Bazyalwanyina Bajisini Munyika Yoonse

JEHOVA wakasala maIsrayeli kuti babe chisi chiitwa azina lyakwe kwaminyaka iili 1 500. Kuzwa waawo, Jehova wakababikkila “maano bamasi kuti mulimbabo ajane bantu bazina lyakwe.” (Mil. 15:14) Bantu bayitwa azina lyaJehova bakali kuyooba bakamboni bakwe, bajisini muzintu nzibayeeya anzibachita munyika yoonse. Kujatana kwabantu bayitwa azina lyaLeza kwakali kuyoochitika akaambo kamulimu Jesu ngwaakapa batobeli bakwe naakati: “Aboobo kamuya mukayiisye bantu bazisi zyoonse kuti babe basikwiiya, akubabbapatizya muzina lya Taata alya Mwana alya muuya uusalala, mukabayiisye kutobela zintu zyoonse nzyondakamulailila.”—Mt. 28:19, 20.

² Wakaba sikwiiya waJesu Kristu chiindi nwakalipeda kuli Jehova akubbabbatizigwa. Wakaba mumpuli yamaKristu ijisini yabazyalwanyina bamunyika yoonse batazumini kuti kusiyana kwamaponeno, kusiyana kwamisyobo akukkala muzisi zisiyene kubaanzanie. (Int. 133:1) Eezi zipa kuti ubayande akubalemeka maKristunyokwe bali mumbungano. Amwi bamwi wakali kubazonda akaambo kakusiyana kwamusyobo, lwiiyo ambubakali kupona. Pesi lino ulikubotelwa akaambo kabuzyalwanyina busimide bwiinda kufumbwa kumvwanana kukonzya kuba akati kabantu bazwa kuchisi chimwi, bakombaamwi naakuti bali mumpuli iimwi.—Mk. 10:29, 30; Kol. 3:14; 1 Pet. 1:22.

KUCHINCHA MABONENO

³ Ikuti kulaapenzi lyakusaluula bantu akaambo kamusyobo wabo, nzibasala mutwaambo twapolitikisi, maponeno aabo naakuti kumwi kusaluula kuli mumoyo wako, weelede kuyeeya atala amaKristu bakusaanguna bakeelede kuleka njiisyo zyabukombi bwachiJuda zyakali kusaluula bantu bakatali maJuda. Jehova wakagwasya Petro kuti alibambile chiindi naakamubuzya kuti akaswaye Kkorneliyo mupati wankamu yamasoja aakuRoma.—Milimo chaandaano 10.

⁴ Muchilengaano nchaakabona, Petro wakabuzigwa kuti ajaye akulya banyama maJuda mbibakali kubona kuti balisofweede. Chiindi Petro naakakaka, jwi lizwa kujulu lyakamubuzya kuti: “Koleka kwaamba zintu Leza nzyaasalazya kuti zilisofweede.” (Mil. 10:15) Leza wakagwasya Petro kuti achinche maboneno aakwe kuchitila kuti akonzye kutambula mulimu ngwaakapedwe wakuswaya muntu wakatali muJuda. Katobela malayilile aJehova, Petro wakabuzya bantu bakabungene kuti: “Mulizyi kabotu kuti cilatondwa kumu Juda ikuyanzana naa kuswaya muntu wamusyobo uumbi, pele lino Leza wanditondezya kuti tandeelede kwaamba muntu uuli woonse kuti ulisofweede naa kuti tasalali. Nkakaambo kaako tiindakakaka kuboola nindakaitwa.” (Mil. 10:28, 29) Kuzwa waawo, Petro wakabona kuti Jehova watambula Kkorneliyo abamumpuli yakwe.

⁵ Sawulu wakuTarso, wakali muFarisi wakayiide, wakeelede kulibombya akutalika kumvwanana abantu mbaakatali kumvwananaabo kumasaangunino. Chimwi chiindi wakeelede kubuzigwa malayilile ambabo. (Mil. 4:13; Gal. 1:13-20; Flp. 3:4-11) Tulakonzya kuyeeya atala akuchincha maboneno nkubakachita bantu bali mbuli Sergiyo Pawulu, Dionisiyo, Filimoni, Onesimo abamwi chiindi nibakamvwa makani mabotu akusala kuba basikwiiya baJesu Kristu.—Mil. 13:6-12; 17:22, 33, 34; Flm. 8-20.

