Kulonga
38 Wakapanga chipayililo chamukoka chazipo zitentwa, mabazu aacho woonse akaleelene. Chakali kulampa makkiyubbiti* aali musanu, busasa bwacho bwakali makkiyubbiti aali musanu mpawo kuya mujulu chakali kulampa makkiyubbiti aatatu. 2 Wakapanga meja aacho mumakkona aacho aane. Meja aayo akalijisilidi aali nchicho mpawo wakachizilulula aakkopa. 3 Naakamaninsya, wakapanga zibelesyo zyoonse zyachipayililo, nkukwaamba: tugomo, mafosholo, ndido, mafologo azyakubikkila makala. Zibelesyo zyacho zyoonse wakazipanga aakkopa. 4 Mpawo wakachipangila nsefa yatubulo twakkopa akwiibikka aansi aamumpimpito aakati kachipayililo. 5 Wakabikka maring’i aane kumakkona aane aafwiifwi ansefa yakkopa mwakali kuyoonjizigwa zisamu zyakuchinyampuzya. 6 Naakazwa kuchita eezi, wakapanga zisamu zyamukoka akuzizilulula aakkopa. 7 Wakanjizya zisamu eezyo zyakuchinyampuzya mumaring’i aakali kumabazu aabili aachipayililo. Chipayililo nchaakapanga chakali mbuli bbokesi lyamapulanga lijulikide aajulu aansi.
8 Mpawo wakapanga bbavu lyakkopa achikkalilo chalyo chakkopa kabelesya magilazi* aabanakazi bakali kubeleka munzila iibambikene kumanjililo aatente lyakuswaanganina.
9 Wakapanga lubuwa. Bbazu lyakumusanza lyalubuwa wakalipangila makketeni aalampa makkiyubbiti aali 100 kabelesya busumyo bubotu boosedwe. 10 Kwakali mapila aali 20 azikkazikizyo zyakkopa zili 20, ngobyo zyamapila azyakujatanizya zyawo zyakali zyansiliva. 11 Kubbazu lyakunyika, kwakali makketeni aakali kulampa makkiyubbiti aali 100. Mapila aawo aali 20 azikkazikizyo zyawo zili 20 zyakali zyakkopa. Ngobyo zyamapila azyakujatanizya zyawo zyakali zyansiliva. 12 Kububbila kwakali makketeni aalampa makkiyubbiti aali 50 amapila aali kkumi azikkazikizyo zili kkumi, ngobyo zyamapila azyakujatanizya zyawo zyakali zyansiliva. 13 Busasa bwabbazu lyakubuzwezuba bwakali makkiyubbiti aali 50. 14 Kubbazu lyakuchilisyo lyamanjililo kwakali makketeni aakali kulampa makkiyubbiti aali 15 amapila aatatu azikkazikizyo zitatu. 15 Mpawo kubbazu lyachimweensi lyamanjililo aalubuwa kwakali makketeni aalampa makkiyubbiti aali 15 amapila aatatu azikkazikizyo zitatu. 16 Makketeni woonse aalubuwa akapangidwe aamulembo mubotu. 17 Zikkazikizyo zyamapila zyakali zyakkopa, ngobyo zyamapila azyakujatanizya zyawo zyakali zyansiliva. Mapila akazilulwidwe aansiliva kujulu alubo zyaanzyo zyamapila aalubuwa zyakali zyansiliva.
18 Kketeni lyakumanjililo aalubuwa lyakapangidwe aabusumyo bwabbuluu, wulu yapepulu, busumyo busalala abusumyo bubotu boosedwe. Lyakali kulampa makkiyubbiti aali 20 amakkiyubbiti aali 5 kuya mujulu. Bulamfu bwalyo kuya mujulu bwakeelene aabwamakketeni aalubuwa. 19 Mapila aawo aane azikkazikizyo zyawo zine zyakali zyakkopa. Ngobyo zyawo zyakali zyansiliva. Mitwe yamapila azyakuswaanizya zyawo zyakazilulwidwe ansiliva. 20 Nkanka zyoonse zyatente lyakukombela azyalubuwa zyakali zyakkopa.
21 Eezi nziizintu zyakabelesegwa kukupanga tente lyakukombela, nkukwaamba tente lyaBukamboni, Mozesi nzyaakalayilila kuti zibalwe aamaLevi kabazulwidwa aa-Itamara mwana wamupayizi Aroni. 22 Bbezaleli mwana wa-Uri mwana waHuri wamusyobo waJuda, wakachita zyoonse Jehova nzyaakalayilila Mozesi. 23 Wakalaamwi a-Oholiyabbu mwana wa-Ahisamakki wamusyobo waDani uuli aaluzibo lwakupanga zintu, lwakusuminina alwakupanga milembo kabelesya busumyo bwabbuluu, wulu yapepulu, busumyo busalala abusumyo bubotu.
24 Ngolida yoonse yakabelesegwa kukuchita mulimu woonse wandawu iisalala njinjiyo yakapegwa kayili chipo chiyumbwa, yakali kulema matalenta* aali 29 amashekeli* aali 730, kweendelana achipimyo chashekeli lyamundawu iisalala.* 25 Nsiliva yakagwisigwa aabantu bamumbungano bakalembwa yakali kulema matalenta aali 100 amashekeli aali 1 775, kweendelana achipimyo chashekeli lyamundawu iisalala.* 26 Umwi awumwi wakagwisya hafu yashekeli kweendelana achipimyo chashekeli lyamundawu iisalala nkaambo baalumi boonse bakalembya, ibakali aaminyaka iili 20 kaziya kunembo bakali 603 550.
27 Matalenta aakabelesegwa kupanga zikkazikizyo zyandawu iisalala azikkazikizyo zyakketeni akali 100; zikkazikizyo zili 100 zyakali kulema matalenta aali 100, nkukwaamba kuti chikkazikizyo chimwi chakali kulema talenta limwi. 28 Wakabelesya mashekeli aali 1 775 kupanga ngobyo zyamapila akuzilulula mitwe yawo mpawo wakaaswaanizya.
29 Kkopa yakapegwa kayili chipo* yakali kulema matalenta aali 70 amashekeli aali 2 400. 30 Bakayibelesya kupanga zikkazikizyo zyakumanjililo aatente lyakuswaanganina, chipayililo chakkopa ansefa yacho yakkopa, zibelesyo zyoonse zyachipayililo, 31 zikkazikizyo zyalubuwa, zikkazikizyo zyakumanjililo aalubuwa ankanka zyoonse zyatente lyakukombela azyalubuwa.