U nga phasega khu gu thava Nungungulu

1-2. Gufana ni Loti sigaradzo muni esi Makristo ma tshanganago naso?

TEPO hi wonago silo nyo vivbe si girwago khu vathu muhuno, ethu hi ngu dzipwa nga edzi Loti a dzipwidego khidzo. Uye a di “gu garadzega ngudzu khu kotani nya mavbanyelo nya dzitshoni nya sindraga-milayo,” kholu a di gu dziti gu khuye Papayi wathu wa ndzadzini a ngu nyenya mavbanyelo nyo vivbe. (2 Ped. 2:7, 8) Khu kotani nya olu Loti a nga ba a ninga githawo ni gu haladza Nungungulu, uye a di gu nyenya mavbanyelo nyo vivbe nya vathu va nga ba va mu randrede. Anethu hi randredwe khu vathu va gu mba ninga githawo milayo ya Jehovha yi ganeyago khu mavbanyelo. Ambari ulolo, hi nga simama na hiri ni mavbanyelo nya yadi ha gu engedzeya gu haladza Nungungulu hi bwe hi mu ninga githawo. — Mav. 14:2.

² Jehovha a ngu hi phasa gu gira isoso khu gu hi tiyisa-hwambo khu malito ma gomogo umo nya Libhuku la Mavingu. Makristo yatshavbo ma nga wuyedwa khu wusingalagadzi wu gomogo umo nya libhuku leli.

GUTHAVA NUNGUNGULU SI NGU HI VHIKEYA

3. Guya khu Mavingu 17:3, khu ginani si gu na ni lisima gu vhikeya monyo wathu? (Wona fotu.)

³ Si na ni lisima gu vhikeya monyo wathu nyo fananise, kholu Jehovha a ngu wona monyo wathu. Isoso so thula gu khiso uye a ngu wona esi vambe va gu mba si kodza gu si wona, nigu a ngu hiti gwadi. (Leri Mavingu 17:3.) Uye a na hi haladza ha gu simama gu dundrugeya khu wusingalagadzi waye, wu nga hi phasago gu mana womi nya mba vbeya. (Joh. 4:14) Ethu gima kha hi na nga manega ni mavbanyelo nyo vivbe hi bwe hi liphedwa khu Sathane ni vathu va vivbedwego khu monyo. (1 Joh. 5:18, 19) Tepo hi manegago ni wupari nyo tiye ni Jehovha hi na engedzeya gu mu haladza ni gu mu ninga githawo. Khu kotani nya olu hi gu mba vbweta gu khunguvanyisa Papayi wathu, ethu hi na potsa gu pimisa gu mu ghoheya. Tepo u lingwago gasi gu gira silo nyo vivbe dzi wudzise khuwe: ‘Nyi nga si kodza kharini gu khunguvanyisa oyu a nyi yeyedzidego lihaladzo?’ — 1 Joh. 4:9, 10.

4. Gu thava Jehovha si vhikede kharini ndriyathu gu mba gira wubhayi?

⁴ Ndriyathu Marta a vbanyago Croácia a di lingwa gasi gu gira wubhayi. Uye a di khuye: “Si di gu nyi garadzeya gu pimisa gwadi, nigu nyi di gu dwana ni gu dogoreya nyo gire silo nyo vivbe, ganiolu gu thava Jehovha si nyi vhikede.”b Gu thava Nungungulu gu nga hi vhikeya kharini? Marta a di khuye a di dundrugeya khu mihandro nya mba yadi a nga hadzi gu yi mana. Hi nga gira sasimweso. Handro nyo vivbe ngudzu hi na wu manago khu gu hi na khungunvanyisa Jehovha hi bwe hi si mukhozeyi kala gupindruga. — Gen. 6:5, 6.

5. U nga hevbula ginani khu giyeyedzo gya Leo?

⁵ Tepo hi thavago (mwendro gu yeyedza githawo) Jehovha, ethu kha hi na nga manega ni dzipari dzi girago silo nya mba sadi. Hongoleni hi wona esi si dugeledego Leo a vbanyago Congo. Hwane nya 4 myaga na bhabhatisidwe uye a di gira dzipari nya mba dzadi. Uye a di gu pimisa gu khuye kha sa vivba gu manega ni dzipari dzodzo. Ganiolu, esi si nga vivba khu gu gira silo nya mba sadi. Nya mba hweya, dzipari dzaye dzi di mu kutsedzeya gu seya wadwa ni gu gira wubhayi. Uye a di pheya gu dundrugeya khesi vavelegi vaye nya Makristo va nga ba va mu hevbudzide ni edzi a nga ba a tsaka khidzo tepo a nga ba a thumeya Jehovha. Khu wevbini handro a wu manidego? Uye a di pheya gu gira silo nya sadi. Khu gu phaswa khu madhota, uye a di bweleya ga Jehovha. Muhuno, uye a ngu tsaka khu gu thuma kha nga lidhota ni gu thuma kha nga pioneiro nyo hathege. 

