CHAANDAANO 5
Mbutukonzya Kulisiyanisya Anyika
“Tamuli bayeeyi nyika.”—JOHANE 15:19.
1. Niinzi chakali kupa kuti Jesu akataazikane mubusiku katanafwa?
MUBUSIKU Jesu katanafwa, wakalizi kuti wakali kuyoosiya basikwiiya bakwe alubo wakali kukataazikana atala azyakali kuyoobachitikila kunembo. Wakababuzya kuti: “Tamuli bayeeyi nyika.” (Johane 15:19) Nikwakiinda chiindi, wakabakombela kuli Wisi kati: “Tabali banyika mbuli mbwentali wenyika amebo.” (Johane 17:15, 16) Jesu wakali kwambaanzi?
2. “Nyika” Jesu njaakali kwaamba niinzi?
2 “Nyika” Jesu njaakali kwaamba, mbantu basala kweendelezegwa aSaatani. (Johane 14:30; BaEfeso 2:2; Jakobo 4:4; 1 Johane 5:19) Kujana twachita biyeni kuti ‘tutabi banyika eeyi’? Muchaandaano eechi, tuyoolanga-langa nzila zisiyene-siyene zikonzya kutugwasya kuti tutabi banyika. Nzila eezi ziswaanizya kusyomeka kuBwaami bwaLeza akutatola lubazu mutwaambo twanyika, kulisiyanisya anyika, kuzwaata chabulemu ambutweelede kwiibona mali. Alubo tulakonzya kuchita oobo kwiinda mukuzwaata zilwanisyo zyoonse nzyatupede Leza.—Langa Makani Aakumamanino 16.
SYOMEKA KUBWAAMI BWALEZA
3. Jesu wakali kukubona biyeni kuliswaanizya mutwaambo twanyika?
3 Jesu naakali aanyika, wakabona kuti bantu bakali kuswaanana amapenzi miingi mubuumi. Wakali kubayanda alubo wakali kuyanda kubagwasya. Wakazumina na kuba mwaami wabo kuchitila kuti abagwasye? Taakazumina pe. Nkaambo wakalizi kuti Bwaami bwaLeza mbubo abulikke bukonzya kugwasya bantu. Jesu wakali kuyooba Mwaami waBwaami oobo alubo chiindi chiingi wakali kukambawuka atala ambubo. (Daniele 7:13, 14; Luka 4:43; 17:20, 21) Jesu taakali kutola lubazu mutwaambo twanyika. Naakali kunembo lyaMweendelezi wakuRoma, Ponto Pilato wakati: “Bwami bwangu tabuli bwaansi ano.” (Johane 18:36) Basikwiiya bakwe abalabo teebakali kutola lubazu mutwaambo twanyika. Bbuku litegwa On the Road to Civilization lyakaamba kuti maKristu bakusaanguna “bakali kukaka kupegwa zyuuno mubweendelezi.” Nikuba mazubaano, maKristu bakasimpe abalabo tabatoli lubazu mutwaambo twanyika. Pesi tulasyomeka kuBwaami bwaLeza alubo tatutoli lubazu mutwaambo twanyika.—Matayo 24:14.
Ulakonzya na kupandulula kuti nkamboonzi nuyanda kusyomeka kuBwaami bwaLeza?
4. MaKristu bakasimpe batondeezya biyeni kuti balasyomeka kuBwaami bwaLeza?
4 Bayiminini banyika tabatoli lubazu mutwaambo twanyika tuchitika munyika mubabelekela. Mbukubede akumaKristu bananikidwe bali abulangilizi bwakuyooyendelezya aKristu kujulu. Pawulu wakalembela maKristu bananikidwe kuti: ‘Tuli bayiminini baKristu.’ (2 BaKorinto 5:20) MaKristu bananikidwe bayiminina mfulumende yaLeza. Nkinkaako, tabatoli lubazu mutwaambo twanyika eeyi. (BaFilipi 3:20) Pesi bagwasya bantu kuti bayiye atala aBwaami bwaLeza. ‘Bambelele zimwi,’ chaamba aabo bali abulangilizi bwakuyoopona munyika mpya yaLeza, bagwasilizya maKristu bananikidwe. Abalabo tabatoli lubazu mutwaambo twanyika. (Johane 10:16; Matayo 25:31-40) Zili antanganana kuti maKristu bakasimpe tabatoli lubazu mutwaambo twanyika.—Bala Isaya 2:2-4.
