Wusedza wupari wago ni Jehovha

Mwaga ni mwaga, dzinvuta nya dzingi nya lisima dzi ngu wuyela libandlani nya Wukristo. Nga dundrugeya ‘khu gu nengela nya gu khongolo gu giregago ndzadzini’ tepo nvuta mweyo yi wuyeleyago. (Luka 15:7, 10) Wa gu ba u wuyede, tiyisega gu khuwe Jesu, dzingilozi gumogo ni Jehovha, va tsakide ngudzu kholu u girago gambe gipandre nya libandla. Ganiolu, tepo u na yago u wusedza wupari wago ni Jehovha u na tshangana ni sigaradzo. Khu sevbini nyo khaguri sakone nigu u nga si pala kharini?

SIGARADZO U NGA TSHANGANAGO NASO?

Vandriyathu nya vangi va ngu simama gu dzipwa na va vbede tshivba, ambari hwane nya gu ba va wuyede libandlani. Adzina u nga dzipwa nga Pfhumu Dhavhidhe. Ambari hwane nya gu ba a divaledwe, uye a di khuye: “Mithumo yangu nya guvivbe yi nyi gamide.” (Ndzi. 40:12; 65:3) Tepo vathu nyo khaguri va wuyeleyago ga Jehovha, va ngu simama gu dzipwa nandru mwendro dzitshoni khu myaga nya yingi. Isabelle a vbedzide 20 myaga na gu dusidwe libandlani.a Uye wari khuye: “Si di gu nyi garadzeya ngudzu gu khodwa gu Jehovha a nga nyi divaleya.” Wa gu vbeya tshivba, wupari wago ni Jehovha wu nga vbola gambe. (Mav. 24:10) U nga dzumeleyi gu khuwe isoso si gu giregeya.

Vambe vo pimisa gu khawe kha va na nga si kodza gu gira satshavbo si vbwetegago gasi gu wusedza wupari wawe ni Jehovha. Hwane nya gu ba Antoine a wuyede libandlani uye a di khuye: “Nyi di divade silo nya singi nyi nga ba nyi hevbude mwendro gu gira tepo nyi nga ba nyi ri Fakazi.” Khu Kotani nya olu vambe va dzipwago khu ndziya yeyi, kha va si kodzi gu thuma khu sighingi avba nya silo nya liphuvbo.

Khu giyeyedzo, ya gu tshuka nyumba yi tshungunudwa khu gingulu, mune wayo a nga garadzega khu gu dundrugeya basi thumo a na manegago nawo mwendro tepo a na yi vbedzago na gu yi vbahedza. Khiso sa simweso si giregago tepo u girago gighoho nya gikhongolo gi gu girago u songa wupari wago ni Jehovha. Uwe adzina u nga vbeya tshivba khu gu dundrugeya thumo u na manegago nawo gasi gu wusedza wupari wago ni Jehovha, ganiolu u nga gi rwali wenga gigaradzo gegi.

Jehovha a gu hi konvhidhari khuye: “Deluni, hongoleni hi pimise gumogo khu mahungu yaya.” (Isa. 1:18) Uwe u dzi garadzide ngudzu gasi gu lulamisa “mahungu” ni Jehovha. Nigu Jehovha a ngu gu haladza kholu u giridego isoso. Nga dundrugeya vbadugwana: Khu kotani nya olu u wuyedego ga Jehovha, uye a nga gu thumisa gasi u khala giyeyedzo gi yeyedzago gu khigyo Sathane muliphi. — Mav. 27:11.

Khu gu ba u wide lisineni, u hidzimede vbafuvbi ga Jehovha, ni gu uye a gu tumbisa gu khuye a na gu hidzimeleya nuye. (Jak. 4:8) U nga tsaki basi kholu u wonwago khu vambe gu khavo u wide libandlani, u yede gu tiyisa lihaladzo lago khu Papayi wago ni pari yago, Jehovha. U nga gira kharini isoso?

DZI VEGEYE MISUWO U NA SI KODZAGO GU YI VBOHEYA

Zama gu dzi vegeya misuwo u na si kodzago gu yi vboheya. Khu lisine, u ngo dundruga silo nya litshina u si hevbudego maningano ni Jehovha ni gitumbiso gyaye nya paradhesi. Ganiolu, u yede gu manega gambe ni longoloko wa liphuvboni. Khu giyeyedzo, gu hongola thumoni nyo tshumayele tepo yatshavbo, gu hongola mitshanganoni ni gu dzi ninga tepo nyo vbungandze ni vandriyago. Wona misuwo nyo khaguri u nga manegago nayo.