MBUTUKONZYA KUKKALA KATUJISINI ABAKWESU BALI MUNYIKA YOONSE

⁶ Chilaantanganana kuti luyando bakwesu abachizi ndubakakutondeezya lwakakugwasya kuti ube afwiifwi aJehova ambunga yakwe. Wakalubona luyando lwachoonzyo lutondeezya kuti tuli basikwiiya baJesu Kristu bakasimpe mbuli mbakaamba kuti: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:34, 35) Eezi zyakapa kuti umuyande loko Jehova ambunga yakwe, nwaakabona kuti luyando lujanika mumbungano ndulo lujanika mumbunga yaJehova iili munyika yoonse. Alubo, ulikubona kuzuzikizigwa kwabupolofita buli muBbayibbele bwakuyobololwa kwabantu kuti bazookombe Jehova kabajisini alubo kabali aaluumuno mumazubaano aakumamanino.—Mik. 4:1-5.

⁷ Ngwani wakali kuyeeya kuti bantu bazwa “muzisi zyoonse, mumisyobo yoonse, mumikowa yoonse alimwi amumilaka yoonse,” balakonzya kujatana, mbukunga mazubaano kuli zintu zyiingi zipa kuti kube kwaanzaana? (Ciy. 7:9) Yeeya musiyano uuliwo aakati kabantu balalwiiyo lulaajulu lwakubelesya minchina abantu bakakatila kutunsiya-nsiya twachiindi. Alubo, yeeya kutamvwanana kuliwo muzikombelo zyabantu bamusyobo umwi abazwa kuchisi chimwi. Mazubaano, bantu balikukazyania muli zyapolitikisi akaambo kakuyanda kusumpula zisi zyabo. Alubo, kuti wabona zintu zisiyene-siyene zipa kuti bantu baanzane ulakonzya kumvwisisisya kuti nguLeza Singuzuzyoonse luzutu uukonzya kupa kuti bantu bazwa muzisi zisiyene, baambuula milaka iisiyene abamisyobo iisiyene abalaamaponeno aasiyene bamvwanane akuti bajatane.—Zek. 4:6.

⁸ Pesi kujatana kuli boobu kulachitika alubo wakazibona chiindi nwakalipeda akubbabbatizigwa akuba Kamboni waJehova. Mbukunga kujatana ooku kulagwasya, ulakonzya kugwasilizya kuti kwiinkilile kunembo. Eezi zilakonzeka kwiinda mukutobela majwi akalembwa amwaapostolo Pawulu ali mulugwalo lwaBaGalatiya 6:10 lwaamba kuti: “Kufwumbwa leelyo notujisi coolwe, atucitile bantu boonse milimo mibotu, pele kapati ibaciinga cesu calusyomo.” Alubo, tutobelezya malayilile aakuti: “Mutaciti cintu cili coonse amuuya wakuzwangana naa cakulisumpula, pele amucite zintu zyoonse cakulicesya akubona bamwi kuti balamwiinda. Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.” (Flp. 2:3, 4) Ikuti twabona bakwesu abachizi mbuli mbababona Jehova kutali kulanga kuti bazwa kuli, tuyooba aluumuno alubo tuyoomvwanana ambabo.—Ef. 4:23, 24.

KUBIKKILANA MAANU

⁹ Mwaapostolo Pawulu wakati mbungano tazyaanzene pe, pesi zilabikkilana maanu. (1 Kor. 12:14-26) Nikuba kuti tukkala kule abakwesu abachizi pesi tulababikkila maanu. Ikuti twamvwa kuti bamwi bakwesu balikupenzegwa, zilatuchisa toonse. Ikuti bamwi kabayanda lugwasyo muzintu zyakumubili, bachitikilwa mapenzi aalichitikila, nkondo naakuti kubukilana kwabantu bali muchisi, tubweza ntaamu yakubagwasya mubukombi amuzintu zyakumubili.—2 Kor. 1:8-11.

¹⁰ Toonse tweelede kubakombela bakwesu chiindi choonse. Bamwi balikulwana azintu zibasunka kuti bachite zintu zibi. Bamwi baswaana buyumu-yumu mbutuzi. Alubo bamwi baswaana mapenzi aataboneki mbuli kukazigwa kumilimu naakuti abamumpuli batakombi. (Mt. 10:35, 36; 1 Tes. 2:14) Eezi zilatukataazya toonse nkaambo tuli bazyalwanyina bajisini munyika yoonse. (1 Pet. 5:9) Alubo kuli baalu babeleka changuzu mumulimu waJehova abatuzulwida mumulimu wakukambawuka amumbungano. Kuyungizya waawo, kuli bamwi bayendelezya mulimu wakukambawuka uuchitwa munyika yoonse. Nikuba katutakonzyi kubagwasya, tulakonzya kubatondeezya luyando akuti tulababikkila maanu kwiinda mukubakombela.—Ef. 1:16; 1 Tes. 1:2, 3; 5:25.

