Baami Wachibili
10 Lino Ahabbu wakali aabana bali 70 muSamariya. Nkinkaako, Jehu wakalemba magwalo waatumizya kuSamariya kuli balupati-pati bamuJezriyeli akubaalu akuli basikulela bana ba-Ahabbu, kati: 2 “Lugwalo oolu nilwasika kulindinywe, bana basimalelaanu banoolaamwi andinywe kuswaanizya angolo zyankondo, mabbiza, muunzi uukwabilidwe azilwanisyo. 3 Amusale mwana wasimalelaanu uumwi uulikabotu alubo weelela,* mumubikke aachuuno chabwaami chawisi. Mpawo mulwanine ng’anda yasimalelaanu.”
4 Pesi bakayoowa mpawo bakati: “Kuti baami babili kabali bakakachilwa kwiimikila kunembo lyakwe, iswe nga tulakonzya na?” 5 Nkinkaako, mulangizi wamuunzi wamwaami,* amweendeelezi wamuunzi, abaalu, abasikulela bana bamwaami, bakatumizya mulumbe kuli Jehu wakuti: “Iswe tuli babelesi bako, alubo tulachita zyoonse nzutatubuzye kuti tuchite. Taakwe ngututabikke pe kuti abe mwaami. Chita kufumbwa nzubona kuti zilikabotu mumeso aako.”
6 Mpawo wakabalembela lugwalo lwachibili, kati: “Kuti kamuli kubbazu lyangu alubo kamuyanda kundiswiilila, amweete mitwe yabana basimalelaanu muzaayo kulindime juunza aachiindi eechino kuJezriyeli.”
Bana bamwaami bali 70 bakalaamwi abaalumi bamumuunzi balemekwa bakali kubalela. 7 Mbubakalutambula biyo lugwalo oolo, bakajata bana bamwaami bali 70 babajaya, mpawo bakabweza mitwe yabo bayibikka mumabbasikiti, bayitumizya kulinguwe kuJezriyeli. 8 Mutumwa wakanjila mpawo wakamubuzya kuti: “Beeta mitwe yabana bamwaami.” Nkinkaako, wakati: “Amwiilundike mumilwi iibili kugeedi lyamuunzi mwiisiye kusika kuseeni.” 9 Naakazwaanze kuseeni, wakayimikila kunembo lyabantu boonse mpawo wakati: “Inywe tamukwe mulandu pe.* Ime ndakabukila simalelaangu mpawo ndakamujaya, pesi ngwani wakajaya bantu boonse aaba? 10 Amuzibe kuti taakwe jwi lyaJehova niliba limwi litazooleke kuzuzikizigwa,* eelyo Jehova ndyaakaamba kabeteka ng’anda ya-Ahabbu, alubo Jehova wachita nzyaakaamba kabelesya mubelesi wakwe Elija.” 11 Mukuyungizya, Jehu wakajaya bantu boonse bakali basyaala bamung’anda ya-Ahabbu kuJezriyeli, kuswaanizya abaalumi balemekwa, beenzinyina abapayizi bakwe, zyakuti taakwe naba uumwi ngwaakasiya kali muumi.
12 Mpawo wakanyampuka waya kuSamariya. Ng’anda* yabeembeli yakugelela mbelele yakali kumbali aanzila. 13 Kundawu eeyo, nkunkuko Jehu nkwaakaswaanana aababbululu baMwaami Ahaziya waJuda, mpawo wakati kulimbabo, “Ndinywe bani?” Mpawo bakati: “Tuli babbululu ba-Ahaziya, tulikukunuka kuti tukabone kuti balibiyeni bana bamwaami abana babanyina bamwaami.”* 14 Aachiindi nchicheecho, wakati: “Amubajate!” Nkinkaako, bakabajata babajaya kuchikala chakung’anda yakugelela mbelele, baalumi bali 42. Taakwe ngwaakasiya naba uumwi kali muumi.
15 Naakwazwa ooko, wakaswaanana aaJehonadabbu mwana waRekkabbu, ooyo wakali kuza kuti azooswaanane aanguwe. Naakamujuzya,* wakati: “Moyo wako ulimaninide na kulindime, mbuli moyo wangu mbuumaninide kulinduwe?”
Jehonadabbu wakasandula kuti: “Iiyi.”
“Kuti kakuli oobo, ndipe kuboko kwako.”
Nkinkaako, wakamupa kuboko mpawo Jehu wakamudonsela mungolo mwaakabede. 16 Mpawo wakati: “Atweendaamwi ukabone mbunditalekeleli bantu batasyomeki kuli* Jehova.” Nkinkaako, bakamutansika mungolo yakwe yankondo beendaamwi. 17 Mpawo wakasika kuSamariya, wajaya bantu boonse bamung’anda ya-Ahabbu bakali basyaala muSamariya kusikila wabamana, kweendelana ajwi lyaJehova ndyaakali waamba kabelesya Elija.
