GIHEVBULO 2

Ganeya nga khatshi wo bhula

2 Vakorinto 2:17

ESI U YEDEGO GU GIRA: Ganeya nga edzi u ganeyago khidzo tshigu ni tshigu, khu ndziya yi na yeyedzago githawo khu mahungu u ganeyago khayo ni vaengiseyi vago.

MAGIRELO YAKONA:

Dzi dongiseye gwadi u bwe u gombeya. Gombeya u lomba Jehovha a gu phasa gu vega gupima avba nya mahungu yago, nasiri avba gwago. Vegisa hungoni matshina nya gisekelo u vbwetago gu ganeya khayo. Tshamuseya matshina yoyo khu malito yago; u nga ma siguli edzi ma lovidwego khidzo.

Wo vbweta gu gira khu gu leri omu nya Bhibhiliya mwendro libhuku nyo khaguri, tshukwana u wusedza gwadi gasi gu u leri gwadi. Go ba guri ni malito ma nga ganedwa khu vathu nyo khaguri, leri edzi ma nga ganedwa khidzo, ganiolu u nga vbindrisi.
Ganeya na si gu khugeya monyoni. Dundruga gu khuwe khu ginani vaengiseyi vago va yedego gupwa mahungu yoyo. Ganeya nu dundruga avo. Khavbovbo maemelo yago, dzizesto, ni khovbe si na yeyedza githawo ni wuwadi.

Dundruga gu khuwe gu ganeya nga edzi u ganeyago khidzo tshigu ni tshigu si hambanide ni maganelelo nya mba na githawo. Yeyedza lisima nya mahungu yago khu gu thumisa maganelelo ni malito ma dzumelegago.
Khedza vaengiseyi vago. So ba si si gorosi muthu gipandreni gwanu, khedza vaengiseyi vago tepo u ganeyago. Tepo u vegago ganelo, khedza muthu moyo khu tepo nyo khaguri, vbavbandze nyo vbindrise maho ga vatshavbo khu gumogo.