September

Leza wakapa Jesu manguzu aakumaninsya mapenzi woonse aakataazya bantu. Kwiinda muzigambyo nzyaakachita Jesu, wakatondeezya kuti ulaamanguzu aakumaninsya mapenzi ngitutakonzyi pe kumaninsya. Muchikozyano, Jesu ulaamanguzu aakugwisya mapenzi aayetwa aachibi, aaswaanizya kuchiswa alufu. (Mt. 9:​1-6; Rom. 5:​12, 18, 19) Zigambyo nzyaakachita zyakatondeezya kuti ulaamanguzu aakumaninsya malwazi “aamisyobo yoonse” akubusya bafwide. (Mt. 4:23; Joh. 11:​43, 44) Alubo ulaamanguzu aakuumuzya guwo akutanda myuuya mibi. (Mk. 4:​37-39; Lk. 8:2) Zilawumbulizya kuziba kuti Jehova wakapa Mwanaakwe manguzu aakuchita zintu zyoonse eezi. Tulaachoonzyo chakuti zisyomezyo nzitwakasyomezegwa zizoozuzikizigwa nibwazooyeendelezya Bwaami bwaLeza. Zigambyo nzyaakachita Jesu naakali aanyika zitondeezya zintu nzyatazoochite naazoosaanguna kweendelezya nyika kali Mwaami waBwaami bwaLeza. w23.04 3 ¶5-7

Kuti mumbungano yanu kamuli basikupupulula biingi alubo iwe kutali kwaambwa pe kuti usandule nikuba kuti ngawatambika twiingi, ulakonzya kuyeeya kuleka. Pesi utaleki pe kusandula. Ulakonzya kulibambila nsandulo zyiingi amuswaangano umwi awumwi. Kuti teewaambwa pe kuti usandule kumasaangunino aachiiyo, ulakonzya kujana umwi mweenya wakuti usandule chiindi nimuli kuchita chiiyo eecho. Kuti kulikulibambila Chiiyo chaNgaziyakulinda, yeeya mafuka mbaanjililana amutwe wachiiyo. Kuti wachita oobo, tuzibuli pe zintu zyakwaamba kumiswaangano. Kuyungizya aalizeezi, ulakonzya kulibambila mafuka aali aanjiisyo zyamuBbayibbili ziyumu kupandulula. Nkamboonzi? Nkaambo mbantu bache batambika kuti basandule azipanzi ziliboobu. Niinzi zimwi nzukonzya kuchita kuti kutajani mweenya wakuti usandule nikuba kuti weezya kubelesya nzila eezi? Ulakonzya kwaambuula aasikuchitisya miswaangano kayitanasaanguna pe mpawo umubuzye fuka nduyanda kusandula. w23.04 21-22 ¶9-10

Josefa wakabelesya malayilile aaJehova, eezi zyakapa kuti abe mutwe wampuli uulikabotu. Kwaziindi zitatu, Josefa wakatambula malayilile aakazwa kuli Leza aakali atala ampuli yakwe. Aazyiindi zyoonse eezi wakali kufwambaana kubelesya malayilile aayo nikuba kuti zimwi ziindi kwakali kumuyumina kuchita oobo. (Mt. 1:20; 2:​13-15, 19-21) Kwiinda mukugwasigwa aaJehova, Josefa wakakwabilila Mariya akumulangania. Kweelede kuti nzyaakali kuchita Josefa zyakapa kuti Mariya amuyande loko mulumaakwe akuti amulemeke. Nibaalumi, mulakonzya kutobelezya Josefa kwiinda mukubelesya malayilile aali muBbayibbili aali atala ambumukonzya kulangania mpuli zyanu. Kuti mwatobelezya malayilile aaya, ngamulikutondeezya kuti mulabayanda banakazi banu akuti muyanda kusimya lukwatano lwanu. Umwi muchizi wakuVanuatu uuli mulukwatano kwaminyaka yiinda ku20 wakaamba kuti: “Chiindi mulumaangu natobelezya akuswiilila malayilile aazwa kuli Jehova, ndimulemeka loko. Ndilimvwa kandikwabililidwe alubo ngandili aachoonzyo chakuti usala zintu zilikabotu.” w23.05 21 ¶5

MaJuda bakali kuzoobweeda ku-Israyeli bakeelede kuba “bantu basalala” kuli Leza wabo (Dt. 7:6) Pesi eezi teezyakali kwaamba kuti takuchiyandikani pe kuti bachinche maponeno aabo kuchitila kuti babotezye Jehova. MaJuda biingi bakazyalilwa kuBbabbiloni bakali bazibilana aazintu zyakali kuchitwa nkuko. Kakuli kwayinda minyaka myiingi kuzwa maJuda kabali babweeda kuli mbabo, Mweendelezi Nehemiya wakagamba loko naakaziba kuti bana bakazyalilwa mu-Israyeli teebakali kukonzya pe kwaambuula mulaka wamaJuda. (Dt. 6:​6, 7; Neh. 13:​23, 24) Mbukunga Jwi lyaLeza lyakalembedwe muchiHebberu, bana aabo bakali kunookonzya biyeni kuyanda Jehova akumukomba mbukunga teebakali kuumvwisisisya pe mulaka ooyo? (Ezr. 10:​3, 44) Eezi zitondeezya kuti maJuda bakeelede kubeleka changuzu. Pesi kwakali kuzoobawubila kuti bazichite eezi kabali ku-Israyeli nkaambo bukombi busalala bwakali kubusilizigwa mbichaani-mbichaani.—Neh. 8:​8, 9. w23.05 15 ¶6-7

