Samiyele Wachibili
8 Nikwakayinda chiindi, Davida wakazunda maFilisiti mpawo wakasaanguna kubeendelezya alubo Davida wakabweza muunzi waMetegi-ama mumaboko aamaFilisiti.
2 Wakazunda maMowabbu, wabalayilila kuti balandabale aansi alubo wakabapima aantambo. Wakapima tubunga tubili mpawo wakati tujayigwe akuti kamwi kabunga kasiigwe kakapona. Mukuyungizya, maMowabbu bakaba babelesi baDavida alubo bakali kutela mutelo.
3 Davida wakazunda Hadadezeri, mwana waRehobbu mwaami wakuZobba naakali munzila kuti akabusilizye bweendelezi bwakwe kuMulonga waYufurati. 4 Davida wakajata basimabbiza bakwe bali 1 700 amasooja aakwe aayenda aamawulu aali 20 000. Mpawo Davida wakadunsula milambi yamabbiza woonse aadonsa ngolo, pesi wakasiya aali 100.
5 MaSiriya bakuDamasikko nibakasika kuti bazoogwasye Mwaami Hadadezeri wakuZobba, Davida wakajaya maSiriya bali 22 000. 6 Davida wakabikka nkamu zyamasooja muSiriya muDamasikko alubo maSiriya bakaba babelesi baDavida alubo bakali kutela mutelo. Jehova wakapa kuti Davida azunde kufumbwa nkwaakali kuya. 7 Mukuyungizya, Davida wakabweza ntobo zyalawundi zyangolida zyababelesi baHadadezeri mpawo wakazyeeta kuJerusalema. 8 Mwaami Davida wakabweza kkopa nyingi loko kuBbeta akuBberotayi, myuunzi yaHadadezeri.
9 Mwaami Toyi wakuHamati wakamvwa kuti Davida wakazunda nkamu yoonse yamasooja aaHadadezeri. 10 Nkinkaako, Toyi wakatuma mwanaakwe Joramu kuMwaami Davida kuti akamujuzye akumulumbayizya akaambo kakuti wakali walwana Hadadezeri wamuzunda, (nkaambo Hadadezeri wakali walwana Toyi kwaziindi zyiingi) alubo wakayinka aazintu zyansiliva, zyangolida azyakkopa. 11 Mwaami Davida wakazibikka aambali zintu eezi kuti zibe zyaJehova kuswaanizya ansiliva angolida nzyaakali wabikka aambali kuzwa kuzisi zyoonse nzyaakazunda, 12 nkukwaamba kuzwa kuSiriya akuMowabbu, kuma-Amoni, kumaFilisiti, kuma-Amalekki azintu zyakanyangwa zyakazwa kuli Hadadezeri mwana waRehobbu mwaami wakuZobba. 13 Alubo Davida wakaba aampuwo chiindi naakaboola kuzwa kukujaya ma-Edomu bali 18 000 muKkuti lyaMunyo.* 14 Wakabikka nkamu zyamasooja mu-Edomu. Wakabikka nkamu eezi mu-Edomu yoonse alubo ma-Edomu boonse bakaba babelesi baDavida. Jehova wakapa kuti Davida azunde kufumbwa nkwaakali kuya.
15 Davida wakayinkilila kunembo kweendelezya ma-Israyeli alubo Davida wakali aachoonzyo chakuti bantu bakwe boonse ulikubabeteka kabotu akuti ulikubachitila zintu ziluleme. 16 Jowabbu mwana waZeruya wakali kuzulwida nkamu yamasooja alubo Jehoshafati mwana wa-Ahiludi wakali sikulemba makani. 17 Zadokki mwana wa-Ahitubbi, a-Ahimelekki mwana wa-Abbiyata bakali bapayizi alubo Seraya wakali mulembi. 18 Bbenaya mwana waJehoyiyada wakali kuzulwida maKkereti amaPeleti. Alubo bana balombe baDavida bakaba bazulwidi.*