GIHEVBULO 10

Guvbindrugedza-vbindrugedza lito

Mithumo 16:28

ESI U YEDEGO GU GIRA: Tshamuseya gwadi mahungu yago u bwe u ndrindra gupima khu gu vbindrugedza-vbindrugedza vholumi nya lito, tshivba, ni mazambo.

MAGIRELO YAKONA:

Guvbindrugedza-vbindrugedza vholumi nya lito. Engedzeya vholumi nya lito lago gasi gu tshingisa matshina nya gisekelo nya mahungu yago ni gu kutsa vaengiseyi vago. Gira sasimweso gambe tepo u lerigo Milowo yi gu na ni mahungu nyo lamule. Vbungula vholumi nya lito lago gasi gu wusa gudogoreya gupwa esi si ngo gutago mwendro gasi gu yeyedza hwanga mwendro gugaradzega.

U nga khaleyi gu engedzeya vholumi nya lito lago gasi gu vaengiseyi vago va si dzipwi nga khatshi vo vbenyedwa. Potsa maganelelo nyo khatsi wo vbweta gu dzi yeyedza.
Guvbindrugedza-vbindrugedza tshivba nya lito lago. So ba si girwa khu lidimi lago, engedzeya tshivba nya lito lago gasi gu yeyedza sighingi mwendro pimo mwendro pfhuka nyo khaguri. Vbungula tshivba nya lito lago wo vbweta gu yeyedza gudzilaya mwendro gugaradzega.
Guvbindrugedza-vbindrugedza nya mazambo nya lito lago. Ganeya khu guvbiredza gasi gu yeyedza gutsaka. Ganeya khu gunonoka tepo u ganeyago khu silo nya lisima.

Gasi gu mba thurugisa vaengiseyi vago, u nga vbindrugedzi mazambo nya lito lago khavba ni avba. U nga ganeyi khu guvbiredza ngudzu avba nya gu malito yago ma si pwali gwadi.