Nikuba kuti tuli aachiyandisyo alubo katukanzide kuzuzikizya zipeekezyo zyesu, pesi takubuliki zintu zitukachizya kuzizuzikizya. Muchikozyano, “zintu zitalangilwi” zilakonzya kutukachizya kuzuzikizya chipeekezyo chesu. (Muk. 9:11) Tulakonzya kuswaana buyumu-yumu bukonzya kutumana manguzu. (Tus. 24:10) Akaambo kakuti tatumaninide, tulakonzya kuchita zintu zipa kuti tukachilwe kuzuzikizya zipeekezyo zyesu. (Rom. 7:23) Chimwi chiindi ngatwalimvwa katukatede (Mt. 26:43) Niinzi zikonzya kutugwasya kuti tuzuzikizye zipeekezyo zyesu nikuba kakuli buyumu-yumu butukachizya kuti tuzizuzikizye? Kuti waswaana zilebyo tazyaambi kuti tuzookonzyi pe kuzuzikizya chipeekezyo chako. Bbayibbili lyaamba kuti tunookkala katuswaana buyumu-yumu. Alubo litondeezya kuti tulakonzya kuchizuzikizya lubo chipeekezyo chesu. Kuti wayinkilila kunembo kubelekela kuti uzuzikizye chipeekezyo chako nikuba kakuli kuyumu, nga ulikutondeezya kuti uyanda kubotezya Jehova. Jehova ulabotelwa kuti wabeleka changuzu kuti uzuzikizye chipeekezyo chako. w23.05 30 ¶14-15

Kupayona kugwasya bakwesu bachiniini kuti bakonzye kubeleka aabantu basiyene-siyene. Alubo kubagwasya kuti babe aabbajeti. (Flp. 4:​11-13) Kubweza bupayona bwakugwasilizya nintaamu iilikabotu yakuti banjile mumulimu wachiindi choonse alubo zibagwasya kuti balibambile kubweza bupayona bwachiindi choonse. Kupayona kubajulila myeenya myiingi yakuti babeleke milimu iisiyene-siyene yamulimu wachiindi choonse mbuli kubeleka kuli kuyakwa mayake aambunga akuBbeteli. Bakwesu bachiKkristu beelede kubeleka changuzu kuti beelele kuba baalu bambungano kuchitila kuti bagwasye bakwesu abachizi. Bbayibbili lyaamba kuti bakwesu bayanda kuchita mulimu ooyu ‘bayanda mulimu mubotu.’ (1 Tim. 3:1) Mukwesu usaanguna kubeleka kali mubelesi wambungano. Babelesi bambungano bagwasya baalu munzila zisiyene-siyene. Baalu ababelesi bambungano batondeezya kuti balalibombya kwiinda mukugwasya bakwesu abachizi akuba basungu mumulimu wakukambawuka. w23.12 28 ¶14-16

Mwaami Josiya wakali aaminyaka iili 16 chiindi naakasaanguna kuyanduula Jehova. Wakali kuyanda kuziba zyiingi atala aJehova akuchita kuyanda kwakwe. Nikuba oobo, chimwi chiindi zintu teezyakali kumweendela kabotu pe naakasaanguna kweendelezya. Wakeelede kwiiminina bukombi bwakasimpe chiindi bukombi bwakubeja nibwakazula muchisi chabo. Alino nzizyo nzyaakachita. Katanasisya minyaka iili 20, Josiya wakasaanguna kugwisya bukombi bwakubeja muchisi chabo. (2 Mak. 34:​1, 2) Nikuba kuti uli muniini, ulakonzya kutobelezya chikozyano chaJosiya kwiinda mukuyanduula Jehova akwiiya atala abuntu bwakwe. Kuti wachita oobo, uyoolipeda kulinguwe akubbabbatizigwa. Kulipeda kuli Jehova kukugwasya biyeni mubuumi? Luke wakabbabbatizigwa kali aaminyaka iili 14 wakati: “Kuzwa lino, ndinoobikka Jehova mubusena bwakusaanguna mubuumi bwangu alubo ndinooyezya kuchita zintu zimubotezya.” (Mk 12:30) Nchilongezyo chipati loko kuti wakanza kuchita zyakachitwa aaLuke! w23.09 11 ¶12-13