6. Ginani hi na bhulago khigyo olu?

⁶ Olu hongoleni hi bhula khu libhuku la Mavingu gipimo 9 li ganeyago khu vanyamayi vavili. Moyo a yeyedzago guti, mumbe wupumbu. (Fananisa ni Varoma 5:14; Vagalatiya 4:24.) Tepo hi bhulago khu mahungu yaya, dundruga gu khuwe litigo leli la Sathane li tade khu vathu va girago wubhayi ni gu wona pornografia. (Efes. 4:19) Khu kharato, si na ni lisima gu simama gu haguleya gu thava Nungungulu hi bwe hi potsa gu gira silo nyo vivbe. (Mav. 16:6) Khu lisine, hatshavbo hi nga wuyedwa khu gu hevbula gipimo gegi. Igyo gyo ganeya gu khigyo vanyamayi vava vavavili va gu rana vale va gu mwalo guti nya gungi. A gu “vale va gu mwalo mapimo.” Vanyamayi vava vavavili, va gu ganeya gu khavo: “Deluni mu ta hodza guhodza gwangu.” (Mav. 9:1, 5, 6, 13, 16, 17) Ganiolu, avo va dzumeyago dzikovhinti dzedzi dza dzimbili va na mana mihandro nyo hambane.

U NGA DZUMEYI KOVHINTE YA NYAMAYI NYA GIPUMBU

7. Guya khu Mavingu 9:13-18, ginani gi na dugeleyago vale va dzumeyago kovhinte ya “nyamayi nya gipumbu”? (Wona fotu.)

⁷ Hongoleni hi bhulani khu kovhinte yi girwago khu “nyamayi nya gipumbu.” (Leri Mavingu 9:13-18.) Uye a gu rana vale va gu mwalo mapimo khuye: ‘Deluni eno’ hi ta gira festa. Khu yevbini wuyelo yakone? Khu gu “vale a va rambidego vomo phalani nya vafi.” Malito yaya, ma gu hi dundrugisa malito nyo fananise ma gomogo umo ga Mavingu. Ayo ma gu hi gengedza khu “nyamayi” a gu na ni mavbanyelo nya guvivbe. Ma gu hi embeya gambe khayo: “Nyumba ya muthu yoyo ya gu wegeleya gufani.” (Mav. 2:11-19) Libhuku la Mavingu 5:3-10 la gu hi gengedza khu mumbe “nyamayi” a gu na ni mavbanyelo nyo vivbe, nigu “migondro yaye ya gu hongola gufatunu.”

8. Ginani va yedego gu gira vale va engiseyago nyamayi nya gipumbu?

⁸ Vale vapwago “nyamayi nya gipumbu,” va yede gu hunga gu khavo va na dzumeya kovhinte yaye mwendro ne. Adzina hi nga tshangana ni giemo gya gimwegyo. Ginani hi yedego gu gira a gu tshuka muthu nyo khaguri a zama gu hi kutsedzeya gu gira wubhayi mwendro gu wona pornografia?

9-10. Sighelo muni hi gu naso gasi gu potsa wubhayi?

⁹ Hi na ni sighelo nyo pwali gasi gu potsa wubhayi. “Nyamayi nya gipumbu” a gu fananiswa na gu ganeya gu khuye: “Mati nya gubidwe, ma gu lombela ngudzu.” So thula ginani “mati nya gubidwe”? Bhibhiliya ya gu fananisa gu hengeya malawo nya mwama ni ngadzi va tshadhidego ni mati nyo dzidziye. (Mav. 5:15-18) Patwa wu tshadhidego wu tshulegide gu dzi buza khu gu hengeya malawo. Esi si hambanide ni “mati nya gubidwe.” Kholu ayo ma gu tshamuseya gu hengeya malawo nya mba handzega. Dzitepo nya dzingi, vathu va gu dzi buza khu mati yaya ma gusihalani gu fana ni muthu abago. Mati yaya nya gubidwe, ma nga gira gu khatshi ma gu lombeya” ngudzu-ngudzu abari gu ava vabago vo pimisa gu khavo kha va na nga tugudwa khu muthu. Ganiolu, va gu dzipfhadza kholu Jehovha a ngu wona satshavbo. Khu lisine, si na va vaveya tepo va na digwago gu tsakedwa khu Jehovha. Kholu va na tugula gu khavo esi va nga ba va gira kha si “lovbeyi” mwendro “gu tsakisa.” (1 Kor. 6:9, 10) Ganiolu, somo simbe gambe.

