1921 Sem myaga hwane

Mukhedziseyi nya 1 Janeiro nya 1921, wu giride giwudziso gegi ga Sihevbuli nya Bhibhiliya: ‘Khu wevbini thumo hi nga wu vireyago mwaga wowu?’ Kha nga hlamulo, Mukhedziseyi wu di khumbuga libhuku la Isaya 61:1, 2, li nga va dundrugisa thumo wawe nyo tshumayele. Ilo lari khilo: “PFHUMU Nungungulu a nyi todzide khu mafura, a nyi wumbela gasi nyi huwelela mahungu maphya ga avo va vbedego tshivba . . . guya tivisa mwaga nya wadi ni litshigu nya gu dzi phodzele ga Nungungulu wathu.”

VATSHUMAYELI NYA GU TIYE HWAMBO

Gasi gu gira thumo nyo tshumayele, Sihevbuli nya Bhibhiliya si di yede gu tiya hwambo. Iso si di yede gu huweleya “muhungu maphya” ga vathu nya vadi, ni gu huweleya “litshigu nya gu dzi phodzele” ga vathu nya gu vivbedwe khu myonyo.

Ndriyathu John Herry Hoskin a ga ba a vbanya Canadá, a tshumayede khu gu tiya hwambo ambari a ga ba a wugedwa. Khu 1921, uye manide moyo nya mutshumayeli nya Mumetodhista. Ndriyathu John a phede mabhulo khu gu khuye: “Hongole hi bhula khu gwadi tepo hi ganeyago khu mahungu nya Bhibhiliya, nigu ambari a gu mba pwana avba nya gilo nyo khaguri hi nga sega mabhulo khu dziya nya yadi kha nga dzipari.” Ganiolu, khandriso si nga girega. Ndriyathu John wari khuye: “Hi di bhude basi khu dzimeneti nya dzi dugwana tepo mutshumayeli wule a nga veta lidimba khu tshivba, nyo bwe nyi pimisa gu kheni livhidru li nga ba liri vbale li di hadzi pandrega.”

Mutshumayeli wule a di huweta khuye: “Khu ginani u gu mba hongola nga vale va gu siri Makristo uya bhula navo?” Ndriyathu John kha ganeya gilo, ganiolu tepo a nga ba a hongola uye a di gimbiya na pimisa khuye: “Eni nyi di gu kheni nyo ganeya nyi moyo a gu siri mukristo!”

Ga litshigu li nga landreya, tepo mutshumayeli wule a nga ba ari tshetsheni gwaye na a gu tshumayela, a di ganeya silo nya ba sadi khu ndriyathu Hoskin. Ndriyathu Hoskin o dundruga gu khuye: “Mutshumayeli wule a di embedzeya vathu gu khuye eni nyi diri muliphi nya kongolo nya gu a di nga si manegi dhoropani mule ni gu khuye eni nyi di yede gu songwa.” Ganiolu, isoso kha sa mu gira a bweleleya hwane uye simamide gu tshumayela nigu bhude ni vathu nya vangi. John a di khuye: “Nyi tsakide ngudzu khu gu tshumayela eyi. Vathu nyo khaguri va di bwe va ganeya khawo: ‘Nyi gu dziti gu kheni uwe wo gira thumo wa Nungungulu’ nigu avo va di dzi ningedza gu nyi phasa ga esi nyi nga ba nyi si vbweta.”

GIHEVBULO NYA MUTHU ENGA NI WUKHOZEYI NYA NDRANGA

Gasi gu phasa vathu gu pwisisa gwadi Bhibhiliya, Sihevbuli nya Bhibhiliya, tepo yatshavbo si di gu dusa revhista, muhuno yi tidwago kha nga Khedzugani!a yi nga ba yiri ni siwudziso nya Bhibhiliya ni mihlamulo yakona. Avba nya revhista yeyi, gu diri ni siwudziso nya Bhibhiliya si nga ba si yiswa ga vaphya, esi vavelegi va hadzi si thumisa gasi gu bhula ni sanana sawe. Vavelegi “va di yede gu gireya siwudziso sesi sanana sawe va bwe va si phasa gu mana mihlamulo umo nya Bhibhiliya.” Siwudziso nya ga: “Mabhuku mangani ma gomogo omu nya Bhibhiliya?” sa gu hevbudza silo nyo khaguri nyo vbevbuge maningano ni Bhibhiliya. Simbe nya nga: “Ina watshavbo mukristo yede gu vireya gu wugedwa khu ndziya nyo khaguri?” si di gu phasa vaphya gu tshumayela na va tiyide.

Gu di romo gambe siwudziso ni mihlamulo ya omu Bhibhiliya si nga ba si giredwe ava va nga ba vari ni guti nya gungi nya Bhibhiliya. Milhamulo yi di hadzi manwa omu nya libhuku nyo pheye nya Estudos das Escrituras. Dzimiliyoni nya valeri, va hevbude silo nya singi avba nya siwudziso sesi, ganiolu gu tivisidwe gu pwane siwudziso sesi kha si na nga thedwa gambe avba nya revhista. Khu ginani?