Mwaapostoli Pawulu naakalemba lugwalo oolu, mbungano yakuTesalonikka teeyakayinakkwanisya pe munyaka kayijulidwe. Bakwesu bakali kuzulwida bakali aaluzibo luche alubo kulakonzeka kuti kuli zintu nzibakatali kuchita kabotu. Nikuba oobo, bamumbungano bakeelede kubalemeka. Mbukunga mapenzi mapati abaafwiifwi, kuyandikana loko lino kuti tuswiilile malayilile ngibatupa baalu. Kulakonzeka kuti kunooli kuyumu kuti tujane malayilile kuzwa kumawofesi mapati akumawofesi aamutabi, pesi kuyanda baalu akubalemeka kuyootugwasya loko muchiindi eecho. Kufumbwa zitakachitike, atukkale katuyeeya kabotu, tutalangisisyi zintu zibi nzibachita baalu, pesi atubikkile maanu kukaambo kayandikana kakuti Jehova, kabelesya Kkristu ulikuzulwida baalumi aaba basyomeka. Mbuuli ngowani mbuyikwabilila mutwe wamusooja, bulangilizi bwalufutuko bukwabilila mizeezo yesu. Kutugwasya kubona kuti zintu zili munyika tazigwasyi pe. (Flp. 3:8) Alubo bulangilizi butugwasya kuti tukkale katubeteme. w23.06 11-12 ¶11-12

Bantu batambwa ‘aamukaintu mufuba-fuba’ beelede kulisalila zyakuchita kuti balazumina na kutambwa aawe naakuti balakaka. Kuli twaambo tuyandikana tupa kuti tutantamuke kuchita bwaamu. ‘Mukaintu mufuba-fuba’ waamba kuti: “Maanzi aakubba alalweela.” (Tus. 9:17) Niinzi chitegwa “maanzi aakubba”? Bbayibbili likozyanisya koonana kuchitwa aabantu bakwetene zili mumulawu amaanzi aakatalusya. (Tus. 5:​15-18) Bachadide zili mumulawu mbabo bazumizigwa kuti boonane alubo balabotelwa akoonana nkubachita. Eezi zilisiyene ‘amaanzi aakubba.’ “Maanzi aakubba” alakonzya kwaamba kuchita bwaamu naakuti koonana kwabantu batachadide. Bantu aabo boonana chakusisikizya mbuuli mbachita muntu uubba. “Maanzi aakubba” abonekaanga alanona kuti bantu aabo kababonaanga taakwe muntu uuzizi pe kuti nzizyo nzibachita. Ooku nkulyeena. Jehova ulazibona zyoonse zichitika. Taakwe chintu chuusisya pe cheelene aakutatambulika kuli Jehova alubo taakwe ‘kulweela’ kuliwo pe kuti katutachikwe bweenzuma bulikabotu anguwe.—1 Kor. 6:​9, 10. w23.06 22 ¶7-9

Niinzi nzukonzya kuchita kuti kubonaanga nkombyo zyako tazizwi aansi aamoyo pe naakuti tulikubotelwa pe mumulimu wakukambawuka? Utabonaanga Jehova tachikupi pe muuya uusalala. Akaambo kakuti uli aachibi, ulakonzya kulimvwa munzila iili oobu chiindi achiindi. Kuti wabona kuti tuchili musungu pe mbuli chiindi, yeeyesesya atala achikozyano chamwaapostoli Pawulu. Nikuba kuti wakali kweezya kutobelezya Jesu, pesi chimwi chiindi wakali kulimvwa katakwe chiyandisyo pe chakuchita zintu nzyaakelede kuchita. Pawulu wakakanzide kuchita zyiingi mumulimu wakukambawuka nikuba kuti chimwi chiindi takalikwe chiyandisyo pe. Munzila iikozyenie, utasali kuchita zintu kweendelana ambulimvwa. Kanza kuchita zintu zilikabotu kazitakwe ndaba kuti ulikulimvwa biyeni aachiindi eecho. Zintu nzuchita zyeelede kuzoopa kuti uchinche mbulimvwa mukuya kwachiindi.—1 Kor. 9:16. w24.03 11-12 ¶12-13

Tulakonzya kutondeezya kuti tulabayanda bakombima kwiinda mukubatambula kuti babe beenzuma. (2 Kor. 6:​11-13) Biingi besu tunjila aambungano muli bakwesu abachizi bali bakakomezegwa munzila zisiyene-siyene alubo bali aabuntu busiyene-siyene. Tulakonzya kubayanda bakwesu abachizi aaba kuti twalanga buntu bubotu mbubali aabo. Chiindi nitubona bakwesu abachizi mbuli mbababona Jehova zipa kuti tubayande. Muchiindi chamapenzi mapati, tweelede kuyoobayanda loko bakwesu abachizi. Kupenzegwa nikuzootalika, Jehova uyootukwabilila biyeni? Atubone Jehova nzyaakalayilila bakombi bakwe chiindi muunzi waBbabbiloni nwaakanyonyoonwa, wakati: “Kamuya nobantu bangu, amunjile mumaanda aanu aamukati, mulijalile. Amuyube kwakaindi kaniini buyo kusikila bukali bwiinde.” (Is. 26:20) Kubonekaanga majwi aaya ayoobeleka kulindiswe chiindi chamapenzi mapati. w23.07 6-7 ¶14-16