¹⁰ Wubhayi dzitepo nya dzingi, wu nga vanga dzitshoni, mimba nya mba yi vireya ni gu mba pwanana nya dzidranga. Khu lisine, wugengeyi gu mba dzumeya kovhinte ya nyamayi nya gipumbu. Nigu gambe, vathu nya vangi va girago wubhayi va nga vbola khu liphuvboni va bwe va thapedwa khu madwali ma nga va songago. (Mav. 7:23, 26) Libhuku la Mavingu gipimo 9, livhesi 18 la gu hegisa khu gu khilo: “a va [ava] rambidego vomo phalani nya vafi.” Khu ginani vathu nya vangi va dzumeyago kovhinte yi yisago mhangoni? — Mav. 9:13-18.

11. Khu ginani gu wona pornografia a gu mhango?

¹¹ Hi yede gu potsa gu wona pornografia. Vathu nyo khaguri va gu pimisa gu khavo gu wona pornografia khandri mhango. Ganiolu, gu wona pornografia mhango nya yikhongolo ngudzu kholu yi ngu vangeya sigaradzo vathu va si dzi ninge githawo, gu mba ninga githawo vambe ni gu si ngu va garadzeya gu ema gu yi wona. Vathu va sixitirigu Pornografia, si ngu va garadzeya gu divala esi va si wonago. Pornografia kha yi phase muthu gu vbungula gudogoreya gwaye. Ganiolu, yo mu gira a engedzeya gu manega ni gudogoreya nyo vivbe. (Kol. 3:5; Jak. 1:14, 15) Khu lisine, vathu nya vangi va wonago pornografia va ngu gira silo nya singi nya mba handzega.

12. Ginani hi yedego gu gira gasi gu potsa dzifotu nya mba handzega?

¹² Kha nga Makristo, ginani hi yedego gu gira ho tshuka umo nya mutshini wathu yi vbondza fotu nya pornografia nya mba si vireya? Hi yede gu dzegeya gu ema gu yi kedziseya. Si na hi vbevbugeya gu gira isoso, ho dzegeya gu dundruga gu khethu wupari wathu ni Jehovha wu na ni lisima. Ambari olu nya gu dzimbe dzifotu khandri nya pornografia, dzi nga hi gira hi manega ni mapimo nya gu mba handzega. Khu ginani hi yedego gu dzi potsa? Kholu ethu kha hi vbweti gu pimisa gu gira gilo nya mba handzega. (Mat. 5:28, 29) Lidhota li vbanyago Tailândia nyo pwani khu David lari khilo: “Eni nya gu dzi wudzisa gu kheni ‘ambari a gu dzifotu nya gu khandri pornografia, ina Jehovha a na tsaka nya gu simama gu dzi khedziseya?’ Gu pimisa khu ndziya yeyi, si ngu nyi phasa gu hunga silo khu wugengeyi.”

13. Ginani gi na hi phasago gu hunga silo khu wugengeyi?

¹³ Guthava gu mba tsakisa Jehovha, si na hi phasa gu hunga silo khu wugengeyi. Gu thava Nungungulu ‘maphelo nya guti.’ (Mav. 9:10) Esi so tshamusedwa gupheyani nya gipimo 9 nya libhuku la Mavingu, umo hi hevbulago khu nyamayi a fananiswago ni “guti nya lisine.”

DZUMEYA KOVHINTE YA NYAMAYI A EMEYAGO “GUTI NYA LISINE”

14. Kovhinte muni nyo hambane yi gomogo umo ga Mavingu 9:1-6?

¹⁴ Leri Mavingu 9:1-6. Avba ha gu hevbula khu kovhinte yitago khiyo ga Jehovha, oyu a gu gifefe nya guti gwatshavbo. (Mav. 2:6; Rom. 16:27) Ha gu hevbula gambe khu nyumba yi gu na ni 7 dzipilari. Esi so thula gu khiso Jehovha a na ni wuhindzi, nigu a ngu hoyozeya vatshavbo va vbwetago gu thumisa guti gwaye womini gwavo. 