5. Nkaakali kamwi kaambo kapa kuti maKristu batayinki kunkondo?
5 MaKristu bakasimpe balibona kuti nimpuli iimwi abakombinyina alubo balijisini nikuba kuti bazwa muzisi zisiyene akuti bali amaponeno asiyene. (1 BaKorinto 1:10) Kuti twaya kunkondo, tunoolwana abamumpuli naakuti bakombima aabo Jesu mbaakatubuzya kuti tweelede kubayanda. (Johane 13:34, 35; 1 Johane 3:10-12) Kuyungizya waawo, Jesu wakabuzya basikwiiya bakwe kuti bayande basinkondonyina.—Matayo 5:44; 26:52.
6. Bakombi baJehova bayibona biyeni milawu yamfulumende?
6 Nikuba kuti iswe tumaKristu tatutoli lubazu mutwaambo twanyika pesi tuleezya kuba aluumuno abamwi. Muchikozyano, tuswiilila milawu yamfulumende kwiinda mukubbadala mitelo akutobelezya milawu yamuzisi mutukkala. Pesi tubikkila maanu kuti ‘zintu zyaLeza tuzipe Leza.’ (Marko 12:17; BaRoma 13:1-7; 1 BaKorinto 6:19, 20) “Zintu zyaLeza” ziswaanizya kumuyanda, kumuswiilila akumukomba. Kuti kakuyandikana, tulilipedelede kufwa kwiinda kuti tutyole mulawu waLeza.—Luka 4:8; 10:27; bala Incito 5:29; BaRoma 14:8.
TANTAMUKA “MUUYA WAANSI ANO”
7, 8. “Muuya waansi ano” niinzi, alubo upa kuti bantu bachiteenzi?
7 Kulisiyanisya aabantu beendelezegwa aSaatani chaamba kutantamuka “muuya waansi ano.” Muuya ooyu uzwa kuli Saatani, chaamba mbubayeeya bantu ambubachita alubo weendelezya bantu batakombi Jehova. MaKristu beelede kuutantamuka muuya ooyu. Pawulu wakaamba kuti, ‘muuya ngututambwide teensi muuya waansi ano pe, muuya uuzwa kuli Leza.’—1 BaKorinto 2:12; BaEfeso 2: 2, 3; langa Makani Aakumamanino 17.
8 Muuya waansi ano upa kuti bantu kabaliyanda, kabalisumpula akupapila. Ubapa kuti bayeeye kuti tabeelede kuswiilila Leza. Saatani uyanda kuti bantu bachite zintu zyoonse nzibayanda, kabatabikkili maanu kumapenzi ngibakonzya kuswaana. Uyanda kuti bantu basyome kuti kuzuzikizya “zisusi zyanyama niziba zisusi zyameso,” nzizintu ziyandikana mubuumi. (1 Johane 2:16; 1 Timoteo 6:9, 10) Dyabbulosi ulikubeleka changuzu kuti ayene bakombi baJehova akupa kuti babe amaboneno aali mbuuli aakwe.—Johane 8:44; Incito 13:10; 1 Johane 3:8.
9. Kujana muuya waansi ano watweendelezya biyeni?
9 Muuya waansi ano ulajanika koonse-koonse mbuuli muuya ngutuyoya. Muuya ooyu ulakonzya kutweendelezya kuti teetwazumanana kuutantamuka. (Bala Tusimpi 4:23.) Muuya ooyu ulakonzya kutalika kutweendelezya muzintu zibonekaanga zilikabotu, mbuuli kutobelezya zintu zichitwa abantu batakombi Jehova. (Tusimpi 13:20; 1 BaKorinto 15:33) Alubo ulakonzya kutweendelezya kuti tweebela ponogilafu, twabala makani abasiluleyo naakuti twaliswaanizya mumisobano iisumpula muuya wakuzundaana.—Langa Makani Aakumamanino 18.
10. Kujana twawutantamuka biyeni muuya waansi ano?
10 Kujana twawutantamuka biyeni muuya waansi ano? Tweelede kuswena afwiifwi aJehova akubelesya malayilile aakwe abusongo bwakwe. Tweelede kukumbila muuya usalala chiindi choonse akusungwaala mumulimu wakukambawuka. Jehova nguSinguzuzyoonse. Nkinkaako, tusyoma kuti uyootugwasya kuti tutantamuke muuya waansi ano.—1 Johane 4:4.
KUZWAATA MUNZILA IILEMEKA LEZA
11. Muuya waansi ano ulikupa kuti bantu biingi bazwaate biyeni?
11 Nzila njituzwataayo ilakonzya kutondeezya kuti tulisiyene anyika. Bantu biingi bazwaata munzila iipa kuti bamwi babe amizeezo yakoonana naakuti babonwe. Bamwi bazwaata munzila iitondeezya kuti tabaswiilili naakuti kuyanda kubonwa kuti bali amali nyingi. Alubo bamwi tababikkili maanu kunzila njibabonekaayo. Balakonzya kuba babeya. Tatweelede kuzumizya maboneno aaya aatali kabotu kuti atweendelezye munzila njituzwataayo.