Tweelede kutondeezya kuti tuli bantu bamvwisisisya. Tulakonzya kulibuzya kuti: ‘Bantu bandizi kuti ndili muntu uumvwisisisya na naakuti ndili muyumu mutwe? Ndili muntu uuyanda kuti zintu zichitwe kweendelana anzila njindiyeeya kuti njiyo njizyeelede kuchitwaayo na? Naakuti ndilabaswiilila na bamwi akuzumina kuti zintu zichitwe kweendelana amaboneno aabo?’ Kuti twaba bantu bamvwisisisya, kulatuubila kuti tutobelezye chikozyano chaJehova aJesu. Kulayandikana kuti tube bantu bamvwisisisya chiindi zyiimo nizyachincha. Kuchincha ooko kulakonzya kutweetela buyumu-yumu mbututayeeyeli pe. Tulakonzya kuba aabulwazi buyanda kuti tufwambaane kusilikwa. Kubula mali akuchincha kwamfulumende ankuko kulakonzya kutweetela buyumu-yumu. (Muk. 9:11) Kulakonzya kutuyumina kuti twakumbilwa aambunga kuti tukaakubelekele kuliimwi ndawu naakuti tuchite mulimu uusiyene angutwalikuchita. Kufumbwa chiimo nchitwaswaana, tulakonzya kuzwidilila kuti twachita zintu zili 4 zitobela: (1) kutambula chiimo nchitwaswaana, (2) kuyeeya atala azintu zilikunembo kutali zintu nzitwakali kuchita chiindi, (3) kubikkila maanu kuzintu zibotu (4) akugwasya bamwi. w23.07 21-22 ¶7-8

Mupolofita Daniyele wakachili muniini chiindi bantu bakuBbabbiloni nibakamubweza kuti akabe muzike, kule akulimbabo kuJerusalema. Nikuba kuti Daniyele wakachili muniini pesi balupati-pati bakuBbabbiloni bakabona “mbwaboneka” Daniyele nkaambo taakalikwe “kampenda nokaba komwe” alubo wakali ‘aachiwa chibotu.’ Alubo bakalizi kuti Daniyele wakali wamusyobo waJuda. (1 Sam. 16:7) Akaambo katwaambo ootu, bantu bakuBbabbiloni bakasala kuti bamuyiisye kuti abelekele mung’anda yamwaami. (Dan. 1:​3, 4, 6) Jehova wakali kumuyanda Daniyele akaambo kakuti anguwe Daniyele wakali kumuyanda Jehova. Kweelede kuti Daniyele wakachili kusisya minyaka iili kuma20 chiindi Jehova naakaamba kuti Daniyele wakali mbuli Nowa aJobu nkaambo Jehova wakabona kuti Daniyele wakaliluleme mbuli baalumi aaba bakasyomeka kwaminyaka myiingi. (Matl. 5:32; 6:​9, 10; Job. 42:​16, 17; Ezk. 14:14) Alubo Jehova wakamuyanda Daniyele kwabuumi bwakwe boonse.—Dan. 10:​11, 19. w23.08 2 ¶1-2

Chiindi nuyanda kuula ng’anda, nchuyanda kusaanguna kulanga-langa zintu zyoonse kuti uzibe ng’anda njuyanda kuula kuti ilibiyeni. Eezi zilikozyenie anzitweelede kuchita chiindi nitubala Bbayibbili. Kuti walibala kuchijaana, ulakonzya kwiiya zintu ziche biyo “zyakusaanguna zili atala amakani aasalala aaLeza.” (Heb. 5:12) Mbuli mbuwayinoochita kaansinga wategwa wuule ng’anda, lipe chiindi chakulanga-langa zintu zili muBbayibbili. Imwi nzila iilikabotu yakubala Bbayibbili nkubona kuti majwi aali mukati anjililana biyeni. Yezya kumvwisisisya kasimpe kamuBbayibbili nkusyoma akubona kuti nkamboonzi nusyoma kasimpe aako. Kuti tukonzye kulimvwisisisya chakumaninina Jwi lyaLeza, tweelede kunika kukwiiya kasimpe kamuBbayibbili. Mwaapostoli Pawulu wakasungwaazya bakombinyina kuti babe basungu mukubala Jwi lyaLeza kuchitila kuti “bakonzye kubumvwisisisya chakumaninina busasa, bulamfu, bulamfu bwakuya mujulu abubbile” bwakasimpe. Eezi zyakali kuyoopa kuti “basimpe miyanda, bazyate aantalisyo” mulusyomo lwabo. (Ef. 3:​14-19.) Andiswe nzitweelede kuchita. w23.10 18 ¶1-3

Bbayibbili lilaazikozyano zimbi zyiingi zyabantu bakatondeezya moyo mulamfu. Ulakonzya kubala zikozyano zyabantu aaba chiindi nubala Bbayibbili. Muchikozyano, Davida wakananikwa kuti abe mwaami wa-Israyeli kachili muniini pesi wakeelede kulindila kwaminyaka myiingi kuti azooyendelezye kali mwaami. Simiyoni a-Ana bakali bakombi baJehova basyomeka alubo bakalindila kuti bazoobone Mesiya. (Lk. 2:​25, 36-38) Chiindi nubala atala azikozyano zyabantu aaba, jana nsandulo zyamibuzyo eeyi: Niinzi chakamugwasya kuti abe aamoyo mulamfu? Wakagwasigwa biyeni akaambo kakuba aamoyo mulamfu? Kujana ndamutobelezya biyeni? Ulakonzya kugwasigwa aazikozyano zyabantu bakatatondeezya moyo mulamfu. (1 Sam. 13:​8-14) Ulakonzya kulibuzya kuti: ‘Niinzi chakapa kuti atatondeezyi moyo mulamfu? Nziizili mpindu nzyaakajana?’ w23.08 25 ¶15

