Amosi
6 “Bali aapenzi aabo balisyoma* muZiyoni,
Aabo babonaanga balikwabilidwe muchilundu chaSamariya,
Balupati-pati bazisi zisumpukide,
Aabo bamung’anda ya-Israyeli mbibasyoma!
2 Amuzubukile kuKkaline mukabone.
Nimwazwa ooko, mwiinke kuMuunzi Mupati waHamati,
Mpawo mukunukile kuGati yamaFilisiti.
Ani ilikabotu loko na kwiinda bwaami* oobu,
Naakuti chilawu chayo nchipati na kwiinda chanu?
3 Muli kulilubya buzuba bwamapenzi
Akupa kuti kube bweendelezi buyandisya lupyopyongano* na?
4 Boona aamalo aabotesedwe aameja aanzovu alubo bakkala aazyuuno zinefa* kabalyiibide,
Kabali kulya bagutu abana bang’ombe baneneede,*
5 Baanza nyimbo kuti zyeendelane aakulila kwakantimbwa,
Alubo bapanga zibelesyo zyakwiimbya mbuli Davida,
6 Wayini bayinywida munkomeki zipati
Alubo balinanika mafuta mabotu loko.
Pesi tabakwe ndaba pe apenzi* lyaJosefa.
7 Nkinkaako, mbabo batasaangune kutolwa mubuzike,
Amusindo wabaabo balikupobola, bakkede aazyuuno zyabo kabalyiibide uzoomana.
8 ‘Mwaami Singuzuzyoonse Jehova walikonkezya alikke,’ mbaamba Jehova Leza wamakamu,
‘“Kulisumpula kwaJakkobo kulandisesemya,
Ngazi zyakwe zyakukwabilila ndilazizonda,
Alubo muunzi azili mumo ndizoozibikka mumaboko aabasinkondonyina.
9 “‘“Kuti kwasyaala baalumi bali kkumi mung’anda iimwi, ambabo bazoofwa. 10 Bbululu wabo* uzoosika kuti abagwisizye aanze akutenta umwi awumwi wabo. Uzoogwisya mafuwa aabo mung’anda. Mpawo uzoobuzya kufumbwa uuli mutwaanda twamukati kuti, ‘Kuchili bamwi na mbulaabo?’ Mpawo uzoowamba kuti, ‘Taakwe pe!’ Bbululu wabo uzoowamba kuti, ‘Kuswini kuumwine!’ Nkaambo eechi teechiindi chakuti ndaambe zina lyaJehova pe.’”
11 Nkaambo nguJehova walayilila,
Uzoodilisya ng’anda mpati kuti ibe mulwi wamagadi,
Akaanda kaniini kuti kabe mulwi wadoti.
12 Mabbiza alachijaana na aabbwe pati,
Naakuti muntu nga ulalima aang’ombe na mpawaawo?
Nkaambo mwachincha nzila iiluleme njimubetekaayo kuti ibe musamu uujaya,
Amuchelo wabululami kuti ube mululwe.
13 Mubotelwa aazintu zitagwasyi,
Alubo mwaamba kuti, “Teetwajana manguzu* na akaambo kanguzu zyesu?”