Miswaangano Yesu Icitwa Biyeni?

Miswaangano yabanaKristu bakusaanguna yakali kuswaanizya inyimbo, kukomba, kubala akupandululwa kwaMagwalo zyoonse eezi tiizyakalikwe tunsiya-nsiya pe. (1 baKorinto 14:26) Ulakonzya kujana zintu ziloobu kumiswaango yesu.

Malayilile azwa muBbaibbele, alimwi alagwasya. Kumamanino aamviki, imbungano imwi ayimwi ilaswaangana kuti iswiilizye Nkani yaBbaibbele iitola maminisi aali 30. Inkani eeyi, ipandulula Magwalo nzyaamba atala abuumi bwesu amumazuba ngitulokupona. Toonse tusungwaazigwa kulanga mumaBbaibbele eesu. Yamana nkani, kuba Ciiyo ca“Ngaziyakulinda,” citola awa iimwi, woonse muntu mumbungano ulaangunukide mukusandula kuzwa muciiyo caNgaziyakulinda. Kwiizya ooku, kutugwasya kubelesya njiisyo zili muBbaibbele mubuumi bwesu. Zyiiyo eezi, zilayiigwa mumbungano ziinda ku110 000 nyika yoonse.

Tulagwasigwa kuyungizya luzibo lwakuyiisya. Tuswaangana antoomwe akati kamviki kuzoocita muswaangano uuli muzibeela zitatu uutegwa Buumi Bwesu bwaciKristu Amulimu Wesu, kakubelesegwa kabbuku kazwa mwezi amwezi kategwa, Kabbuku Kamuswaangano waMulimu Abuumi bwaciKristu. Cipaanzi cakusaanguna camuswaangano ooyu citegwa Lubono Luzwa muJwi lyaLeza, citugwasya kumvwisisisya cipaanzi camuBbaibbele cakabambilwa ambungano kakucili ciindi. Cipaanzi citobela citegwa Lipede Kumulimu Wakukambawuka, cilaazitondeezyo zitugwasya kwaambuzyania abamwi atala makani aazwa muBbaibbele. Sikupa lulayo waamba twaambo tukonzya kutugwasya kuti tukonzye kubala akwaambuula kabotu. (1 Timoteo 4:13) Cipaanzi camamamanino citegwa Buumi bwamaKristu citugwasya kubona mbotukonzya kubelesya malayilile aazwa muBbaibbele mubuumi bwesu. Cipaanzi eeci ciswaanizya kwaambuzyania kwamibuzyo ansandulo citugwasya kuyungizya luzibo lwesu atala aBbaibbele.

Ikuti wanjila miswaangano yesu, uyoojana kubotelwa nkutayeeyeli pe kwalwiiyo luzwa muBbaibbele.—Isaya 54:13.

• Niinzi ncuyeeyela kumvwa kumiswaangano yaBakamboni baJehova?

• Aakati kamiswaangano yesu, nguuli ngunga ulayanda kuzoonjila muciindi ciza?