Petro wakali kusyomeka, taakwe naakazumizya chimwi chintu kuti chimukachizye kutobela Jesu. Wakatondeezya kuti wakali kusyomeka chiindi Jesu naakaamba zintu nzibakatamvwisisisya pe basikwiiya bakwe. (Joh. 6:68) Kwiinda kuti basikwiiya aabo balindile bupanduluzi naakuti bayanduule nzyaakali kweezya kwaamba Jesu, biingi bakasala kuleka kutobela Jesu pesi Petro taakaleka pe kutobela Jesu. Wakalizi kuti Jesu nguwe alikke wakali ‘aamakani aabuumi butamani.’ Jesu wakalizi kuti Petro abamwi baapostoli bakali kuzoomukaka. Nikuba oobo, Jesu wakali aalusyomo lwakuti Petro wakali kuzoobambulula akukkala kasyomeka. (Lk. 22:​31, 32) Jesu wakali kumvwisisisya kuti “moyo ulayanda pesi mubili tawukwe manguzu pe.” (Mk. 14:38) Nikuba Petro naakamusansa, Jesu taakamukaka pe Petro kuti abe mwaapostoli wakwe. Chiindi Jesu naakabusigwa, wakalibonia kuli Petro alubo kweelede Petro wakali aalikke. (Mk. 16:7; Lk. 24:34; 1 Kor. 15:5) Kulakonzeka kuti eezi zyakamusungwaazya loko Petro akaambo kazintu nzyaakali wapambanisya musule! w23.09 22 ¶9-10

Leza ulazilekelela naakuti kuzivumba zibi zyabaabo basyoma mulinguwe. Ulabalekelela chakumaninina alubo ngatachiziyeeyi lubo pe zibi zyabo. (Int. 32:​1, 2) Ubona bantu aabo kuti tabakwe mulandu pe akuti baliluleme akaambo kalusyomo lwabo. Nikuba kuti Abbrahamu, Davida abamwi bakombi baLeza bakaambwa kuti baliluleme, pesi bakachili aachibi. Pesi akaambo kalusyomo lwabo, Leza wakababona kabatakwe kabata, ikapati naakabeezyanisya aabantu bakatalikwe bweenzinyina bulikabotu anguwe. (Ef. 2:12) Mbuli mbaakazibikka aantanganana mwaapostoli Pawulu mulugwalo lwakwe, lusyomo lupa kuti tube abweenzinyina busimide aLeza. Eezi nzizyo zyakachitika kuli Abbrahamu aDavida alubo nzizyo zikonzya kuchitika akulindiswe. w23.12 3 ¶6-7

Mazubaano, maKkristu boonse bali aachilongezyo chakupa zipayizyo kuli Jehova kababelesya chiindi chabo, manguzu aabo azintu nzibalaazyo kuti basumpule mulimu waBwaami bwaLeza. Tulakonzya kutondeezya kuti tuchibona kachiyandikana chilongezyo chakukomba Jehova kwiinda mukupa zipayizyo zyesu zibotu. Mwaapostoli Pawulu wakaamba zintu nzitweelede kukkala katuchita chiindi nitubelekela Jehova. (Heb. 10:​22-25) Zintu eezi ziswaanizya kukomba kuli Jehova, kukambawuka, kunjila miswaangano yambungano abamwi akusungwaazyania “kapati mbuli [mbutubwene] kuti buzuba bwaswena aafwiifwi.” Kumamanino aalugwalo lwaChiyubunuzyo, kwaziindi zibili, ngilozi yaJehova yakaamba majwi aakuti: “Komba Leza!” (Chi. 19:10; 22:9) Atukanze kutakaluba kasimpe kanikide kali atala atempele lyaJehova lyakumuuya pati achilongezyo nchitulaacho chakukomba Leza wesu mupati. w23.10 29 ¶17-18

Toonse “tuyanda kwiinkilila kunembo katuyandana.” (1 Joh. 4:7) Nikuba oobo, kulayandikana kuti tukkale katuyeeya nchenjezyo yaJesu yakuti, “luyando lwabantu biingi luzootontola.” (Mt. 24:12) Jesu taakali kwaamba kuti luyando lwabasikwiiya bakwe biingi lwakali kuyootontola. Pesi tweelede kukkala katuyeeya nchenjezyo eeyi kuchitila kuti tutapambanisigwi aabantu bali munyika eeyi mbi batakwe luyando. Katuchili amuzeezo ooyu, atulange-lange mubuzyo uuyandikana wakuti: Niinzi chikonzya kutugwasya kuti tuzibe kuti luyando ndutulaalo abakombima luchisimide na? Imwi nzila iikonzya kutugwasya kuti tuzibe kuti luyando lwesu abakombima luchisimide na, nkulangala-langa mbutuchita muzyiimo zisiyene-siyene mubuumi. (2 Kor. 8:8) Chimwi chiimo chili oobo chakaambwa aamwaapostoli Petro, wakati: “Kwiinda zintu zyoonse, amuyandane loko, nkaambo luyando luvumba zibi zyiingi.” (1 Pet. 4:8) Chiindi nitubona zintu nzibapambanisya bamwi akutamaninina kwabo kulakonzya kutugwasya kubona kuti luyando lwesu ambabo luchisimide na. w23.11 10-11 ¶12-13