Gombeya ga Jehovha tepo yatshavbo. Papayi wago a ngu pwisisa gu khuye wa gu simama gu dzipwa nandru khu Kotani nya silo nyo vivbe u giridego, si nga gu garadzeya gu gombeya gwaye. (Rom. 8:26) Ganiolu, “pharisa milombeloni” u bhuleya Jehovha gu khuwe u ngu dzina ngudzu gu khala pari yaye. (Rom. 12:12) Andrej wari khuye: “Eni nyi di gupwa nandru nya wukhongolo ngudzu ni dzitshoni, ganiolu hwane nyo gire nombelo nyi di gu dzipwa gwadi nyi bwe nyi rula mapimo.” Wa gu ba u si giti gilo nyo ganeye avba ya milombelo yago, hevbula Ndzimo sipimo 51 ni 65 si yeyedzago milombelo eyi Pfhumu Dhavhidhe a giridego tepo a nga dzilaya.

Hevbula Bhibhiliya tshigu ni tshigu. Esi si na gu phasa gu tiyisa gukhodwa gwago nigu lihaladzo lago khu Jehovha li na tiya. (Ndzi. 19:7-11) Felipe wari khuye: “Gu mba manega ni longoloko nya wadi nya gihevbulo nya Bhibhiliya, khiso si nyi giridego nyi vbola khu liphuvboni nyi bwe nyi ghoheya Jehovha. Kha nya nga ba nyi vbweta gu gorosa gambe Jehovha, khu kharato nyi di hunga gu gira gihevbulo gyangu nya Bhibhiliya tepo yatshavbo.” Anuwe u nga gira sasimweso. Wa gu ba u si giti egi u nga gi patago avba nya gihevbulo gyago nya muthu enga, lomba giphaso ga ndriyathu a vidzidwego?

Wusedza wupari wago ni vandriyago. Vambe va wuyelago libandlani, va ngu garadzega khu gu khavo vandriyathu va na va wona khu ndziya nya mba yadi. Larissa wari khuye: “Eni nyi di gupwa ngudzu dzitshoni. Nyi di gu dzipwa gu kheni nyi pwisiside guvbisa vandriyangu. Nyi vbedzide tepo nya yingi na nyi gu dzipwa khu ndziya yeyi.” Tiyisega gu khuwe madhota ni vambe vandriyathu nyo vidzwe, va ngudzina ngudzu gu gu phasa gasi u wusedza wupari wago ni Jehovha. (Wona kwandru yi gu khiyo: “Esi madhota ma nga girago.” Avo va ngu tsaka ngudzu kholu u wuyidego ga Jehovha ni gu avo va gu vbweta gu khavo u tsaka. — Mav. 17:17.

Ginani u nga girago gasi u dzipwa vbafuvbi ni libandla? Tepo yatshavbo gimbiya mitshanganoni u bwe u patega thumoni nyo tshumayele ni vandriyago. Esi si na gu phasa kharini? Felix wari khuye: “Libandla li di gu nyi virede khu maho nyo fuviye. Nyi wonide gu kheni vandriyangu va ngu nyi haladza. Vatshavbo va nyi phaside gu dzipwa na nyi gira gipandre nya ndranga, gu kheni Jehovha a nyi divalede ni gu kheni nyi nga simama gu thumeya Jehovha.” — Wona kwadru yi gu khiyo: “Esi u nga girago.”

U NGA TSUKULI!

Tepo u na yago u wusedza wupari wago ni Jehovha, tiyisega gu khuwe Sathane a na gu vangeya sigaradzo. Uye o vbweta gu gu vbedza tshivba. (Luka 4:13) Khu kharato, dzi dongiseye u bwe u tiyisa wupari wago ni Jehovha olu.

Na ganeya khu dzinvuta dzaye, Jehovha tumbiside khuye: “Nyi na vbwetedzela idzo dzi dzimedego, nyi wuyisa idzo dzi phalalegidego, nyi na hungelela iyo yi bayisidwego, nyi tiyisa iyo yi vbedego tshivba.” (Ezek. 34:16) Jehovha phaside vathu nya vangi ngudzu gu wusedza wupari wawe naye. Tiyisega gu khuwe a ngu dzina gu gu phasa nuwe gu wusedza ni gu tiyisa wupari wago naye.