“Lino Ndaabuyanda Mulimu Wakukambawuka”

TEENDAKACHILI KUBOTELWA PE

Nindakali ndaamba kusisya minyaka iili 13 bweenzuma bwangu aJehova bwakali kuyabumana. Bantu mbindakali kwiiyaabo kuchikolo bakali kubonekaanga balabotelwa andime ndakali kuyanda kuba mbuli mbabo. Ndakali kubonaanga milawu njindakali kupegwa aabazyali bangu amilawu yaJehova yakali kundidyaaminina. Alubo ndakali kubonaanga kukomba Jehova nkuyumu. Nikuba kuti ndakalizi kuti Jehova mpali pesi ndakali kulimvwa kuti tandichisimide pe mubukombi.

Teendakali kuyanda pe kuba sikupupulula uutachichiti kabotu mubukombi pesi nzindakali ndaabuchita zyakali zyakwiinzya mulawu luzutu. Ndakali kwiinka mumulimu wakukambawuka kanditalibambilide pe, eezi zyakali kupa kuti kundiyumine kukambawukila bantu. Mulimu wakukambawuka teewakachili kundinoneezya pe alubo teendakachili kuuyanda pe. Ndakalibuzya kuti, ‘Bamwi bazikonzya biyeni kakuli mulimu ooyu tunoneezyi pe alubo muyumu?’

Nindakasisya minyaka iili 17 ndakali ndaabuyanda kulyiiminina. Nkinkaako, ndakazwa aang’anda mpawo ndakaya kuAustralia. Zyakabachisa loko bazyali bangu chiindi nindakazwa aang’anda. Bakali kukataazikana kuti ndakali kuyoozumanana na kuchita zintu zyabukombi.

Nindakasika kuAustralia, ndakayinkilila kunembo kutachita kabotu muzintu zyabukombi. Teendakachili kunjila pe miswaangano chiindi choonse. Ndakasaanguna kumvwanana abachikula bakali kuchita mbuli mbundakali kuchita. Nitwakali kuyeeya kwiinka kumiswaangano, twakali kwiinka pesi buzuba butobela twakali kuya kumabbawa kukunywa bukande akuzyana. Kuti ndayeeya nzindakali kuchita chiindi, ngandabona kuti ndakali kwaandila tusulwe tubili.

CHIIYO NCHINDAKATALI KULANGILILA

Minyaka iibili yakatobela, ndakaswaanana aawumwi muchizi wakandigwasya kuti ndiyeeyesesye atala abuumi bwangu. Pesi nzyaakali kuchita muchizi ooyu taakali kuzibona pe kuti wakali kundigwasya. Ndakali kukkala aabamwi bachizi bali 4. Twakatamba mulangizi wabbazu amwanakazi wakwe Tamara kuti bazookkale aandiswe kwamviki. Mulangizi wabbazu naakali kuchita zintu zyambungano, twakali kujana chiindi chakwaambuula aamwanakazi wakwe. Ndakali kubotelwa loko. Tamara wakali kulibombya alubo wakali waangunukide. Zyakali kundigambya kuti muntu uusimide oobu mubukombi nga ulajana chiindi chakuseka aandiswe.

Tamara wakali kukayanda kasimpe alubo wakali kuuyanda mulimu wakukambawuka. Nkinkaako, chiyandisyo nchakalaacho atala azintu zyabukombi zyakatugwasya andiswe. Wakali kubelekela Jehova amoyo woonse pesi ime teendakali kubotelwa pe nkaambo ndakali kuchita zyakwiinzya mulawu luzutu. Tamara wakali aamaboneno aalikabotu alubo wakali kubotelwa. Eezi zyakapa kuti andime ndililange-lange. Chikozyano chakwe chilikabotu chakapa kuti ndiyeeyesesye atala akasimpe kayandikana kakuti: Jehova uyanda kuti tumubelekele “cakukondwa” alubo ‘kumwi katoongolola cakukondwa.’—Int. 100:2.

NDAKASAANGUNA KUUYANDA LUBO MULIMU WAKUKAMBAWUKA

Ndakali kuyanda kubotelwa mbuli Tamara, pesi kuti ndikonzye kubotelwa ndakeelede kuchincha maponeno aangu. Ndakatalika kuchincha mbichaani-mbichaani pesi zyakanditolela chiindi. Ndakasaanguna kulibambila kanditanayinka mumulimu wakukambawuka alubo ndakali kubweza bupayona bwakugwasilizya aawo awaawo. Eezi zyakandigwasya kuti nditayoowi akuti ndibe aachibindi. Kukkala kandibelesya Bbayibbele mumulimu wakukambawuka kwakapa kuti ndibotelwe loko. Kuzwa waawo, ndakabweza bupayona bwakugwasilizya mweezi amweezi.

Ndakasaanguna kumvwanana aabakombima bali aaminyaka iisiyene-siyene, bakali kuyanda zintu zyabukombi alubo bakali kubotelwa kubelekela Jehova. Chikozyano chabo chilikabotu chakandigwasya kuti ndizibe zintu nzindeelede kubikka mubusena bwakusaanguna akuti ndibale Bbayibbele buzuba abuzuba. Mulimu wakukambawuka wakali wabundinoneezya loko alubo muchiindi chifwiifwi biyo ndakabweza bupayona bwachiindi choonse. Ndakasaanguna kubotelwa mubuumi alubo ndakali kulimvwa kandaangunukide kuba aamwi abakwesu abachizi.

