo ni fanelo nya gugire edzi a dzi golago khu libumba, gani? Ina kha dzi kodzi gu gira khilo sombo nya guthavisege, ni sombo nya nyalidede, gani? 22 Ha gupwa ginani ethu, Nungungulu a gu bani a dzinide gu yeyedza likhulo laye ni gu wonegisa tshivba yaye? Uye yeyedzide guhunisela nya gukhongolo ga vale va nga bani va gu yela gu mana sitsayiso nya likhulo laye, va nga bani va gu yela gu fuviswa. 23 Dzinide gambe gu yeyedza talo nya wufumu waye ga vale a va hathidego, kholu a hi pwede wusiwana a hi dongisela guya hengela naye wudhumoni gwaye.
w13 15/6 paj. 25, ndri. 5
Dzumeleya gu wumbwa khu wusingalagadzi wa Jehovha
5 Guwaniwani vathu va gu tsarama guwumbwa khu Muwumbi nya Khongolo? Gasi a gu wu thumisa kharini wufumu waye? Nga dundrugeya khesi li na girwago libumba li si thumigo gambe gasi gu tadzisa makungo nyo pheye nya muwumbi. Muwumbi a gu dzina a na gira khilo gimbe gyombo mwendro gu li dzudzuga! Libumba la gu mba phasa gilo, gu tala nya dzitepo muwumbi khuye a gu ni nandru. Ganiolu, ga Muwumbi wathu khandri kharato. (Dhet. 32:4) Muthu a gu tsarama guwumbwa khu Jehovha, nandru wa gu thegeya muthu yoyo kamo. Gufana ni muwumbi nya dzikhali, Jehovha a gu gira thumu waye nyo wumbe vathu khu guya khedzi va dzumeyago khidzo. Avo va dzumeyago guwumbwa, va gu khala sombo nya lisima. Khu giyeyedzo, maKristo ma todzidwego ayo “sombo nya gupweye wusiwana, NM” ava va wumbidwego gasi va khala “sombo nya guthavisege.” Ganiolu avo va wugeyago Nungungulu “va gu yela gu mana sitsayiso nya likhulo laye, . . . gu fuviswa” — Varoma 9:19-23.
(Varoma 10:2) Kholu nyi ngu dzi kodza gu va emela nyi fakaza gukheni avo va ngu dzi garadza ngudzu khu silo sa Nungungulu. Nombo basi khu gu va gu dzi garadzela wukhumuni,
it-1 paj. 517, ndri. 5
Wufu, ni gu manega ni wufu
Sighingi nya gu mba yeyedzwa gwadi. Si ngu kodzega gu muthu a manega ni sighingi, mwendro gu nyenya gilo khu gighelo nyo khaguri, ganiolu nari o hosisa ni gu bwe a gorosa Nungungulu. Isoso si dugelede vaJudha nya vangi va lizana-myaga nyo pheye. Va di gu vireya gu khavo gululama gu dugeya avba gwawe vbavbatshi nya Nayo wa Mosi. Ganiolu Pawulo yeyedzide gu khuye sighingi sawe si di siri sa gilo kholu va diri mwalo guti nya lisine. Khu kharato kha va gu mana gululama nya lisine gutago khiyo ga Nungungulu. Va di yede gu dzi sola, va wuya ga Nungungulu khu ga Kristo gasi va feya gu mana gululama ni gutshudziswa avba nya nandru wu seketedwago khu Nayo. (Ro 10:1-10) Moyo wakone gu diri Sawule wa Tarisu, oyu a nga ba a vbisegeya ngudzu giJudha kala avba nya gu a ‘sanisa khu tshivba Libandla la Nungungulu, a zama gu li fuvisa.’ Uye a di gu sayisa gwadi Nayo nga muthu a vbanyago “nyambana gihoso nayoni.” (Ga 1:13, 14; Flp 3:6) Ganiolu, edzi a nga ba a nyenya khidzo giJudha, si diri mwalo nayoni. Ambari ulolo, uye a diri ni monyo nya wadi, a gu iso si giridego Jehovha a mu gireya wuwadi wu si hi faneyigu, khu ga Kristo khu gu a mu bedza ndziyani nya wukhozeyi nya lisine. — 1Tm 1:12, 13.