Tatukonzyi pe kwaamba kuti tulawuswiilila mulawu waJesu wakuti tuyandane kuti katusaluula bantu bakutondeezya luyando mumbungano. Nichoonzyo kuti tulakonzya kumvwanana loko abamwi kwiinda mbutuchita kuli bamwi mbuli mbaakachita Jesu. (Joh. 13:23; 20:2) Pesi Petro ulikutuyeezya kuti tubeleke changuzu kuti tutondeezye bakwesu abachizi boonse ‘luyando lwabuzyalwama’ nkaambo bali aakati kampuli yesu. (1 Pet. 2:17) Petro wakatusungwaazya kuti ‘tuyandane loko kazizwa aansi aamoyo.’ (1 Pet. 1:22) Mulugwalo oolu, mabala aakuti ‘kuyandana loko’ aswaanizya kuyanda bamwi nikuba kakuli kuyumu kuchita oobo. Muchikozyano, niinzi nzukonzya kuchita kuti mukombinyokwe wakunyemya naakuti wakuchitila zintu zikuchisa loko? Zili mulindiswe biya kuti tuyande kubweedezya kutali kutondeezya luyando. Pesi Petro wakayiya kuzwa kuli Jesu kuti kubweedezya takumubotezyi pe Leza. (Joh. 18:​10, 11) Petro wakalemba kuti: “Mutabweedezyi chibi kuchibi naakuti kutukila akutukila. Pesi amubweedezye kwiinda mukulongezya.” (1 Pet. 3:9) Kuti katubayanda loko bamwi, tulabafwida luzyalo alubo tulabajata munzila iilikabotu nibaba aabo bakatunyemya. w23.09 28-29 ¶9-11

Zilatugambya kubona nzila njibakomenaayo bana. Nga kubonekaanga zilichita biya azilikke kuti bafwambaane kukomena. Nikuba oobo, kuba maKkristu bakomena mubukombi takulichitikili biya pe akulikke, pesi kuli nzitweelede kuchita. (1 Kor. 13:11; Heb. 6:1) Kuti tube maKkristu basimide mubukombi, tweelede kuba aabweenzuma busimide aJehova. Alubo tweelede kugwasigwa aamuuya uusalala chiindi nitubelekela kuba aabuntu mbwaayanda Leza, nitwiiya iimwi milimu yamaboko anitulibambila kuzoochita iimwi milimu muchiindi chilikunembo. (Tus. 1:5) Jehova naakalenga bantu, wakalenga mwaalumi amwanakazi. (Matl. 1:27) Nikuba kuti nkuuba kuziba kuti ooyu mwaalumi naakuti mwanakazi pesi kuli mpubasiyene lubo. Muchikozyano, Jehova wakapa baalumi milimu njibeelede kuchita alubo wakapa banakazi milimu njibeelede kuchita, nkinkaako, boonse beelede kuba aabuntu aluzibo lubagwasya kuti bakonzye kuchita milimu yabo.—Matl. 2:18. w23.12 18 ¶1-2

Jesu wakali kuyanda na kuti bamwi babelesye zina lyaWisi? Iiyi, wakali kuyanda. Kulakonzeka kuti bapati bamuzikombelo bamuchiindi eecho bakali kwaamba kuti nkutalemeka kuti bantu bayita zina lyaLeza, pesi Jesu taakwe naakazumizya muzeezo ooyu uutazwi muMagwalo kuti umukachizye kubelesya zina lyaWisi. Atubone nzyaakachita Jesu chiindi naakaponia mwaalumi wakali aadimoni wamuchilawu chaGerasa. Bantu bamuchilawu eechi bakayoowa alubo bakakombelezya Jesu kuti ayende, nkinkaako, Jesu wakazwa muchilawu eecho. (Mk. 5:​16, 17) Nikuba oobo, Jesu wakali kuyanda kuti bantu bamuchilawu eechi balizibe zina lyaJehova. Nkinkaako, wakabuzya mwaalumi ooyo ngwaakaponia kuti abuzye bantu atala anzyaakamuchitila Jehova kutali zintu nzyaakali wachita Jesu. (Mk. 5: 19) Nikuba mazubaano, Jesu uyanda kuti tubuzye bantu munyika yoonse zina lyaWisi! (Mat. 24:14; 28:20) Kuti twachita oobo, tulamubotezya Mwaami wesu Jesu. w24.02 10 ¶10

