Kulonga
10 Mpawo Jehova wakati kuli Mozesi: “Yinka kuli Faro nkaambo ndamuleka ababelesi bakwe kuti bayumye myoyo yabo kuti ndichite zitondeezyo zyangu kunembo lyakwe, 2 kuchitila kuti muzoobuzye bana banu abazukulu banu mbundakapenzya Ijipita azitondeezyo nzindakachita aakati kabo alubo muzooziba kuti ndime Jehova.”
3 Nkinkaako, Mozesi a-Aroni bakanjila mwaakabede Faro mpawo bakati kulinguwe: “Nzezi nzyaamba Jehova Leza wamaHebberu, ‘Unooswini kukaka kulibombya kulindime kusikila lili? Leka bantu bangu beende, kuchitila kuti bakandibelekele. 4 Nkaambo kuti kulikukaka kuti bantu bangu beende, juunza ndileeta nsozi munyika yako. 5 Zizoovumba nyika alubo tamukakonzyi pe kubona aansi. Zizoolya zyakafutuka kuchivulamabwe azyakasyaalila alubo zizoolya minsamu yanu yoonse iili musokwe. 6 Zizoozula mumaanda aako, mumaanda aababelesi bako boonse amumaanda aama-Ijipita boonse, zyakuti naaba mawuso naakuti masianyookulu taakwe naakabwene nsozi zyiingi oobu kuzwa naakakkala munyika eeyi kusikila sunu.” Mpawo wakachengunuka wazwa mwaakabede Faro.
7 Babelesi baFaro bakati kulinguwe: “Mwaalumi ooyu unootupenzya* kusikila lili? Leka bantu beende kuchitila kuti bakabelekele Jehova Leza wabo. Tubwene na kuti Ijipita yanyonyooka?” 8 Nkinkaako, Mozesi a-Aroni bakayitwa lubo kuli Faro mpawo wakati kulimbabo: “Amwiinke mukabelekele Jehova Leza wanu. Pesi mbaani loko bateende?” 9 Mozesi wakati: “Tuleenda aabana besu, bachembeede besu, bana besu balombe, bana besu basimbi, mbelele zyesu ang’ombe zyesu nkaambo tuyoochitila Jehova pobwe.” 10 Mpawo wakati kulimbabo: “Kuti inywe ndimuleke abana banu kuti mweende, choonzyo Jehova unooli aandinywe. Zilaantanganana biya kuti muyanda kuchita chintu chibi. 11 Peepe! Baalumi mbabo kupela batayinke kuyoobelekela Jehova, nkaambo nzizyo nzimwakakumbila.” Mpawo bakabatanda kunembo lyaFaro.
12 Jehova wakati kuli Mozesi: “Tandabika kuboko kwako aanyika ya-Ijipita kuchitila kuti nsozi zize aanyika ya-Ijipita zizoolye zimena zyoonse zyaanyika azintu zyoonse zyakasiigwa aachivulamabwe.” 13 Mozesi wakatandabika mufunko wakwe aanyika ya-Ijipita mpawo Jehova wakapa kuti luuwo luzwa kubuzwezuba luunge aanyika buzuba boonse abusiku boonse. Nibwakacha, luuwo oolo lwakeeta nsozi. 14 Nsozi zyiingi zyakasika aanyika ya-Ijipita akuzula muchilawu choonse cha-Ijipita. Zyakali zyiingi loko, taakwe nikwakabede nsozi zyiingi oobu alubo tazichizoobi lubo pe. 15 Zyakavumba ndawu yoonse alubo nyika yakasiya akaambo kanzizyo. Zyakanyonyoona zimena zyoonse zyaanyika amichelo yaminsamu yoonse yakali yasiigwa aachivulamabwe. Taakwe tu lyakasyaala muminsamu amuzintu zimena zyamusokwe munyika yoonse ya-Ijipita.
16 Nkinkaako, Faro wakayita Mozesi a-Aroni mpawo wakati kulimbabo: “Ndabisya kuli Jehova Leza wanu akulindinywe. 17 Ikaka, ndikumbila kuti mundilekelele kamwi biyo, mukombelezye Jehova Leza wanu kuti agwisye penzi eeli lijaya.” 18 Nkinkaako, wakazwa* mwaakabede Faro waakukombelezya Jehova. 19 Mpawo Jehova wakapa kuti luuwo luzwide kububbila alubo lwakali aanguzu. Luuwo oolo lwakabweza nsozi zyoonse lwaakuzisiya muLwizi Lusalala. Taakwe nsozi niiba iimwi yakasyaala muchilawu cha-Ijipita. 20 Nikuba oobo, Jehova wakamuleka Faro kuti ayumye moyo alubo taakabaleka pe ma-Israyeli kuti beende.
21 Mpawo Jehova wakati kuli Mozesi: “Tambika kuboko kujulu, kuchitila kuti kube mudima munyika ya-Ijipita. Mudima uusiya mbi uukonzya kujatwa.” 22 Mozesi wakatandabika kuboko kwakwe kujulu mpawo kwakaba mudima uusiya mbi munyika yoonse ya-Ijipita kwamazuba aatatu. 23 Teebakali kukonzya pe kubonana alubo taakwe wakazwa mpaakabede kwamazuba aatatu, pesi ma-Israyeli boonse bakali aamumuni nkubakali kukkala. 24 Mpawo Faro wakayita Mozesi wamubuzya kuti: “Amweende mukabelekele Jehova. Mbelele zyanu ang’ombe nzizyo kupela zitasyaale. Mulakonzya kwiinka aabana banu.” 25 Pesi Mozesi wakati: “Iwe lwako weelede kutupa* zipayizyo azipo zitentwa mpawo tuyoozipa kuli Jehova Leza wesu. 26 Tulayinka aazivuubwa zyesu, taakwe munyama uutasyaale pe,* nkaambo tuyoobelesya bamwi babo kukukomba Jehova Leza wesu alubo tatuzi pe kuti mbaabali mbituyoopa kuli Jehova kusikila tukasike nkukooko.” 27 Nkinkaako, Jehova wakamuleka Faro kuti ayumye moyo alubo taakabaleka pe kuti beende. 28 Faro wakati kulinguwe: “Zwa! Uteezyi lubo pe kuzoobona busyu bwangu, nkaambo mubuzuba mbutazoobone busyu bwangu, ulifwide.” 29 Mpawo Mozesi wakati: “Tandizooyezyi lubo pe kubona busyu bwako mbuli mbuwaamba.”