18 Mukuyungizya, Jehu wakabunganizya bantu boonse mpawo wakababuzya kuti: “Ahabbu wakamukomba mbichaani Bbaala, pesi Jehu ulamukomba kwiinda nguwe. 19 Lino amundiitile bapolofita baBbaala boonse, abakombi bakwe boonse, abapayizi bakwe boonse. Kutabi muntu naba uumwi uutaleke kusika, nkaambo ndiyanda kupa chipayizyo chipati kuli Bbaala. Muntu woonse uutaleke kusika ulajayigwa.” Pesi Jehu wakabeena kayanda kujaya bakombi baBbaala.
20 Jehu wakati: “Amwaambilizye kuti kunooli muswaangano uuyandikana waBbaala.” Nkinkaako, bakawuwambilizya. 21 Jehu wakatumizya mulayizyo mu-Israyeli yoonse, mpawo bakombi baBbaala boonse bakasika. Boonse bakasika, taakwe wakasyaala pe. Bakanjila mung’anda yaBbaala* mpawo ng’anda yaBbaala yakazula pamu kuzwa kulilimwi bbazu kusika kulilimwi. 22 Wakabuzya muntu wakali kulanga ndawu yakali kubambilwa zigogo kuti: “Beetele zigogo bakombi baBbaala boonse.” Nkinkaako, wakabeetela zigogo wabapa. 23 Mpawo Jehu aJehonadabbu mwana waRekkabbu bakanjila mung’anda yaBbaala. Wakabuzya bakombi baBbaala kuti: “Amuyanduulisisye, mubone kuti taakwe mukombi waJehova na oomuno, kweelede kusyaala bakombi baBbaala kupela.” 24 Kumamanino, bakanjila kuti bape zipayizyo azipo zitentwa. Jehu wakali wabikka baalumi bali 80 mbaakalaabo aanze, mpawo wakali wababuzya kuti: “Kuti umwi wabantu mbindili kubikka mumaboko aanu achije, buumi bwanu bulabbadala buumi bwakwe.”
25 Mbaakamaninsya biyo kupa chipo chitentwa, Jehu wakabuzya balindi* abagwasilizi babapati bamasooja kuti: “Amunjile mubajaye! Mutalekeli naba uumwi kuti achije!” Nkinkaako, balindi abagwasilizi babapati bamasooja bakabajaya aapanga mpawo bakabawaalila aanze, alubo bakaliswini kunjila kusikila baakusika mundawu iisalala yamung’anda* yaBbaala. 26 Bakagwisya mapila aasalala aamung’anda yaBbaala baabikka aanze mpawo bakaatenta woonse. 27 Bakadilisya pila lisalala lyaBbaala, alubo bakadilisya ng’anda yaBbaala, bayichita kuti ibe zimbuzi, mbiichibede ambulisunu.
28 Oobu mbumbubo Jehu mbaakanyonyoona Bbaala mu-Israyeli. 29 Nikuba oobo, Jehu taakazileka pe zibi Jerobbowamu mwana waNebbati nzyaakali wapa kuti Israyeli achite, nkukwaamba kukomba zibumbwa zyabana bang’ombe bangolida bakali kuBbeteli akuDani. 30 Nkinkaako, Jehova wakati kuli Jehu: “Akaambo kakuti wachita zintu zibotu akuti wachita ziluleme mumeso aangu kwiinda mukuchita zintu zyoonse zyali mumoyo wangu nzindali kuyanda kuchitila ng’anda ya-Ahabbu, mazyalani aane aabana bako balombe azookkala aachuuno chabwaami cha-Israyeli.” 31 Pesi Jehu taakalikataazya pe kweenda muMulawu waJehova Leza wa-Israyeli amoyo woonse. Taakazileka pe zibi Jerobbowamu nzyaakali wapa kuti Israyeli achite.
32 Mumazuba aayo, Jehova wakasaanguna kuchesya nyika ya-Israyeli mbichaani-mbichaani. Hazayeli wakaliswini kubalwana muchilawu choonse cha-Israyeli, 33 kuzwa kububwezuba kwaJodani, nyika yoonse yaGiliyadi—yamusyobo waGadi, waRubbeni awaManase—kuzwa ku-Arowa, iili aafwiifwi aKalonga ka-Anoni kusika kuGiliyadi akuBbashani.
34 Makani aachiindi woonse aali atala aJehu, azintu zyoonse nzyaakachita amilimu yakwe yoonse yanguzu, taalembedwe na mubbuku lyamakani aachiindi aaziindi zyabaami ba-Israyeli? 35 Mpawo Jehu wakalazikwaamwi amasianyinakulu alubo bakamuzikka muSamariya. Mwanaakwe Jehowahazi wakaba mwaami mundawu yakwe. 36 Jehu wakeendelezya Israyeli muSamariya kwaminyaka iili 28.