Nzila njindizwataayo ipa kuti Jehova alemekwe na?
12, 13. Ngaali malayilile akonzya kutugwasya kuti tusale zyakuzwaata zilikabotu?
12 Mbutuli bakombi baJehova, tweelede kuzwaata munzila iili kabotu, yabulemu yeendelana azyiimo. Tweelede “kusama cakulibombya” kutondeezya kuti ‘tulilipedelede kuli Leza.’—1 Timoteo 2:9, 10; Juda 21.
13 Nzila njituzwataayo ilakonzya kupa kuti bantu balemeke Jehova abakombi bakwe. Tuyanda kuti zintu ‘zyoonse nzituchita zipe bulemu kwaLeza.’ (1 BaKorinto 10:31) Kuzwaata chabulemu kuswaanizya kulemeka mbubalimvwa bamwi ambubayeeya. Tweelede kuyeeya mbubalimvwa bamwi chiindi nituyanda kusala zyakuzwaata.—1 BaKorinto 4:9; 2 BaKorinto 6:3, 4; 7:1.
14. Tweelede kuzwaata biyeni chiindi nituchita milimu yachiKristu?
14 Tweelede kuzwaata biyeni chiindi nituya kumiswaangano naakuti mumulimu wakukambawuka? Tuzwaata munzila iipa kuti bantu batabikkili maanu kumulumbe ngutukambawuka na? Nzituzwaata zipa kuti bamwi babe abweeme na? Nzila njituzwataayo itondeezya kuti taakwe weelede kutubuzya zyakuchita na? (BaFilipi 4:5; 1 Petro 5:6) Nikuba kuti tuyanda kuti katuboneka kabotu pesi chipa kuti tuboneke kabotu nkutondeezya bube bwachiKristu. Bube oobu mbubo bukonzya kupa kuti tubotezye Jehova. Alubo, bube oobu butondeezya mbutubede ‘mukati kamoyo . . . , uuyandika loko mumeso aaLeza.’—1 Petro 3:3, 4.
15. Nkamboonzi Jehova natatubikkilide milawu iitondeezya mbutweelede kuzwaata?
15 Jehova tatubikkilide milawu iitondeezya nzitweelede kuzwaata anzituteelede. Pesi utupede malayilile aazwa muBbayibbele akonzya kutugwasya kuti tusale zyakuzwaata zilikabotu. (BaHebrayo 5:14) Muzintu zyoonse nzitusala, uyanda kuti tutondeezye kuti tulamuyanda abakombima. (Bala Marko 12:30, 31.) Bakombi baJehova bazwaata munzila zisiyene-siyene kweendelana amaponeno aabo. Nikuba kuti balisiyene pesi boonse bazwaata chabulemu.
MBUTWEELEDE KWIIBONA MALI
16. Zyakaambwa aJesu atala amali zisiyene biyeni ambubayibona bantu munyika? Njiili mibuzyo njitweelede kulibuzya?
16 Bakombi baJehova tabasyomi kuti kuba amali abunoti nkuko kupa kuti babotelwe, nikuba kuti Saatani uyanda kuti bantu bayeeye oobo. Bakombi baJehova basyoma majwi aaJesu aakuti: “Buumi bwamuntu tabuzwi kukuvuba kwazintu nzyajisi.” (Luka 12:15) Mali tayipi kuti bantu kababotelwa. Tayikonzyi kupa kuti tube abeenzuma balikabotu, kukkalikana mumizeezo nikuba kujana buumi butamani. Nikuba boobo, kuti tubotelwe mubuumi tuyandikana zintu zyakunyama kuti zitugwasye. Pesi Jesu wakatuyiisya kuti kuba abweenzuma bulikabotu aLeza akubikka bukombi mubusena bwakusaanguna, nkuko kukonzya kupa kuti tubotelwe. (Matayo 5:3, NW; 6:22) Ulakonzya kulibuzya kuti: ‘Mali ndiyibona mbuuli mbubayibona na bantu munyika? Ndikkala kandiyeeya atala akuyanduula mali na chiindi choonse?’—Luka 6:45; 21:34-36; 2 Johane 6.
17. Kujana wagwasikana biyeni kuti waleka kutobelezya mbubayibona mali bantu munyika?
17 Tuyoobotelwa mubuumi kuti twazumanana kukomba Jehova katutatobelezyi mbubayibona mali bantu munyika. (Matayo 11:29, 30) Tuyookkutisikana akukkalikana mumizeezo amumoyo. (Matayo 6:31, 32; BaRoma 15:13) Alubo tatukabikkili maanu kukuyanduula zintu zyiingi. (Bala 1 Timoteo 6:9, 10.) Kugwasya bamwi kuyoopa kuti tubotelwe. (Incito 20:35, NW) Alubo tuyoojana chiindi chiingi chakukkala abamumpuli zyesu. Tuyoowona ng’onzi mbotu loko.—Mukambausi 5:12.