LIBHUKU NYA LIPHYA!

Libhuku *A Harpa de Deus*

Gikartawana gi nga ba gi yeyedza dzipajina dzi nga ba dzi yedwe gu lerwi

Sikartawana si nga ba siri ni siwudziso

Vandriyathu va nga ba va thangeya, va pwisiside gu khavo ndziya nya yadi nyo hevbudze khiyo muthu Bhibhiliya gu mu hevbudza sidugwanasidugwana. Khu kharato, khu Novembro nya 1921 gu dusidwe libhuku li gu khilo: A Harpa de Deus. Tepo muthu a tsakeyago a nga ba a dzumeya libhuku, a di gu dzi pata gambe avba nya Kursu nya gihevbulo eyi a nga ba a si khodza gu gira enga. Iyo yi di gu ranwa pwane i Curso de estudo bíblico da harpa. avba nya kursu yeyi, muthu a di gu hevbula enga nigu a di gu hevbula “maningano ni makhungo ya Nungungulu nyo ninge vathu womi nyo pindruge.” Kursu yeyi yi di gu girwa kharini?

Tepo muthu a nga ba a dzumeya gu hakha libhuku, a di gu hakha gambe gikartawana gi nga ba gi mu yeyedza dzipajina a na lerigo ga semana yile. Khavbovbo, ga yimbe semana, muthu wule a di gu hakha gimbe gikartawana gi nga ba giri ni siwudziso nya singi si nga ba si seketedwa avba nya dzipajina a nga ba a yede gu leri. Khu gu hegisa, gikartawana gi di gu yeyedza dzipajina edzi muthu a nga ba a yede gu leri kala semana yi landreyago.

Ndrani nya 12 dzi semana, semana ni semana muthu a di gu hakha likartawu nya liphya khu koreyu li nga ba li rumedwa khu libandla la vbafuvbyana mule. Gutala nya dzitepo, sikartawana si di gu rumedwa khu vale va gumbidego mwendro vale va nga ba va si si khodzi gu tshumayela khu dranga ni dranga. Khu gi yeyedzo, Anna K. Gardner de Millvale, wa Pennsylvania Estados Unidos, ganede gu khuye: “Ndrinyangu Thayle a di haside, ganiolu tepo gu nga duswago libhuku A Harpa de Deus uye a di gu khala na pharegide. Semana ni semana a di gu rumeya sikartawana nya siwudziso.” Tepo gihevbuli gi nga ba gi vbedza kursu yeyi, ndriyathu nyo khaguri libandlani a di gu gi endreya gasi guya gi phasa gu hevbula nya singi khu Bhibhiliya.

Thayle Gardner na khade avba nya khadera yaye nya marodha

GU SIMAMA NYA THUMO

Guvbeyani nya mwaga, ndriyathu Joseph F. Rutherford, rumede lidangaliya ga yatshavbo mabandla. Lidangaliya li di gu khilo: “Wufakazi wu ningedwego ga mwaga wowu maningano ni Mufumo wa Nungungulu, wu phaside vathu nya vangi ngudzu gu vbindra ga myaga yi vbindridego.” Na dundrugeya khu wumindru, ndriyathu Rutherford a di engedzeya khuye: “Gu ngari ni thumo nya wungi ngudzu gasi gu gira. Kutsa vambe gasi va ta patega gambe avba nya thumo wowu nyo tsakise.” Nya mba kanakana, Sihevbuli nya Bhibhiliya si wu thumiside wusingalagadzi wowu. Khu 1922, khu gutiya, Sihevbuli nya Bhibhiliya si tshumayede maningano ni Mufumo wa Nungungulu khu ndziya nyo samadzise ngudzu.

Dzipari nyo tiye

Sihevbuli nya Bhibhiliya si yeyedzide lihaladzo nya wundruye khu gu phasa vambe. Iso si diri dzipari nyo tiye “gikhatini nya wuvi.” Matimo ma landreyago ma gu yeyedza isoso — Mav. 17:17.

Khu mavili, 31 nya Maio nya 1921, gu dugelede ligwaha nya likongolo ngudzu Oklahoma, Estados Unidos, eli khu gu gimbiya nya tepo li nga tidwa kha nga Massacre de Tulsa. Satshavbo soso si phede tepo mwama moyo nya mulandre a ga khotedwa a bwe a singedzwa gu pwani bede nyamayi moyo nya tsungu. Khavbovbo, gitshungu nya 1000 vatsungu ni gu vbindra va di wugeya tsawa nya wudugwana nya valandre. Nya ba hweya litunga di vboha Greenwood, a gu lidhoropa la vbafuvbyana mule li nga ba li tade ngudzu khu valandre. Gu vbindra 1400 dzindranga ni dzinogosi dzi di dhumedwa dzi bwe dzi vbiswa. Go ganedwa gu pwane gu fude 36 nya vathu, ganiolu adzina saye tengo nya lisine wu diri 300.