Tuli aachilongezyo chipati chakuba mumbunga yaJehova muziindi eezino ziyumu zyakumazuba aakumamanino. Nikuba kuti nyika eeyi ilikwiindilila kubija, pesi Jehova utupede bakwesu abachizi kuti batugwasye. (Int. 133:1) Ulatugwasya kuti tumvwanane loko akuti tubotelwe mumpuli eeyi. (Ef. 5:33–6:1) Alubo Jehova utupa busongo kuchitila kuti tube aaluumuno mumizeezo. Tweelede kubeleka changuzu kuti twiinkilile kunembo kubelekela Jehova katusyomeka. Nkamboonzi? Nkaambo chimwi chiindi tulakonzya kunyema akaambo kakupambanisya nkubachita bamwi. Alubo tulakonzya kukachilwa kulisimya akaambo kakupambanisya nkutuchita kapati kuti twayindulula chintu chimwi nchitwakapambanisizye. Kulayandikana kuti tukakatile mumulimu waJehova chiindi (1) umwi mukombima naatunyemya, (2) muntu ngutukwetenaawe naachita zintu zitumana manguzu, (3) anitwamana manguzu akaambo kazintu nzitunga twapambanisya. w24.03 14 ¶1-2

Chiindi achiindi, unoomvwa zintu zyakachitikila bakwesu abachizi bakachita zyiingi mumulimu waJehova. Amwi bakanjila Chikolo chaBakambawusi baBwaami naakuti bakalongela kubusena buyanda basikupupulula biingi. Kuti anduwe walibikkila chipeekezyo chili oobu, yezya kuchizuzikizya. Bakombi baJehova bali aachiyandisyo chakuyungizya mulimu wabo nibabelekela Jehova. (Mil. 16:9) Ani kuti kutakonzyi lino kuti uchite zintu eezi? Utabonaanga tuyandikani loko pe kuli Jehova mbuli bamwi bachita mulimu ooyu. Chiyandikana nchakuti wiinkilile kunembo kuli kulisimya. (Mt. 10:22) Utalubi kuti upa Jehova nzukonzya kuchita kweendelana azyiimo zyako. Eeyi niinzila iiyandikana loko iikonzya kukugwasya kuti wiinkilile kunembo kutobela Jesu chiindi nwaabbabbatizigwa.—Int. 26:1. w24.03 10 ¶11

Taateesu wakujulu Jehova utusyomezya kuti ulatulekelela kuti twasanduka. (Int. 86:5) Nkinkaako, kuti twawusa chachoonzyo akaambo kazibi nzitwakachita, tulakonzya kusyoma kuti nzyaakaamba Jehova nzyachoonzyo akuti wakatulekelela. Tweelede kuyeeya kuti Jehova teemuyumu pe, ulamvwisisisya. Talangilili kuti tuchite zintu nzitutakonzyi pe. Uzibona kaziyandikana nzituchita kuti kakuli twabeleka changuzu kuti tumuchitile zintu eezyo. Yeeyesesya atala azikozyano zili muBbayibbili zyabantu bakabelekela Jehova amoyo woonse. Ulakonzya kuyeeyesesya atala amwaapostoli Pawulu. Pawulu wakabelekela Jehova kwaminyaka myiingi, wakali kweenda misinzo milamfu kajula mbungano. Pesi zyiimo nizyakachincha, taakachili kukonzya pe kuchita zyiingi mumulimu wakukambawuka mbuli mbaakali kuchita chiindi. Eezyi zyaamba kuti taakachili kutambulika na kuli Leza? Teembuzyaamba pe. Wakayinkilila kunembo kupa Jehova zintu nzyaakali kukonzya kuchita alubo Jehova wakamulongezya. (Mil. 28:​30, 31) Andiswe zintu nzitupa Jehova zilakonzya kuchincha chimwi chiindi akaambo kazyiimo. Pesi chintu chiyandikana loko kuli Jehova, makanze aapa kuti tuchite zintu eezyo. w24.03 27 ¶7, 9

Jesu wakasiila basikwiiya bakwe chikozyano chakutobelezya kwiinda mukukomba kuli Jehova. Naakali kuchita mulimu wakwe aanyika, wakali kukomba kwaziindi zyiingi. Wakali kubikka chiindi aambali chakuti akombe akaambo kakuti wakali kukkala kajisikini alubo wakali kukkala kali aakati kabantu biingi loko. (Mk. 6:​31, 45, 46) Wakali kufuma kuti ajane chiindi chakukomba kali aalikke. Chimwi chiindi, wakakomba busiku boonse naakali kuyanda kusala chintu chiyandikana loko. (Lk. 6:​12, 13) Alubo Jesu wakakomba kwaziindi zyiingi mubusiku katanafwa kayanda kuti amaninsye mulimu wakwe kasyomeka wakali muyumu loko. (Mt. 26:​39, 42, 44) Chikozyano chaJesu chituyiisya kuti nikuba kuti tujisikini zili biyeni, pesi tweelede kujana chiindi chakukomba. Katutobelezya Jesu, andiswe tulakonzya kubikka aambali chiindi chakukomba, tulakonzya kufuma kuseeni naakuti kunonoka kulala kuchitila kuti tujane chiindi chakukomba. Kuti twachita oobo, nga tutondeezya kuti tulamulumba Jehova akaambo kakutupa chipo eechi chibotu loko. w23.05 3 ¶4-5