¹¹ Bakombi baJehova beelede kukkala kabalibambilide kugwasyania nkaambo kuli mapenzi miingi loko mumazubaano aakumamanino. Chimwi chiindi, nga kwachitika mapenzi aali mbuli mapenzi aalichitikila, mizuzumo yanyika amaanzi aakukula myuunzi alubo kuti kwaba boobo kuchitwa mabambe akuti bakwesu bagwasigwe azintu nzibayandikana. MaKristu bamumwaanda wamunyaka wakusaanguna bakatusiila chikozyano chilikabotu loko munkani eeyi. Kabayeeya malayilile aaJesu, basikwiiya bakali kukkala kuAntiyokkiya bakatumizya zipo kubazyalwanyina bakuJudaya. (Mil. 11:27-30; 20:35) Mukuya kwachiindi, mwaapostolo Pawulu wakasungwaazya maKristu bakuKkorinto kuti bagwasilizye bazyalwanyina munzila iibambikene. (2 Kor. 9:1-15) Mazubaano, mbunga amuKristu umwi awumwi balagwasya anzibalaazyo kuti bamwi bakwesu baba mumapenzi naakuti kabayandikana kugwasigwa muzintu zyakumubili.

TUSALIDWE KUTI TUCHITE KUYANDA KWAJEHOVA

¹² Tuli bakwesu munyika yoonse bajisini mukuchita kuyanda kwaJehova. Mazubaano, Jehova uyanda kuti tuchite mulimu wakukambawuka makani mabotu aaBwaami kuchitila kuti abe chitondeezyo kumisyobo yoonse. (Mt. 24:14) Jehova uyanda kuti tupone kweendelana azyeelelo zyakwe zisumpukide chiindi nituchita mulimu ooyu. (1 Pet. 1:14-16) Tweelede kulibombya kuli umwi awumwi akubeleka changuzu mumulimu wakukambawuka makani mabotu. (Ef. 5:21) Mazubaano, kuyandikana kuti tubikke Bwaami bwaLeza mubusena bwakusaanguna mubuumi bwesu kutali nzituyanda. (Mt. 6:33) Ikuti twachita oobo chiindi nitukambawuka makani mabotu, tuyookkutisikana lino alubo tuyoojana zilongezyo zitamani.

¹³ Mbutuli Bakamboni baJehova, tulisiyene abamwi bantu nkaambo twakasalazigwa alubo tubelekela Leza chabusungu. (Tit. 2:14) Nzila njitumukombaayo Jehova ipa kuti tusiyane abamwi bantu. Nikuba kuti tubelekelaamwi abakwesu bali munyika yoonse, pesi twaambuula mulaka uumwi wakasimpe alubo tupona kweendelana akasimpe aako. Jehova wakaamba makani aaya chiindi naakabuzya Zefaniya kuti alembe kuti: “Ndiyoosandula mwaambo wabantu kuba mwaambo uusalala, kutegwa boonse kabaita zina lya Jehova, akuti kabamubelekela calukamantano.”—Zef. 3:9.

¹⁴ Jehova wakazulwida Zefaniya kuti apandulule buzyalwama bwesu bwamunyika yoonse mbububede mazubaano, wakati: “Ibasyeede akati kabana Israyeli tabakaciti zintu zitaluleme; tabakaambi zyakubeja pe, alimwi mukanwa lyabo tamukajaniki mulaka walweeno; bayoolya akulyoonena, alimwi kunyina muntu naba omwe uuyoobayoosya.” (Zef. 3:13) Tulakonzya kubeleka katujisini nkaambo twakakamvwisisisya kasimpe kali muJwi lyaJehova alubo kakatugwasya kuti tupone kweendelana azyeelelo zyakwe. Tulikuchita zintu bantu nzibayeeyanga tazikonzeki pe. Nisimpe kuti tulisiyene abamwi bantu alubo tuli bakombi baLeza bamulemeka munyika yoonse.—Mik. 2:12.