Amosi
4 “Amumvwe jwi eeli, inywe ning’ombe zyakuBbashani,
Nimuli aachilundu chaSamariya,
Inywe nibanakazi nimweena aabo balangilwaansi akunyonyoona bafwaba,
Nimubuzya balumi banu* kuti, ‘Amutweetele chakunywa!’
2 Mwaami Singuzuzyoonse Jehova wakonka abusalali bwakwe kati,
‘“Amubone! Mazuba azoomusikila, aawo natazoomulengelezye aansimbi zyakwaanzikila nyama
Andinywe moonse nimusyeede natazoomulengelezye aatulobyo.
3 Umwi awumwi wanu uzoozwida aampako iili aamuduli iili kunembo lyakwe,
Mpawo muzoosowelwa kuHamoni,” mbaamba Jehova.’
4 ‘Amuze kuBbeteli muchite chibi,*
Amuze kuGiligali muyungizye kubisya!
Amweete zipayizyo zyanu kuseeni,
Azyakkumi zyanu mubuzuba bwachitatu.
5 Amutente chipayizyo chakulumba chachinkwa chitakwe bumena,
Amwaambilizye zipo zyanu zyakuliyandila kamuli koompolola!
Nkaambo nzizyo nzimuyanda kuchita, inywe nibantu bamu-Israyeli,’ mbaamba Mwaami Singuzuzyoonse Jehova.
6 ‘Ime ndakapa kuti menyo aanu atube akaambo kakubula chakulya* mumyuunzi yanu yoonse
Akupa kuti chinkwa chibulike mumaanda aanu woonse,
Nikuba oobo, teemwakaboola pe kulindime,’ mbaamba Jehova.
7 ‘Alubo ndakapa kuti mvula itawi nkumubede kakusyeede myeezi iitatu kuti chiindi chakutebula chisike,
Ndakapa kuti mvula iwe muli umwi muunzi akuti itawi muli umwi muunzi.
Umwi muunda wakali aamvula,
Pesi ooyo wakatalikwe mvula wakayuma.
8 Bantu bamumyuunzi iibili naakuti iitatu bakali kudadalika kabaya mumuunzi uumwi kuti bakanywe maanzi,
Pesi teebakagondwa pe,
Nikuba oobo, teemwakaboola pe kulindime,’ mbaamba Jehova.
9 ‘Ndakapa kuti zilyo zyanu zitentwe aazuba akuti zinjilwe aabulwazi bujaya zilyo.
Mwakayungizya myuunda yanu amyuunda yanu yamisaansa,
Pesi nsozi zyakanyonyoona mikuyu yanu ama-olifa,
Nikuba oobo, teemwakaboola pe kulindime,’ mbaamba Jehova.
10 ‘Ndakamutumina bulwazi bubi loko mbuli oobuya bwaku-Ijipita.
Ndakajaya balombe bakali aakati kanu apanga alubo ndakabweza mabbiza aanu.
Ndakapa kuti kununka kwamumakkeempu aanu kunjile mumpemo zyanu,
Nikuba oobo, teemwakaboola pe kulindime,’ mbaamba Jehova.
11 ‘Ndakapa kuti kube lunyonyooko aakati kanu
Mbuli Leza mbaakanyonyoona Sodoma aGomora.
Alubo mwakaba mbuli chisisi chagwisigwa mumulilo,
Nikuba oobo, teemwakaboola pe kulindime,’ mbaamba Jehova.
12 Nkinkaako, eezi nzizyo nzinditazookuchitile, O Israyeli.
Libambile kuswaana Leza wako, O Israyeli
Nkaambo eezi nzizyo nzinditazookuchitile.
13 Nkaambo bona! Nguwe wakapanga zilundu akulenga luuwo,
Ubuzya muntu mizeezo yakwe,
Uchincha buchedo kuti bube mudima,
Alubo ulyatuuka ndawu zyanyika zili aajulu,
Jehova Leza wamakamu ndiizina lyakwe.”