Bbala lyakuti “lwakatilwa” lujanina mulugwalo lwabuzuba bwasunu, kweendelana abbuku lipandulula Bbayibbili, lili aamuzeezo wakuti luyando “lwakatilwa mulindiswe kalweenda mbuli kalonga.” Majwi aaya atondeezya luyando lupati Jehova ndwabatondeezya maKkristu bananikidwe. MaKkristu bananikidwe balizi kuti “bayandwa aaLeza.” (Jud. 1). Mwaapostoli Johane wakatondeezya mbubalimvwa maKkristu bananikidwe, wakati: “Amubone mbululi lupati luyando Taata ndwaakatutondeezya, kuti twiitwe kuti tuli bana baLeza!” (1 Joh. 3:1) Eezi zyaamba kuti luyando lwaJehova lumanina kumaKkristu bananikidwe kupela na? Peepe, Jehova ulatuyanda toonse. Niinzi chintu chipati chipa kuti tube aachoonzyo chakuti Jehova ulatuyanda toonse? Nchinunuzyo. Kwiinda mukutupa chinunuzyo, Jehova wakatondeezya kuti ulatuyanda toonse kwiinda zikonzya kuchitwa aawumwi muntu.—Joh. 3:16; Rom. 5:8. w24.01 28 ¶9-10

Lugwalo luli ajulu lutondeezya chakagwasya Davida kuti azunde kuyoowa. Nikuba kuti buumi bwakwe bwakali mungoozi, wakayeeyesesya atala azintu Jehova nzyaakali kuzoomuchitila kunembo. Davida wakalizi kuti Jehova wakali kuzoomugwasya aachiindi cheelede. Kwiinda zyoonse, Jehova wakaamba kuti Davida nguwe wakali kuzooba mwaami wama-Israyeli uutobela. (1 Sam. 16:​1, 13) Davida wakali kubona zisyomezyo zyaJehova mbuli kuti zyazuzikizigwa kale. Jehova wakakusyomezyaanzi? Tatulangilili kuti Jehova atukwabilile kumapenzi woonse ngituswaana. Nikuba oobo, kufumbwa masunko ngituswaana munyika eeyi yeendelezegwa aaSaatani, Jehova uzoowagwisya munyika mpya. (Is. 25:​7-9) Mulengi wesu uli aamanguzu aakubusya bafwide, aakutuponia akugwisya bantu boonse batukazya.—1 Joh. 4:4. w24.01 6 ¶12-13

Yeeyesesya atala akuti nkamboonzi nwakalipeda akubbabbatizigwa. Wakabweza ntaamu eezi akaambo kakuti wakali kuyanda kuba kubbazu lyaJehova. Yeeya atala azintu zyakakugwasya kuti ube aachoonzyo chakuti wajana kasimpe. Wakajana luzibo lwakasimpe atala aJehova alubo wakasaanguna kumuyanda akumulemeka akaambo kakuti nguTaateesu wakujulu. Wakaba aalusyomo alubo nzwaakayiya zyakapa kuti usanduke. Moyo wako wakapa kuti utantamuke michito mibi akuti upone kweendelana akuyanda kwaLeza. Wakaangunuka chiindi nwaakaziba kuti Leza wakakulekelela. (Int. 32:2) Wakasaanguna kunjila miswaangano akubuzya bamwi atala azintu nzwaakayiya. Akaambo kakuti wakalipeda akubbabbatizigwa, lino ulikweendela munzila iitola kubuumi alubo ukanzide kuzumanana kweendela mulinjiyo. (Mt. 7:​13, 14) atwiimikile nji tukakatile kukomba Jehova alubo tutasunzuki chiindi nituswiilila malayilile aakwe. w23.07 17 ¶14; 19 ¶19

Kuyeeyesesya atala ankombyo yako yakulipeda kuli Jehova kukugwasya kuti utantamuke kufumbwa sunko. Muchikozyano, uyoochita zintu zitondeezya kuti ulamuyanda na muntu uuli mulukwatano kale? Peepe. Wakasyomezya Jehova kuti tuzoochiti zintu zili oobu. Nkinkaako, kuti twaalekela mizeezo iitali kabotu kuti isimpe miyanda muli nduwe, kuyookuubila kuti uyigwisye kuti yakusikila. ‘Uyooleya’ “munzila yababi.” (Tus. 4:​14, 15) Kuyeeyesesya atala achikozyano chaJesu kulakugwasya. Jesu wakakanzide kuchita zintu zibotezya Wisi. Mbuli Jesu, uyoofwambaana kutantamuka zintu zitamubotezyi pe Leza. (Mt. 4:10; Joh. 8:29) Masunko akupa mweenya wakuti utondeezye kuti ukanzide “kwiinkilila kunembo kutobela” Jesu. Chiindi nuchita oobo, baachoonzyo chakuti Jehova ulakugwasya. w24.03 9-10 ¶8-10