“AMUZWATE ZILWANYO ZYOONSE”
18. Saatani uyanda kuchitaanzi?
18 Tweelede kubeleka changuzu kuti tukkale katuli abweenzuma bulikabotu aJehova nkaambo Saatani uyanda kuti bumane. Tulwana “amyuuya yabubi.” (BaEfeso 6:12) Saatani amadimoni aakwe tabayandi kuti tubotelwe akuti tukajane buumi butamani. (1 Petro 5:8) Nikuba kuti tulwana abasinkondoma balaamanguzu, Jehova uyootugwasya kuti tuzunde!
19. Lugwalo lwaBaEfeso 6:14-18 luzipandulula biyeni “zilwanyo zyoonse” zyamuKristu?
19 Chiindi, basilumamba bakali kuzwaata zilwanisyo kuchitila kuti balikwabilile munkondo. Andiswe tweelede kuzwaata “zilwanyo zyoonse” nzyatupede Jehova. (BaEfeso 6:13) Zilwanisyo eezi ziyootukwabilila. Lugwalo lwaBaEfeso 6:14-18 lulazipandulula zilwanisyo eezi. Lwaamba kuti: “Lino mbuboobo mbumweelede kwiima. Amulyaange kuzikungu lutambo lwalusinizyo akulisamika kucamba cikwabilizyo cabululami, zituta zyanu zibambwe kukusamikwa a-Makani Mabotu aaluumuno. Kwiinda zyoonse amubweze intobo yalusyomo, njiyonya njimukonzya kuzimya mimvwi yoonse iipya iifuswa kumubi. Alimwi amubweze ingoani yalufutuko, apanga lya-Muuya, nkokuti ijwi lya-Leza. Amukombe lyoonse azikombyo ankumbizyo zyoonse zyamu-Muuya.”
20. Tweelede kuchitaanzi kuti “zilwanyo zyoonse” zitukwabilile?
20 Basinkondonyina bakali kumuchisa silumamba mpatalikwabilide kuti waleka kuzwaata chimwi chilwanisyo. Kuti katuyanda kulikwabilila, tweelede kuzwaata “zilwanyo” zyoonse. Tweelede kuzizwaata chiindi choonse akuzibamba kabotu. Nkondo njitulwana aSaatani amadimoni aakwe tayikamani kusikila bakanyonyoonwe. (Ciyubunuzyo 12:17; 20:1-3) Tatweelede kulengwaana pe kulwana amizeezo itali kabotu naakuti kulwana achiimbo chibi!—1 BaKorinto 9:27.
21. Niinzi chiyootugwasya kuti tuzunde?
21 Tatukonzyi pe kumuzunda Dyabbulosi atulikke. Pesi Jehova nguwe uukonzya kutugwasya kuti tuzunde. Kukomba kuli Jehova, kubala Bbayibbele akuliswaanizya abakombima ziyoopa kuti tube alusyomo lusimide. (BaHebrayo 10:24, 25) Kuchita oobo kuyoopa kuti tukkale katusyomekede kuli Leza akuti tukwabilile lusyomo lwesu.
KKALA KULIBAMBILIDE KUPANDULULA NZUSYOMA
22, 23. (a) Njiili mibuzyo njitweelede kulibuzya iitondeezya kuti tulilibambilide kupandulula nzitusyoma? (b) Tuyooyiyaanzi muchaandaano chitobela?
22 Tweelede kukkala katulibambilide kukwabilila lusyomo lwesu chiindi choonse. (Johane 15:19) Chimwi chiindi Bakamboni baJehova bachita zintu zisiyene abamwi. Libuzye kuti: ‘Ndilakamvwisisisya na kaambo kapa kuti tusale kuchita munzila iisiyene abamwi? Ndilasyoma na kuti nzilyaamba Bbayibbele amuzike uusyomekede nzyachoonzyo? Ndilalitondeezya na kuti ndili Kamboni waJehova? (Intembauzyo 34:2; Matayo 10:32, 33) Ndilakonzya na kubuzya bamwi zintu nzindisyoma?’—Matayo 24:45; Johane 17:17; bala 1 Petro 3:15.
23 Chimwi chiindi nchuuba kuziba nchitweelede kuchita kuti tukkale katusiyene abantu bali munyika. Pesi chimwi chiindi kulakonzya kutuyumina. Saatani uyanda kutucha munzila zisiyene-siyene. Chimwi chiindi ubelesya zyakulikondelezya. Kujana twasala biyeni zyakulikondelezya zilikabotu? Tuyooyiya atala ankani eeyi muchaandaano chitobela.