NDAKAJANA MUNTU WAKUPAYONA AAWE KWABUUMI BWANGU BOONSE

Munyaka wakatobela ndakabonana aaAlex. Alex muntu uulikabotu, uuyanda Jehova amulimu wakukambawuka. Wakali mubelesi uubelekela alubo wakali waba aaminyaka iili 6 kali payona. Wakagwasilizya kwamyeezi iili 8 kubusena kwakali kuyanda basikupupulula biingi kuMalawi. Naakali kuMalawi wakakuswaanana aaMamishinali bakamusungwaazya kuti ayinkilile kunembo kubikka zintu zyabukombi mubusena bwakusaanguna.

Mu2003 ime aAlex twakachada alubo twakazumanana katuli mumulimu wachiindi choonse. Twakayiya zyiingi loko mumulimu ooyu alubo Jehova wakatulongezya munzila zisiyene-siyene.

JEHOVA WAKAYINKILILA KUNEMBO KUTULONGEZYA

Mu2009 twakakumbilwa kuti tukabelekele kuchisi chiniini chitegwa Timor-Leste chijanika kutusuwa twakuIndonesian. Toonse twakagamba, twakabotelwa kumwi twakali kuyoowa. Myeezi iili 5 yakatobela twakazooyinka kudolopo pati lili muTimor-Leste litegwa Dili.

Kulongela kuTimor-Leste kwakapa kuti tuchinche zintu zyiingi mubuumi bwesu. Twakeelede kuzibilana aachiyanza chankuko, mulaka ngubaambuula, chakulya chabo amaponeno aabo. Mumulimu wakukambawuka twakali kuswaanana aabantu bakali kufwaba, bakatayiide abakali kudyaamininwa. Alubo bamwi bakali kuswaanana aamapenzi aakaambo kankondo.a

Mulimu wakukambawuka wakali kunoneezya. Muchikozyano, ndakaswaanana aamusimbi wakali aaminyaka iili 13 uutegwa Maria.b Maria wakali kukkala kakataazikene. Bayina bakali bafwa minyaka miche yayinda alubo taakali kujana chiindi chakuba aamwi awisi nkaambo teebakali kukkala aamwi pe. Maria taakazizi pe nzyaakali kuyanda kuchita mubuumi. Ndichiyeeyede limwi zuba wakalila naakali kundibuzya zyakali mumoyo wakwe. Nikuba boobo, teendakali kuzimvwa pe nzyaakali kwaamba akaambo kakuti mulaka wakwe teendakalinawuziba kabotu pe. Ndakakomba kuli Jehova kandikumbila kuti andigwasye kuti ndikonzye kumusungwaazya Maria. Kuzwa waawo, ndakazoobala magwalo aakumusungwaazya. Minyaka miche yakatobela kasimpe kakagwasya Maria kuti achinche buumi bwakwe. Wakabbabbatizigwa alubo lino uli aabantu mbayiyaabo Bbayibbele. Lino Maria uli aakati kampuli yabakombi baJehova alubo ulimvwa kayandwa.

Mulimu wakukambawuka ulikwiinkilila kunembo kuTimor-Leste. Nikuba kuti basikupupulula biingi bakabbabbatizigwa minyaka miche yayinda pesi bamwi babeleka kabali mapayona, babelesi babelekela naakuti baalu. Bamwi babeleka kuwofesi yabusanduluzi balikugwasilizya kusandulula mabbuku aBbayibbele mumilaka yankuko. Ndilabotelwa kubabona kabali kwiimba kumiswaangano, kubabona mbubali kumweta-mweta ambubali kwiinkilila kunembo muzintu zyabukombi.

TEENDAKALI KUYEEYA PE KUTI NDIZOOPONA BUUMI BULIKABOTU BULI BOOBU

Buumi mbutwakali kupona kuTimor-Leste bwakasiyene kule loko ambutwakali kupona kuAustralia. Kazili ziyumu kazili boobu ndakali kubotelwa abuumi mbutwakali kupona kuTimor-Leste. Chimwi chiindi twakali kugada kkombi alubo yakali kunoonga ilizwide pamu. Mukkombi oomo mwakali kunoonga muli baswi bayumu achisyu chakali kuulwa kuzintoolo. Amwi mazuba twakali kwiiya aabantu Bbayibbele mutwaanda tuniini twakali kupya. Mutwaanda oomo aansi kwakazwide doti mpawo nkuku zyakali kunjila mumoomo. Nikuba kuti ndakali kuswaanana aabuyumu-yumu boonse oobu pesi ndakali kubotelwa.

Kuti ndayeeya zyakachitika mubuumi bwangu, ndilabalumba bazyali bangu akaambo kakundiyiisya atala anzila zyaJehova akundigwasilizya nikuba chiindi nindakatachili kuchita kabotu muzintu zyabukombi. Lugwalo lwa Tusimpi 22:6 lwakazuzikizigwa kulindime. Bazyali bangu balabotelwa kutubona ime aAlex katuli kubelekela Jehova. Mu2016 twakasaanguna kubeleka mumulimu wakweendeenda muchilawu chakuAustralisia.

Zilandiyumina kuti ndizumine kuti aali chimwi chiindi mulimu wakukambawuka teewakachili kundinoneezya pe nkaambo lino ndaabuyanda. Ndakabona kuti kufumbwa zyiimo nzitukonzya kuswaana mubuumi pesi kubotelwa kwachoonzyo tulakujana kuti katubelekela Jehova amoyo woonse. Ime aAlex twaba aaminyaka iili 18 katulikubotelwa kubelekela Jehova. Lino ndabwaamvwisisisya majwi aasintembawuzyo Davida ngaakali kubuzya Jehova kuti: “Aabo boonse bayuba mulinduwe bayookondwa; banoosekelela lyoonse. . . . Alimwi aabo bayanda zina lyako bayookondwa mulinduwe.”—Int. 5:11.