Ndriyathu Richard Joseph Hill, gihevbuli nya Bhibhiliya nya mulandre, a nga ba a vbanya dhoropani ga Greenwood, ganede esi si geregidego. Uye wari khuye: “Ga wutshigu wule gu nga manega litunga, ethu hi di gira mitshangano yathu nya libandla kha nga giolovedzo. Tepo hi nga vbedza mitshangano, hi dipwa siphisa na si gu vbophosedwa dhoropani ga Tulsa. Tepo hi nga hongola hi ya lala, hi di ngo sipwa gambe siphisa na si gu vbophosedwa.” Kala vbadzimindrutunu nya mararu, 1 nya Junho, silo si di gu engedzede gu vivba. Ndriyathu Richard a di simama khuye: “Vathu nyo khaguri va dita hi embeya gu khavo ha gu vbweta gu vbuluga hi yede gu hongola ga wulanga gu girwago mitshangano.” Ndriyathu Richard ni mwangadzi waye ni sanana saye nya 5, va di tutuma va hongola ga wulanga gu girwago mitshangano Tulsa. Eyi gu diri ni tanga nya 3000 vama ni va nyamayi nya valandre va nga ba va vhikedwe gu masotshwa ma rumidwego khu wufumu gasi gu ya emisa litunga.

Khu ora ya yi mweyo, ndriyathu Arthur Claus, a nga ba ari tsungu, hungide gu gira gilo gi nga ba gi lomba gutiya-hwambo. Uye a di khuye: “Tepo nyi nga dziti gu kheni gu na ni ni mitsawa yi nga ba yi dhumeya ni gu vbisa dzinyumba dhoropani ga Greenwood, nyi di hunga guya wona pari yangu Richard, gasi nyiti gu kheni womo kharini.”

Ndriyathu Arthur Claus, a gu phasa 14 sanana gu hevbula nya singi maningano ni Bhibhiliya khu gu thumisa libhuku A Harpa de Deus

Tepo a nga vboga gaya ga ndriyathu Richard, Arthur manide moyo nya vhizinyu nya tsungu na gu pharide giphisa. Vhizinyu wule, a nuye a nga ba ari pari ya ndriyathu Richard, a di gu pimisa gu khuye Arthur anuye a di gu patega umo nya litunga. Khu kharato, uye a di huweta khuye: “Wo vbweta ginani avba?”

Arthur wari khuye: “Mwama wule a gu mba tsaka khu hlamulo wangu maningano ni iso si nga nyi gira nyi hongola vbale, uye adzina a di hadzi nyi vbophosa. Khu kharato, nyi di mu embeya gu kheni nyi pari ya Richard nigu dza nyi di gu hongode khu dzitepo nya dzingi gaya gwaye.” Arthur ni vhizinyu wule va si kodzide gu vhikeya ndranga ya Richard ga valala.

Nya mba hweya, Arthur tugude gu khuye ndriyathu Richard ni ndranga yaye va di romo ga wulanga gu girwago avbo tshangano. Ganiolu, Arthur a di embedwa gu pwani, gasi gu valandri va khuga khu eyi va di yede gu dzumeledwa khu muthangeyi nya masotshwa nya gu pwani khu Barrett, a ga ba a va wonelela. Khu kharato nya mbana asinatura ya muthangeyi, mwalo a nya ba a duga khu vbale. Arthur wari khuye: “Si garadzide ngudzu gu ganeya ni muthangeyi wule. Tepo nyi nga ganeya ga muthangeli esi nyi nga ba nyi vbweta gu gira uye a di nyi wudzisa khuye: ‘Ina u na si khodza gu sayisa ndranga yeyi ni gu khataleya esi yi si vbwetago?’ Nyi di kheni ina, na nyi tsakide.”

Tepo a nga dzumeledwa, Arthur a di tutuma a hongola ga wulanga gu girwago avbo mitshangano. Tepo a nga yeyedza gwardha lidangaliya nya gu dzumeledwe, iyo yi di hlamala khiyo: “Ginani! asinatura ya muthangeyi eyi! U di gu dziti gu khuwe, khuwe nyo pheye u ga si khodza gu dusa muthu muhuno khavba?” Khavbovbo, gwardha yi di ya dzega Richard ni ndranga yaye. Vatshavbo va di manyana omu nya movha ya Arthur va hongola gaya.

Arthur giride satshavbo a ga si khodza gasi gu vhikeya ndranga ya ndriyathu Richard. Vambe va kuhidwe khu gu wona gutiya hwambo ni lihaladzo nya wundruye li yeyedzidwego khu ndriyathu Arthur. Arthur wari khuye: “Vhizinyu a ga phasa gu vhikeya ndranga ya Richard engedzede gu manega ni githawo khu vathu va Nungungulu. Nigu, vathu nya vangi va tsakede mahungu nya Mufumu wa Nungungulu. Va wonide gu khavo ga vathu va Nungungulu gu mwalo gihatheya, hatshavbo hi ngu fana.”

a Revhista Golden Age yi di vbindrugedzwa lina yi khala Consolation khu 1937 nigu khu 1946 yi di khala Awake! (a gu Khendzugani! muhuno khu Gitonga.)