15. Nungungulu a gu hi kutsa gu gira ginani?

¹⁵ Jehovha a na ni wuhindzi nigu a ngu hi ninga esi hi si vbwetago. Avba nya giyeyedzo gya nyamayi a emeyago guti nya lisine gi gomogo umo ga Mavingu gipimo 9, ho hevbula gu khethu Jehovha a na ni wuhindzi nigu a ngu hi ninga silo nya singi. Mavhesi yaya, ma gu ganeya gu khayo nyamayi yoyo a di rana vathu gasi gu hongola gaya gwaye va ya seya vhinyu ni gu hodza guhodza a dongisedego. (Mav. 9:2) Gu diga isoso, guya khu mavhesi 4 ni 5: “Uye [guti nya lisine] a gu embeya vale va gu mwalo mapimo gu khuye: ‘Deluni mu ta hodza guhodza gwangu’”. Khu ginani hi yedego gu dzumeya kovhinte ya nyamayi yoyo? Jehovha o vbweta gu khuye sanana saye si manega ni guti si bwe si vhikelega. Uye kha vbweti gu khuye hi gira sihoso, kholu si na hi vangeya sigaradzo. Kholu “avo va lulamidego a gu va ninga makategwa.” (Mav. 2:7) Ha gu manega ni hwanga nya wadi khu Jehovha ethu hi na vbweta gu mu tsakisa. Hi ngu engisa wusingalagadzi waye hi bwe hi tsaka khu gu wu thumisa. — Jak. 1:25.

16. Gu thava Nungungulu si phaside kharini Alain gu hunga makungo nya yadi nigu handro muni wu manegidego? 

¹⁶ Wona edzi guthava Nungungulu gu phasidego khidzo Alain gu hunga makungo nya yadi. Alain a gu lidhota nigu a thumago kha nga profesori wari khuye: “Dzikolega dzangu dzi di gu ganeya gu khidzo gu wona pornografia gu diri ndziya nyo hevbule nya singi khu gu hengeya malawo.” Ganiolu, uye a di gu dzite gu khuye isoso khandri lisine. Uye a di khuye: “Khu kotani nya olu nyi haladzago ni gu ninga githawo Jehovha, eni nyi di bomba gu wona pornografia ni gu gambe nyi tshamusede dzikolega dzangu gighelo gi nyi girago nyi si woni pornografia.” Uye a di thumisa “guti nya lisine” gasi ‘gu gimbiya khu ndzila nya mapimo.’ (Mav. 9:6) Dzikolega dza Alain dzi samadzisidwe khesi a nga ganeya nyo bwe dzimbe dzi pheya gu hevbula Bhibhiliya ni gu hongola mitshanganoni.

17-18. Makategwa muni ma manwago khu vatshavbo vale va hakhago kovhinte ya “nyamayi nya guti”, nigu ginani va gi vireyago? (Wona fotu.)

¹⁷ Gasi hi si kodza gu mana wumindru nyo tsakise, Jehovha a gu thumisa siyeyedzo sa vanyamayi vava vavili. Vale va dzumeyago kovhinte ya “nyamayi nya gipumbu” va gu zama gu dzi tsakisa khu gu gira wubhayi. Ganiolu, avo kha va dziti gu khavo esi va girago si na kuha womi wavo mindru watshigu. Sigiro sawe si na va ‘yisa gufani.’ — Mav. 9:13, 17, 18.

¹⁸ Vale va dzumeyago kovhinte ya nyamayi a emeyago “guti nya lisine”, va na mana wumindru nyo tsakise. Nigu avo va ngu tsaka ngudzu, kholu va na ni satshavbo va si vbwetago gasi gu simama ni wupari nyo tiye ni Jehovha. (Isa. 65:13) Khu gu thumisa muprofeti Isaya, Jehovha wari khuye: “Tulani dzindzeve mu nyi yingisa, mu na hodza esi nya sadi, mupwa gutshamba khu guhodza nya gunone.” (Isa. 55:1, 2) Ho hevbula gu gola esi Jehovha a si golago ni gu nyenya esi a si nyenyago. (Ndzi. 97:10) Nigu hi ngu tsaka kholu hi si kodzago gu rana vambe gasi gu hevbula “khu guti nya lisine.” Ho fana ni sithumi si ranago vambe “gukhugela malangani nya gukhugege nya lidhoropa si huweleya gu khiso: ‘Mwatshavbo nyambana mapimo, deluni gwangu!’” Ethu gumogo ni vale va hakhago kovhinte hi na wuyedwa olu, nigu mindru watshigu hi na ‘vbanya ni gu gimbiya ndziyani nya mapimo’ kala gupindruga. — Mav. 9:3, 4, 6.

19. Guya khu Muhevbudzi 12:13, 14, ginani hi yedego gu dzi emiseya gu gira? (Wona kwadru yi gu khiyo: “Githawo hi gu nagyo khu Nungungulu gi ngu hi phasa.”)

¹⁹ Leri Muhevbudzi 12:13, 14. Githawo hi gu nagyo khu Jehovha, gi na hi vhikeya ni gu hi phasa gu simama na hiri ni mavbanyelo nya yadi ni gu hi phasa gu manega ni wupari nyo tiye ni Jehovha matshigoni yaya nyo hegise. Hongeleni hi simama gu rana vathu nya vangi gasi guta hevbula khu guti nya lisine ni gu hevbula edzi guti gogo gu hi phasago khidzo gu haladza ni gu ninga githawo Jehovha khu monyo wathu watshavbo.